ပြည်တွင်းကုန်သွယ်မှုသတင်း

          တောင်ငူမြို့နယ် ငါးဖယ်အင်းကျေးရွာအုပ်စုတွင် တောင်သူလယ်သမားများ မိုးစပါးများ ကို ရိတ်သိမ်းနေပြီဖြစ်ပါသည်။ ဗျော့ထွန်းစပါးနှင့် နှံကောက်စပါးများကို စိုက်ပျိုးကြပါသည်။ စပါး ရိတ်သိမ်းချွေလှေ့ခမှာ ယခင်နှစ်က တစ်ဧကလျှင် ၈၀၀၀၀ ကျပ်ရှိခဲ့ရာမှ ယခုနှစ်တွင် ရိတ်သိမ်း ချွေလှေ့ခ တစ်ဧကလျှင် ၁၂၀၀၀၀ ကျပ် ရှိပါသည်။

              စပါးများကို စပါးပွဲစားများက လယ်ကွင်းထဲအရောက်လာယူကြရာ ဈေးနှုန်းအနေဖြင့် ဗျော့ထွန်းစပါး တင်း ၁၀၀ လျှင် ၁၇၀၀၀၀၀ ကျပ်နှင့် နှံကောက်စပါး တင်း ၁၀၀ လျှင် ၁၅၈၀၀၀၀ ကျပ် ရှိပါသည်။

          ယခင်နှစ်များတွင် အချို့တောင်သူများက စက်ရုံများသို့ အရောက်တင်ပို့၍ ရောင်းချကြ သော်လည်း ယခုနှစ်တွင် စပါးရိတ်သိမ်းချိန်အထိ မိုးများရွာသွန်းနေသဖြင့် စပါးများ ပျက်စီးဆုံးရှုံးမှု မရှိစေရေးကို ဂရုပြုရသဖြင့် တောင်သူများအနေဖြင့် လယ်ကွင်းထဲအရောက် လာရောက်ရောင်းချ သည့် ပွဲစားများသို့ ရောင်းချကြကြောင်း သိရပါသည်။

DOCA(ပဲခူး)

   ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်ရှိ ဒိုးအင်းကျေးရွာအုပ်စုတွင် ကြံခင်းများအောင်မြင်ဖြစ်ထွန်းနေကြောင်းတွေ့ရပါသည်။ ကြံသည် နိုင်ငံတော်၏ အဓိကသီးနှံ ၁၀မျိုးတွင် တစ်ခုအပါအဝင်ဖြစ်သဖြင့် ပန်းတိုင်အထွက်နှုန်းထွက်ရှိစေရန်အတွက် အားပေးဆောင်ရွက်လျက်ရှိပါသည်။ ကြံကို စပါးစိုက်ပျိုးရန်ခက်ခဲသည့် သဲဆန်သောမြေများနှင့် ကုန်းကျသောမြေများတွင်သာစိုက်ပျိုးကြပါသည်။ ကညင်ချောင်းကျေးရွာအုပ်စု၊ စပါးကြွယ်ကျေးရွာအုပ်စုများတွင်လည်း ကြံစိုက်ပျိုးကြပါသည်။

   မြန်မာနိုင်ငံတွင် ကြံကို ရှေးကတည်းကပင် စိုက်ပျိုးကြထုတ်လုပ်ကြပါသည်။ ကြံစိုက်ပျိုးသည့် အဓိကရည်မှန်းချက်မှာ သကြားရရှိနိုင်ရန်အတွက်ဖြစ်ပါသည်။ သကြားသည် လူတို့၏အစားအစာတွင် အရေးပါသောကုန်ပစ္စည်းတစ်မျိုးဖြစ်ပါသည်။ စိုက်ပျိုးသည့်တောင်သူများနှင့် ကြံစိုက်ခင်းများသည် ခေတ်မီသကြားစက်ကြီးများတည်ရှိမှုနှင့် ဈေးကောင်းပေးဝယ်ယူရေးသည်လည်း လိုအပ်သည်ကိုတွေ့ရပါသည်။ ကြံစိုက်ပျိုးရေးခြံများမှ မျိုးကောင်းမျိုးသန့်များကို လွယ်ကူစွာဝယ်ယူရရှိခြင်း၊ စက်ရုံကြီးများမှ ဈေးကောင်းပေးဝယ်ယူခြင်းတို့ကြောင့် မြေလွတ်မြေရိုင်းများတွင် အများအပြားစိုက်ပျိုးလာကြပါသည်။

     ယခင်နှစ် ကြံပေါ်ချိန်၌ ကြံတစ်တန်လျှင် စက်ရုံအရောက်ဈေး ၈၅၀၀၀ကျပ်ရရှိပါသည်။ ယခုနှစ်ကြံပေါ်ချိန်တွင် ကြံတစ်တန်လျှင် စက်ရုံအရောက်ဈေး ၁၁၀၀၀၀ကျပ်ဖြင့် ဝယ်ယူမည်ဖြစ်ကြောင်းသိရပါသည်။ တောင်ငူမြို့နယ်တွင် သက်ဆိုင်ရာဌာနများ၏ စာရင်းများအရ ကြံခင်းသစ် ၂၄၅၀ဧကနှင့်   လမိုင်း ၂၂၇၆ဧကရှိကြောင်းသိရပါသည်။ ဒီဇင်ဘာလနှင့် ဇန်နဝါရီလများတွင် စတင်စိုက်ပျိုးသည့်ကြံများသည် ယခုအောက်တိုဘာလတွင် ၁၀လသားအရွယ်ရှိသော အောင်မြင်ဖြစ်ထွန်းနေသည့် ကြံခင်းအဖြစ်တွေ့ရပါသည်။ နိုဝင်ဘာလနှင့် ဒီဇင်ဘာလများတွင် ကြံရွက်ချခြင်း၊ ပိုးမွှားကာကွယ်ခြင်း၊ မီးဘေးအန္တရာယ်ကာကွယ်ခြင်းများဆောင်ရွက်နိုင်ပါက ကြံစိုက်တောင်သူကြီးများဝင်ငွေတိုးတော့မည်ဖြစ်ပါကြောင်း ရေးသားတင်ပြလိုက်ရပါသည်။

DOCA(ပဲခူး)

    တောင်ငူခရိုင်၊ ရေတာရှည်မြို့နယ်၌ မိုးစပါးစိုက်ဧက ၈၀၇၄၄ဧကရှိပြီး ၂၀၂၃ခုနှစ်၊ အောက်တိုဘာလတွင် ၉၃၀၀ဧကခန့်ရိတ်သိမ်းပြီးဖြစ်ပါသည်။ စပါးဈေးနှုန်းမှာ ၅၄ပေါင်ပါ တစ်တင်းလျှင် အစိုဓာတ် ၂၅%ပါဝင်ပြီး တင်း၁၀၀လျှင် ကွင်းဈေး ၁၅၉၀၀၀၀ကျပ်ရှိကာ မြို့ပေါ်ရှိစက်ရုံအရောက်ဈေးမှာ ၁၆၅၀၀၀၀ကျပ်ရှိပါသည်။

     ဆန်ဈေးမှာ တစ်အိတ်လျှင် ၅၉၀၀၀ကျပ်မှ ၆၀၀၀၀ကျပ်အထိရှိပါသည်။ တောင်သူလယ်သမားအများစုမှာ မြို့ပေါ်အရောက်သယ်၍ စပါးကို တိုက်ရိုက်ရောင်းချကြပြီး တောင်သူတချို့ မှာ ဆန်ကြိတ်ပြီးမှ ကြိတ်ခွဲထွက်ရှိသည့် ဆန်နှင့်ဆန်ထွက်ပစ္စည်းကို ပြန်လည်ရောင်းချကြပါသည်။

     ဆန်ကြိတ်ခွဲပြီးမှ ထွက်ရှိလာသော ဆန်နှင့်ဆန်ထွက်ပစ္စည်းကိုရောင်းချခြင်းသည် စပါးကို တိုက်ရိုက်ရောင်းချခြင်းထက် အကျိုးအမြတ်ပိုသော်လည်း ရာသီချိန်အားလပ်မှုမရှိခြင်းကြောင့် တောင်သူလယ်သမားအများစုမှာ စပါးကို တိုက်ရိုက်ရောင်းချကြကြောင်းသိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရှိရာ ၂၀၂၃ခုနှစ်၊ အောက်တိုဘာလ၊ စတုတ္ထပတ်အတွင်း အရောင်းအဝယ်ဖြစ်သည့် သီးနှံနှင့်ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့်ဆက်သွယ်မေးမြန်းခဲ့ပါသည်။ အစေ့ထုတ်ပြောင်းမှာ စက်တင်ဘာလ၊ တတိယပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး အောက်တိုဘာလ၊ စတုတ္ထပတ်တွင် အရောင်းအဝယ်ဖြစ်သည့်ဈေးနှုန်းမှာ အစေ့ထုတ်ပြောင်းတစ်တင်းလျှင် (၁၇၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ (၂၄၀၀)တင်း/ (၆၀)တန်ဖြစ်ကြောင်း၊ ယခင်အပတ်နှင့်ယခုအပတ်တို့တွင် အရောင်းအဝယ်ဖြစ်သည့်ဈေးနှုန်းတို့ကိုနှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင် (၁၆၃၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် အစေ့ထုတ်ပြောင်းတစ်တင်းလျှင် (၇၀ဝိ/-) ကျပ်ဈေးပိုခဲ့ကြောင်း၊  ယခင်နှစ်ကာလတူနှင့် အရောင်းအဝယ်ဖြစ်သည့်ဈေးနှုန်းတို့ကိုနှိုင်းယှဉ်ပါက ယခင်နှစ်ကာလတူ၌ အစေ့ထုတ်ပြောင်းတစ်တင်းလျှင် (၁၇၃၀ဝိ/-)ကျပ်ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူအောက် အစေ့ထုတ်ပြောင်းတစ်တင်းလျှင် (၃၀ဝိ/-)ကျပ်ဈေးလျော့နည်းခဲ့ကြောင်း သတင်းရရှိပါသည်။

DOCA(စစ်ကိုင်း)

   တောင်ငူမြို့တွင် အခြေခံစားသောက်ကုန်များဖြစ်သော မြေပဲဆီမှာ ၂၀၂၃ ခုနှစ် ၊ အောက်တိုဘာလ စတုတ္ထပတ်တွင် တစ်ပိဿာလျှင် ၁၇၀၀၀ ကျပ်ဖြင့် ဈေးနှုန်းတည်ငြိမ်နေပြီး စားအုန်းဆီမှာ တစ်ပိဿာလျှင် ၅၀၀၀ ကျပ်ဖြင့် ရောင်းချလျက်ရှိပါသည်။

     ကြက်သွန်နီမှာ ၂၀၂၃ ခုနှစ် ၊ အောက်တိုဘာလ တတိယပတ်တွင် တစ်ပိဿာလျှင် ၂၄၀၀ ကျပ်၊ အလတ် ၂၈၀၀ ကျပ်၊ အကြီး ၃၂၀၀ ကျပ်နှင့် တရုတ်ကြက်သွန်နီ ၃၅၀၀ ကျပ်ရှိရာမှ ယခုအောက်တိုဘာလ စတုတ္ထပတ်တွင် တစ်ပိဿာလျှင် အသေး ၃၀၀၀ ကျပ်၊ အလတ် ၃၂၀၀ ကျပ်၊ အကြီး ၃၅၀၀ ကျပ်နှင့် တရုတ်ကြက်သွန်နီ ၃၆၀၀ ကျပ်ဖြင့် ဈေးနှုန်း အနည်းငယ်တက်ပါသည်။

    ကြက်သွန်ဖြူမှာ ယခုအောက်တိုဘာလ စတုတ္ထပတ်တွင် တစ်ပိဿာလျှင် အသေး ၈၀၀၀ ကျပ်၊ အလတ် ၈၅၀၀ ကျပ်၊ အကြီး ၉၀၀၀ ကျပ်၊ တရုတ်ကြက်သွန်ဖြူ ၉၀၀၀ ကျပ်ဖြင့် ဈေးနှုန်း တည်ငြိမ်နေပါသည်။

    အာလူးမှာ ယခင် အောက်တိုဘာလ တတိယပတ်က တစ်ပိဿာလျှင် အသေး ၂၃၀၀ ကျပ် ၊ အလတ် ၂၆၀၀ ကျပ်၊ အကြီး ၃၀၀၀ ကျပ်၊ တရုတ်အာလူး ၃၀၀၀ ရှိရာမှ ယခု အောက်တိုဘာလ စတုတ္ထပတ်တွင် တစ်ပိဿာလျှင် အသေး ၂၈၀၀ ကျပ်၊ အလတ် ၃၀၀၀ ကျပ်၊ အကြီး ၃၅၀၀ ကျပ်၊ တရုတ်အာလူး ၃၅၀၀ ကျပ်ဖြင့် ဈေးနှုန်းအနည်းငယ်တက်ပါသည်။

     ငရုတ်သီးခြောက် အပု/အရှည်မှာ ယခုအောက်တိုဘာလ စတုတ္ထပတ်တွင် တစ်ပိဿာလျှင် ၁၂၀၀၀ ကျပ်မှ ၁၅၀၀၀ ကျပ်၊ ငရုတ်သီးခြောက် အပွမှာ တစ်ပိဿာလျှင် ၂၃၀၀၀ ကျပ်မှ ၂၅၀၀၀ ကျပ်၊ မြေပဲဆန်(အနီ)မှာ တစ်ပိဿာလျှင် ၈၂၀၀ ကျပ်၊ မြေပဲဆန်(အဖြူ)မှာ တစ်ပိဿာလျှင် ၇၆၀၀ ကျပ်၊ ကုလားပဲခြမ်းမှာ ယခင် အောက်တိုဘာလ တတိယပတ်က တစ်ပိဿာလျှင် ၆၃၀၀ ကျပ် ရှိရာ မှ ယခုအောက်တိုဘာလ စတုတ္ထပတ်တွင် တစ်ပိဿာလျှင် ၆၀၀၀ ကျပ်ဖြင့် ဈေးနှုန်း တည်ငြိမ် နေကြောင်း သိရပါသည်။

DOCA(ပဲခူး)