၁၈.၁၂.၂၀၂၃ ရက်နေ့တွင် တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။
၁၈.၁၂.၂၀၂၃ ရက်နေ့တွင် တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။
၁၈.၁၂.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
မန္တလေးတိုင်းဒေသကြီးကုန်သည်များနှင့် စက်မှုလက်မှုလုပ်ငန်းရှင်များအသင်း MRCCI မှ Mandalay International Trade Fair and Investmest Forum 2023 ကို ဒီဇင်ဘာလ(၂၀)ရက်နေ့မှ (၂၂) ရက်နေ့အထိ Mandalay Convention Centre တွင် ကျင်းပပြုလုပ်မည်ဖြစ်ပါသည်။ အဆိုပါ Trade Fair တွင် MRCCI မှ ပြခန်းများနှင့် ဈေးရောင်းပွဲတော်အတွက် ပြခန်းပေါင်း(၂၆၂)ခန်း၌ လူသုံးကုန်ပစ္စည်းအမျိုးမျိုး၊ ဆေးဝါးအမျိုးမျိုး၊ စားသောက်ကုန်ပစ္စည်းအမျိုးမျိုး၊ အလှကုန်ပစ္စည်းအမျိုးမျိုး၊ တောင်သူလယ်သမားများအတွက် လယ်ယာသုံးစက်ကိရိယာအမျိုးမျိုး၊ ပါကင်ထုပ်ပိုးထားသည့် စက်ကိရိယာအမျိုးမျိုးနှင့်ဆက်စပ်ပစ္စည်းများကို ခင်းကျင်းပြသရောင်းချပေးမည်ဖြစ်ကြောင်းသိရှိရပါသည်။
DOCA(မန္တလေး)
မန္တလေးတိုင်းဒေသကြီး၊ ကျောက်ဆည်ခရိုင်တွင် နှမ်းကို တစ်နှစ်ပတ်လုံးစိုက်ပျိုးလျက်ရှိပြီး ခရိုင်အတွင်း၌ မိုးနှမ်းစိုက်ဧက(၆၇၈၃)ဧကစိုက်ပျိုးထားရှိရာ ယခုအချိန်ထိ ရိတ်သိမ်းဧက (၅၇၆၈)ဧကရိတ်သိမ်းပြီးစီးကြောင်း ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည်။ မိုးနှမ်းစိုက်ပျိုးမှု (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၂၄၀၀၀၀)ကျပ်ခန့်ကုန်ကျကြောင်း၊ (၁)ဧကအထွက်နှုန်းအနေဖြင့် (၁၀-၁၁)တင်းအထိထွက်ရှိပြီး နွေနှမ်းထက် အထွက်နှုန်းအနည်းငယ်လျော့နည်းကြောင်း၊ စိုက်ပျိုးသောမျိုးများမှာ နှမ်းဖြူ၊ နှမ်းညိုနှင့် နှမ်းနက်မျိုးများကိုစိုက်ပျိုးကြပြီး အများဆုံးစိုက်ပျိုးသော မိုးနှမ်းမှာနှမ်းနက်ကို အများဆုံးစိုက်ပျိုးကြပါသည်။ နှမ်းဈေးနှုန်းအနေဖြင့် ယခင်တွင် နှမ်းဖြူ(၁)တင်းလျှင် (၅၉၀၀၀)ကျပ်၊ နှမ်းညို(၁)တင်းလျှင် (၅၄၀၀၀)ကျပ်၊ နှမ်းနက်ရိုးရိုး (၁)တင်းလျှင် (၅၄၀၀၀)ကျပ်၊ နှမ်းနက်စမုံ(၁)တင်းလျှင် (၅၂၀၀၀)ကျပ်ဈေးနှုန်းတို့ားရှိပြီး ယခုလက်ရှိ နှမ်းဈေးနှုန်းအနေဖြင့် နှမ်းဖြူ(၁)တင်းလျှင် (၁၂၀၀၀၀)ကျပ်၊ နှမ်းညို(၁)တင်းလျှင် (၉၀၀၀၀)ကျပ်၊ နှမ်းနက်ရိုးရိုး(၁)တင်းလျှင် (၈၀၀၀၀)ကျပ်၊ နှမ်းနက်စမုံ(၁)တင်းလျှင် (၈၅၀၀၀)ကျပ်ဈေးနှုန်းတို့ဖြင့်ရောင်းဝယ်လျက်ရှိပြီး ယခုလက်ရှိတွင် နှမ်းဆီ(၁)ပိဿာလျှင် (၁၃၄၀၀)ကျပ်ဖြင့် အရောင်းအဝယ်ဖြစ်နေကြောင်း၊ နှမ်းဈေးနှုန်းနှင့် နှမ်းဆီဈေးနှုန်းများ ကောင်းမွန်သောကြောင့် စိုက်စရိတ်ကုန်ကျမှုနည်းပါးပြီး အကျိုးအမြတ်များသောမိုးနှမ်းများကို တောင်သူများ အများဆုံးစိုက်ပျိုးသင့်ပါကြောင်း ရေးသားတင်ပြလိုက်ရပါသည်။
DOCA(မန္တလေး)
မန္တလေးတိုင်းဒေသကြီး၊ ကျောက်ဆည်ခရိုင်တွင် (၂၀၂၃-၂၀၂၄) ဘဏ္ဍာနှစ်၌ မိုးစပါးစိုက်ဧက (၁၅၃၁၄)ဧကစိုက်ပျိုးနိုင်ခဲ့ပြီး ယခုနိုဝင်ဘာလကုန်အပတ်မှစတင်၍ အစောစိုက်မိုးစပါးများကိုစတင်ရိတ်သိမ်းလျက်ရှိပါသည်။ မိုးစပါးစိုက်ပျိုးရာတွင် (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၇၅၀၀၀၀)ကျပ်ခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် တင်း(၇၀) မှ (၇၅)တင်းအထိထွက်ရှိကြောင်း၊ ယခုနှစ်တွင် မိုးရွာသွန်းမှုအားကောင်းသောကြောင့် ရေသွင်းစရိတ်သက်သာကြောင်း၊ မိုးစပါးအသစ်ဧရာပဒေသာစပါး(၁)တင်းလျှင် (၂၂၀၀၀)ကျပ်၊ မနောသုခစပါး(၁)တင်းလျှင် (၁၈၀၀၀)ကျပ်မှ (၁၈၅၀၀)ကျပ်စျေးနှုန်းတို့ဖြင့် ရောင်းဝယ်လျက်ရှိပါသည်။ လက်ကျန်အဟောင်း ဧရာပဒေသာစပါး(၁)တင်းလျှင် (၃၅၀၀၀)ကျပ်၊ မနောသုခစပါး (၁)တင်းလျှင် (၂၉၀၀၀)ကျပ်စျေးနှုန်းတို့းဖြင့် ရောင်းဝယ်လျက်ရှိပါသည်။ ဆန်စျေးနှုန်းအနေဖြင့် ဧရာပဒေသာဆန် (အဟောင်း) ၂၄ပြည်ပါ တစ်အိတ်လျှင် (၁၃၀၀၀၀)ကျပ်၊ မနောသုခဆန် (အဟောင်း) ၂၄ပြည်ပါ တစ်အိတ်လျှင် (၉၂၀၀၀)ကျပ်စျေးနှုန်းတို့ဖြင့် ရောင်းဝယ်လျက်ရှိကြောင်း၊ ကုန်သည်၊ ပွဲစားများထံမှသိရှိရပါသည်။ မိုးစပါးရိတ်သိမ်းပြီးလယ်ကွက်များတွင် ဆောင်းကုလားပဲများကို စိုက်ပျိုးမည်ဖြစ်ကြောင်း၊ မိုးစပါးစိုက်ပျိုးမှုတွင် စိုက်ပျိုးစရိတ်၊ လုပ်သားခများနုတ်ပါက ယခုနှစ်တွင် တောင်သူများအနေဖြင့် ဧရာပဒေသာစိုက်ပျိုးမှုမှ (၉၀၀၀၀၀)ကျပ်၊ မနောသုခစိုက်ပျိုးမှုမှ (၆၃၇၅၀၀)ကျပ်ခန့်အကျိုးအမြတ်ရရှိကြောင်း မိုးစပါးရိတ်သိမ်းပြီးဖြစ်သော တောင်သူတစ်ဦး၏ ပြောကြားချက်အရသိရှိရပါသည်။
DOCA(မန္တလေး)
မန္တလေးတိုင်းဒေသကြီး၊ ကျောက်ဆည်ခရိုင်တွင် စိုက်ပျိုးရေးကိုအဓိကထားလုပ်ကိုင်သော ဒေသဖြစ်သည့်အလျောက် သီးနှံမျိုးစုံကို ရာသီအလိုက် စိုက်ပျိုးကြပြီး ဆည်ရေသောက်ဒေသ ဖြစ်သောကြောင့် တစ်နှစ်ပတ်လုံးစိုက်ပျိုးလျက်ရှိကြပါသည်။ (၂၀၂၃-၂၀၂၄) ဘဏ္ဍာနှစ်တွင် ခရိုင်အတွင်း မိုးပဲတီစိမ်းစိုက်ဧက (၂၁၅၂၀)ဧကစိုက်ပျိုးနိုင်ခဲ့ပြီး ယခုလက်ရှိအချိန်ထိ (၁၇၉၀၅)ဧကရိတ်သိမ်းနိုင်ခဲ့ကြောင်း၊ တစ်ဧကအထွက်နှုန်းအနေဖြင့် (၁၇-၁၈)တင်းထွက်ရှိပြီး စုစုပေါင်းအထွက်နှုန်းအနေဖြင့် (၃၁၀၃၅၉)တင်းထွက်ရှိကြောင်း ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည်။ မိုးပဲတီစိမ်းစိုက်ပျိုးမှုအနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၂၉၅၀၀၀)ကျပ်ဝန်းကျင်ခန့်ကုန်ကျပြီး မျိုးအနေဖြင့် ကျောက်စိမ်းမျိုး၊ ရေဆင်း(၁၁)မျိုးများကို အများဆုံးစိုက်ပျိုးကြပါသည်။ ပဲတီစိမ်းစိုက်ပျိုးမှုတွင် မိုးပဲတီစိမ်းမှာ အထွက်ပိုကြောင်း၊ မိုးရွာသွန်းမှုအားကောင်းသောကြောင့် အသီးအပွင့်များ ဝေဝေဆာဆာပွင့်သီးသဖြင့် အထွက်ပိုကြောင်း၊ ယခင်ပဲတီစိမ်းပေါက်ဈေးမှာ (၆၀၅၀၀)ကျပ်ဈေးနှုန်းရှိခဲ့ပြီး ယခုလက်ရှိ ပေါက်စျေးအနေဖြင့် ပဲတီစိမ်းတစ်တင်းလျှင် (၄၀၀၀၀) ကျပ်ဖြင့် အရောင်းအဝယ်ဖြစ်နေကြောင်းသိရှိရပါသည်။ယခုနှစ်ပေါ်ချိန်တွင် ဈေးနှုန်းကျဆင်းသော်လည်း အထွက်နှုန်းကောင်းမွန်သောကြောင့် စိုက်ပျိုးစရိတ်၊ လုပ်သားခများနုတ်ပါက အကျိုးအမြတ်အနေဖြင့် (၃၈၅၀၀၀)ကျပ်ခန့်ရှိကြောင်း ပဲတီစိမ်းစိုက်ပျိုးသော တောင်သူတစ်ဦး၏ပြောကြားချက်အရသိရှိရပါသည်။
DOCA(မန္တလေး)
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ် တာဝန်ခံရုံးအနေဖြင့် စားသုံးသူပြည်သူများ ဘေးအန္တရာယ်ကင်းရှင်းစေရေးနှင့် ထုတ်ကုန်များ လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိရာ ဒီဇင်ဘာလ (၈)ရက်နေ့ နံနက် (၀၈:၃၀)နာရီ အချိန်တွင် ကျွန်းလှမြို့ပေါ်ရပ်ကွက်အတွင်းရှိ အသင့်သောက်အချိုရည်အမျိုးမျိုး ရောင်းချသည့်ဆိုင်များအား ကျွန်းလှမြို့နယ်တာဝန်ခံ ဒေါ်ဝေဝေအောင်မှ ဈေးကွက်စောင့်ကြည့်စစ်ဆေးခြင်းအား ကွင်းဆင်းဆောင်ရွက်ခဲ့ပါသည်။
ထိုသို့ ကွင်းဆင်းစစ်ဆေးရာတွင် ဦးစားပေးစစ်ဆေးရန် သတ်မှတ်ထားသော အသင့်သောက် အချိုရည်အမျိုးမျိုးအား ဈေးကွက်စောင့်ကြည့်စစ်ဆေးခဲ့ရာ ကုန်စုံဆိုင်များတွင်ရောင်းချလျက်ရှိသည့် Ve Ve အမှတ်တံဆိပ် အချိုရည်ဘူးများတွင် ကုန်အညွှန်းအမှတ်အသားများကို မြန်မာဘာသာဖြင့် ပြည့်စုံစွာ ဖော်ပြထားသည်ကို စိစစ်တွေ့ရှိရကြောင်း စီးပွားရေးလုပ်ငန်းရှင်များအနေဖြင့် မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ မြန်မာဘာသာဖြင့် ပြည့်စုံစွာ ထည့်သွင်းဖော်ပြထားသည့် ကုန်ပစ္စည်းများကိုသာ ရောင်းချကြရန်နှင့် မိမိတို့ထံ လက်ဝယ် လာရောက်ပို့ဆောင်သော ကုန်ပစ္စည်းများတွင် ကုန်အညွှန်းအမှတ်အသား မပြည့်စုံပါက လာရောက်ပို့ဆောင်သူအား ကုန်အညွှန်းအမှတ်အသား ပြည့်စုံစွာ ထည့်သွင်းပေးရန် စကားလက်ဆင့်ကမ်း ပြောကြားပေးပါရန်နှင့် ကုန်အညွှန်းအမှတ်အသားနှင့်ပတ်သက်၍ စားသုံးသူရေးရာဦးစီးဌာန၏ အတည်ပြုချက်ရယူနိုင်ရေး ဆောင်ရွက်ကြရန် ၊ မိမိတို့ စားသုံးသူရေးရာဦးစီးဌာနမှ ကုန်အညွှန်းအမှတ်အသား လျှောက်ထားရာတွင် အခမဲ့ကူညီ ဆောင်ရွက်ပေးပါကြောင်း အသိပညာပေးဆွေးနွေးခဲ့ပြီး ညွှန်ကြားချက်အမှတ်(၂/၂၀၁၉)ပါ အသိပညာပေး လက်ကမ်းစာစောင်များ ဖြန့်ဝေခဲ့ကြောင်း သတင်းရရှိ ပါသည်။
DOCA(စစ်ကိုင်း)
ကရင်ပြည်နယ်တွင် သီးနှံမျိုးစုံစိုက်ပျိုးလျက်ရှိရာ ဖူးစားပြောင်းကိုလည်း တောင်သူများအနေဖြင့် စီးပွားဖြစ်စိုက်ပျိုးကြပါသည်။ စိုက်ပျိုးမှုအနေဖြင့် (၂၀၂၃-၂၀၂၄) ဘဏ္ဍာနှစ်တွင် ဖူးစားပြောင်း (၂၄၈၆)ဧကစိုက်ပျိုးထားရှိကြောင်း လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ ဖူးစားပြောင်းစိုက်ပျိုးမှုတွင် (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၄၈၀၀၀၀)ကျပ်ခန့်ကုန်ကျကြောင်း၊ ဖူးစားပြောင်းကို ဘားအံခရိုင်နှင့် ကြာအင်းဆိပ်ကြီးခရိုင်နှင့် မြဝတီခရိုင်တို့တွင် စီးပွားဖြစ်စိုက်ပျိုးကြပြီး ကျန်ခရိုင်များတွင်လည်း မိသားစုစားသုံးရန်အတွက် စိုက်ပျိုးကြပါသည်။ စိုက်ပျိုးမှုအနေဖြင့် သကြားပြောင်းကို အဓိကစိုက်ပျိုးကြပြီး ထောပတ်ပြောင်းကို အနည်းငယ်စိုက်ပျိုးကြပါသည်။
ဒေသခံတောင်သူများအနေဖြင့် ထွက်ရှိလာသောပြောင်းဖူးများကို ဘားအံမြို့ပေါ်ဈေးများရှိ ဟင်းသီးဟင်းရွက်ဒိုင်များသို့ လက်ကားစနစ်ဖြင့်လည်းကောင်း၊ ဒေသတွင်းစားသုံးသူပြည်သူများသို့ ကိုယ်တိုင်ရောင်းစနစ်ဖြင့်လည်းကောင်း ပြန်လည်ရောင်းချကြပါသည်။ ဘားအံမြို့၊ ရေပေါ်စံပြဈေးတွင် ၂၀၂၃ခုနှစ်၊ ဒီဇင်ဘာလ ဒုတိယပတ်အတွင်း အရောင်းအဝယ်ဖြစ်နေသောဈေးနှုန်းများမှာ သကြားပြောင်းဖူးအစိမ်း(၁)ဖူးလျှင် (၄၀၀)ကျပ်၊ ထောပတ်ပြောင်းအစိမ်း(၁)ဖူးလျှင်(၄၀၀)ကျပ်ဖြစ်ပြီး ပြောင်းဖူးပြုတ် (၁)ဖူးလျှင် အဖူးကြီး(၈၀၀)ကျပ်၊ ဖူးသေး(၁)ဖူးလျှင် (၅၀၀)ကျပ်တို့ဖြင့် ဈေးကောင်းရ၍ အရောင်းအဝယ်ဖြစ်လျက်ရှိကြောင်းသိရသည်။ ပြောင်းဖူးစိမ်းကို ဂျစ်ဖြင့်ခြစ်၍ ပြောင်းဖူးကြော်အဖြစ်လည်းကောင်း၊ ပြောင်းဖူးစိမ်းကိုပြုတ်ပြီး ဓားဖြင့်ပါးပါးလှီး၍ ကြက်သွန်နီ၊ ခရမ်းချဉ်သီး၊ နံနံပင်တို့ဖြင့် ပြောင်းဖူးသုပ်အဖြစ်လည်းကောင်း၊ ယိုးဒယားပြောင်းဖူးထောင်းအဖြစ်လည်းကောင်း အမျိုးမျိုးစားသုံးကြပါသည်။
ပြောင်းဖူးတွင် ဗီတာမင် B1၊ ဗီတာမင် B5၊ ဗီတာမင် C၊ ဖော့စရပ်စ်၊ မဂ္ဂနီစ်နှင့် အမျှင်ဓာတ်များ၊ အမိုင်နိုအက်ဆစ်ဓာတ်နှင့် အသားဓာတ်များလည်းပါဝင်သည်။ အမျှင်ဓာတ်ပါဝင်မှုမြင့်မားသည့်အတွက် သွေးတွင်းကိုလက်စထရောကိုလျော့ကျစေပြီး အူမကြီးကင်ဆာဖြစ်နိုင်ချေကိုလည်းလျော့ကျစေပါသည်။ သွေးတွင်းသကြားဓာတ်ပမာဏကို လျော့ကျစေသည့်အတွက် ဆီးချိုသမားများစားသုံးသင့်ပါသည်။ ပြောင်းဖူးတွင်ပါဝင်သည့် ဗီတာမင် B1 သည် မှတ်ဉာဏ်စွမ်းအားကိုတိုးမြင့်စေသည့်အတွက် ခလေးသူငယ်များလည်းစားသုံးသင့်ပါသည်။ ပြောင်းဖူးစားသုံးခြင်းသည် ကျန်းမာရေးနှင့်ညီညွတ်ပြီး မိသားစုအတွက်လည်း စီးပွားဖြစ်ဝင်ငွေတိုးသောကြောင့် ပြောင်းဖူးသီးနှံများကို တိုးချဲ့စိုက်ပျိုးသင့်ပါကြောင်း ရေးသားတင်ပြလိုက်ရပါသည်။
DOCA(ကရင်)
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်စီမံအုပ်ချုပ်ရေးအဖွဲ့၏အစီအစဉ်ဖြင့် ကျွန်းလှမြို့နယ် စီမံအုပ်ချုပ်ရေးအဖွဲ့ ဥက္ကဌ ဦးမျိုးတင့်ထူးနှင့် မစဖ အဖွဲ့ဝင်များ ၊ စည်ပင်သာယာရေးအဖွဲ့မှ အမှုဆောင်အရာရှိ ဦးစိုးထိုက်၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်ဝေဝေအောင် တို့ပူးပေါင်းကာ (၆.၁၂.၂၀၂၃)၊ (၈.၁၂.၂၀၂၃) နှင့် (၁၂.၁၂.၂၀၂၃) ရက်နေ့များတွင် နံနက်(၀၇:၀၀)နာရီအချိန်မှ (၀၈:၃၀) အချိန်ထိ ပိတောက်မြိုင်ရပ်ကွက်၊ ပိတောက်မြိုင်ဈေးနှင့် သစ်ရာမြိုင်ရပ်ကွက်၊ သစ်ရာမြိုင်ဈေး၊ ပျဉ်းမမြိုင်ရပ်ကွက် ၊ ပျဉ်းမမြိုင်ဈေးတို့တွင် စားအုန်းဆီများကို စားသုံးသူပြည်သူများ လက်ဝယ်အရောက် သက်သာသောဈေးနှုန်းဖြင့် ဆက်လက်ရောင်းချ ပေးခဲ့ကြောင်း သိရှိရပါသည်။
အဆိုပါစားအုံးဆီများရောင်းချရာတွင် စားသုံးသူပြည်သူများ သက်သာသောဈေးနှုန်းဖြင့် စားအုံးဆီ များဝယ်ယူရရှိစေရန်နှင့် စားဝတ်နေရေးအဆင်ပြေစေရန်အတွက် စားအုန်းဆီ (၁)ပိသာလျှင် (၅၄၀၀)ကျပ် နှုန်း၊ အိမ်ထောင်စု (၁)စုလျှင် စားအုန်းဆီ (၅၀)ကျပ်သားနှုန်းဖြင့် အိမ်ထောင်စု(၉၀၀) ၊ လူဦးရေ(၉၀၀)ဦးတို့အား စားအုန်းဆီ(၄၅၀)ပိသာရောင်းချပေးခဲ့ကြောင်း၊ စားအုန်းဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ ထုတ်ပြန်ပေးလျက်ရှိသော စားအုန်းဆီ တစ်ပိသာရည်ညွှန်းဈေးဖြင့် ရရှိသည့်အပေါ် မူတည်၍ ဆက်လက်ရောင်းချပေးနိုင်ရေးအတွက် ကန့်ဘလူခရိုင်ဆီကုန်သည်များနှင့် ပူးပေါင်းစီမံဆောင်ရွက်လျက်ရှိကြောင်း မြို့နယ်စီမံအုပ်ချုပ်ရေးအဖွဲ့ ဥက္ကဌမှ ပြောကြားပေးခဲ့ကြောင်း သတင်းရရှိပါသည်။
DOCA(စစ်ကိုင်း)
