ပြည်တွင်းကုန်သွယ်မှုသတင်း

      တောင်ငူမြို့၊ ထီးလှိုင်ရပ်ကွက်တွင်ရှိသော ပြည့်ဖြိုးကျော်အမှတ်တံဆိပ် ပေါင်မုန့်ကြော်လုပ်ငန်းတွင် ပေါင်မုန့်ကြော်ပြုလုပ်ရန်အတွက် လိုအပ်သောကုန်ကြမ်းပစ္စည်းများမှာ ဂျုံ၊ သကြား၊ ကြက်ဥ၊ ပွဆေး၊ ဆားနှင့် ဆီတို့ဖြစ်ကြောင်းသိရပါသည်။

       ပေါင်မုန့်ကြော်ပြုလုပ်ရန်အတွက် ပါဝင်ပစ္စည်းများအားလုံးကို သမအောင်ရောနယ်၍ ကြိတ်လုံးနှင့်ကြိတ်ကာ ဓါးဖြင့်လှီးဖြတ်ပြီး လိုအပ်သောပမာဏအတိုင်း ပေါင်မုန့်အဝိုင်းလေးများဖြစ်အောင်ပုံဖော်ကာ ပွလာစေရန် အချိန်အနည်းငယ်ခန့်စောင့်ဆိုင်းရပါသည်။

      ထို့နောက် ပွလာသောဂျုံအဝိုင်းလေးများအား ဆီဖြင့်ကြော်၍အအေးခံကာ ပါကင်ပိတ်လိုက်ပါက ဈေးကွက်အတွင်းဖြန့်ချိရန်အတွက် အသင့်ဖြစ်နေသော ပေါင်မုန့်ကြော်အထုပ်လေးများရရှိပြီဖြစ်ပါသည်။

         ၂၀၂၄ခုနှစ်၊ ဇူလိုင်လအစပိုင်းတွင် ပြည့်ဖြိုးကျော်အမှတ်တံဆိပ် ပေါင်မုန့်ကြော်ထုပ်များအား တစ်ထုပ်လျှင် ဖောက်သည်ဈေး ၂၄၀ကျပ်ဖြင့် တောင်ငူမြို့ရှိ မုန့်အရောင်းဆိုင်များအား ဖြန့်ချိပေးလျက်ရှိပါသည်။ ပေါင်မုန့်ကြော်ထုပ် လက်လီဈေးနှုန်းအနေဖြင့် တစ်ထုပ်လျှင် (၃၀၀)ကျပ်ဖြင့် ပြန်လည်ရောင်းချလျက်ရှိကြောင်းသိရှိရပါသည်။

               ပြည့်ဖြိုးကျော် ပေါင်မုန့်ကြော်လုပ်ငန်းတွင် ပိုင်ရှင်မိသားစုဝင် (၂) ဦးနှင့် လုပ်သား (၃) ဦးငှားရမ်းကာ လုပ်ငန်းလည်ပတ်လျက်ရှိပါသည်။ တစ်နေ့လျှင် ပေါင်မုန့်ကြော်အထုပ်ပေါင်း (၁၅၀) ခန့်ထုပ်လုပ်ကာ မိသားစုတစ်နိုင်တစ်ပိုင်စီးပွားရေးအနေဖြင့် ပုံမှန်ဝင်ငွေရရှိလျက်ရှိကြောင်း လေ့လာသိရှိရပါသည်။

DOCA(ပဲခူး)

     မော်လမြိုင်ဒေသထွက် ရင်ကွဲသရက်သီးများ ဈေးကောင်းရရှိနေသည်။ သရက်သီးမျိုးနွယ် (၁၂၅) မျိုးအနက် ရင်ကွဲသရက်သီးမှာ လူကြိုက်အများဆုံးနှင့် အသီးထွက်အကောင်းဆုံးဖြစ်သော သရက်မျိုးဖြစ်သည်။ ယခင်မေလနှင့် ဇွန်လတွင် ရင်ကွဲသရက်သီး လှိုင်လှိုင်ထွက်ရှိခဲ့သည်။

       ယခုဇူလိုင်လဆန်းတွင် ရင်ကွဲသရက်သီးဈေးနှုန်းအခြေအနေမှာ ရင်ကွဲသရက်သီး အစိမ်းအချောအကြီးတစ်လုံးလျှင် (၂၅၀) ကျပ်၊ အသေးတစ်လုံးလျှင် (၂၀၀) ကျပ်ဖြစ်သည်။ ရင်ကွဲသရက်သီးအမှည့် အကြီးတစ်လုံးလျှင် (၃၅၀) ကျပ်၊ အသေးတစ်လုံးလျှင် (၂၅၀) ကျပ်ဖြစ်သည်။

      အဆိုပါ ရင်ကွဲသရက်သီးများမှာ ရာသီချိန်ကုန်ဆုံးတော့မည်ဖြစ်သဖြင့် အသီးထွက်နှုန်းနည်းပါးခြင်းကြောင့် ဈေးကွက်အတွင်း ရောင်းချမှုလည်းနည်းပါးကာ ဒေသထွက် ရင်ကွဲသရက်မျိုးများမှာ ဈေးကောင်းရရှိနေကြောင်းသိရှိရပါသည်။

DOCA(မွန်)

   စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ တိုက်ရိုက်မျိုးစေ့ချကိရိယာ(Seeder)ဖြင့် မိုးစပါးစိုက်ပျိုးခြင်းနှင့် တောင်သူလယ်သမားများအား မျိုးစပါးနှင့် ဓာတ်မြေဩဇာပေးအပ်သည့်အခမ်းအနားကို  ၂၀၂၄ခုနှစ်၊ ဇွန်လ(၂၇)ရက်နေ့၊ နံနက် (၀၈း၀၀) နာရီအချိန်၌ ကော့မှူးမြို့နယ်၊ မကျီးကန်ကျေးရွာ၊ ကွင်းအမှတ်(၂၉၁)၊ ဦးပိုင်အမှတ်(၂၃)ရှိ ဦးချစ်ဦး၏ လယ်ယာမြေ (၅)ဧကနှင့် လယ်ကွင်းပေါင်ပေါ်တွင် ကျင်းပခဲ့ကြောင်းသိရသည်။

        အဆိုပါအခမ်းအနားတွင် ကော့မှူးမြို့နယ်၊ အထွေထွေအုပ်ချုပ်ရေးဦးစီးဌာန၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဒေဝက တိုက်ရိုက်မျိုးစေ့ချကိရိယာ(Seeder) အသုံးပြုစိုက်ပျိုးခြင်းကြောင့် ရရှိ လာမည့်အကျိုးကျေးဇူးများ၊  မျိုးစေ့(မျိုးစပါး)နှင့် ဓာတ်မြေဩဇာများထောက်ပံ့ပေးအပ်ရသည့် ရည်ရွယ်ချက်များနှင့် စိုက်ပျိုးရေးလုပ်ငန်းများအောင်မြင်ရေးအတွက် အားလုံးပူးပေါင်းဆောင်ရွက်ရေးတို့ကို ရှင်းလင်းပြောကြားခဲ့ပြီး စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးသက်နိုင်က မျိုးစေ့(မျိုးစပါး)နှင့် ဓာတ်မြေဩဇာဥပဒေ၊ ပိုးမွှားပြုစုရေး၊ ထိန်းချုပ်ရေးဥပဒေများဖြင့် တိုက်ရိုက်မျိုးစေ့ချကိရိယာအသုံးပြုစိုက်ပျိုးရာတွင် လိုက်နာဆောင်ရွက်ရမည့်အချက်များနှင့် ရှောင်ကြဉ်ရမည့်အချက်များဖြစ်သော ညီညာအောင်ညှိခြင်းနှင့် ရေပြောင်စင်အောင်ထုတ်စေရန်၊ မျိုးစေ့အနေအထားမှာ စပါးစပ်ပြုအနေအထားရှိစေရန်လိုအပ်ကြောင်း၊ အတန်းဖြောင့်၍ လိုအပ်သော အပင်ဦးရေရရှိစေရန်အတွက် မျိုးစေ့ချကိရိယာဆွဲသူသည် ခြေလှမ်းပုံမှန်ဖြင့် အသွား/ အပြန် ဘီးရာတစ်ထပ်တည်းကျအောင် သတိပြုဆောင်ရွက်ရန်၊ မျိုးစေ့ချပြီး (၂၀-၂၅)ရက်အတွင်း ကောက်ပင်ဖာခြင်း မဖြစ်မနေဆောင်ရွက်ရန် မျိုးစေ့ချပြီး (၂၀)ရက်သားမှ (၄၅)ရက်သားအတွင်း သမန်းနိုးကြားပေါင်းလိုက်ခြင်းဖြင့် ပေါင်းမြက်ရှင်းခြင်းများကို (၃)ကြိမ်လုပ်ပေးကြရန်အချက်များနှင့် ရှောင်ကြဉ်ရမည့်အချက်များကို ရှင်းလင်းပြောကြားဆွေးနွေးခဲ့ကြောင်းသိရသည်။

        အဆိုပါအခမ်းအနားသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဒေဝနှင့်အဖွဲ့ဝင်(၂)ဦး၊ အထွေထွေအုပ်ချုပ်ရေးဦးစီးဌာနမှ ဒုတိယမြို့နယ်အုပ်ချုပ်ရေးမှူးနှင့်ဝန်ထမ်းများ၊ မြို့နယ်ဌာနဆိုင်ရာ တာဝန်ရှိသူများ၊ ရပ်ကွက်ကျေးရွာမှ အုပ်ချုပ်ရေးမှူးများနှင့် တောင်သူများတက်ရောက်ခဲ့ကြောင်းသိရှိရပါသည်။

DOCA(ရန်ကုန်)

   မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် ပဲမျိုးစုံ အရောင်းအဝယ်ဖြစ်လျက်ရှိသော မြို့တစ်မြို့ဖြစ်သည်။ ပခုက္ကူဈေးကွက်သို့ ဆီထွက်သီးနှံ မြေပဲ၊ နှမ်းနှင့် ပဲမျိုးစုံ အရောင်းအဝယ်ဖြစ်လျက်ရှိရာ ပြည်တွင်းစားသုံးမှုမြင့်မားလျက်ရှိသော ကုလားပဲသီးနှံလည်း နေ့စဉ်ဈေးကွက်သို့ ဝင်ရောက်၍ အရောင်းအဝယ်ဖြစ်လျက်ရှိသည်။ ၂၀၂၄ခုနှစ်တွင် ဒေသတွင်း သီးနှံပေါ်စအချိန်မှ ယခု အချိန်ထိ ကုလားပဲဈေးကွက်မှာ ဈေးငြိမ်၍ အရောင်းအဝယ်ဖြစ်လျက်ရှိသည်။ ပခုက္ကူဈေးကွက်သို့ ကုလားပဲသီးနှံစိုက်ပျိုးရာဒေသများဖြစ်သော ပခုက္ကူမြို့နယ်အတွင်းရှိကျေးရွာများ၊ မြစ်ခြေ၊ ကမ္မ၊ မြိုင်၊ ရေစကြိုမြို့နယ်တွင်းရှိ ကျေးရွာများမှ အများဆုံးဝင်ရောက်လျက်ရှိကြောင်း သိရှိရသည်။

     သီးနှံဈေးကွက်အနေဖြင့် ဇူလိုင်လ(ပထမပတ်)အစောပိုင်းတွင် ကုလားပဲ(V2)တစ်တင်းလျှင် ကျပ်(၈၂၅၀၀)၊ ကုလားပဲ(HL)တစ်တင်းလျှင် ကျပ်(၈၃၀၀၀)၊ ကုလားပဲ(V6)တစ်တင်းလျှင် ကျပ် (၈၄၅၀၀)၊ ကုလားပဲ(929)တစ်တင်းလျှင် ကျပ်(၈၁၀၀၀)၊ ကုလားပဲ(ဗမာ)လုံးသေး တစ်တင်းလျှင် ကျပ် (၇၉၀၀၀)ဈေးဖြင့် အရောင်းအဝယ်ဖြစ်လျက်ရှိကြောင်း၊ ယခင်ဇွန်လ(စတုတ္ထပတ်)နှင့် ဈေးနှုန်း နှိုင်းယှဉ်ပါက ဈေးငြိမ်၍ အရောင်းအဝယ်ဖြစ်ကြောင်း၊ နေ့စဉ်တစ်ရက်လျှင် ကုလားပဲ(၃၀)ပိဿာ ဝင်အိတ်(၅၀မှ ၁၀၀ထိ) တစ်ပတ်အတွင်း အိတ်(၅၀၀)ခန့် ဝင်ရောက်အရောင်းအဝယ်ဖြစ်လျက်ရှိကြောင်း၊ ရေစကြိုမြို့နယ်ရှိ ကျေးရွာများမှ အများဆုံးဝင်ရောက်ကြောင်း၊ ပခုက္ကူဈေးကွက်သို့ ဝင်ရောက်သည့် ကုလားပဲများကို မြို့ပေါ်ရှိ ပဲခွဲစက်လုပ်ငန်းးရှင်များမှ ဝယ်ယူသိုလှောင်ကြောင်း၊ ယခုအချိန်၌ ဒေသခံတောင်သူများတွင် သီးနှံလက်ကျန်နည်း၍ ကုန်ဝင်ရောက်မှုနည်းခြင်းကြောင့် လုပ်ငန်းရှင်များမှ အခြားမြို့နယ်များသို့ ဖြန့်ဖြူးမှုမရှိကြောင်း မြို့ပေါ်ရှိ ပဲရောင်းဝယ်ရေးလုပ်ငန်းရှင်တစ်ဦးထံမှ သိရှိရပါသည်။

DOCA(မကွေး)

   စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် တိုက်ရိုက်မျိုးစေ့ချကိရိယာ(Seeder)ဖြင့် မိုးစပါးစိုက်ပျိုးခြင်းကွင်းသရုပ်ပြပွဲကို ၂၀၂၄ခုနှစ်၊ ဇွန်လ(၂၇)ရက်နေ့၊ နံနက်(၀၉း၀၀)နာရီအချိန်တွင် ကော့မှူးမြို့နယ်၊ မကျီးကန်ရပ်ကွက် ဦးပိုင်အမှတ်(၁၀/၁)၊ ကွင်းအမှတ်(၂၉၃)ရှိ ဦးပြုံး၏ အဆင့်မြင့်လယ်ယာမြေ (၅)ဧကပေါ်တွင် ဆောင်ရွက်ခဲ့ကြောင်းသိရသည်။

       အဆိုပါ တိုက်ရိုက်မျိုးစေ့ချကိရိယာ(Seeder)ဖြင့် မိုးစပါးစိုက်ပျိုးခြင်းကွင်းသရုပ်ပြပွဲသို့ ကော့မှူးမြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဒေဝနှင့်ဝန်ထမ်းများ၊ မြို့နယ်ဌာနဆိုင်ရာများမှ တာဝန်ရှိသူများနှင့် စိုက်ကြပ်အဖွဲ့ဝင်များတက်ရောက်ကြည့်ရှုအားပေးခဲ့ပြီး မြို့နယ်စိုက်ပျိုးရေးဦးစီးဌာန၊ မြို့နယ်ဦးစီးမှူး ဦးသက်နိုင်နှင့် မြို့နယ်စက်မှုလယ်ယာဦးစီးဌာနမှ မြို့နယ်ဦးစီးမှူး ဦးကျော်ဟိန်းတို့က တိုက်ရိုက်မျိုးစေ့ချကိရိယာ(Seeder)၏ ထူးခြားချက်၊ အားသာချက်၊ စွမ်းဆောင်ချက်များ၊ ကုန်ကျစရိတ်သက်သာပြီး အချိန်မီစိုက်ပျိုးရိတ်သိမ်းနိုင်ခြင်း၊ လုပ်သားရှားပါးမှုကိုဖြေလျော့နိုင်ရေးနှင့် ပန်းတိုင်အထွက်နှုန်းပြည့်မီကျော်လွန်စေရေးတို့အတွက်ရည်ရွယ်၍ ဆောင်ရွက်ရခြင်းဖြစ်ကြောင်းနှင့် တောင်သူများအတွက် များစွာအကျိုးကျေးဇူးရှိမည်ဖြစ်ကြောင်း အကျယ်တဝင့်ရှင်းလင်းပြောကြားခဲ့ကြောင်းသိရသည်။

     အဆိုပါ တိုက်ရိုက်မျိုးစေ့ချကိရိယာ(Seeder)ဖြင့် မိုးစပါးစိုက်ပျိုးခြင်းကွင်းသရုပ်ပြပွဲသို့ မြို့နယ်ဌာနဆိုင်ရာဝန်ထမ်းများနှင့် ကျေးရွာရပ်ကွက်အုပ်ချုပ်ရေးမှူးများ၊ ဒေသခံတောင်သူများ၊ စုစုပေါင်း (၁၀၀)ဦးခန့်တက်ရောက်ခဲ့ကြောင်းသိရသည်။

DOCA(ရန်ကုန်)