ပြည်တွင်းကုန်သွယ်မှုသတင်း

    ကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်ရှိ မြို့မဈေးနှင့် ပန်းခြံဈေးတို့တွင်ရောင်းချနေသော ကုန်စိမ်းသီးနှံ၊ ဟင်းသီးဟင်းရွက်ဈေးကွက်တွင်   ပန်းမုံလာပွင့်၊ ခရမ်းချဉ်သီး၊ ခရမ်းသီး၊ ပဲတောင့်ရှည်သီးများလှိုင်လှိုင်ဝင်ရောက်အရောင်းအဝယ်ဖြစ်လျက်ရှိသည်။ ကုန်စိမ်းသီးနှံများကို ပခုက္ကူမြို့၊ မြစ်တစ်ဖက်ကမ်းရှိ ကျွန်းကျေးရွာများ၌ ကျွန်းညိုကြီးရွာ၊ ကံလှအုပ်စု၊ တင်းဂတ်၊ ကုက္ကိုလှအုပ်စုအတွင်းရှိ ကျေးရွာများနှင့် ကမ္မ၊ မြစ်ခြေနှင့် ကျောက်ပန်းတောင်း၊ ပုပ္ပါးဒေသများမှ စိုက်ပျိုးထားရှိသော ကုန်စိမ်းသီးနှံများကိုလှိုင်လှိုင်ဆွတ်ခူးလျက်ရှိပြီး ဈေးကွက်အတွင်းသို့ဝင်ရောက်လျက်ရှိသည်။ ယခုဖေဖော်ဝါရီလဆန်းမှစ၍ ကုန်စိမ်းသီးနှံတချို့မှာ ဈေးနှုန်းကျဆင်းပြီး အရောင်းအဝယ်ဖြစ်၍ စားသုံးသူများတွက် အဆင်ပြေလျက်ရှိသည်။

      ယခု၂၀၂၄ခုနှစ်၊ ဖေဖော်ဝါရီလ(ဒုတိယပတ်)တွင် သီးနှံအရည်အသွေးနှင့် အရွယ်အစားကိုလိုက်၍ ပန်းမုံလာပွင့်တစ်ပွင့်လျှင် ကျပ်(၁၅၀)မှ ကျပ်(၅၀၀)၊ ခရမ်းချဉ်သီးတစ်ပိဿာလျှင် (ဗမာ)ခရမ်းချဉ် ကျပ်(၇၀၀-၈၀၀)၊ ထိုင်ဝမ်ခရမ်းချဉ် ကျပ်(၄၀၀-၅၀၀)၊ ခရမ်းသီး(အစိမ်း)တစ်ပိဿာလျှင် ကျပ်(၄၀၀-၈၀၀)၊ ပဲတောင့်ရှည်တစ်ပိဿာလျှင် ကျပ်(၇၀၀-၈၀၀) စသည့်ဈေးနှုန်းအသီးသီးဖြင့် ရောင်းချပေးလျက်ရှိကြောင်း၊ ယခင်ဇန်နဝါရီလလ(ဒုတိယပတ်)ဈေးနှုန်းနှင့်နှိုင်းယှဉ်ပါက ပန်းမုံလာပွင့်တစ်ပွင့်လျှင် ကျပ်(၄၀၀)၊ ခရမ်းချဉ်သီးတစ်ပိဿာလျှင် ကျပ်(၆၀၀)၊ ခရမ်းသီးတစ်ပိဿာလျှင် ကျပ်(၇၀၀)၊ ပဲတောင့်ရှည်သီးတစ်ပိဿာလျှင် ကျပ်(၄၀၀)ခန့် စသည်ဖြင့် ဈေးနှုန်းအသီးသီးကျဆင်းသွားကြောင်း၊ ယခင်က ပခုက္ကူမြို့ကုန်စိမ်းသီးနှံများရှားပါးနေချိန်တွင် မန္တလေးတိုင်းဒေသကြီးနှင့် ရှမ်းပြည်နယ်အတွင်းရှိ ကုန်စိမ်းသီးနှံများဝင်ရောက်ခဲ့ပြီး ယခုအခါ ဒေသတွင်းစိုက်တောင်သူများစိုက်ပျိုးထားရှိသော ရာသီပေါ်ကုန်စိမ်းသီးနှံများကို ဆွတ်ခူးရောင်းချချိန်ဖြစ်၍ ဈေးနှုန်းများကျဆင်းလျက်ရှိကြောင်း လုပ်ငန်းရှင်တစ်ဦးထံမှသိရှိရပါသည်။

DOCA(မကွေး)

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကုန်စည်ဒိုင်ကြက်သွန်နီဈေးကွက်သို့ ဖေဖော်ဝါရီလ(ဒုတိယပတ်)တွင် မိုးကြက်သွန်နီများလှိုင်လှိုင်တူးဖော်လျက်ရှိသည့် ဒေသများဖြစ်သော ဆိပ်ဖြူမြို့အနောက်ပိုင်း၊ ရွာသစ်ရပ်ကွက်၊ ကိုးတောင့်အုပ်စု၊ ချင်တောင်အုပ်စု၊ မြင်ကဝအုပ်စုအတွင်းရှိကျေးရွာများနှင့် ချောက်၊ ဆင်ဖြူကျွန်း၊ စလင်းမြို့နယ်အတွင်းရှိ ကျေးရွာများမှထွက်ရှိသော ကြက်သွန်နီများမှာ ဥပုသ်နေ့မှလွဲ၍ နေ့စဉ်ဝင်ရောက်အရောင်းအဝယ်ဖြစ်လျက်ရှိရာ တစ်ရက်လျှင် ကုန်ချိန်ပိဿာ(၄)သောင်းမှ (၈)သောင်းအထိ တစ်ပတ်အတွင်း ပိဿာ(၃)သိန်းခန့်အရောင်းအဝယ်ဖြစ်လျက်ရှိကြောင်း ဈေးကွက်မှသိရှိရသည်။

     ကြက်သွန်နီဈေးကွက်အနေဖြင့် ၂၀၂၄ခုနှစ်၊ ဖေဖော်ဝါရီလ(ဒုတိယပတ်)တွင် ကြက်သွန်နီဈေးနှုန်းမြင့်တက်၍ အရောင်းအဝယ်ဖြစ်လျက်ရှိသည်။ မိုးကြက်သွန်နီတစ်ပိဿာလျှင် အမြင့်ဈေး ထိပ်စ ကျပ်(၂၁၀၀)၊ အလတ်စ ကျပ်(၁၈၇၅)၊ အနိမ့်စ ကျပ်(၁၄၀၀)ဖြင့် အရောင်းအဝယ်ဖြစ်လျက်ရှိသည်။ ယခင်ဖေဖော်ဝါရီ(ပထမပတ်)တွင် ကြက်သွန်နီ ထိပ်စတစ်ပိဿာလျှင် ကျပ်(၁၇၅၀)၊ အလတ်စ ကျပ်(၁၆၀၀)၊ အနိမ့်စ ကျပ်(၁၃၀၀) စသည့်ဈေးနှုန်းအသီးသီးဖြင့် အရောင်းအဝယ်ဖြစ်ခဲ့သည်။

     ယခင်အပတ်ဈေးနှုန်းနှင့်နှိုင်းယှဉ်ပါက ယခုဖေဖော်ဝါရီ (ဒုတိယပတ်)တွင် မိုးကြက်သွန်နီတစ်ပိဿာလျှင် အမြင့်ဈေးထိပ်စ ကျပ်(၃၅၀)၊ အလတ်စ ကျပ်(၂၀၀)၊ အသေးစ ကျပ်(၁၀၀)ခန့် ဈေးတက်၍ အရောင်းအဝယ်ဖြစ်ခဲ့ကြောင်း၊ ဈေးနှုန်းမြင့်တက်ရခြင်းမှာ ဒေသတွင်းကြက်သွန်နီစိုက်ခင်းများလျော့နည်းသွားပြီး ဈေးကွက်သို့ ကုန်ချိန်ဝင်ရောက်မှုလျော့နည်းသွားခြင်းနှင့် ပြည်ပအဝယ်လိုက်ခြင်းကြောင့် ဈေးနှုန်းမြင့်တက်ခြင်းဖြစ်ကြောင်း ကုန်စည်ဒိုင်ဈေးကွက်မှသိရှိရပါသည်။ 

     ဆိပ်ဖြူမြို့မှထွက်ရှိသည့် ကြက်သွန်နီများကို ရန်ကုန်ဘုရင့်နောင်ကုန်စည်ဒိုင်နှင့် ပြည်၊ ပုသိမ်မြို့နှင့် မြဝတီမြို့မှတစ်ဆင့် ထိုင်း၊ ဗီယက်နမ်နိုင်ငံများသို့ ကြက်သွန်နီကုန်ချိန်ပိဿာ (၄)သိန်း ခန့်၊ တန်ချိန်အားဖြင့် (၆၅၃)တန်ခန့်ကုန်စည်စီးဆင်းခဲ့ကြောင်းသိရှိရပါသည်။

DOCA(မကွေး)

     စီးပွား‌‌ရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများအပြင် အခြေခံစားကုန်ဈေးနှုန်းများကို အပတ်စဉ် မေးမြန်း တင်ပြလျက်ရှိရာ ဖေဖော်ဝါရီလ ဒုတိယပတ်တွင် ရွှေဘိုမြို့၌ စားသုံးဆီ ဈေးနှုန်းများ အနည်းငယ် ကျဆင်းလျက်ရှိကြောင်း စားသုံးဆီအရောင်းဆိုင်များမှ သိရသည်။

      ရွှေဘိုမြို့ပေါ်တွင် စားသုံးဆီ လက်လီ/လက်ကားရောင်းချသောဆိုင် (၁၂)ဆိုင်ရှိပြီး ဖေဖော်ဝါရီလ ပထမပတ်တွင် စားအုန်းဆီ တစ်ပိဿာ (၅၇၀၀)ကျပ်၊ ပဲဆီသန့် တစ်ပိဿာ (၁၅၀၀၀)ကျပ်၊ နှမ်းဆီသန့် တစ်ပိဿာ (၁၄၀၀၀)ကျပ်ဖြင့် အရောင်းအဝယ်ဖြစ်ခဲ့ပြီး၊ ယခု ဖေဖော်ဝါရီလ ဒုတိယပတ်တွင် စားအုန်းဆီ တစ်ပိဿာ (၅၇၀၀) ကျပ်၊ ပဲဆီသန့် တစ်ပိဿာ (၁၄၀၀၀)ကျပ်၊ နှမ်းဆီသန့် တစ်ပိဿာ (၁၄၀၀၀)ကျပ်ဖြင့် အရောင်းအဝယ် ဖြစ်နေသဖြင့် စားသုံးဆီ တစ်ပိဿာ ဈေးနှုန်းနှိုင်းယှဉ်ကြည့်ပါက ပဲဆီသန့် တစ်ပိဿာလျှင်  (၁၀၀၀)ကျပ် ဈေးနှုန်း ကျဆင်းခဲ့ပြီး၊ နှမ်းဆီသန့်နှင့် စားအုန်းဆီဈေးနှုန်းမှာ ယခင်ပတ်နည်းတူ ဈေးနှုန်း တည်ငြိမ်လျက်ရှိကြောင်း စားသုံးဆီလက်ကား အရောင်းဆိုင်များမှ သတင်းရရှိသည်။

DOCA(စစ်ကိုင်း)

    ရေသည် လူနှင့်သက်ရှိသတ္တဝါမှန်သမျှအတွက် မရှိမဖြစ်လိုအပ်သောအရာဖြစ်ရုံသာမက အပင်များအားလုံးအတွက်လည်း မရှိမဖြစ်လိုအပ်ပါသည်။ “ထမင်းအသက် ခုနှစ်ရက်၊ ရေအသက် တစ်မနက်” ဟူ၍ပင် ညွှန်းဖွဲ့ပြောဆိုလေ့ရှိကြသည်။ လူတို့သည် ရေကို ထမင်းဟင်းချက်ပြုတ်ရန်၊ သောက်သုံးရန်၊ ဆေးကြောရန်၊ တစ်ကိုယ်ရည်သန့်ရှင်းမှုရှိစေရန်အတွက် အသုံးပြုကြပါသည်။

     အညာဒေသဖြစ်သော ပခုက္ကူမြို့တွင် သဘာဝရေဖြစ်သော အဝီစိတွင်းရေနှင့် သောက်ရေသန့်များကိုအသုံးများကြသည်။ ပခုက္ကူမြို့တွင် သောက်ရေသန့်လုပ်ငန်းပေါင်း (၂၀)ကျော်ရှိ၍ ၎င်းလုပ်ငန်းများအနေဖြင့် ထုတ်လုပ်ဖြန့်ဖြူးရောင်းချလျက်ရှိပါသည်။ ရေသန့်စက်ရုံများမှ (၂၀)လီတာဘူးကြီးများ၊ (၁)လီတာဘူးများ၊ (၀.၆)လီတာဘူးများ၊ (၀.၃၅)လီတာဘူးများကို  ထုတ်လုပ်၍ ဖြန့်ဖြူးရောင်းချလျက်ရှိရာ ယခု၂၀၂၄ခုနှစ်၊ ဖေဖော်ဝါရီလတွင် (၂၀)လီတာဘူးကြီးတစ်ဘူးလျှင် ကျပ်(၇၀၀)၊ (၁)လီတာ (၆)ဘူးပါ (၁)ကတ်လျှင် ကျပ်(၂၀၀၀)၊ (၀.၃၅)လီတာ (၂၀)ဘူးပါ (၁)ကတ်လျှင် ကျပ်(၃၅၀၀)ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း၊ ယခင်ဇန်နဝါရီလတွင် (၂၀)လီတာဘူးကြီးတစ်ဘူးလျှင် ကျပ်(၄၀၀-၅၀၀)၊ (၁)လီတာ(၆)ဘူးပါ (၁) ကတ်လျှင် ကျပ်(၁၅၀၀)၊ (၀.၃၅)လီတာ (၂၀)ဘူးပါ (၁)ကတ်လျှင် ကျပ်(၃၀၀၀)ဖြစ်၍ ယခုဖေဖော်ဝါရီလဈေးနှုန်းနှင့်နှိုင်းယှဉ်ကြည့်လျှင် ဖေဖော်ဝါရီလတွင် ဈေးနှုန်းမြင့်တက်လာ၍ အရောင်းအဝယ်ဖြစ်နေကြောင်းသိရှိရပါသည်။ ဈေးနှုန်းတက်ရခြင်းမှာ ကုန်ဈေးနှုန်းများကြီးမြင့်ခြင်း၊ စက်သုံးဆီများဈေးကြီးနေခြင်းတို့ကြောင့် ဈေးနှုန်းများမြင့်တက်ရခြင်းဖြစ်ကြောင်း၊ တစ်နေ့လျှင် သောက်ရေသန့်ဘူးကြီးများကို ဘူး(၂၀၀)ထိထုတ်လုပ်ပြီး မြို့ပေါ်ရှိ ကိုယ်စားလှယ်ယူသော လုပ်ငန်းရှင်များထံသို့ ဖြန့်ဖြူးရောင်းချရကြောင်း ရေသန့်လုပ်ငန်းရှင်တစ်ဦးထံမှ သိရှိရပါသည်။

      ပခုက္ကူမြို့တွင် သောက်ရေသန့်များကို သောက်သုံးရန်၊ ချက်ပြုတ်ရန်သာမက အလှူအတန်းများ၊ မင်္ဂလာဆောင်များ၊ သာရေး၊ နာရေးများအတွက်လည်း ဝယ်ယူအသုံးပြုလျက်ရှိ၍ အရောင်းအဝယ်ဖြစ်နေကြောင်းသိရှိရပါသည်။

DOCA(မကွေး)

    မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်သည် စိုက်ပျိုးရေးဒေသဖြစ်သော်လည်း စပါးစိုက်ဧကနည်းပြီး ဆန်မှာအခြားတိုင်းဒေသကြီးများမှ ဝယ်ယူတင်သွင်းရသောဒေသဖြစ်ပါသည်။ မင်းလှမြို့သို့ စစ်ကိုင်းတိုင်းဒေသကြီး၊ ရွှေဘိုမြို့၊ ရေဦးမြို့နှင့် မကွေးတိုင်းဒေသကြီး၊ မကွေးမြို့၊ မင်းဘူးမြို့၊ စလင်းမြို့၊ ဆင်ဖြူကျွန်းမြို့နှင့် ဧရာဝတီတိုင်းဒေသကြီး၊ ဖျာပုံမြို့၊ ပုသိမ်မြို့၊ မြောင်းမြမြို့၊ မြန်အောင်မြို့၊ ကြံခင်းမြို့၊ ဟင်္သတမြို့တို့မှဆန်အိတ်များ ဝင်ရောက်လျက်ရှိကြောင်းသိရှိရပါသည်။

      ၂၀၂၄ခုနှစ်၊ ဖေဖော်ဝါရီလ(တတိယပတ်)တွင် အထက်မင်းလှမြို့၌ အရောင်းအဝယ်ဖြစ်ပေါ်လျက်ရှိသော ဆန်ဈေးနှုန်းများမှာ ဧရာပဒေသာဆန် ရွှေပိုးအိမ်(၂၄)ပြည်ပါတစ်အိတ်လျှင် ကျပ် (၁၇၂၀၀၀)၊ စိန်ရတီ(စိမ်း)တစ်အိတ်လျှင် ကျပ်(၁၅၀၀၀၀)၊ စိန်ရတီ(နီ) တစ်အိတ်လျှင် ကျပ် (၁၅၀၀၀၀)၊ စိန်ရတနာဧရာတစ်အိတ်လျှင် ကျပ်(၁၃၀၀၀၀)၊ စိန်ပုလဲဧရာတစ်အိတ်လျှင် ကျပ် (၁၃၀၀၀၀)၊ ကုန်းဇောင်း(ဟောင်း)တစ်အိတ်လျှင် ကျပ်(၁၅၅၀၀၀)၊ ကုန်းဇောင်း(သစ်)တစ်အိတ်လျှင် ကျပ်(၁၄၈၀၀၀)၊ မနောသုခ(ဟောင်း) တစ်အိတ်လျှင် ကျပ်(၉၇၀၀၀)၊ ပေါ်ဆန်း(ရွှေဘို) တစ်အိတ်လျှင် ကျပ်(၁၅၀၀၀၀)၊ ရက်(၉၀)ဆန်တစ်အိတ်လျှင် ကျပ်(၉၇၀၀၀)၊ ဖယောင်းရွှေစင်တစ်အိတ်လျှင် ကျပ်(၁၁၃၀၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်း၊ (ဒုတိယပတ်)နှင့်နှိုင်းယှဉ်ပါက ယခုအပတ်တွင် မနောသုခ(ဟောင်း)တစ်အိတ်လျှင် ကျပ်(၁၀၀၀၀)နှင့် ကျန်ဆန်အိတ်တစ်အိတ်စီလျှင် ကျပ်(၂၀၀၀မှ ၃၀၀၀)ထိဈေးနှုန်းမြင့်တက်လာကြောင်း သိရှိရပါသည်။

DOCA(မကွေး)