ပြည်တွင်းကုန်သွယ်မှုသတင်း

   “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့် မျှော်မှန်းချက်နှင့်အညီ အကောင်အထည်ဖော်ဆောင်ရွက်လျက်ရှိရာ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးအနေဖြင့် သီးနှံဈေးနှုန်း၊ ဈေးကွက်နှင့် စီးဝင်/စီးထွက်မှုအခြေအနေများကို စာရင်းကောက်ယူလျက်ရှိရာ ကန့်ဘလူခရိုင်အတွင်း  ဆန်စီးဝင်/ စီးထွက်အခြေအနေများကိုဖော်ပြလိုက်ရပါသည်။

     ကန့်ဘလူခရိုင်အနေဖြင့် ၂၀၂၃ခုနှစ်၊ အောက်တိုဘာလ စတုတ္ထပတ်အတွင်းဖြစ်ပေါ်ခဲ့သော စပါး၊ ဆန်ဈေးနှုန်းများမှာ ရွှေဘိုပေါ်ဆန်း စပါးတင်း(၁၀၀)လျှင် ကျပ်၃၄၀၀၀၀၀၊ ဧရာမင်း စပါးတင်း (၁၀၀)လျှင် ကျပ်၃၀၀၀၀၀၀နှင့် နွေစပါး ရွှေဝါထွန်းစပါးတင်း(၁၀၀)လျှင် ကျပ်၁၆၈၀၀၀၀၊ ရွှေဘိုပေါ်ဆန်း ဆန်(၂၄)ပြည်ပါ တစ်အိတ်လျှင် ကျပ်၁၂၂၀၀၀၊ ဧရာမင်းဆန်(၂၄)ပြည်ပါ တစ်အိတ်လျှင် ကျပ်၁၂၇၀၀၀နှင့် ရွှေဝါထွန်းဆန်(၂၄)ပြည်ပါ တစ်အိတ်လျှင် ကျပ်၆၈၀၀၀ဖြစ်ပြီး  ကန့်ဘလူခရိုင်မှ အခြားတိုင်းဒေသကြီးနှင့်ပြည်နယ်များသို့ ဆန်စီးထွက်မှုမှာ  မန္တလေးတိုင်းသို့ အိတ်ရေ ၅၀၀အိတ်၊ ကချင်ပြည်နယ်သို့ အိတ်ရေ ၅၀၀အိတ် စုစုပေါင်းအိတ်ရေ ၁၀၀၀အိတ်၊ တန်အားဖြင့် (၅၀)တန်စီးထွက်ခဲ့ကြောင်း ဒေသခံဆန်စက်လုပ်ငန်းရှင်နှင့်ချိတ်ဆက်မေးမြန်းမှုအရ သတင်းရရှိပါသည်။

DOCA(စစ်ကိုင်း)                 

  ကရင်ပြည်နယ်သည် စပါး၊ ပဲ၊ ပြောင်းနှင့် ဆီထွက်သီးနှံများကို အဓိကထားစိုက်ပျိုးလျက်ရှိပြီး ဆီထွက်သီးနှံ မိုးမြေပဲကို ဘားအံမြို့နယ်တွင် (၁၄၂၇)ဧက၊  လှိုင်းဘွဲ့မြို့နယ်တွင် (၆၅၁)ဧက၊ သံတောင်ကြီးမြို့နယ်တွင် (၄၂၃)ဧက၊ ကော့ကရိတ်မြို့နယ်တွင်(၃၃၅)ဧက၊ ကြာအင်းဆိပ်ကြီး မြို့နယ်တွင် (၇၂၅)ဧက၊ မြဝတီမြို့နယ် တွင် (၁၁၉၆)ဧက၊ ဖာပွန်မြို့နယ်တွင် (၂၉)ဧက၊ စုစုပေါင်း ပြည်နယ်ချုပ် (၄၇၈၆)ဧကစိုက်ပျိုးကြောင်း သိရသည်။

       ကရင်ပြည်နယ်တွင် မိုးမြေပဲကို ဇွန်လတွင် စတင်စိုက်ပျိုးကြပြီး စိုက်ပျိုးရာ၌ မျိုးအနေဖြင့် (၁)ဧကလျှင် မြေပဲအတောင့်ကို စိုက်ပျိုးပါက(၆)တင်းခန့် ကုန်ကျကြောင်း၊ (၁)ဧကကုန်ကျစရိတ်အနေဖြင့် မျိုး၊ ထွန်ယက်ခ၊ လုပ်သားခအပါအဝင် စုစုပေါင်း (၅၀၀၀၀၀)ကျပ်ခန့်ကုန်ကျပြီး (၁)ဧကလျှင် ပျမ်းမျှအထွက်နှုန်းအနေဖြင့် (၃၅)တင်းခန့်ထွက်ရှိပြီး တစ်တင်းပျမ်းမျှရောင်းဈေး ၂၈၀၀၀ ကျပ်ဖြစ် သောကြောင့်တစ်ဧက အကျိုးအမြတ်အနေဖြင့်    ၅ သိန်းကျပ်ဝန်းကျင်ခန့်ရရှိကြောင်းနှင့် တောင်သများ တွက်ခြေကိုက်လျက်ရှိကြောင်း သိရသည်။

   ၂၀၂၃ ခုနှစ်၊ အောက်တိုဘာလအတွင်း မိုးမြေပဲရိတ်သိမ်းမှုအနေဖြင့် ဘားအံမြို့နယ်တွင်  (၉၂၈)ဧက၊  လှိုင်းဘွဲ့မြို့နယ်တွင် (၁၇၆)ဧက၊ သံတောင်ကြီးမြို့နယ်တွင် (၂၈၇) ဧက၊ ကော့ကရိတ်မြို့နယ်တွင် (၂၈၁)ဧက၊ ကြာအင်းဆိပ်ကြီးမြို့နယ်တွင် (၃၁၇)ဧက၊ ဖာပွန်မြို့နယ်တွင် (၂၉)ဧက၊ စုစုပေါင်း(၂၀၁၈)ဧက ရိတ်သိမ်းပြီးဖြစ်ကြောင်း ပြည်နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရ သိရှိရသည်။

DOCA(ကရင်)

     ကရင်ပြည်နယ်၊ ဘားအံမြို့ပေါ်ရှိ ရေပေါ်ဈေးသို့ တောင်ကြီးမြို့မှ အာတာလွတ်ဥများ အောက်တိုဘာလ တတိယအပတ်မှ စတင်ဝင်ရောက်လာကြောင်း သိရပါသည်။ ယခုလို ပေါ်ဦးပေါ်ဖျား အချိန်တွင် အာတာလွတ်ဥများ အဝယ်လိုက်နေပြီး ရက်ခြားတစ်ပတ်လျှင် ပိဿာချိန် ၈၀ ကျော်ဝင်ရောက်မှုများရှိနေပြီး ဘားအံမြို့ပေါ်ရှိ ဈေးများတွင် အာတာလွတ်ဥများကို အရွယ်အစားအလိုက် တစ်ပိဿာလျှင် ၂၅၀၀- ၃၀၀၀ ကျပ်နှုန်းဖြင့် အရောင်းအဝယ်ဖြစ်နေကြောင်း သိရသည်။

      မြန်မာ့အစားအစာတွေထဲမှာ နေရာတစ်နေရာယူထားတဲ့ အာတာလွတ်ဥက ဆေးဖက်ဝင်ကြောင်း သိရှိရပါသည်။ အာတာလွတ်ဥမှာ သတ္တုဓါတ်များ ကြွယ်ဝစွာပါဝင်ပြီး အမျှင်ဓါတ်နဲ့ ပရိုတင်းဓါတ်များ ပါဝင်သည့်အတွက် အာဟာရပြည့်စုံ၍ ကျန်းမာရေးအတွက်များစွာ အထောက်အကူဖြစ်စေသော သီးနှံတစ်မျိုးပဲဖြစ်သည်။ အာတာလွတ်စပေါ်သော ရာသီဖြစ်၍ အရသာဆိမ့်ဆိမ့်လေးနဲ့ အရသာရှိသော အာတာလွတ်ဥကို ဆီ၊ ဆားလေးနှင့် နှမ်းထောင်းလေးဖြူးပြီး တို့စားခြင်း၊ အာတာလွတ်ဥပြုတ်ကို ပါးပါးလှီးပြီး အုန်းသီး၊ သကြားတို့ဖြင့်လည်း နယ်စားခြင်း၊ အာတာလွတ်ဥကို မုန့်နှစ်အဖြစ်ပြုလုပ်၍ အကြွပ်ကြော်စားခြင်း စသည့်ဖြင့်လည်း စားသုံးကြကြောင်း သိရသည်။

DOCA(ကရင်)

     အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၃ခုနှစ်၊ အောက်တိုဘာလ(၁၈)ရက်နေ့မှ အောက်တိုဘာလ(၂၄)ရက်နေ့အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်းသိရှိရပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (တစ်ပိဿာ)လျှင် ကျပ် (၁၄၀၀မှ ၁၈၀၀) အတွင်း၊ ဂေါ်ဖီထုပ်(တစ်ထုပ်)လျှင် ကျပ် (၅၀၀မှ ၁၀၀၀) အတွင်း၊ ပန်းဂေါ်ဖီ(တစ်ထုပ်)လျှင် ကျပ် (၁၀၀၀မှ ၂၀၀၀) အတွင်း၊ အာလူး(တစ်ပိဿာ)လျှင် ကျပ် (၂၂၀၀မှ ၂၅၀၀) အတွင်း၊ မုန့်လာဥနီ(တစ်ပိဿာ)လျှင် ကျပ် (၃၀၀၀မှ ၃၅၀၀) အတွင်း၊ ရွှေဖရုံသီး(တစ်လုံး)လျှင် ကျပ် (၁၀၀၀မှ ၄၅၀၀) အတွင်း၊ ဘူးသီး(တစ်လုံး)လျှင် ကျပ် (၁၂၀၀မှ ၃၅၀၀) အတွင်း၊ မုန်ညှင်း(ထုပ်)(တစ်ပိဿာ)လျှင် ကျပ် (၄၀၀၀မှ ၄၅၀၀) အတွင်း၊ ကြက်သွန်နီ(ဆိပ်ဖြူ)တစ်ပိဿာလျှင် ကျပ် (၂၂၀၀မှ ၃၀၀၀) အတွင်း၊ ကြက်သွန်ဖြူ(ရှမ်း) (တစ်ပိဿာ)လျှင် ကျပ် (၇၂၀၀မှ ၈၀၀၀) အတွင်း၊ ကြက်သွန်ဖြူ (ကြူကုတ်) (တစ်ပိဿာ) လျှင် ကျပ် (၇၈၀၀မှ ၇၉၀၀) အတွင်း၊ ချင်း(တစ်ပိဿာ)လျှင် ကျပ် (၄၅၀၀မှ ၅၅၀၀) အတွင်း၊ ဆလပ်ရွက် (တစ်စည်း) လျှင် ကျပ် (၃၀၀မှ ၄၀၀) အတွင်း၊ ချဉ်ပေါင်ရွက်(တစ်စည်း)လျှင် ကျပ် (၂၀၀မှ ၃၀၀) အတွင်း၊ ခရမ်းသီး  (ရှည်) (တစ်ပိဿာ) လျှင် ကျပ် (၁၂၀၀မှ ၂၀၀၀) အတွင်း၊ သံပရာသီး(တစ်လုံး)လျှင် ကျပ် (၈၀မှ ၁၂၀) အတွင်း၊ ငရုတ်သီးစိမ်း (ကျောက်စိမ်း) (တစ်ပိဿာ) လျှင် ကျပ် (၂၁၀၀မှ ၂၅၀၀) အတွင်း၊ ဖရဲသီး (အကြီး၊ အလတ်၊ အသေး) တစ်လုံးလျှင် ကျပ် (၁၅၀၀မှ ၆၃၀၀) အတွင်းဖြစ်ကြောင်းနှင့် တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပရာသီးအလုံးပေါင်း (၃၇၃၅၆၀)ကျော်၊ ခရမ်းသီး(ရှည်) (ပိဿာ) (၃၈၁၄၀)ကျော်၊ ဘူးသီးအလုံးပေါင်း (၃၃၃၅)ကျော်၊ ရွှေဖရုံသီးအလုံးပေါင်း(၈၉၆၅)ကျော်၊ ဂေါ်ဖီထုပ်ပေါင်း (၅၅၆၀၀)ကျော်၊ ပန်းဂေါ်ဖီထုပ်ပေါင်း (၄၆၃၂၅)ကျော်၊ မုန်ညှင်းထုပ်(ပိဿာ) ပေါင်း (၉၄၉၀)ကျော်၊ ဖရဲသီးလုံးပေါင်း (၂၀၉၅၀)ကျော်  အသီးသီးကုန်အဝင်ရှိကြောင်းသိရပါသည်။

DOCA(ရန်ကုန်)

    ၂၀၂၄ခုနှစ်၊ ဆောင်းသီးနှံ၊ နွေစပါးစိုက်တောင်သူများအား မြန်မာ့လယ်ယာဖွံ့ဖြိုးရေးဘဏ်မှ စိုက်ပျိုးစရိတ်ချေးငွေစာချုပ်ချုပ်ဆိုနိုင်ရေးအတွက် ဆောင်းသီးနှံ၊ နွေစပါးစီမံကိန်းထုတ် ချေးငွေအကြံပေးအဖွဲ့လုပ်ငန်းညှိနှိုင်းအစည်းအဝေးကို ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၊ အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူးရုံး(ရုံးချုပ်)၌ ၂၀၂၃ခုနှစ်၊ အောက်တိုဘာလ ၁၆ရက်နေ့၊ နေ့လယ် (၃း၀၀) နာရီအချိန်တွင် ကျင်းပခဲ့ကြောင်းသိရသည်။

     အဆိုပါ လုပ်ငန်းညှိနှိုင်းအစည်းအဝေးအစီအစဉ်တွင် ကော့မှူးမြို့နယ်၊ မြန်မာ့လယ်ယာဖွံ့ဖြိုးရေးဘဏ်မှ မန်နေဂျာ ဦးတင်မောင်သိန်းက ချေးငွေထုတ်ချေးပေးရသည့်ရည်ရွယ်ချက်နှင့် ချေးငွေထုတ်ချေးရာတွင် တောင်သူလယ်သမားဘက်မှ  လိုက်နာရမည့်စည်းကမ်းများ၊ လယ်ယာမြေလုပ်ပိုင်ခွင့် ပုံစံ(၇) မူရင်းကိုတင်ပြမှသာ ချေးငွေထုတ်ချေးပေးမည်ဖြစ်ကြောင်း၊ တစ်ဧကလျှင် ကျပ်တစ်သိန်းခွဲနှုန်းဖြင့် ကျေးရွာအုပ်စု (၃၅) အုပ်စုနှင့် ချေးငွေစုစုပေါင်း ကျပ် (၃၇၅) သိန်းထုတ်ချေးပေးမည်ဖြစ်ပြီး၊ အောက်တိုဘာလ ၁၇ရက်နေ့တွင် ကျွဲလတောကျေးရွာ၌ စတင်ထုတ်ချေးပေးသွားမည်ဖြစ်ကြောင်း ရှင်းလင်းပြောကြားဆွေးနွေးခဲ့ပြီး မြို့နယ်အုပ်ချုပ်ရေးမှူး ဦးကျော်ဒေဝကလည်း ချေးငွေများထုတ်ချေးရာတွင် ဆောင်းသီးနှံ၊ နွေစပါးအမှန်တကယ်စိုက်ပျိုးထုတ်လုပ်နေသော တောင်သူများထံသို့ထုတ်ချေးနိုင်‌ရေး၊ အချိန်မီ တောင်သူများလက်ဝယ် အမြန်ဆုံးထုတ်ချေးနိုင်ရန် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန အနေဖြင့် စီမံကိန်းဧကကို ကျေးရွာအလိုက် ပြုစုပေးနိုင်ရေးတို့ကို လမ်းညွှန်မှာကြားဆွေးနွေးခဲ့ကြောင်းသိရပါသည်။

    ဆောင်းသီးနှံ၊ နွေစပါးစီမံကိန်းထုတ်ချေးငွေအကြံပေးအဖွဲ့လုပ်ငန်းညှိနှိုင်းအစည်းအဝေးသို့ မြို့နယ်အထွေထွေအုပ်ချုပ်ရေးဦးစီးဌာနမှ မြို့နယ်အုပ်ချုပ်ရေးမှူး၊ မြန်မာ့လယ်ယာဖွံ့ဖြိုးရေးဘဏ်မှ မြို့နယ်မန်နေဂျာနှင့်ဝန်ထမ်းများ၊ စိုက်ပျိုးရေးဦးစီးဌာနမှ မြို့နယ်ဦးစီးမှူး၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနမှ တာဝန်ရှိသူများ၊ သမဝါယမဦးစီးဌာနမှ မြို့နယ်ဦးစီးမှူး၊ တိ၊ မွေးကုဦးစီးဌာနမှ မြို့နယ်ဦးစီးမှူး၊ စားသုံးသူရေးရာဦးစီးဌာနမှ မြို့နယ်တာဝန်ခံတို့တက်ရောက်ခဲ့ကြောင်းသိရပါသည်။

DOCA(ရန်ကုန်)