ပြည်တွင်းကုန်သွယ်မှုသတင်း

          ပဲခူးတိုင်းဒေသကြီး၊ ပြည်ခရိုင်တွင် ၂၀၂၃-၂၀၂၄ ခုနှစ်တွင် မိုးနှမ်းစိုက်ဧက (၆၆၃၇၁)ဧက တွင် (၆၆၃၇၁)ဧက ရိတ်သိမ်းနိုင်ခဲ့ပြီး တစ်ဧကအထွက်နှုန်းအနေဖြင့် (၁၄.၉၅)တင်းထွက်ရှိကြောင်း၊ ဆောင်းနှမ်းစိုက်ဧကမှာ (၁၁၂၆၄)ဧက စိုက်ပျိုးထားကြောင်း သိရပါသည်။

         မိုးနှမ်းများမှာ ၂၀၂၃ခုနှစ် အောက်တိုဘာလတွင် စတင်ထွက်ပေါ်ပြီး နှမ်းနီ(၃)တင်းပါ တစ်အိတ်လျှင် ၃၀၅,၀၀၀ကျပ်၊ နှမ်းနက်(၃)တင်း ပါ တစ်အိတ်လျှင် ၂၇၀,၀၀၀ကျပ် နှင့် စမုံနက်နှမ်း (၃)တင်း ပါ တစ်အိတ် လျှင် ၃၁၅၀၀၀ကျပ်ဖြင့် အရောင်းအဝယ်ဖြစ်ခဲ့ပါသည်။ နိုဝင်ဘာလတွင် နှမ်းနီ (၃)တင်း ပါ တစ်အိတ် လျှင် ၂၈၅,၀၀၀ကျပ်၊ နှမ်းနက်(၃)တင်းတစ်အိတ်လျှင် ၂၇၀,၀၀၀ကျပ်နှင့် စမုံနက်နှမ်း (၃)တင်း တစ်အိတ်လျှင် ၃၀၀,၀၀၀ကျပ်ဖြင့် ဈေးအနည်းငယ်ကျဆင်းလာပြီး ရန်ကုန်၊ မန္တလေးဝယ်လက်များက အဝယ်ရှိ၍ နေ့စဉ်အရောင်းအဝယ်ဖြစ်လျက်ရှိပြီး တစ်နေ့လျှင် အိတ် (၁၀၀၀/၁၅၀၀)ခန့် အရောင်းအဝယ်ဖြစ်ခဲ့ပါသည်။

         ဆောင်းနှမ်းစိုက်ပျိုးချိန် ဒီဇင်ဘာလတွင် နှမ်းနီ(၃)တင်း ပါ တစ်အိတ် လျှင် ၂၈၀,၀၀၀ကျပ်၊ နှမ်းနက်(၃)တင်း ပါ တစ်အိတ်လျှင် ၃၀၀,၀၀၀ကျပ်နှင့် စမုံနက်နှမ်း (၃)တင်း ပါ တစ်အိတ်လျှင် ၃၂၀,၀၀၀ကျပ်ဖြင့် အရောင်းအဝယ်ဖြစ်ခဲ့ပြီး နှမ်းအနည်းငယ်ရှားပါးသွား၍ စမုံနက်နှမ်းမှာ ဈေးပြန်မြင့်တက်သွားပြီး ရိုးရိုးနှမ်းနက်မှာ ဈေးငြိမ်၍ နှမ်းနီမှာဈေးကွက်တွင် ပစ္စည်းလက်ကျန်ပြတ်၍ ဈေးတန်းသာ ရှိခဲ့ပါသည်။

       ၂၀၂၄ခုနှစ် ဇန်နဝါရီလ ဒုတိယပတ်တွင် နှမ်းနီ(၃)တင်းပါတစ်အိတ်လျှင် ၂၈၀,၀၀၀ကျပ်၊ နှမ်းနက်(၃)တင်းပါတစ်အိတ်လျှင် ၃၀၀,၀၀၀ကျပ် နှင့် စမုံနက် နှမ်း(၃)တင်း ပါ တစ်အိတ်လျှင် ၃၄၀,၀၀၀ ကျပ်ဖြင့် ဈေးဖြစ်ခဲ့ပါသည်။  ယခုအပတ်ဖြစ်သော ဇန်နဝါရီလ နောက်ဆုံးပတ်တွင် နှမ်းနီ(၃) တင်း ပါ တစ်အိတ်လျှင် ၂၈၅,၀၀၀ကျပ်၊ နှမ်းနက်(၃)တင်းတစ်အိတ်လျှင် ၃၀၀၀၀၀ကျပ်နှင့် စမုံနက်နှမ်း (၃)တင်း ပါ တစ်အိတ်လျှင် ၃၄၀,၀၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်နှစ်ဖြစ်သော ၂၀၂၃ခုနှစ်တွင် ဖြစ်ပေါ်ခဲ့သော နှမ်းဈေးနှုန်းများမှာ-

စဉ်               အမျိုးအမည်             ရေတွက်ပုံ                အနိမ့်(ဈေး)              အမြင့်(ဈေး)

၁။                နှမ်းနီ                      (၃)တင်း                  ၂၆၅၀၀၀(ကျပ်)         ၃၀၀၀၀၀(ကျပ်)

၂။                နှမ်းနက်                  (၃)တင်း                  ၂၇၀၀၀၀(ကျပ်)        ၃၂၀၀၀၀(ကျပ်)

၃။                စမုံနက်                   (၃)တင်း                  ၃၂၀၀၀၀(ကျပ်)         ၃၅၀၀၀၀(ကျပ်)

          ထို့ကြောင့် ပြည်ခရိုင်တွင် နှမ်းဈေးများမှာ အမြင့်ဆုံးတွင်ရှိပြီး        နှမ်းစိုက်ပျိုးသူ တောင်သူများအနေဖြင့် တစ်ဧကထုတ်လုပ်မှုသည့် သီးနှံအရည်အသွေးမြင့်မား တိုးတက်အောင် ဆောင်ရွက်နိုင်လျှင်ရောင်းချသည့်အခါ မိမိသီးနှံအရည်အသွေးပေါ်မူတည်၍ ဝင်ငွေတိုးနိုင်ပြီး အမြတ်အစွန်းများရရှိလာနိုင်မှာဖြစ်၍ လယ်ယာစီးပွားရေးကဏ္ဍကိုမြှင့်တင်နိုင်မည်ဖြစ်ကြောင်း ရေးသားတင်ပြလိုက်ရပါသည်။        

DOCA(ပဲခူး)

   ဆောင်းသီးနှံပဲသစ်များ ပြည်ဈေးကွက်သို့ ဝင်ရောက်လာပြီဖြစ်ပြီး ပဲပုပ်သီးနှံသည်လည်း ပဲသစ်များ ဒီဇင်ဘာလဆန်းပိုင်းကတည်းက စတင်ဝင်ရောက်လာခဲ့ကာ ယခုချိန်ထိလည်း နေ့စဉ် ပဲသစ်များ ဝင်ရောက်မှုရှိကြပါသည်။ ပေါင်းတလည်၊ ပေါက်ခေါင်း၊ ပန်းတောင်းဒေသများမှ ဝင်ရောက်ခဲ့ပြီး ဒေသတွင်းဝယ်ယူမှုရှိသလို ရန်ကုန်ဝယ်လက်များလည်း အဝင်ရှိသလောက် ဝယ်ယူမှုရှိခဲ့ကြပါသည်။ ပဲသစ်ပေါ်စ ပဲပုပ်သီးနှံဈေးမှာ တစ်တင်း (၆၄၀၀ဝိ/-)ကျပ်ရရှိခဲ့ပြီး ယခင်နှစ် ကာလတူ အချိန်ဈေးဖြင့်ယှဉ်လျင် ကွာခြားမှုသိပ်မရှိခဲ့ပဲ ရောင်းဝယ်ခဲ့ကြပါသည်။ ယခုနှစ် အတွင်း အခြားပဲသီးနှံ အားလုံးလိုလို ဈေးနှုန်းများမြင့်တက်လာလို့ ဈေးကောင်းရလျက်ရှိသော်လည်း ပဲပုပ်သီးနှံကတော့ ဈေးအေးနေခဲ့သည်ကိုတွေ့ရပါသည်။ ယခုနှစ်ဆန်းပိုင်းတွင် ပဲပုပ်သီးနှံ တစ်တင်း (၆၁၀၀ဝိ/-) ကျပ်ဖြင့် ပဲအရည်အသွေးလိုက်၍ ဈေးနှုန်းကွာခြားမှုရှိကြပါသည်ဟု သိရပါသည်။ ဒါကြောင့် ပြည်ပဲ ဈေးကွက်ရဲ့ ဆောင်းပဲသစ်ဈေးကွက်မှာ ပဲပုပ်သီးနှံသည် အခြားပဲများထက် ဈေးအနိမ့်ဖြင့်သာ ရောင်းဝယ်နေခဲ့ကြောင်း သိရှိရပါသည်။

DOCA(ပဲခူး)

   မကွေးတိုင်းဒေသကြီး၊ ပခုက္ကူမြို့နယ်အတွင်းရှိ ကံလှ၊ ကျွန်းညိုကြီး၊ သံပုရာပင်ကုန်း၊ ကျွန်းညိုကြီးရွာသစ်၊ တင်းဂတ်အုပ်စုများအတွင်းရှိ ကျေးရွာများနှင့် ပခုက္ကူကျွန်းရွာများတွင် ဒေသခံတောင်သူများသည် ရေသွင်းစနစ်ဖြင့် သကြားပြောင်းဖူး(ချို)စိုက်ခင်းများကို ယခင်၌ မိသားစုတစ်နိုင်တစ်ပိုင်စိုက်ပျိုးလျက်ရှိပြီး ယခုအချိန်တွင် ပြည်တွင်းစားသုံးမှုများလာပြီး ပြောင်းဖူးများဈေးကောင်းရရှိ၍ တောင်သူအများ စီးပွားဖြစ်တိုးချဲ့စိုက်ပျိုးလာကြကြောင်း၊ နှစ်စဉ် ငှက်ပျော၊ ငရုတ်၊ ကြက်သွန်၊ ခရမ်းချဉ်၊ ကုလားပဲ၊ ဆေးရွက်ကြီးနှင့် အခြားဟင်းသီးဟင်းရွက်သီးနှံစားအပင်များကို တစ်နှစ်လျှင် တစ်ရာသီသာစိုက်ပျိုးကြသည့်အပြင် ပြောင်းဖူးဈေးကွက်ကောင်း၍ သကြားပြောင်းဖူး(ချို)စိုက်ခင်းများကို နွေ၊ မိုး၊ ဆောင်း သုံးရာသီလုံး တိုးချဲ့စိုက်ပျိုးလာကြကြောင်း ဒေသခံတောင်သူတစ်ဦးကပြောကြားခဲ့ပါသည်။

     စိုက်ပျိုးမှုအနေဖြင့် ပြောင်းဖူးသီးနှံကို သဲနုန်းမြေ၊ မြေမာများတွင် ရေသွင်းစနစ်ဖြင့် အများဆုံးစိုက်ပျိုးကြပြီး အတန်းလိုက်စနစ်ဖြင့် ပင်ကြား(၅)လက်မ၊ တန်ကြား(၁)ပေအကွာစိုက်ပျိုးကြောင်း၊ တောင်သူများသည် ပြောင်းဖူးပင်သက်တမ်း (၃)လခွဲအကြာ ရောင်းတန်းဝင် မနုမရင့်အချိန်တွင် ပြောင်းဖူးများကိုခူး၍ ရောင်းချခြင်းကြောင့် မျိုးထားရှိခြင်းမရှိ၍ ဝယ်ယူစိုက်ပျိုးရကြောင်း၊ ပံ(၁၃၅)မျိုးကို တောင်သူအများစိုက်ပျိုးကြောင်း၊ မျိုးစေ့တစ်ထုပ်လျှင် ကျပ်(၂၇၀၀၀-၂၈၀၀၀)ဈေးနှုန်းဖြင့်ပေးဝယ်ရပြီး တစ်ဧကလျှင် မျိုးစေ့(၄)ထုပ်နှင့် (၂)ပြည်ခန့်ကုန်ကျကြောင်း၊ စက်တင်ဘာလတွင် စတင်စိုက်ပျိုးပြီး ဒီဇင်ဘာလတွင် သီးနှံရိတ်သိမ်းကြောင်း၊ စိုက်ပျိုးချိန်မှ ရိတ်သိမ်းချိန်ထိ ရေ(၃)ချိန်ခန့်ပေးသွင်းရကြောင်း၊ မိုးရာသီ၌စိုက်ပျိုးကြကာ သကြားပြောင်းဖူးများရိတ်သိမ်းရောင်းချပြီးနောက် သီးထပ်အဖြစ် ဆောင်းသီးနှံကုလားပဲကိုစိုက်ပျိုးကြကြောင်း၊ ကုလားပဲခင်းကျွတ်များတွင် ဖူးစားပြောင်းကို  ဇန်နဝါရီလဆန်းမှစ၍ တောင်သူအများ စိုက်ပျိုးလျက်ရှိသည့်အတွက် တစ်နှစ်ပတ်လုံး ပြောင်းဖူးထွက်ရှိလျက်ရှိကြောင်းသိရှိရသည်။

     သကြားပြောင်းဖူး(ချို)တစ်ဧကစိုက်ပျိုးလျှင် ရာသီဥတုပြောင်းလဲမှုနှင့် သွင်းအားစုသုံးစွဲပုံ၊ ရေသွင်းအကြိမ်ရေမတူညီခြင်းကြောင့် သီးနှံအထွက်နှုန်းမတူညီကြောင်း၊ တောင်သူတစ်ဦးလျှင် ပျမ်းမျှအဖူးရေ (၉၀၀၀-၁၂၀၀၀)ခန့်အထိထွက်ရှိပြီး တစ်ဖူးလျှင် သီးနှံပေါ်ဒေသပေါက်ဈေး လက်လီသုံးဖူးလျှင် ကျပ်(၁၀၀၀)ဖြင့်ရောင်းချရပြီး လက်ကားဈေးတစ်ဖူးလျှင် အကြီးအသေးအနုအရင့်အပေါ်မူတည်ပြီး ကျပ် (၁၅၀-၂၀၀)ဈေးနှုန်းဖြင့်ရောင်းချရကြောင်း၊ စိုက်ခင်းထွက်ပြောင်းဖူးများကို မြို့ပေါ်ရှိ လုပ်ငန်းရှင်များက အခင်းအထိ လာရောက်ဝယ်ယူကြပြီး ပခုက္ကူဒေသတွင်းအပြင် ရန်ကုန်မြို့သို့ အများဆုံးတင်ပို့ဖြန့်ဖြူးတင်ပို့လျက်ရှိကြောင်း၊ ကုန်ကျစရိတ်အနေဖြင့် တစ်ဧကလျှင် ကျပ်(၈၀၀၀၀၀)ခန့်ကုန်ကျပြီး ဝင်ငွေမှာ ကျပ်(၂၀၀၀၀၀၀)ခန့်ရရှိ၍ ကျပ်(၁၂၀၀၀၀၀)ခန့်အကျိုးအမြတ်ရရှိကြောင်း၊ ယခင်နှစ်တွင်လည်း ပြောင်းဖူးသီးနှံပေါ်ချိန် ဒေသတွင်းဈေးကွက်၌ တစ်ဖူးလျှင် လက်လီဈေး ကျပ်(၃၅၀-၄၀၀)၊ လက်ကားဈေးကျပ်(၂၀၀)ဈေးနှုန်းအသီးသီးဖြင့်ရောင်းချခဲ့ရ၍ ပြည်တွင်းပြောင်းဖူးဈေးကွက်ခိုင်မာလျက်ရှိခြင်းကြောင့် တိုးချဲ့စိုက်ပျိုးလျက်ရှိကြောင်းသိရှိရသည်။   

       သကြားပြောင်းဖူးသီးနှံသည် လူတိုင်း နေ့စဉ်စားသုံးလျက်ရှိသော စားသောက်ကုန်များအနက် အမျှင်ဓာတ်များစွာပါဝင်သော ဆေးဖက်ဝင်သီးနှံဖြစ်ပါသည်။ လူကြီးလူငယ်မရွေး နေ့စဉ် စားသုံးလျက်ရှိသော ပြောင်းဖူးသည် လူ့ကျန်းမာရေးကို အဖက်ဖက်မှ ကူညီထောက်ပံ့ပေးနိုင်သော သဘာဝသီးနှံတစ်မျိုးဖြစ်ပါသည်။ ပြောင်းဖူးတစ်ဖူးတွင် သစ်သီးနှင့်ဟင်းသီးဟင်းရွက်များထက် အာဟာရဓာတ်ပိုမိုပါဝင်၍ လူအများစုက ပြုတ်စား၊ သုပ်စား၊ ကြော်စား၊ ဟင်းချိုချက်ခြင်းများပြုလုပ်၍ စားသုံးလျက်ရှိပါသည်။ နေ့စဉ်လူနေမှုဘဝတွင် ကျန်းမာသောဘဝများ ရေရှည်ရပ်တည်နိုင်ရေးအတွက် အာဟာရဓာတ်များစွာကြွယ်ဝပြီး ကျန်းမာရေးအတွက် များစွာကူညီထောက်ပံ့ပေးနိုင်သော ပြောင်းဖူးကို ပြည်တွင်းစားသုံးမှုပိုမိုများလာလျက်ရှိသည်။ စီးပွားရေလုပ်ငန်းရှင်များကလည်း ပြောင်းဖူးကုန်ကြမ်းမှတစ်ဆင့် တန်းဖိုးမြှင့်စားသောက်ကုန်မျိုးစုံထုတ်လုပ်ရောင်းချလျက်ရှိ၍ ပြည်တွင်းအသုံးများခြင်းကြောင့် ပြောင်းဖူးဈေးကွက်ခိုင်မာလျက်ရှိပါသည်။ စိုက်တောင်သူများအတွက်လည်း ပြောင်းဖူးဆွတ်ခူးရောင်းချပြီး ကျန်ရှိသောအပင်များကို နွားမွေးမြူရေးခြံများ၊ ကျွဲ၊ နွား တစ်နိုင်တစ်ပိုင်မွေးမြူသူများအနေဖြင့် တိရိစ္ဆာန်အစာအဖြစ် လာရောက်ဝယ်ယူကြသောကြောင့် အပိုဝင်ငွေရရှိလျက်ရှိပါသည်။ သကြားပြောင်းဖူးများကို ပြည်တွင်းစားသုံးမှုအပြင် ပြည်ပတရုတ်နိုင်ငံက အဝယ်ဒိုင်များဖွင့်၍ အများဆုံးဝယ်ယူလျက်ရှိခြင်းကြောင့် ပြည်တွင်းဈေးကွက်ခိုင်မာလျက်ရှိ၍ တောင်သူများတွက်ချေကိုက်ကာ အကျိုးအမြတ်များစွာရရှိသည့်အပြင် နိုင်ငံတော်အတွက် တစ်ဖက်တစ်လမ်းမှ ပြည်ပဝင်ငွေရရှိစေသော သီးနှံဖြစ်၍ စိုက်တောင်သူများအနေဖြင့် တိုးချဲ့စိုက်ပျိုးသင့်သည့် သီးနှံဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)

    မကွေးတိုင်းဒေသကြီး၊ ချောက်ခရိုင်၊ ချောက်မြို့နယ်ရှိ မြို့မဈေးသည် ပတ်ဝန်းကျင်ကျေးရွာများမှ နေ့စဉ်လာရောက်သည့်အပြင် ဆိပ်ဖြူနှင့်ယောဒေသမှ စားသုံးသူများကလည်း လာရောက်ရောင်းဝယ်ဖောက်ကားရာဈေးဖြစ်ပါသည်။ ရေထွက်ကုန်များကို ရန်ကုန်ဘုရင့်နောင်ပွဲရုံမှ မှာယူရောင်းချကြောင်းသိရှိရပါသည်။

    ချောက်ခရိုင်၊ ချောက်မြို့မစျေးအတွင်း ၂၀၂၄ခုနှစ်၊ ဇန်နဝါရီလ(စတုတ္ထပတ်)အတွင်းရောင်းချနေသော ရေထွက်ပစ္စည်းစျေးနှုန်းများမှာ ပုစွန်ခြောက်(၁)ပိဿာလျှင် ကျပ်(၆၅၀၀၀)၊ ငါးပုတ်သင်အသေး (၁)ပိဿာလျှင် ကျပ်(၈၅၀၀)၊ ငါးပုတ်သင်ကြီး (၁)ပိဿာလျှင် ကျပ်(၁၇၀၀၀)၊ ငါးရံ့လုံး (၁) ပိဿာလျှင် ကျပ် (၃၇၀၀၀)၊ ငါးတံခွန် (၁)ပိဿာလျှင် ကျပ်(၁၀၀၀၀)၊ ငါးမဲလုံး(၁)ပိဿာလျှင် ကျပ် (၁၄၅၀၀)၊ ငါးအသားမျှင် (၁)ပိဿာလျှင် ကျပ်(၂၃၀၀၀)၊ ငါးနီတူခြောက်(၁)ပိဿာလျှင် ကျပ် (၁၆၅၀၀)၊ ငါးကြီးခြောက် (၁)ပိဿာလျှင် ကျပ် (၆၀၀၀၀)၊ ငါးဇင်းလုံး (၁)ပိဿာလျှင် ကျပ် (၉၀၀၀)၊ ငါးဇင်းပြား (၁)ပိဿာလျှင် ကျပ်(၁၃၅၀၀)၊ မြီးဆံသွယ်(၁)ပိဿာလျှင် ကျပ်(၉၀၀၀)စျေးနှုန်းတို့ဖြင့် အရောင်းအဝယ်ဖြစ်နေကြောင်း လေ့လာသိရှိရပါသည်။

DOCA(မကွေး)

          ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ တောင်ခွေးရဲကျေးရွာမှ တောင်သူ ဦးကြည်နိုင်၏ လယ်ယာမြေထဲတွင် ပန်းဂေါ်ဖီများကို စိုက်ပျိုးရောင်းချခြင်းဖြင့် မိသားစု စားဝတ်နေရေးအတွက် ဝင်ငွေများတိုးပြီး စီးပွားရေးအဆင်ပြေလျက်ရှိကြောင်း သိရပါသည်။

     ဟင်းသီးဟင်းရွက်အုပ်စုဝင်ဖြစ်သော ပန်းဂေါ်ဖီသည် စားသုံးသူများက ရာသီစာအဖြစ် စားသုံးမှုများကြပါသည်။ ပန်းဂေါ်ဖီများကို ပြည်မြို့၊ ဈေးကြီးအပါအဝင် အခြားဈေးများတွင်လည်း အောက်တိုဘာလနှင့် နိုဝင်ဘာလဆန်းပိုင်းမှစပြီး ရောင်းချလျက်ရှိပါသည်။ ပန်းဂေါ်ဖီသည် အေး၍ စိုစွတ်သောရာသီဥတုကို ကြိုက်နှစ်သက်ပါသည်။ စိုက်ပျိုးမှုမှာ မျိုးစေ့ကို ပျိုးထောင်ပြီး တစ်ဧကလျှင် အပင်ရေ (၁၂၀၀၀)ခန့်အထိ စိုက်ပျိုးနိုင်ကြောင်း သိရှိရပါသည်။ စိုက်ပျိုးကာလမှာ ရက်ပေါင်း (၉၀) ကျော်အကြာတွင် အပွင့်များကို ခူးဆွတ်၍ ရနိုင်ပါသည်။

      ပန်းဂေါ်ဖီပွင့်များ ရောင်းချရာတွင် ကျေးရွာအတွင်းမှ ဈေးသည်များက လာရောက် ဝယ်ယူကြသလို ပြည်မြို့ပေါ်ရှိ ဈေးများသို့လည်း သွားရောက်ရောင်းချမှုများရှိပါသည်။ ပန်းဂေါ်ဖီ ပေါ်ဦး ပေါ်ဖျားတွင်ဈေးကောင်းရရှိခဲ့သလို ယခုအချိန်တွင် အပွင့်ကြီးတစ်ပွင့်လျှင်(၇၀၀-၆၀၀) ကျပ်၊ အပွင့်လတ် တစ်ပွင့်လျှင် (၅၀၀-၄၀၀)ကျပ်နှင့် အပွင့်သေးတစ်ပွင့်လျှင် (၃၀၀-၂၀၀)ကျပ် အထိ ဈေး ရရှိကြောင်း သိရပါသည်။

         ပန်းဂေါ်ဖီများ လှိုင်လှိုင်ပေါ်ထွက်ချိန်ဖြစ်သော ဒီဇင်ဘာလမှ ဇန်နဝါရီလတို့တွင်  ဈေးပေါပေါဖြင့် ရောင်းချသဖြင့် စားသုံးသူများ ဈေးနှုန်းသက်သာစွာ ဝယ်ယူစားသုံးကြလို့ အရောင်းသွက်လျက်ကြောင်း သိရှိရပါသည်။

DOCA(ပဲခူး)