ပြည်တွင်းကုန်သွယ်မှုသတင်း

သရက်သီး ရာသီချိန်ကုန်တော့မည် ဖြစ်သော်လည်း ရင်ကွဲသရက်နှင့် ပတ္တမြားငမောက် သရက်သီးများမှာ ဝင်ရောက်လျက်ရှိကြောင်း သိရသည်။ ပတ္တမြားငမောက် သရက်သီးများသည် အလုံး အရွယ်အစားကြီးပြီး အသားထူသောကြောင့် လူကြိုက်များသည်။ ပတ္တမြားငမောက် သရက် မျိုးများကို မုံရွာမြို့နယ်နှင့် အနီးတစ်ဝိုက် ဒေသများရှိ ကျေးရွာများမှ စိုက်ပျိုး၍ စစ်ကိုင်းတိုင်း ဒေသကြီး၊ မုံရွာခရိုင်၊ မုံရွာမြို့နယ်ရှိ ဈေးတို့တွင် လာရောက် ရောင်းချလျက်ရှိရာ ဇွန်လ စတုတ္ထ ပတ်တွင် ဖြစ်ပေါ်နေသော ပတ္တမြားငမောက်သရက်သီးဈေးနှုန်းများအနေဖြင့် ( ၁ )လုံးလျှင် ( ၅၀၀ ) ကျပ်၊ ( ၁ ) ပိဿာလျှင် ( ၄၀၀၀)ကျပ်ဖြင့် ရောင်းချလျက်ရှိပြီး အရောင်းသွက်လျက်နေကြောင်း သိရသည်။ DOCA(စစ်ကိုင်း)

ပြည်ထောင်စုနယ်မြေ၊ နေပြည်တော်အတွင်း မွေးမြူရေးကြက်သားဈေးနှုန်းအနေဖြင့် မန္တလေးတိုင်းဒေသကြီး ဈေးကွက်များမှ ဒေသတွင်းရှိ မွေးမြူရေးခြံများသို့ ဝင်ရောက် ဝယ်ယူခဲ့မှု ကြောင့် ခြံဖမ်းဈေးနှုန်း မြင့်တက်မှုရှိခဲ့ပါသည်။ ဒေသတွင်းသုံးစွဲမှုတွင်လည်း ပွဲတော်ရက်ကာလ အတွင်း သုံးစွဲမှုမြင့်တက်ခဲ့သဖြင့် ကြိုတင်မှာ ယူခဲ့မှုအနေအထားများကြောင့် ဈေးနှုန်းမြင့်တက် မှုရှိခဲ့ပါသည်။ လက်ကားဒိုင်(အကောင်လိုက်) ရောင်းဈေးနှုန်း (၁၃၄၀၀)ကျပ်မှ (၁၄၁၀၀)ကျပ် ဖြစ်ခဲ့ သဖြင့် လက်လီ(ခုတ်သား)ဈေးနှုန်း(၈၀၀)ကျပ်မြင့်တက်မှုရှိခဲ့ပါသည်။ ဒေသတွင်းဈေးကွက်များသို့ အောင်ပန်းဈေးကွက်များမှသာ ဝင်ရောက်မှုရှိနေပါသည်။ ဈေးကွက်များသို့ ပုံမှန်ဝင်‌ရောက်မှု ရှိသော်လည်း ဒေသတွင်းစိုက်ပျိုးထွက် ရှိမှုများမှ စားဖိုဆောင် သီးနှံများ ထွက်ရှိနေမှုကြောင့် အာလူးသုံးစွဲမှုလျော့ကျခဲ့ပါသည်။ အောင်ပန်းဈေးကွက်အနီးရှိ စိုက်ပျိုး မှုများမှ ထွက်ရှိမှုအားကောင်းနေသဖြင့် သီးနှံပွဲရုံ များမှ ဝယ်ယူရသည့် ဈေးနှုန်း နိမ့်ကျလာမှုနှင့်အတူ ဒေသတွင်းလက်လီဈေးနှုန်းများတွင်လည်း ကျဆင်းမှုရှိလာခဲ့ပါသည်။ အာလူးဈေးနှုန်း အနည်းငယ် ထပ်မံကျဆင်းနိုင် သည်ဟုလည်း သိရှိရပါသည်။ DOCA(နေပြည်တော်ကောင်စီ)

ပြည်ထောင်စုနယ်မြေ၊ နေပြည်တော်အတွင်း ဒေသတွင်းမှ ထွက်ရှိမှုအားကောင်းနေပြီး၊ ရှမ်း(တောင်)မှ ဝင်ရောက်မှု ပုံမှန်ရှိခဲ့သည်ကိုတွေ့ရပါသည်။ ဒေသတွင်းထွက်ရှိမှုများမှ ရပ်ကွက်/ ကျေးရွာများ အတွင်းရှိ လက်လီဆိုင်များသို့အရောက် ရောင်းချလာမှုကိုတွေ့ရပြီး၊ ရှမ်း(တောင်)မှ ဝင်ရောက်မှုများတွင်လည်း ဈေးကွက်ငယ်များအထိ ရောက်ရှိနေမှုများကြောင့် ကြက်ဥဈေးနှုန်း ကျဆင်းလာမှုကို တွေ့ရပါသည်။ ဒေသတွင်း မွေးမြူရေးခြံများမှ ထွက်ရှိမှုနှင့် မန္တလေးမှ ပုံမှန်ဝင်ရောက်နေမှုများ ရှိနေပါသည်။ ဒေသတွင်းနွေးစပါးရိတ်သိမ်းပြီး၊ စားကျက်များနှင့် မိုးစပါးစိုက်ပျိုးရန် ပြင်ဆင်နေသော စားကျက်များ သို့ ဘဲရွှေ့ပြောင်းမွေးမြူသူများ ရောက်ရှိလာပြီး၊ ဘဲဥ ထွက်ရှိမှုများမှလည်း ဒေသတွင်း ဈေးကွက်များ သို့ ရောက်ရှိလာပါသည်။ ဘဲဥ ဝင်ရောက်မှု ပုံမှန်ထက် ပိုမိုခဲ့ပြီး၊ သုံးစွဲမှုတွင်လည်း လျော့ကျမှုရှိခဲ့ပါ သည်။ ကြက်ဥ ဈေးနှုန်းလျော့ကျမှုရှိခဲ့သဖြင့် ဈေးနှုန်းတွင် နိမ့်ကျမှု ရှိလာသည်ကိုတွေ့ရပါသည်။ DOCA(နေပြည်တော်ကောင်စီ)

ပြည်ထောင်စုနယ်မြေ၊ နေပြည်တော်အတွင်း ကြက်သွန်နီ ဈေးကွက်အနေဖြင့် ဒေသတွင်း စိုက်ပျိုးထားရှိမှုနှင့် မန္တလေးတိုင်းဒေသကြီးတို့မှ ဒေသတွင်းဈေးကွက်သို့ ဝင်ရောက်မှုများရှိခဲ့ပါ သည်။ ဈေးကွက်လိုအပ်ချက်ထက် ပိုမိုဝင်ရောက်နေခြင်းကြောင့် ဈေးနှုန်းကျဆင်းနေသည်ကို တွေ့ရှိရပါသည်။ ကြက်သွန်နီ ဈေးနှုန်းအနေဖြင့်လည်း ပြည်ပတင်ပို့မှုမရှိခြင်းကြောင့် တစ်ပိဿာ လျှင် အနိမ့်ဆုံး(၁၄၀၀)ကျပ်မှ အမြင့်ဆုံး (၂၀၀၀)ကျပ်အတွင်း ဖြစ်ပေါ်လျက်ရှိပြီး ဈေးနှုန်း တည်ငြိမ် နေကြောင်း တွေ့ရှိရပါသည်။ ဒေသတွင်း စိုက်ပျိုးထွက်ရှိသည့် ကုလားပဲများကို မန္တလေးမြို့ရှိ ပဲခွဲစက်များသို့ ကုန်ကြမ်း တင်ပို့မှုများရှိပြီး မန္တလေးမှ ပြန်လည်ဝင်ရောက်လာသော ကုလားပဲခြမ်းများမှာ ဒေသတွင်းဖူလုံမှုရှိ ပါသည်။ အလားတူ မိတ္ထီလာနှင့် ပျော်ဘွယ် ဒေသတို့မှလည်း ကုလားပဲခြမ်းဝင်ရောက်မှုများ တွေ့ရှိရ ပါသည်။ ယင်းအပြင် ဧပြီလနှင့်မေလများတွင် ဝန်ကြီးဌာနအသီးသီးရှိ ဝန်ထမ်းများသို့ ကုလားပဲ ခြမ်းများ ထောက်ပံ့လျက်ရှိသဖြင့် ဈေးကွက်၌ ကုလားပဲရောင်းလိုအားနှင့် ဝယ်လိုအားမျှခြေရှိသဖြင့် ဈေးနှုန်းတည်ငြိမ်လျက်ရှိပါကြောင်း တွေ့ရှိရပါသည်။ ကြက်သွန်ဖြူဝင်ရောက်မှုအနေဖြင့် အောင်ပန်းဈေးကွက်မှ ကြက်သွန်ဖြူဝင်ရောက်နေမှု အများဆုံးတွေ့ရှိရပြီး၊ မန္တလေးဈေးကွက်မှလည်းဝင်ရောက်လျက်ရှိပါသည်။ ဒေသတွင်းကြက်သွန်ဖြူ ထွက်ရှိမှု အနည်းငယ်သာရှိပြီး အောင်ပန်း ဈေးကွက်အတွင်းရှိ သီးနှံပွဲရုံများမှ အိတ်ဆွဲ‌ဈေးနှုန်း တစ်ပိဿာလျှင် (၇၀၀၀)ကျပ်ရှိချိန်တွင် ဒေသတွင်းလက်လီ ရောင်းဈေးတစ်ပိဿာလျှင် (၁၀၀၀၀) ကျပ်မှ (၁၂၀၀၀)ကျပ် ဖြစ်ပေါ်မှုကို တွေ့ရှိပါသည်။ ဒေသတွင်း ငရုတ်စိုက်ပျိုးထုတ်လုပ်မှုရှိပြီး မန္တလေးတိုင်းနှင့် ရှမ်း(တောင်)မှ ဝင်ရောက်မှု ရှိနေပါသည်။ ရှမ်း(တောင်)မှ ဝင်ရောက်မှုရှိသော ငရုတ်ခြောက်ဈေးနှုန်းမြင့်မားမှုကိုတွေ့ရှိရပါသည်။ ဒေသတွင်း ငရုတ်စိုစိုက်ပျိုးမှုအားကောင်းပြီး၊ အခြားတိုင်းဒေသကြီး/ပြည်နယ်များသို့ တင်ပို့နိုင်သည် အထိ ထွက်ရှိနေပါသည်။ ဒေသတွင်းစိုက်ပျိုးသည့် ငရုတ်စိုသုံးစွဲမှုပိုများ လာခြင်းကြောင့် ငရုတ် ခြောက် လိုအပ်ချက်နည်းလာပြီး ဈေးနှုန်းတည်ငြိမ်နေကြောင်း သိရှိရပါသည်။ DOCA(နေပြည်တော်ကောင်စီ)