ပြည်တွင်းကုန်သွယ်မှုသတင်း

      ပဲခူးတိုင်းဒေသကြီး(အနောက်ပိုင်း) သဲကုန်းမြို့နယ်၊ အင်းမမြို့ရှိ၊ တံခွန်တိုင်ရွာတွင် ဗေဒါရိုးမှတစ်ဆင့် တန်ဖိုးမြှင့်ထုတ်ကုန်များထုတ်လုပ်ရောင်းချကြောင်းသိရပါသည်။ ထိုလုပ်ငန်းကို နွေရာသီ၌လုပ်ကိုင်ပြီး မိုးရာသီတွင် အလုပ်နားကြောင်းသိရပါသည်။ မိုးရာသီတွင် လုပ်ငန်များနားရခြင်းမှာ နေပူလှန်း၍မရခြင်း၊ မှိုတက်ခြင်းတို့ကြောင့်ဖြစ်ပါသည်။ ဗေဒါထုတ်ကုန်ပစ္စည်းများထုတ်လုပ်ပုံမှာ ဗေဒါကိုအခြောက်လှမ်းပြီး ဗေဒါအလယ်ရိုးကိုထုတ်ယူ၍ ကြိုးကျစ်ပြီး လိုချင်သောလူအသုံးအဆောင်ပစ္စည်းများကို ပြုလုပ်ကြပါသည်။ ထိုလုပ်ငန်းကို မိသားစုတစ်နိုင် တစ်ပိုင်အပြင် စီးပွားဖြစ်လည်းထုတ်လုပ်ရောင်းချသဖြင့် အလုပ်သမား(၁၉)ဦးဖြင့် လုပ်ကိုင်ကြောင်းသိရပါသည်။ ဗေဒါရိုးဖြင့်ထုတ်လုပ်သော ထုတ်ကုန်ပစ္စည်းများမှာ ဦးထုပ်၊ ဖိနပ်၊ လက်ကိုင်အိတ်၊ လက်ဆွဲခြင်းနှင့်ဖျာတို့ဖြစ်ပါသည်။ ထိုပစ္စည်းများအနက် ဦးထုပ်၊ ဖိနပ်၊ လက်ကိုင်အိတ်နှင့် လက်ဆွဲခြင်းတို့ကို လိုချင်သောဆေးရောင်များဖြင့်ခြယ်ကာ လှပအောင်၊ ရောင်းတန်းဝင်အောင်ပြုလုပ်ကြသော်လည်း၊ ဖျာတစ်မျိုးတည်းကိုသာ သဘာဝအရောင်ဖြင့်ပြုလုပ်၍ ရောင်းချကြပါသည်။ ရောင်းချသောဈေးကွက်များမှာ အင်းမမြို့၊ တိုက်ကြီး၊ ရန်ကုန်၊ မန္တလေးနှင့် ပြည်မြို့တို့သို့ တင်ပို့ရောင်းချကြပါသည်။ ဈေးနှုန်းအနေဖြင့် ဦးထုပ်တစ်လုံးလျှင် ၄၅၀၀ကျပ်၊ လက်ဆွဲခြင်းတစ်ခြင်းလျှင် ၇၅၀၀ကျပ်၊ လက်ကိုင်အိတ်အသေးတစ်လုံးလျှင် ၁၀၀၀၀ကျပ်၊ လက်ကိုင်အိတ်အကြီးတစ်လုံးလျှင် ၁၅၀၀၀ကျပ်၊ ဖျာတစ်ချပ်လျှင် ၅၅၀၀ကျပ်၊ ယောကျ်ားစီးဖိနပ်တစ်ရံလျှင် ၈၅၀၀ကျပ်၊ မိန်းမစီးဖိနပ်တစ်ရံလျှင် ၆၀၀၀ကျပ်ဖြင့် ရောင်းချကြောင်းသိရပါသည်။

         ထို့ကြောင့် ကန်ထဲ၊ မြစ်ထဲ၌ အလေ့ကျပေါက်ရောက်သော အမှိုက်အဖြစ်လွှင့်ပစ်စရာမလိုဘဲ လူအသုံးအဆောင်ပစ္စည်းများအဖြစ် ထုတ်လုပ်ရောင်းချပြီး မိသားစုအပိုဝင်ငွေအပြင် လုပ်ငန်းများတွင် ပိုမိုတွင်ကျယ်စွာထုတ်လုပ်လာနိုင်ပါက အလုပ်အကိုင်အခွင့်အလမ်းများရရှိလာနိုင်မည်ဖြစ်ပါသည်။ ထို့ပြင် တန်ဖိုးမြှင့်ထုတ်ကုန်ပြုလုပ်လာနိုင်မည်ဆိုပါက နိုင်ငံခြားအထိ တင်ပို့ရောင်းချနိုင်လျှင် နိုင်ငံခြားဝင်ငွေများလည်းရရှိလာနိုင်သောကြောင့် "အမှိုက်ထဲက ရွှေ" ဟု တင်စားလိုက်ရပါသည်။

DOCA(ပဲခူး)

     ရွှေဘိုမြို့ပေါ်ရှိ အောင်ဇေယျဈေးတွင် ဆိုင်ခန်းပေါင်း (၁၀၀)ကျော်နှင့် ပျံကျဈေးသည် များအပြင် မိုးကုတ်မြို့သို့ တင်ပို့ရောင်းချသည့် သီးနှံလက်ကားဒိုင်များဖြင့် နေ့စဉ် နံနက် (၆:၀၀)နာရီမှ နေ့လယ် (၁၄:၀၀)နာရီထိ ပိတ်ရက်မရှိ ရောင်းဝယ်ဖောက်ကားလျက်ရှိပါသည်။

      ၂၀၂၄ ခုနှစ်၊ ဇွန်လ ပထမဆုံးပတ်တွင် တန့်ဆည်မြို့နယ် ကံထူးမရွာ မှာယူရောင်းချသည့် ရာသီပေါ် အင်ဥ(ခေါ်)မှိုစေ့များ   လှိုင်လှိုင်ဝင်ရောက်လျက်ရှိပြီး တစ်ပိဿာလျင် (၂၅၀၀၀)ကျပ်မှ (၃၀၀၀၀)ကျပ်ဖြင့် အရောင်းအဝယ်သွက်နေပြီး ၊ဝင်ရောက်လာသော အင်ဥ(မှိုစေ့)များအား  ဈေးအတွင်းရှိ လက်လီ ပျံကျဈေးသည်များကို ဖောက်သည်ပေးသည့်အပြင်၊ ဆိုင်ကယ်ဖြင့် မြို့တွင်းလှည့်လည်ရောင်းချသော ဈေးသည်များ၊ ရွှေဘိုမြို့ပေါ်ရှိ ထမင်းဆိုင်များနှင့် နေ့စဉ်စားသုံးသူများသို့ လက်လီ/လက္ကားရောင်းချလျက်ရှိကြောင်း  အောင်ဇေယျဈေးအတွင်းရှိ သီးနှံစုံ လက်ကားဒိုင် များမှ သတင်းရရှိသည်။

DOCA(စစ်ကိုင်း)

     ၂၀၂၄ ခုနှစ်၊ မေလ နောက်ဆုံးပတ်အတွင်း ရွှေဘိုမြို့နယ်တွင် အခြေခံစားကုန်များဖြစ်သော ရွှေဘိုပေါ်ဆန်း(သစ်) တစ်ပြည် (၆၇၀၀)ကျပ်၊ ဧရာမင်းဆန် (သစ်) တစ်ပြည်လျင် (၆၅၀၀)ကျပ်၊ရွှေဝါထွန်း တစ်ပြည် (၄၆၀၀)ကျပ်ဖြင့် အရောင်းအဝယ် ဖြစ်လျက်ရှိသည်။

     စားသုံးဆီ ဈေးနှုန်းများမှာ ပဲဆီသန့် တစ်ပိဿာလျှင် ၁၅၀၀၀ကျပ်၊  စားအုန်းဆီ တစ်ပိဿာလျှင် ၅၈၀၀ကျပ်နှင့် နှမ်းဆီ တစ်ပိဿာလျှင် ၁၅၀၀၀ကျပ်၊ နေကြာဆီ တစ်ပိဿာလျှင် ၁၂၀၀၀ကျပ်ဖြင့် အရောင်း အဝယ် ဖြစ်နေကြောင်း သိရသည်။

    ကြက်သွန်နီ (သစ်) တစ်ပိဿာလျင် ၂၀၀၀ကျပ်မှ ၂၅၀၀ကျပ်ထိ အရောင်းအဝယ် ဖြစ်လျက်ရှိသည်။ ရှမ်း ကြက်သွန်ဖြူ တစ်ပိဿာ ၁၄၀၀၀ကျပ်မှ ၁၇၀၀၀ကျပ်ထိ ၊ (ကြူကုပ်) တစ်ပိဿာ ၁၃၀၀၀ကျပ်မှ ၁၅၀၀၀ကျပ်ထိ၊ ကြက်သွန်ဖြူ(အသစ်) (ဗမာ) တစ်ပိဿာလျှင် (၈၀၀၀ကျပ်မှ ၁၂၀၀၀)ကျပ်၊ ချင်းတစ်ပိဿာ ၁၂၀၀၀ကျပ်၊ ငရုတ်သီးခြောက် အမျိုးအစားအလိုက် ၁၂၀၀၀ကျပ် မှ ၁၅၀၀၀ကျပ်ထိ အာလူး တစ်ပိဿာ ၂၈၀၀ကျပ်မှ ၃၆၀၀ကျပ်ထိ ၊ခရမ်းချဉ်သီး တစ်ပိဿာ ၃၅၀၀ကျပ်ဖြင့် အရောင်းအဝယ် ဖြစ်နေပါသည်။

     ကြက်ဥ လက်လီဈေးနှုန်းမှာ (ကြီး)တစ်လုံး ၃၅၀ကျပ်၊ (သေး) တစ်လုံး ၃၀၀ကျပ် ၊ ဘဲဥ (ကြီး) တစ်လုံး (၃၅၀)ကျပ်၊ (သေး)တစ်လုံး (၃၀၀)ကျပ်ရှိသည်။ ရွှေဘိုမြို့၏ အသား/ငါး ဈေးနှုန်းများမှာ ကြက်သား(CP)  တစ်ပိဿာ ၁၂၀၀၀ကျပ်မှ ၁၄၀၀၀ကျပ်ထိ၊ကြက်သား (ဗမာ)တစ်ပိဿာ ၁၆၀၀၀ ကျပ်မှ ၂၀၀၀၀ကျပ်ထိ၊  ဝက်သား တစ်ပိဿာ ၂၀၀၀၀ကျပ်မှ ၂၂၀၀၀ကျပ်ထိ၊ အမဲသားတစ်ပိဿာ ၁၈၀၀၀ကျပ်မှ ၂၀၀၀၀ကျပ်ထိ၊  ငါးမြစ်ချင်း တစ်ပိဿာ ၈၅၀၀ကျပ်၊ ငါးကြင်း တစ်ပိဿာ ၈၅၀၀ကျပ်ဖြင့် ရောင်းဝယ်နေကြောင်း သိရသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်တာဝန်ခံရုံးသည် တိုင်းဒေသကြီးဦးစီးမှူး၏ လမ်းညွှန်မှု ၊ ကန့်ဘလူခရိုင်ဦးစီးမှူး၏ကြီးကြပ်ကွပ်ကဲမှုတို့ဖြင့် ကျွန်းလှမြို့နယ်တာဝန်ခံသည် ၂၀၂၄ ခုနှစ်၊ ဇွန်လ (၃)ရက်နေ့ နံနက်(၀၈:၀၀)နာရီအချိန်တွင် စစ်ကိုင်းတိုင်းဒေသကြီး၊  ကန့်ဘလူခရိုင် ၊ ကျွန်းလှမြို့ပေါ် ရပ်ကွက်များရှိ အိမ်ဆောက်ပစ္စည်းအရောင်းဆိုင်များသို့ အပတ်စဉ်သွားရောက် ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

     ကွင်းဆင်းစစ်ဆေးရာ ကျွန်းလှမြို့နယ်အတွင်းရောင်းချနေသော ဘိလပ်မြေအရောင်းဆိုင်များတွင်   ဘိလပ်မြေဝယ်ယူရရှိမှု အခြေအနေ၊ ဘိလပ်မြေအမျိုးအစားများ ၊ တစ်အိတ်ချင်းစီ၏ တစ်အိတ်ဈေးနှုန်း၊ ပစ္စည်းပြတ်လတ်မှုရှိ/မရှိ ကုန်ပစ္စည်းလက်ကျန်အခြေအနေမျာကို မေးမြန်းခဲ့ရာ ဈေးကွက်အနေဖြင့် ကျွန်းလှမြို့နယ်အတွင်း ဖြန့်ဖြူးရောင်းချပေးလျက်ရှိကြောင်းနှင့် ဈေးနှုန်းအနေဖြင့် ကြံ့နှစ်ကောင် အမှတ်တံဆိပ် ဘိလပ်မြေဈေးနှုန်းမှာ တစ်အိတ်လျှင် ကျပ် ၁၄၀၀၀ ၊ CROWN အမှတ်တံဆိပ် 525အမျိုးအစား တစ်အိတ်လျှင် ကျပ်၁၆၀၀၀၊ CROWN အမှတ်တံဆိပ် 425 အမျိုးအစား ဘိလပ်မြေ တစ်အိတ်လျှင် ကျပ် ၁၅၅၀၀ တို့ဖြင့် ဈေးနှုန်း အတက်အကျပေါ်မူတည်၍ ရောင်းချပေးလျက် ရှိကြောင်း နှင့် ဘိလပ်မြေဆိုင်များတွင် ပစ္စည်းပြတ်လတ်မှုမရှိကြောင်း၊ ကုန်ပစ္စည်း လက်ကျန်ရှိကြောင်း မေလနောက်ဆုံးအပတ်နှင့် ဈေးနှုန်းနှိုင်းယှဉ်ပါက ယခုဇွန်လ ပထမအပတ်တွင် ယခင်အပတ်အတိုင်း ဘိလပ်မြေဈေးနှုန်း တည်ငြိမ်လျက်ရှိကြောင်း သိရှိခဲ့ရပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့ မြို့မစည်ပင်သာယာဈေးကွက်အတွင်းသို့ ရှမ်းပြည်နယ် အောင်ပန်းတို့မှထွက်ရှိသော ခရမ်းချဥ်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

     ခရမ်းချဥ်သီးများသည် ယခုအချိန် အခါကာလဖြစ်သည့် မိုးရာသီတွင် ဒေသထွက် ခရမ်းချဥ်သီး များ ဈေးကွက်အတွင်းသို့ ဝင်ရောက်မှုမရှိသည့်အတွက် ရှမ်းပြည်နယ် အောင်ပန်းဒေသထွက် ခရမ်းချဥ်သီးများကို မန္တလေးမြို့မှ မှာယူရောင်းချရပါသည်။ ရှမ်းပြည်၊ အောင်ပန်းဒေသထွက် ခရမ်းချဥ်သီးများမှာ ရာသီမရွေး ဝယ်ယူစားသုံးနိုင်ပြီး အခွံလည်းထူ၍ အချဥ်အရသာနည်းသည့်အပြင် အလုံးအရွယ်အစားလှခြင်း၊ အထားခံခြင်းတို့ကြောင့် လူအများကကြိုက်နှစ်သက်ကြပါသည်။ ယခု ဇွန်လ ပထမ အပတ်မှစ၍ ခရမ်းချဥ်သီး ဈေးနှုန်းများ ဆက်လက်မြင့်တက်လျက်ရှိလာကြောင်း သိရှိရပါသည်။

    ကန့်ဘလူမြို့၏ ခရမ်းချဥ်သီးဈေးနှုန်း အနေဖြင့် ယခင် ဧပြီလကုန်နှင့် /မေလ လဆန်းပိုင်းများ တွင် ထိုင်ဝမ် ခရမ်းချဥ်သီးဈေးမှာ အလုံးအရွယ်အစားအလိုက် တစ်ပိဿာလျှင် (၅၀၀/၇၀၀/၈၀၀/ ၁၀၀၀)ကျပ် ဈေးနှုန်းဖြစ်ခဲ့ပြီး ၊ မေလ ဒုတိယအပတ်နှင့် တတိယအပတ်တို့တွင် ထိုင်ဝမ် ခရမ်းချဥ်သီးဈေးမှာ တစ်ပိဿာလျှင် အလုံးအရွယ်အစားအလိုက် (၁၂၀၀/၁၅၀၀/၁၈၀၀/၂၀၀၀)ကျပ်အထိ ဈေးနှုန်း မြင့်တက်လာကာ ယခု ဇွန်လ ပထမအပတ်တွင် ထိုင်ဝမ် ခရမ်းချဥ်သီးဈေးမှာ အလုံးအရွယ်အစား အလိုက် တစ်ပိဿာလျှင် (၄၅၀၀/၄၈၀၀)ကျပ်ဈေးနှုန်းဖြင့် အရောင်းအဝယ်ဖြစ်နေကြောင်းနှင့် ခရမ်းချဥ်သီး တစ်ပိဿာလျှင် (၂၀၀၀) ကျပ်ခန့် အထိ ဆက်လက်ပြီး ဈေးနှုန်းမြင့်တက်လျက်ရှိကြောင်း ကန့်ဘလူမြို့ ကုန်စိမ်းသီးနှံအရောင်းအဝယ်လုပ်နေသူများထံမှ သိရှိရပါသည်။

DOCA(စစ်ကိုင်း)