ရန်ကုန်တိုင်းဒေသကြီး သန်လျင်မြို့နယ်၌ ယခုဆောင်းသီးနှံစိုက်ပျိုးရာသီတွင် ပဲတီစိမ်း ၄၆၇၂၆ ဧက စိုက်ပျိုးနိုင်ခဲ့သဖြင့် ၂၀၂၄-၂၀၂၅ ခုနှစ် ဆောင်းသီးနှံပဲတီစိမ်းလျာထားချက် ပြည့်မီအောင် စိုက်ပျိုးနိုင်ခဲ့ပြီး စိုက်ပျိုးထားသည့် သီးနှံများဖြစ်ထွန်းအောင်မြင်လျက်ရှိကြောင်း သိရသည်။

            သန်လျင်မြို့နယ်၌ ယခုဆောင်းသီးနှံစိုက်ပျိုးရာသီတွင် ပဲတီစိမ်းလျာထား ၄၆၇၂၆ ဧကကို ၂၀၂၄ ခုနှစ်၊ နိုဝင်ဘာလမှ စတင်စိုက်ပျိုးခဲ့ရာ လက်ရှိအချိန်တွင် လျာထားဧက ပြည့်မီ အောင် စိုက်ပျိုးနိုင်ခဲ့ပြီး စိုက်ပျိုးရေးအဆင်ပြေတဲ့အတွက် စိုက်ပျိုးထားသော ပဲတီစိမ်းစိုက်ခင်းတွေ အောင်မြင်ဖြစ်ထွန်းမှုရှိပြီး ပဲတီစိမ်းစိုက်ခင်းတွေ အထွက်နှုန်းတိုးတက်စေရေး အပင်အားဆေးနဲ့ မြေဩဇာစနစ်တကျ သုံးစွဲတတ်အောင် ပိုးမွှားအန္တရာယ်ကင်းရှင်းစေရေး ကြိုတင်ကာကွယ်နှိမ်နင်းရေးလုပ်ငန်းတွေ ထိထိရောက်ရောက်ဆောင်ရွက် နိုင်အောင် လိုအပ်တဲ့ တောင်သူအသိပညာပေးတာတွေ၊ ပဲတီစိမ်းစိုက်ပျိုးတောင်သူများကို အထွက်နှုန်းတိုးတက်ကောင်းမွန်စေရန် ဒေသနှင့် ကိုက်ညီသော မျိုးကောင်းမျိုးသန့်များ ရွေးချယ်စိုက်ပျိုးနိုင်ရေး၊ ပိုးမွှား ရောဂါမကျရောက်စေရန် ကြိုတင်ကာကွယ်နှိမ်နင်းရေး၊ စိုက်ပျိုးရေးသွင်းအားစုများ မှန်ကန်စွာ သုံးစွဲတတ်စေရေး စသည့်စိုက်ပျိုးရေးဆိုင်ရာ ဆက်စပ်ဌာနများနှင့် ပူးပေါင်း ဆောင်ရွက်ခဲ့ခြင်းကြောင့် စိုက်ပျိုးထားသော ပဲတီစိမ်းသီးနှံများဖြစ်ထွန်းအောင်မြင်လျက် ရှိကြောင်း သိရသည်။

DOCA(ရန်ကုန်)

          ဖေဖော်ဝါရီလပထမပတ်အတွင်း  ကြက်ဥစျေးမှာ  ဇန်နဝါရီလနောက်ဆုံးပတ်ပေါက်စျေးနှင့် နှိုင်းယှဉ်ပါက  ကြက်ဥစျေးအနည်းငယ်ကျဆင်းသော်လည်း ဘဲဥနှင့် ငုံးဥ ဈေးမှာဈေးငြိမ်နေကြောင်း   သိရပါတယ်။ မန္တလေးစျေးကွက်အတွင်းပြင်ဦးလွင်မြို့နယ်၊ပြင်စာကျေးရွာမွေးမြူရေးခြံထွက်ကြက်ဥ များဝင်ရောက်မှုအများဆုံးဖြစ်ပြီး၊ကျောက်ဆည်၊မြစ်သား၊မြို့သာ မြို့နယ်ရှိ ခြံများမှလည်းဝင်ရောက် ကြောင်း သိရပါတယ်။ ဘဲဥမှာ အမရပူ၊ ပုသိမ်ကြီး၊မတ္တရာမြို့နယ်ရှိခြံများမှ ဝင်ရောက်မှုများပြီး၊ကျန် ဒေသများမှလည်း  ဝင်ရောက်ကြောင်း သိရပါတယ်။  ငုံးဥမှာ မန္တလေး၊ စဉ့်ကိုင်၊ကျောက်ဆည်ဒေသ ရှိမွေးမြူရေးခြံတို့မှဝင်ရောက်ကြောင်း သိရပါတယ်။ကြက်ဥစျေးကွက်အနေဖြင့်ကြက်စာစျေးအနည်း ငယ်ကျဆင်းခြင်းနှင့် ဥထွက်နှုန်းကောင်းမွန်ခြင်းတို့ကြောင့်ဇန်နဝါရီလနောက်ဆုံးပတ်တွင်ဖြစ်ပေါ်ခဲ့ သည့်ပေါက်စျေးနှင့်နှိုင်းယှဉ်ပါကအနည်းငယ်ကျသွားကြောင်းသိရပါတယ်။ ၂၀၂၅ခုနှစ်ဖေဖော်ဝါရီလ ပထမပတ်အတွင်းဖြစ်ပေါ်ခဲ့သောလက္ကားစျေးမှာကြက်ဥ(၃၀လုံးပါ၁၀ကဒ်)တစ်ဆွဲလျှင် ၁၂၆၀၀ဝိ/- နှင့် ၁၃၅၀၀ဝိ/- စျေး၊လက်လီစျေးအနေဖြင့်  ကြက်ဥတစ်လုံးလျှင် ၄၂ဝိ/- နှင့် ၄၅ဝိ/- ၊   ဘဲဥတစ်လုံး လျှင်  ၅၇ဝိ/-နှင့် ၅၈ဝိ/- ၊ ငုံးဥ(၁၀) လုံး လျှင် ၂၃၀ဝိ/-နှင့် ၂၅၀ဝိ/- စျေးအသီးသီးဖြင့် ရောင်းချလျက် ရှိကြောင်း ကြက်ဥ၊ ဘဲဥ  ရောင်းချသူထံ မှ သိရပါတယ်။ စျေးကွက်အတွင်း ကြက်ဥ၊ဘဲဥနှင့် ငုံးဥစျေး များမှာအလုံးအရွယ်အစား ပေါ်မူတည်၍ စျေးအနည်းငယ်ကွာခြားမှုရှိကြောင်း သိရပါတယ်။  ၂၀၂၅ ခုနှစ်ဖေဖော်ဝါရီလပထမပတ်အတွင်း   မန္တလေးစျေးကွက်အတွင်း  ကြက်ဥ၊ဘဲဥနှင့်ငုံးဥစျေးကွက်မှာ  အရောင်းသွက်လျက်ရှိသည့်ကုန်စည်ဖြစ်ကြောင်း သိရပါတယ်။ ပြင်ဦးလွင်‌ဒေသရှိ မွေးမြူရေးခြံများ မှ မန္တလေးစျေးကွက်အတွင်းသို့  ကြက်ဥဝင်ရောက်မှုမှာ  ၁၆ မိုင်၊ထုံးဘိုဂိတ်ဖြတ်ယာဉ်စာရင်းများ အရ  နေ့စဉ် ၆ ဘီးနှင့် ၁၂ ဘီးယာဉ် (၄)စီးမှ (၁၁)စီးအတွင်း ဝင်‌ရောက်ကြောင်း သိရပါတယ်။

DOCA(မန္တလေး)

             ရန်ကုန်တိုင်းဒေသကြီး တွံတေးခရိုင်၊ ကွမ်းခြံကုန်းမြို့နယ်၌ ယခုနှစ်နွေစပါး စိုက်ပျိုးရာသီတွင် နွေစပါးလျာထား ၂၁၃၈၅ ဧက စိုက်ပျိုးထုတ်လုပ်ရန် လျာထားဆောင်ရွက်လျက်ရှိပြီး ယခုအချိန်အထိ ၁၈၆၆၂ ဧက စိုက်ပျိုးပြီးစီးပြီဖြစ်ကြောင်း မြို့နယ်စိုက်ပျိုးရေးဦးစီးဌာနမှ သိရှိရပြီး လျာထားဧက ပြည့်မီအောင် စိုက်ပျိုးနိုင်ရေးနှင့် လျာထားဧကကျော်လွန်အောင် စိုက်ပျိုးနိုင်ရေးအတွက် စိုက်ပျိုးရေးဦးစီးဌာနနဲ့ တောင်သူများ ပူးပေါင်းဆောင်ရွက်လျက်ရှိကြောင်း သိရသည်။

           ကွမ်းခြံကုန်းမြို့နယ်ရှိ နွေစပါးစိုက်ပျိုးရာသီကာလအတွင်း အချိန်မီလျာထားဧကပြည့်မီအောင် စိုက်ပျိုးနိုင်ရေး၊ သက်တမ်းတိုးအထွက်ကောင်းမျိုးများဖြစ်သည့် ရတနာတိုး၊ ရက်(၉၀)၊ အောင်နိုင်တိုးစပါးမျိုးများကို မြို့နယ်စိုက်ပျိုးရေးဦးစီးဌာနနှင့် ညှိနှိုင်းရွေးချယ်စိုက်ပျိုးနိုင်ရေး ပျိုးထောင်စနစ်၊ ကောက်စိုက် စက်၊ တိုက်ရိုက်မျိုးစေ့ချစနစ်ဖြင့် စနစ်တကျစိုက်ပျိုးနိုင်ရေး၊ ယခုနှစ်တွင် ယခင်နှစ်ထက် တောင်သူများအနေဖြင့် နွေစပါးစောစီးစွာ လျာထားဧက ပြည့်မီအောင် စိုက်ပျိုးထုတ်လုပ်နိုင်ရေးနှင့် သီးထပ်သီးနှံများထပ်မံစိုက်ပျိုးနိုင်ရေးအတွက် မြို့နယ်စိုက်ပျိုးမှုကြီးကြပ်ရေးကော်မတီအနေဖြင့် ပံ့ပိုးကူညီ ကြီးကြပ်ဆောင်ရွက်ပေးလျက်ရှိကြောင်း သိရသည်။ စားရေရိက္ခာဖူလုံပေါများရေးနှင့် ပတ်သက်၍ အဓိက စားကုန်ဖြစ်သည့် ဆန်သည် မြန်မာနိုင်ငံအတွက် ဖူလုံမှုရှိပြီးဖြစ်သည့်အပြင် ပြည်ပသို့ နှစ်စဉ်တင်ပို့လျက် ရှိပြီး ပန်းတိုင်ရည်မှန်းချက်အတိုင်း ပြည့်မီအောင်ဆောင်ရွက်နိုင်မည်ဆိုပါက ပြည်တွင်းဆန် လိုအပ်ချက်ကို ဖြည့်ဆည်းပေးနိုင်ရုံသာမက ပြည်ပသို့လည်း ပိုမိုတင်ပို့နိုင်မည်ဖြစ်ကြောင်း သိရှိရပါသည်။

DOCA(ရန်ကုန်)

          မကွေးတိုင်းဒေသကြီး၊ ပခုက္ကူမြို့ ပဲမျိုးစုံနှင့် ဆီထွက်သီးနှံ မျိုးစုံရောင်းဝယ်ရေး ဈေးကွက်တွင် နှမ်းသီးနှံများ နေ့စဉ် အရောင်းအဝယ်ဖြစ်လျက်ရှိရာ ၂၀၂၅ခုနှစ်၊ ဖေဖော်ဝါရီလ(ပထမပတ်)တွင် ဆီထွက်သီးနှံ နှမ်းမျိုးစုံ အရောင်းအဝယ်ဖြစ်ပြီး နှမ်းနက်(စမုန်)များ ပြည်ပအဝယ်လိုက်၍ ဈေးတက်ပြီး အရောင်းအဝယ်ဖြစ်လျက်ရှိပါသည်။ ဈေးကွက်သို့ နှမ်းသီးနှံ စိုက်ပျိုးမှုများသော ပခုက္ကူ၊ မြိုင်၊ ပေါက်၊ ရေစကြို၊ ယောနယ်ဒေသများ၊ အခြားမြို့နယ်များဖြစ်သည့် မန္တလေး၊ စစ်ကိုင်းဒေသကြီးအတွင်းရှိ မြို့နယ်များမှ ထွက်ရှိသော နှမ်းသီးနှံများ နေ့စဉ် အရောင်းအဝယ်ဖြစ်လျက်ရှိပြီး ဖေဖော်ဝါရီလ (ပထမပတ်)တွင် ယောနယ်ဒေသများနှင့် ပခုက္ကူ၊ မြစ်ခြေအပြင် မြိုင်မြို့နယ်ဒေသထွက် နှမ်းသီးနှံများ ကုန်ချိန်အများဆုံး ဈေးကွက်သို့ဝင်ရောက်လျက်ရှိရာ မြိုင်မြို့နယ်ဒေသထွက် နှမ်းနက်(စမုန်)များ ကုန်ချိန်အများဆုံးဝင်ရောက်ကြောင်း၊ တစ်ရက်လျှင် ပိဿာ(၃၀)ဝင်အိတ်(၈၀၀ - ၁၀၀၀)ခန့် ဝင်ရောက်ကြောင်း၊ ပြည်တွင်းသုံးစွဲမှုအပြင် ပြည်ပအဝယ်လိုက်၍ ကုန်ဝင်သလောက် အရောင်းအဝယ် ဖြစ်နေကြောင်း ဈေးကွက်မှ သိရသည်။

          ဈေးနှုန်းအနေဖြင့် ၂၀၂၅ခုနှစ်၊ ဖေဖော်ဝါရီလ(ပထမပတ်)တွင် နှမ်းအမျိုးအစားနှင့် အရည်အသွေး လိုက်၍ နှမ်းနက်(စမုန်)တစ်တင်းလျှင် ကျပ်(၂၃၃၀၀၀-၂၂၈၀၀၀-၂၂၀၀၀၀)၊ နှမ်းဖြူတစ်တင်းလျှင် ကျပ် (၁၂၄၀၀၀-၁၁၉၀၀၀-၁၀၈၀၀၀)၊ နှမ်းဝါတစ်တင်းလျှင် ကျပ်(၁၀၅၀၀၀-၁၀၃၀၀၀-၁၀၀၀၀၀)အရောင်း အဝယ်ဖြစ်ပြီး နှမ်းဖြူတစ်တင်းလျှင် ကျပ်(၁၂၆၀၀၀-၁၂၁၀၀၀-၁၁၀၀၀၀)၊ နှမ်းဝါတစ်တင်းလျှင် ကျပ် (၁၁၁၀၀၀-၁၀၉၀၀၀-၁၀၆၀၀၀) အရောင်းအဝယ်ဖြစ်ခဲ့ပြီး ယခင်ဇန်နဝါရီလ(ပထမပတ်)နှင့် ဈေးနှုန်း နှိုင်းယှဉ်ပါက နှမ်းနက်(စမုန်)တစ်တင်းလျှင် ကျပ်(၆၀၀၀)ခန့် ဈေးတက်ပြီး ကျန်နှမ်းအမျိုးအစား များမှာ ဈေးငြိမ်၍ အရောင်းအဝယ်ဖြစ်နေကြောင်း၊ သီးနှံပေါ်ချိန်ဖြစ်၍ ဈေးကွက်သို့ ကုန်ဝင်ရောက်မှု များ ကြောင်း၊ မြိုင်မြို့နယ်ဒေသထွက် နှမ်းနက်(စမုန်)များ အများဆုံးဝင်ရောက်ကြောင်း၊ ဈေးကွက်သို့ ရောက်ရှိသည့် နှမ်းများကို မြို့ပေါ်ရှိ ဆီစက်လုပ်ငန်းရှင်များ၊ နှမ်းလှော်လုပ်ငန်းရှင်များနှင့် အခြား စားသောက်ကုန် လုပ်ငန်းရှင်များမှ ဝယ်ယူမှုများကြောင်း၊ ရန်ကုန်၊ မန္တလေးဈေးကွက်သို့လည်း တင်ပို့လျက်ရှိကြောင်း၊ ထိုမှတစ်ဆင့် ပြည်ပတရုတ်နိုင်ငံသို့ တင်ပို့ကြောင်း၊ မြို့ပေါ်ရှိ ဆီထွက်သီးနှံ ရောင်းဝယ်ရေး ဈေးကွက်မှ သိရှိရပါသည်။ 

DOCA(မကွေး)

          မကွေးတိုင်းဒေသကြီး၊ ပခုက္ကူမြို့ ပဲမျိုးစုံနှင့် ဆီထွက်သီးနှံမျိုးစုံရောင်းဝယ်ရေး ဈေးကွက်တွင် ဆီထွက်သီးနှံ မြေပဲများ နေ့စဉ်အရောင်းအဝယ်ဖြစ်လျက်ရှိရာ စိုက်ပျိုးမှုများသော ပခုက္ကူ၊ မြိုင်၊ ပေါက်၊ ရေစကြို၊ ဆိပ်ဖြူ၊ ယောနယ်ဒေသများနှင့် စစ်ကိုင်းတိုင်း၊ မန္တလေးတိုင်းဒေသကြီးအတွင်းရှိ ကျေးရွာများ မှထွက်ရှိသော မိုးမြေပဲအတောင့်အဆံများ ပခုက္ကူဈေးကွက်သို့ ဝင်ရောက် အရောင်းအဝယ်ဖြစ်ကြောင်း၊ ယခုအချိန်တွင် ဂန့်ဂေါခရိုင်အတွင်းရှိ ယောနယ်ဒေသများမှ (၄)လပင်ပြန့်မြေပဲများ လှိုင်လှိုင်တူးဖော်ရိတ် သိမ်းချိန်ဖြစ်၍ ဈေးကွက်သို့ သီးနှံဝင်ရောက်မှုများကြောင်း၊ မြေပဲအသစ်များ ဝင်ရောက်သော်လည်း ဈေးနှုန်းကျဆင်းခြင်းမရှိဘဲ ဈေးကွက်သို့ဝင်ရောက်လာသည့် မြေပဲဆံနှင့်မြေပဲ အတောင့်များ ဝယ်လို အားကောင်းပြီး အရောင်းအဝယ်သွက်နေကြောင်း၊ ဈေးကွက်သို့ ဝင်ရောက်လာသော မြေပဲ အတောင့် နှင့်အဆံများကို မြို့ပေါ်ရှိ လှောင်လက်သမားများ၊ ဆီစက်လုပ်ငန်းရှင်များ အဝယ်လိုက်ခြင်းအပြင် ပြည်ပ တရုတ်နိုင်ငံမှလည်း အဝယ်လိုက်၍ ဈေးနှုန်းမြင့်တက်နေကြောင်း၊ မြေပဲတောင့်/ အဆံ အရည် အသွေးနှင့် ဝယ်လိုအားပေါ်မူတည်၍ ဈေးအနိမ့်၊ အမြင့်ရှိကြောင်း၊ ပြည်တွင်းစားသုံးဆီဈေးကွက်တွင် ကျန်းမာရေးနှင့်ညီညွှတ်သည့် မြေပဲဆီသန့်သုံးစွဲမှုမြင့်မားလျက်ရှိ၍ ဒေသတွင်းဆုံ/ဆီစက်များ တွင်ကျယ်စွာ ထုတ်လုပ်လျက်ရှိ၍ မြေပဲဆံဝယ်လိုအားကောင်းပြီး ဈေးကွက်ကျဆင်းခြင်းမရှိ အရောင်း အဝယ်သွက်လျက်ရှိပြီး ပဲဖတ်ဈေးမှာလည်း ပြည်တွင်းတိရိစ္ဆာန်အစားအစာအဖြစ် မြန်မာနိုင်ငံ အောက်ပိုင်း ငါးမွေးမြူရေးလုပ်ငန်းများမှ ဝယ်ယူမှုအပြင် ပြည်တွင်းဆီစက် လုပ်ငန်းရှင်များမှလည်း မြေပဲဆုံပဲဖတ်များကို ပြန်လည်ကြိတ်ပြီး ဆီထုတ်လုပ်ခြင်းအတွက် ဝယ်ယူမှုများ၍ အရောင်းအဝယ် သွက်နေကြောင်း ဈေးကွက်မှ သိရသည်။

          ပခုက္ကူပွဲရုံဈေးကွက်တွင် ဖြစ်ပေါ်နေသော မြေပဲဈေးနှုန်းများမှာ ၂၀၂၅ခုနှစ်၊ ဖေဖော်ဝါရီလ (ပထမပတ်)တွင် သီးနှံအရည်အသွေးလိုက်၍ မြေပဲအတောင့်(အခြောက်) တစ်ပိဿာလျှင် ကျပ်(၆၃၀၀ - ၅၈၀၀)၊ မြေပဲလုံးဆံနီ တစ်ပိဿာလျှင် ကျပ်(၉၄၀၀-၉၃၅၀-၉၁၀၀)၊ မြေပဲလုံးဆံဖြူ တစ်ပိဿာလျှင် ကျပ် (၉၄၀၀-၉၃၅၀)၊ ဆီဆံတစ်ပိဿာလျှင် ကျပ်(၉၀၀၀-၈၅၀၀)၊ မြေပဲဖတ်တစ်ပိဿာလျှင် (၆၂၀၀-၆၁၀၀)ဈေးဖြင့် အရောင်းအဝယ်ဖြစ်ခဲ့ပြီး ယခင်ဇန်နဝါရီလ(ပထမပတ်)နှင့် ဈေးနှုန်းနှိုင်းယှဉ်ပါက မြေပဲတောင့် (အခြောက်)တစ်ပိဿာလျှင်  ကျပ်(၂၀၀)၊ မြေပဲဆံတစ်ပိဿာ ကျပ်(၃၀၀)၊ ပဲဖတ် တစ်ပိဿာလျှင် ကျပ်(၁၀၀)ခန့် ဈေးတက်ပြီး အရောင်းအဝယ်ဖြစ်ကြောင်း၊ ပခုက္ကူမြေပဲဆံ ဈေးကွက်သို့ (၄)လပင်ပြန့် ဆောင်းမြေပဲ(အသစ်)များ ပခုက္ကူ/ မြိုင်မြို့နယ်အတွင်းရှိ ကျေးရွာများနှင့် ယောနယ် (ထီးလင်း၊ ဂန့်ဂေါ) ဒေသများမှ ဝင်ရောက်လျက်ရှိပြီး ကုန်ဝင်သလောက် အရောင်းအဝယ်ဖြစ်ကြောင်း၊ မြို့ပေါ်ရှိ ဆီစက်လုပ်ငန်းရှင်များမှ ဝယ်ယူမှုများခြင်းအပြင် မန္တလေးဈေးကွက်သို့ တင်ပို့လျက်ရှိပြီး ထိုမှ တစ်ဆင့် ပြည်ပနိုင်ငံများသို့ တင်ပို့လျက်ရှိ၍ မြေပဲဈေးနှုန်း သိသိသာသာကျဆင်းခြင်းမရှိ ဈေးတက်ပြီး အရောင်းအဝယ်ဖြစ်လျက် ရှိကြောင်း ပွဲရုံဈေးကွက်မှ သိရှိရပါသည်။

DOCA(မကွေး)