ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ ပခုက္ကူခရိုင်အတွင်းရှိ ပေါက်မြို့နယ်သည် စိုက်ပျိုးရေးကို အခြေပြု၍ သီးနှံမျိုးစုံ စိုက်ပျိုးရာတွင် ကုလားပဲသီးနှံကိုလည်း နှစ်စဉ်အဓိကသီးနှံအဖြစ်ထားပြီး စိုက်ပျိုး လျက်ရှိသည်။ ကြက်သွန်ခင်း၊ စပါးခင်းကျွတ်များတွင် အများဆုံးစိုက်ပျိုးပြီး နှစ်စဉ် စိုက်ဧက (၃၅၀၀)ခန့် စိုက်ပျိုးကြောင်း၊ ယခုနှစ်တွင် နယ်မြေအခြေအနေအရ စိုက်ဧကအနည်းငယ် လျော့နည်း သွားကြောင်း၊ စိုက်ပျိုးရာတွင် ကုလားပဲလုံးကြီးဖြူမျိုးကို အများဆုံးစိုက်ပျိုးကြောင်း၊ အောက်တိုဘာ လတွင် စတင်စိုက်ပျိုးပြီး ဖေဖော်ဝါရီလတွင် သီးနှံရိတ်သိမ်းကြောင်း သိရှိရသည်။

          ကုလားပဲသီးနှံ တစ်ဧကစိုက်ပျိုးထွက်ရှိမှုအနေဖြင့် တစ်ဧကလျှင် မျိုးစေ့(၂)တင်းခန့် ကုန်ကျပြီး အထွက်တင်းမှာ (၁၂-၁၅)ထိထွက်ရှိကြောင်း၊ ဒေသအခြေအနေအရ စိုက်ခင်းအတွင်း သွင်းအားစုများ ဝယ်ယူသုံးစွဲနိုင်မှုမရှိခြင်းနှင့် စက်ဆီဈေးနှုန်းမြင့်၍ ရေသွင်းစိုက်ပျိုးနိုင်ခြင်း မရှိခြင်းကြောင့် သီးနှံ အထွက်နည်းကြောင်း၊ ကုန်ကျစရိတ်မှာ ကျပ်(၅)သိန်းခန့် ကုန်ကျကြောင်း၊ ယခုနှစ်တွင် ပြည်တွင်းပဲ မျိုးစုံဈေးကွက် ကျဆင်းခြင်းကြောင့် ဒေသတွင်းကုလားပဲ ဈေးနှုန်း ဈေးကွက်မှာလည်းကျဆင်းပြီး ဒေသ ပေါက်ဈေး ကုလားပဲလုံးဖြူ တစ်တင်းလျှင် ကျပ်(၇၈၀၀၀)ဖြင့် ရောင်းချရ၍ဝင်ငွေမှာ ကျပ်(၁၁၇၀၀၀၀) ရရှိ၍ အကျိုးအမြတ်အနေဖြင့် ကျပ် (၆၇၀၀၀၀)ခန့် ရရှိကြောင်း၊ ကုလားပဲသီးနှံသည် စိုက်ပျိုးရလွယ်ကူပြီး ဈေးကွက်ခိုင်မာမှုရှိ၍ စိုက်တောင်သူများမှ နှစ်စဉ်မပြတ် စိုက်ပျိုးကြောင်း ဒေသခံ တောင်သူမှ တဆင့်သိရှိရပါသည်။

DOCA(မကွေး)

      မန္တလေးတိုင်းဒေသကြီး၊ကျောက်ဆည်ခရိုင်တွင် ၂၀၂၃-၂၀၂၄ဘဏ္ဍာနှစ်အတွင်း မိုးနှောင်း ချည်မျှင်ရှည်ဝါစိုက်ဧကအနေဖြင့် ကျောက်ဆည်မြို့နယ်တွင်(၁၀၇၆၇)ဧက ၊ စဉ့်ကိုင်မြို့နယ်တွင် (၇၈၉၇)ဧက ၊ မြစ်သားမြို့နယ်တွင်(၄၃၅၄)ဧက ၊ စုစုပေါင်း(၂၃၀၁၈)ဧက စိုက်ပျိုးထားရှိပြီး ယခု လက်ရှိအချိန်ထိ(၄၃၀၀)ဧကရိတ်သိမ်းပြီးစီးပြီဖြစ်ကြောင်း၊ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏စာရင်းများအရ သိရှိရပါသည်။ ဝါစိုက်ပျိုးမှု ကုန်ကျစရိတ်အနေဖြင့် မျိုး ၊သွင်းအားစု၊ လုပ်သားခအပါအဝင်စုစုပေါင်း(၃၀၀၀၀၀/-)ကျပ်ခန့်ကုန်ကျကြောင်း ၊ အထွက်နှုန်းအနေဖြင့်  ဝါ (၁)ဧကလျှင်ပိဿာ(၇၀၀-၈၅၀)အထိ ထွက်ရှိကြောင်း၊ဝါစျေးနှုန်းအနေဖြင့် ယခင် ဝါတစ်ပိဿာလျှင် (၃၃၀၀/-)ကျပ်၊ ဂွမ်းတစ်ပိဿာလျှင်(၇၃၀၀/-)ကျပ်၊ ဝါစေ့တစ်ပိဿာလျှင်(၁၄၀၀/-)ကျပ်စျေးနှုန်း များရှိခဲ့ပြီး ယခုလက်ရှိပေါက်စျေးအနေဖြင့် ဝါတစ်ပိဿာလျှင် (၃၁၀၀/-)ကျပ်၊ ဂွမ်းတစ်ပိဿာလျှင် (၆၀၀၀/-)ကျပ် ၊ ဝါစေ့တစ်ပိဿာလျှင်(၁၂၀၀/-)ကျပ်စျေးနှုန်းများဖြင့် ရောင်းဝယ်လျှက်ရှိပြီး နောက်ကျသောဝါများမှာ အရည်အသွေးညံ့သောကြောင့် စျေးကောင်းမရရှိကြောင်း၊ စိုက်ပျိုးစရိတ် နှုတ်ပြီးပါက(၁၅၀၀၀၀၀/-)ကျပ်ဝန်းကျင်ခန့်မြတ်ကြောင်း၊ ဝါအများဆုံးစိုက်ပျိုးသော ဒိုင်းကျေးရွာမှတောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

      မန္တလေးတိုင်းဒေသကြီး၊ကျောက်ဆည်ခရိုင်တွင် စိုက်ပျိုးရေးကိုအဓိကထားဆောင်ရွက်သော ဒေသဖြစ်သောကြောင့် သီးနှံမျိုးစုံကို ရာသီအလိုက် စိုက်ပျိုးလျက်ရှိကြရာ  ပဲကြီးသီးနှံကိုလည်း စိုက်ပျိုးကြပါသည်။ခရိုင်အတွင်းတွင် ပဲကြီးစိုက်ဧကအနေဖြင့် ကျောက်ဆည်မြို့နယ်တွင် (၁၁၉၅) ဧက၊မြစ်သားမြို့နယ်တွင်(၂၄၀)ဧက၊စုစုပေါင်း(၁၄၃၅)ဧကစိုက်ပျိုးထားရှိပြီး မတ်လ တတိယပတ်အထိ စိုက်ဧကအားလုံး ရိတ်သိမ်းပြီးစီးပြီဖြစ်ကြာင်း ၊ ခရိုင် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏စာရင်းများအရ သိရှိရပါသည် ။ စိုက်ပျိုးမှု ကုန်ကျစရိတ်အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း(၅၀၀၀၀၀/-)ကျပ်ခန့် ကုန်ကျကြောင်း ၊ (၁)ဧကအထွက်နှုန်း အနေဖြင့်(၁၃)တင်းခန့်ထွက်ရှိကြောင်း၊ ယခင်နှစ်ပဲကြီးပေါ်ချိန်တွင် ပဲကြီးတစ်တင်းလျှင်(၇၁၅၀၀/-) ကျပ်ဖြင့်ရောင်းဝယ်ခဲ့ပြီး ယခုလက်ရှိ ပဲကြီး တစ်တင်းလျှင် (၆၈၀၀၀/-)ကျပ်စျေးနှုန်းများဖြင့် ရောင်းဝယ်လျက်ရှိကြောင်း၊ (၁)ဧကအကျိုးအမြတ်အနေဖြင့် စိုက်ပျိုးစရိတ်နှုတ်ပြီးပါက(၃၈၀၀၀၀/-) ကျပ်ခန့်ရရှိကြောင်း ပဲကြီးစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

          မကွေးတိုင်းဒေသကြီးသည် ဆီထွက်သီးနှံဖြစ်သော မြေပဲ၊ နှမ်း၊ ကြက်သွန်နီနှင့် အခြား ပဲမျိုးစုံကို အဓိကထားစိုက်ပျိုးပြီး အခြားတိုင်းဒေသကြီးနှင့်ပြည်နယ်များသို့ တင်ပို့ရောင်းချလျက်ရှိပါသည်။

        မကွေးတိုင်းဒေသကြီးအတွင်းရှိ မကွေး၊ တောင်တွင်းကြီး၊ အောင်လံ၊ ရေနံချောင်း၊ ဆိပ်ဖြူနှင့် ပခုက္ကူကုန်စည်ဒိုင်တွင် နှမ်း၊ ကြက်သွန်နီနှင့် ပဲမျိုးစုံသီးနှံများ ပုံမှန်အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ ဧပြီလ(ပထမပတ်)တွင် ကုန်စည်ဒိုင်များ၏ အရောင်းအဝယ်ဖြစ်ပေါ်နေသော ဈေးနှုန်းများမှာ မကွေးကုန်စည်ဒိုင်တွင် နှမ်းဖြူ(၁)ပိဿာလျှင် ကျပ်(၈၆၇၀-၈၇၃၀)၊ နှမ်းနီ ကျပ် (၇၅၃၀-၇၆၇၀)၊ နှမ်းနက်(စမုံ) ကျပ်(၈၅၃၀-၉၀၀၀)၊ မြေပဲဆီဆံ (အောက်ကျ) ကျပ်(၄၅၀၀-၅၀၀၀)၊ ပဲတီစိမ်း ကျပ်(၃၆၀၀-၃၆၅၀)၊ ပဲနောက် ကျပ်(၂၇၅၀-၂၉၀၀)၊ ပဲလွန်ဝါ (ကြီး) ကျပ်(၃၁၆၀-၃၂၁၀)၊ ကုလားပဲကျပ်(၄၀၈၀-၄၁၃၀)၊ မတ်ပဲ ကျပ်(၄၇၅၀)၊ ပဲစဉ်းငုံနီ ကျပ်(၆၂၀၀)၊ စားတော်ပဲ ကျပ် (၄၅၀၀)ဖြစ်ပြီး ယခင်အပတ်ထက် ယခုအပတ်တွင် နှမ်းဖြူ ကျပ်(၁၄၀-၂၀၀)၊ မတ်ပဲ ကျပ်(၂၃၀)၊ ပဲစဉ်းငုံ(နီ) ကျပ်(၃၀၀)ဈေးမြင့်ခဲ့ပြီး  ပဲလွန်းဝါကြီး ကျပ်(၂၁၀) ဈေးကျခဲ့ပါသည်။ တစ်ပတ်အတွင်း တန်ချိန်(၁၂၃၅)ခန့်အရောင်းအဝယ်ဖြစ်ခဲ့ပြီး ရန်ကုန်၊ မန္တလေးမြို့တို့မှ အများဆုံးဝယ်ယူလျက်ရှိ ကြောင်း သိရှိရပါသည်။

         တောင်တွင်းကြီး ကုန်စည်ဒိုင်တွင် ကုလားပဲ ကျပ်(၃၈၅၀-၄၀၀၀)၊ မတ်ပဲ ကျပ်(၄၇၀၀)ဖြစ်ပြီး ယခင်အပတ်အတိုင်း ဈေးနှုန်းပြောင်းလဲမှုမရှိဘဲ တစ်ပတ်အတွင်း တန်ချိန်(၁၄၆.၉၅)ခန့် အရောင်း အဝယ်ဖြစ်ခဲ့ကြောင်း သိရှိရပါသည်။

        အောင်လံကုန်စည်ဒိုင်တွင် သိပ္ပံနှမ်းနက် ကျပ်(၇၇၈၀-၈၄၄၅)၊ ရိုးရိုးနှမ်းနက် ကျပ်(၇၅၅၅)၊ နှမ်းနီ ကျပ်(၇၅၅၅)၊ နှမ်းဖြူသန့် ကျပ်(၇၇၈၀)၊ ပဲစဉ်းငုံနီ ကျပ်(၆၀၉၀-၆၁၀၀)၊ ကုလားပဲ (မြကြေး) ကျပ် (၄၂၂၅-၄၃၀၀)၊ ကုလားပဲ (ဟော်လန်) ကျပ်(၄၀၅၀-၄၀၇၅)၊ ပဲကြီး(သစ်) ကျပ်(၄၆၀၀-၄၈၀၀)၊ မြေပဲဆီဆံ(နီ) ကျပ်(၇၆၀၀-၇၇၀၀)၊ မြေပဲဆီဆံ(ဖြူ) ကျပ်(၆၃၀၀)၊ မတ်ပဲ ကျပ် (၄၅၅၀-၄၅၇၅)၊ ဝါ ကျပ်(၂၉၀၀-၃၀၀၀)၊ ဘိုကိတ်ပြာ ကျပ်(၃၀၀၀)ဖြစ်ပြီး ယခင်အပတ်ထက် ယခုအပတ်တွင် ပဲစဉ်းငုံ (နီ)ကျပ်(၂၈၀)၊ ကုလားပဲ ဟော်လန် ကျပ်(၅၀)၊ ပဲကြီး ကျပ်(၄၀၀)၊ ကုလားပဲ(မြကြေး) ကျပ်(၅၀) ဈေးမြင့်ပြီး ကျန်ပဲ၊ နှမ်းဈေးနှုန်းများမှာ တည်ငြိမ်လျက်ရှိကြောင်း၊ တစ်ပတ်အတွင်း တန်ချိန်(၂၉၃.၃) ခန့် အရောင်းအဝယ်ဖြစ်ခဲ့ကြောင်း သိရှိရပါသည်။  

       ရေနံချောင်းကုန်စည်ဒိုင်တွင် ကြက်သွန်နီ ကျပ်(၁၅၀၀-၁၉၀၀)ဖြစ်ပြီး ယခင်အပတ်ထက် ယခု အပတ်တွင် ကြက်သွန်နီ ကျပ်(၁၀၀)ဈေးကျပြီး တစ်ပတ်အတွင်း တန်ချိန်(၉၇.၉၇)ခန့် အရောင်း အဝယ်ဖြစ်ခဲ့ကြောင်း သိရှိရပါသည်။  

       ဆိပ်ဖြူကုန်စည်ဒိုင်တွင် ကြက်သွန်နီ(သစ်) ကျပ်(၁၄၀၀-၂၂၀၀)ဖြစ်ပြီး ယခင်အပတ်ထက် ယခုအပတ်တွင်  ကြက်သွန်နီ(သစ်) ကျပ်(၂၀၀)ဈေးကျပြီး တစ်ပတ်အတွင်း တန်ချိန်(၆၃၂)ခန့် အရောင်းအဝယ်ဖြစ်ခဲ့ကြောင်း သိရှိရပါသည်။

      ပခုက္ကူကုန်စည်ဒိုင်တွင် ကုလားပဲ(929) ကျပ်(၄၀၉၅-၄၁၀၅)၊ ထောပတ်ပဲ(ကျွန်း) ကျပ် (၄၆၃၀-၄၈၄၂)၊ ပဲစဉ်းငုံ ကျပ်(၆၀၉၀)၊ ပဲဇီးကွက် ကျပ်(၂၃၀၀)၊ စွန်တာနီ (ကျွန်း) ကျပ်(၂၂၈၀-၂၄၀၀) ဖြစ်ပြီး ယခင်အပတ်ထက် ယခုအပတ်တွင် ထောပတ်ပဲ(ကျွန်း) ကျပ်(၂၇)၊ ပဲစဉ်းငုံ ကျပ် (၂၇၀)၊ ပဲဇီးကွက် ကျပ်(၂၀)၊ ကုလားပဲ(929) ကျပ်(၇၅)ဈေးနှုန်းမြင့်တက်ခဲ့ပြီး ပဲယင်းနီ ကျပ်(၇၈၅)၊ စွန်တာနီ(ကျွန်း) ကျပ်(၆၆၅)ဈေးကျခဲ့ကြောင်း၊ တစ်ပတ်အတွင်း တန်ချိန်(၂၄၄.၈၇)ခန့် အရောင်း အဝယ်ဖြစ်ခဲ့ကြောင်း  သိရှိရပါသည်။

DOCA(မကွေး)

  မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးအတွင်းရှိ အခြေခံစားသောက်ကုန်များရောင်းချလျက်ရှိသောဆိုင်များတွင် နေ့စဉ် ကုန်စိမ်းဟင်းသီးဟင်းရွက်များအပြင် အခြေခံစားသောက်ကုန်တစ်မျိုးဖြစ်သော ခေါက်ဆွဲခြောက်ထုပ်များလည်း  အရောင်းအဝယ်သွက်လျက်ရှိကြောင်း၊ ရွှေဒင်္ဂါး(အဝါရောင်)ခေါက်ဆွဲခြောက်နှင့် စွမ်းထက်(အဖြူရောင်) ခေါက်ဆွဲခြောက်များလည်းဝင်ရောက်လျက်ရှိကြောင်း ပခုက္ကူမြို့မဈေးအတွင်းရှိ ရောင်းဝယ်ရေးလုပ်ငန်းရှင်တစ်ဦးထံမှသိရှိရပါသည်။

      ခေါက်ဆွဲခြောက်ဈေးကွက်အနေဖြင့် ၂၀၂၄ခုနှစ်၊ ဧပြီလ(ပထမပတ်)တွင် ရွှေဒင်္ဂါး (အဝါရောင်)(၂၅)စီးပါ တစ်ထုပ်လျှင် ကျပ်(၁၄၅၀၀)၊ တစ်စည်းလျှင် ကျပ်(၆၀၀)၊ စွမ်းထက် (အဖြူရောင်)ခေါက်ဆွဲခြောက် (၅၀) ကျပ်သားတစ်စည်းလျှင် ကျပ်(၃၀၀၀)၊ (၂၅)ကျပ်သားတစ်စည်းလျှင် ကျပ်(၁၅၀၀)၊ (၂၀)ကျပ်သား တစ်စည်းလျှင် ကျပ်(၁၃၀၀)၊ ခေါက်ဆွဲစက်ကျ အကျိုးတစ်ပိဿာထုပ်တစ်စည်းလျှင် ကျပ်(၄၀၀၀)၊ (၁၀)ကျပ်သားတစ်စည်းလျှင် ကျပ်(၄၀၀)ဈေးနှုန်းအသီးသီးဖြင့် အရောင်းအဝယ်ဖြစ်ကြောင်း၊ ယခင်မတ်လ(ပထမပတ်)ဈေးနှုန်းတို့နှင့်နှိုင်းယှဉ်ကြည့်လျှင် ဈေးအတက်အကျမရှိဘဲ အရောင်းအဝယ်ဖြစ်လျက်ရှိကြောင်းသိရှိရသည်။

       ခေါက်ဆွဲခြောက်များကို  မုံရွာမြို့မှ နေ့စဉ်ဝင်ရောက်လျက်ရှိကြောင်း၊ စားသုံးသူများအနေဖြင့် ဈေးနှုန်းချိုသာ၍  အလွယ်တကူစားသုံးရခြင်းဖြစ်၍ ဝယ်ယူစားသုံးမှုများကြောင်း၊ စားသောက်ကုန်စီးပွားရေးလုပ်ငန်းရှင်များနှင့် အသုပ်ဆိုင်များအပြင် ယခုအချိန်ကာလတွင် မြန်မာ့ရိုးရာနှစ်သစ်ကူးချိန် သင်္ကြန်ကာလဖြစ်၍ မြန်မာလူမျိုးများအနေဖြင့် ကောင်းမှုကုသိုလ်များပြုလုပ်ရန်အတွက် မြို့နေကျေးလက်ပါမကျန် စားသုံးသူများဝယ်ယူသုံးစွဲမှုများ၍ အရောင်းအဝယ်သွက်ကြောင်း၊ တစ်ရက်လျှင် ပိဿာ(၁၀၀-၁၄၀)၊ တစ်လလျှင် ပျမ်းမျှပိဿာ(၃၀၀၀)ခန့်အရောင်းအဝယ်ဖြစ်လျက်ရှိကြောင်း ပခုက္ကူမြို့မဈေးအတွင်းရှိ ဈေးသည်တစ်ဦးထံမှသိရှိရပါသည်။

DOCA(မကွေး)