ပြည်တွင်းကုန်သွယ်မှုသတင်း

        မိတ္ထီလာခရိုင်အတွင်း လယ်ယာထွက်ကုန်သီးနှံများအနက် ပဲ၊ ပြောင်း၊ ဆီထွက်သီးနှံ၊ ဝါတို့ကို အများဆုံးစိုက်ပျိုးပြီး စိုက်ပျိုးထုတ်လုပ်ရသည့် လုပ်သားခစရိတ်များမြင့်တက်လျက်ရှိကြောင်း သိရသည်။ ယခင်နှစ်က သီးနှံစိုက်ပျိုးရာတွင် နေ့စားလုပ်သားခမှာ ၅၀၀၀ ကျပ်မှ ယခုနှစ် ၆၀၀၀ ကျပ်သို့လည်းကောင်း၊ ပြောင်းရိတ်သိမ်းခြင်းနှမ်းခြွေလှေ့ခြင်းတို့တွင် တစ်ရက် ၆၀၀၀ ကျပ်မှ ၇၀၀၀ ကျပ်သို့ လည်းကောင်း မြင့်တက်လာပါသည်။ အလားတူ ဝါသီးနှံတွင်လည်း ယခင်နှစ်က ဆေးဖြန်းခ တစ်ရက် ၇၀၀၀ ကျပ်မှ ၈၀၀၀ ကျပ်သို့လည်းကောင်း၊ ဝါကောက်သိမ်းခမှာ လက်တစ်လော သီးနှံပေါ်စဖြစ်၍ နေ့စားဖြင့် ကောက်သိမ်းနေသော်လည်း သီးနှံလှိုင်ချိန်တွင် ယခင်နှစ်ကထက် တစ်ပိဿာလျှင် ၃၀၀ ကျပ်မှ ၄၀၀ ကျပ်သို့ မြင့်တက်လာမည်ဖြစ်ပါကြောင်း လုပ်သားရှားပါးခြင်း၊ စားသောက်ကုန်ဈေးနှုန်းများမြင့်တက်လာခြင်းအပေါ်၌လည်း လုပ်သားများမှ အရေးဆိုတောင်းခံ ခြင်းတို့ကြောင့် ဖြစ်ကြောင်း သိရသည်။

DOCA(မန္တလေး)

     တောင်ငူခရိုင်၊ ဖြူးမြို့နယ်၊ ဖြူးမြို့၊ မြို့မအရှေ့ရပ်ကွက်၊ ၄လမ်းရှိ ဒေါ်စန်းစန်းနေအိမ်တွင် မိသားစုတစ်နိုင်တစ်ပိုင်ထုတ်လုပ်လျက်ရှိသော သီးစုံအချိုရည်နှင့် ဂျယ်လီဘူးများမှာ ရောင်းအာကောင်းလျက်ရှိပါသည်။

     ကုန်ကြမ်းပစ္စည်းများကို ရန်ကုန်မြို့မှ မှာယူပါသည်။ ဂျယ်လီပြုလုပ်ရာတွင်လိုအပ်သော ပါဝင်ပစ္စည်းများမှာ ရေသန့်၊ သကြား၊ ဂျယ်လီမှုန့်၊ ခဲဆေး (FDA ခွင့်ပြုပစ္စည်း)၊ အချဉ်မှုန့်၊ ကာလစုံအနံ့နှင့် အရောင် (FDA ခွင့်ပြုပစ္စည်း)များဖြစ်ပြီး ပါကင်ဘူးများကိုအသုံးပြုပါသည်။

     သီးစုံအချိုရည် ၆ဘူးပါ တစ်ကတ်လျှင် လက်ကားဈေးနှုန်း ၁၀၀၀ကျပ်၊ ဂျယ်လီဘူး ၁၀ဘူးပါ တစ်ကတ်လျှင် လက်ကားဈေးနှုန်း ၈၅၀ကျပ်ဖြင့် ဖြူးမြို့မဈေး၊ ဇေယျဝတီဈေး၊ ညောင်ပင်သာဈေးနှင့် ကညွတ်ကွင်းဈေးများသို့ ဖြန့်ဖြူးရောင်းချကြောင်းသိရှိရပါသည်။

DOCA(ပဲခူး)

   တောင်ငူခရိုင်၊ ဖြူးမြို့နယ်တွင် ၂၀၂၃ခုနှစ်၊ မိုးစပါးစိုက်ဧက ၁၅၀၈၂၆ဧကရှိရာ စက်တင်ဘာလ လကုန်ပိုင်းမှစ၍ စတင်ရိတ်သိမ်းနေပြီဖြစ်ပါသည်။ အောက်တိုဘာလ ၄ရက်နေ့အထိ ၁၅၄၂ဧကရိတ်သိမ်းပြီးစီးခဲ့ပြီး တစ်ဧကလျှင် တင်း ၇၀ခန့်ထွက်ရှိကြောင်းသိရပါသည်။ စပါးပေါက်ဈေးမှာ နှံကောက် တင်း ၁၀၀လျှင် ၁၅၀၀၀၀၀ကျပ်နှင့် ဆင်းသုခ တင်း၁၀၀လျှင် ၁၅၂၀၀၀၀ကျပ်ရှိပါသည်။

  ဖြူးမြို့နယ်မှထွက်ရှိသော နှံကောက်နှင့် ဆင်းသုခစပါးများကို အဆင့်မြင့်ကြိတ်ခွဲစက်များဖြင့်ကြိတ်ခွဲ၍ ဖြူးမြို့နယ်အတွင်းနှင့် ရန်ကုန်၊ မန္တလေး၊ နေပြည်တော်ရှိ မြို့နယ်အသီးသီးသို့ တင်ပို့ရောင်းချလျက်ရှိပါသည်။ ယခုအောက်တိုဘာလတွင် ကြိတ်ခွဲရောင်းချလျက်ရှိသောဆန်ဈေးနှုန်းမှာ နှံကောက်တစ်အိတ်လျှင် ၅၈၀၀၀ကျပ်နှင့် ဆင်းသုခတစ်အိတ်လျှင် ၆၁၀၀၀ကျပ်ရှိပါသည်။ ဆန်ကွဲတစ်အိတ်လျှင် ၄၅၀၀၀ကျပ်၊ ဖွဲနုတစ်အိတ်လျှင် ၂၅၀၀၀ကျပ်ရှိကြောင်းသိရပါသည်။

      ဖြူးမြို့နယ်တွင် ယခင်နှစ်တွင်လည်း မိုးစပါး ၁၅၀၈၂၆ဧကစိုက်ပျိုးခဲ့ရာ အထွက်နှုန်း ၈၀.၁၈တင်းရှိကြောင်း စိုက်ပျိုးရေးဦးစီးဌာနမှသိရပါသည်။

DOCA(ပဲခူး)

     ၂၀၂၃ ခုနှစ် အောက်တိုဘာလ၊ စတုတ္တပတ်အတွင်း ကျောက်ဖြူမြို့ ၊စည်ပင်သာယာဈေးတွင်   ရွှေဘိုရခိုင်ပေါ်ဆန်းမွှေး တစ်ပြည် (၅၀၀၀) ကျပ်၊ ဧရာဝတီပေါ်ဆန်း တစ်ပြည် (၅၀၀၀) ကျပ်၊ ဧရာဝတီ   ဧည့်မထတစ်ပြည် (၃၀၀၀) ကျပ် ဈေးဖြင့် ပုံမှန်အရောင်းအဝယ်ဖြစ်ပေါ်လျက်ရှိပါသည်။ အမဲသား တစ်ပိဿာ ကျပ် (၂၂၀၀၀) ၊ဝက်သားတစ်ပိဿာ ကျပ် (၂၂၀၀၀) ၊ဒေသကြက်တစ်ပိဿာ ကျပ် (၂၅၀၀၀)၊    CP ကြက်တစ်ပိဿာကျပ် (၁၂၀၀၀) ၊ပုစွန်ကျားတစ်ပိဿာ ကျပ် (၃၀၀၀၀) ၊ ပုစွန်ပြားတစ်ပိဿာကျပ် (၁၈၀၀၀)၊ ပုစွန်ပြားငယ် တစ်ပိဿာ ကျပ် (၁၂၀၀၀) ၊ ကတ်ကတစ် တစ်ပိဿာ ကျပ်(၁၆၀၀၀) ၊ ငါးကွင်းချပ် တစ်ပိဿာ ကျပ်(၁၄၀၀၀) ၊ ပင်လယ်ငါးမျိုးစုံ အငယ်အကြီး တစ်ပိဿာ ကျပ် ( ၅၀၀၀ မှ ၁၂၀၀၀) အထိ၊ ဒီရေအတက်ကြီးချိန်၊ ဒီရေအတက်နည်းချိန်၊ လပြည့်၊ လကွယ်နှင့်လဆန်း၊ လဆုတ် တို့ အပေါ်မူတည်ပြီး ဈေးနှုန်းအပြောင်းအလဲ ဖြစ်ပေါ်လျက်ရှိပြီး ၊ဒေသထွက် မြေပဲဆီတစ်ပိဿာ ကျပ် (၁၈၀၀၀)၊ ကြက်သွန်ဖြူ တစ်ပိဿာ  ကျပ် (၉၀၀၀) ၊ ကြက်သွန်နီ  တစ်ပိဿာ  ကျပ် (၃၅၀၀) ၊ ဂျင်း တစ်ပိဿာ ကျပ် (၆၀၀၀) ၊ငရုတ်သီးခြောက် တစ်ပိဿာ ကျပ် (၁၅၀၀၀) ၊ ကုလားပဲခြမ်း တစ်ပိဿာ ကျပ် (၇၀၀၀) ၊ အာလူး တစ်ပိဿာ ကျပ်(၂၅၀၀) ၊ ပုစွန်ခြောက်တစ်ပိဿာ အကြီးအငယ်အလိုက် ကျပ် (၅၀၀၀၀ မှ ၈၀၀၀၀) အတွင်း၊ ငပိ တစ်ပိဿာအချော၊အကြမ်း ကျပ်(၆၀၀၀ မှ ၁၀၀၀၀) အတွင်း၊ ကြက်ဥ (၁၀) လုံး ကျပ်(၂၅၀၀ မှ ၂၈၀၀)အတွင်း၊ ငနီတူ တစ်ပိဿာ ကျပ်(၁၂၀၀၀)၊ ပြည်ဝက်ပုတ်၊ အင်းမဘက်မှ ငရုတ်သီးစိမ်း တစ်ပိဿာ ကျပ်(၂၅၀၀) ၊ဂေါ်ဖီထုပ်တစ်ထုပ် ကျပ် (၂၅၀၀) ၊ခရမ်းချဉ်သီး တစ်ပိဿာ ကျပ်(၃၀၀၀)၊ ဒေသထွက် ပဲထောင့်ရှည် တစ်ပိဿာကျပ် (၃၀၀၀) ၊ ဒေသထွက်ပိန်းဥ တစ်ပိဿာ ကျပ် (၄၀၀၀) အရောင်းအဝယ် ဖြစ်ပေါ်လျက်ရှိပါကြောင်း ဈေးသည်များထံမှ သိရှိရပါသည်။

DOCA(ရခိုင်)

      ပဲခူးတိုင်းဒေသကြီး၊ တောင်ငူမြို့တွင် ၂၀၂၃ ခုနှစ် ၊ အောက်တိုဘာ တတိယအပတ်က 92 RON တစ်လီတာလျှင် ၂၀၅၀ ကျပ်၊ 95 RON တစ်လီတာလျှင် ၂၁၅၀ ကျပ်၊ ဒီဇယ် တစ်လီတာလျှင် ၂၂၉၅ ကျပ်နှင့် ပရီမီယံဒီဇယ် တစ်လီတာလျှင် ၂၄၁၀ ကျပ်ရှိပါသည်။

          ယခုအောက်တိုဘာ စတုတ္ထပတ်တွင် တောင်ငူမြို့ New Day စက်သုံးဆီဆိုင်၌ 92 RON တစ်လီတာလျှင် ၂၁၀၅ ကျပ်၊ 95 RON တစ်လီတာလျှင် ၂၂၀၀ ကျပ်၊ ဒီဇယ် တစ်လီတာလျှင် ၂၃၄၅ ကျပ်နှင့် ပရီမီယံဒီဇယ် တစ်လီတာလျှင် ၂၄၆၅ ကျပ်ရှိပါသည်။

        အုတ်တွင်းမြို့ Petro K စက်သုံးဆီအရောင်းဆိုင်တွင်  92 RON တစ်လီတာလျှင် ၂၁၀၅ ကျပ်၊ 95 RON တစ်လီတာလျှင် ၂၁၉၅ ကျပ်၊ ဒီဇယ် တစ်လီတာလျှင် ၂၃၄၅ ကျပ်နှင့် ပရီမီယံဒီဇယ် တစ်လီတာလျှင် ၂၄၆၀ ကျပ်ရှိပါသည်။

           ရေတာရှည်မြို့ အောင်မေတ္တာ စက်သုံးဆီအရောင်းဆိုင်တွင်  92 RON တစ်လီတာလျှင် ၂၁၁၀ ကျပ်၊ 95 RON တစ်လီတာလျှင် ၂၂၀၀ ကျပ်၊ ဒီဇယ် တစ်လီတာလျှင် ၂၃၅၀ ကျပ်နှင့် ပရီမီယံဒီဇယ် တစ်လီတာလျှင် ၂၄၆၅ ကျပ် ရှိပါသည်။

            သို့ဖြစ်၍ အောက်တိုဘာ စတုတ္ထပတ်တွင် စက်သုံးဆီဈေးနှုန်းမှာ တစ်လီတာလျှင် ၅၀ ကျပ်မှ ၅၅ ကျပ် အထိ အနည်းငယ်တက်ကြောင်း သိရပါသည်။

DOCA(ပဲခူး)