ပြည်တွင်းကုန်သွယ်မှုသတင်း

  တောင်ငူမြို့ ညောင်ပင်ဈေးတွင် ရာသီပေါ်ခဝဲသီးများဈေးကောင်းရနေပါသည်။ တောင်ငူ မြို့တွင် စစ်တောင်းမြစ်နှင့် ခပေါင်းချောင်းများ တည်ရှိသဖြင့် မြစ်၊ ချောင်း ကမ်းနဘေးရှိ ကျေးရွာ များတွင် ဟင်းသီးဟင်းရွက်များတစ်ပိုင်တစ်နိုင်စိုက်ပျိုးကြပါသည်။

   ယင်းမြစ်၊ ချောင်း ကမ်းနားများရှိ ဟင်းသီးဟင်းရွက်စိုက်ပျိုးသူ တောင်သူများသည် ၎င်းတို့ အခင်းများမှထွက်ရှိသော ဟင်းသီးဟင်းရွက်များအား အများအားဖြင့် တောင်ငူမြို့ ညောင်ပင်ဈေးသို့ လာရောက်၍ ရောင်းချခြင်း၊ ဖောက်သည်သွင်းခြင်းများအား ပြုလုပ်ကြပါသည်။ ထို့ကြောင့် တောင်ငူမြို့ရှိ ညောင်ပင်ဈေးသည် ကုန်စိမ်းဈေးအဖြစ် ဒေသအတွင်းနာမည် ကျော်ကြားပါသည်။

   တောင်ငူမြို့ ညောင်ပင်ဈေးတွင် ဒေသအတွင်းမှ ထွက်ရှိသောရာသီပေါ် ခဝဲသီးများမှာ ဈေးကောင်းရလျှက်ရှိပါသည်။ ခဝဲသီးအား ကြက်ဥနှင့်ကြော်စားပါကအလွန်အရသာရှိသော ဟင်း တစ်ခွက်ဖြစ်ပါသည်။ ထို့ပြင်ခဝဲသီးဟင်းချိုအဖြစ်လည်း ချက်စား၍ရသလို လုံးချက် ချက်စားပြီး ငပိထောင်းနှင့်တွဲဖက်ပါက ယခုလို စိုစွတ်စွတ်မိုးရာသီတွင် ခံတွင်းမြိန်သော ဟင်းလျာတစ်မျိုးဖြစ် ပါသည်။

    ခဝဲသီး ဈေးနှုန်းအနေဖြင့်ဇွန်လအစောပိုင်းတွင် အတော်အသင့်သာကြီးသော ခဝဲသီး (၃) တောင့်ပါ တစ်စည်း လျှင် (၁၀၀၀)ကျပ် ဖြင့် ရောင်းချပေးနေပြီး ယခုဇွန်လဒုတိယပတ်မှစ၍ တစ်စည်းလျှင် (၅၀၀) ကျပ်ဖြင့် ဈေးနှုန်းကျဆင်းသွားကြောင်း ညောင်ပင်ဈေးရှိ ဟင်းသီးဟင်းရွက် ရောင်းချသူ တစ်ဦးထံမှ လေ့လာသိရှိခဲ့ပါသည်။

DOCA(ပဲခူး)

  တောင်ငူမြို့ ဈေးများသို့ ဒေသထွက် နှင့် အခြားအရပ်ဒေသများမှ ရာသီပေါ် ဟင်းသီးဟင်းရွက် နှင့် သစ်သီးဝလံများ လာရောက်ရောင်းချလျက်ရှိရာ ယခုအခါ ရှမ်းပြည်နယ်၊ သီပေါမြို့ နှင့် နမ့်ဆန်မြို့မှ ပျားရည်သီးနှင့် ကျောက်စိမ်းသီး အမည်ရှိသော နာနတ်သီးများ လာရောက် ရောင်းချလျက်ရှိသည်။ တောင်ငူမြို့သို့  (၁၂)ဘီးယာဉ် (သို့မဟုတ်) (၁၀)ဘီးယာဉ်များဖြင့် သယ်ယူပြီး ကားတစ်စီးတွင် အလုံးပေါင်း (၅၀၀၀ မှ ၅၅၀၀)ခန့်ပါဝင်သည်ဟု ရောင်းချသူများထံမှ သိရသည်။ နာနတ်သီးသည် စရိတ်အကုန်အကျနည်းပါးပြီး စိုက်ပျိုးနိုင်သော အသီးလည်းဖြစ်ပါသည်။

  နာနတ်သီးကို ဆိုင်တွင် အထိုင်ဖြစ်လည်းကောင်း၊ မော်တော်ယာဉ်ငယ်များ ဖြင့်လည်းကောင်း လှည့်လည်ရောင်းချလျက်ရှိသည်။ နာနတ်သီးကို သရေစာအဖြစ်အများဆုံး စားသုံးကြပြီး၊ ဖျော်ရည် အဖြစ် လည်းကောင်း၊ ဟင်းချက် စားခြင်းဖြင့်လည်း စားသုံးနိုင်သည်။

     ကျောက်စိမ်းနာနတ်သီးတစ်လုံးလျှင် ၁၅၀၀ မှ ၂၀၀၀ ကျပ်ဖြစ်ပြီး ပျားရည်နာနတ်သီး တစ်လုံးလျှင် ၂၀၀၀ မှ ၂၅၀၀ ကျပ်အထိ ရောင်းချလျက်ရှိရာ ပေါ်ဦးပေါ်ဖျားဖြစ်သည့်အတွက် လူကြိုက် များ၍ ရောင်းအား ကောင်းကြောင်း နာနတ်သီးရောင်းချသူများထံမှ သိရပါသည်။

DOCA(ပဲခူး)

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့၊ ပိတောက်မြိုင်ဈေးတွင် နေ့စဉ်လာရောက် ရောင်းချသူများ၊ ဈေးဝယ်သူများနှင့် စည်ကားသိုက်မြိုက်လျက်ရှိပြီး အသား/ငါးနှင့် အခြားစား‌သောက် ကုန်ပစ္စည်းများ၊ လူသုံးကုန်ပစ္စည်းများကို ဒေသတွင်းနှင့် အခြားဒေသများမှ ဝယ်ယူရောင်းချလျက်ရှိရာ ယခုအခါ တွင် လမ်းပန်းဆက်သွယ်ရေး အခက်ခဲများကြောင့်  ကုန်ဈေးနှုန်းများ အနည်းငယ် မြင့်တက် လျက်ရှိရာမှ အသား/ငါး ဈေးနှုန်းများထဲမှ အမဲသားဈေးနှုန်းသည်လည်း မြင့်တက်လျက်ရှိပါသည်။

အမဲသားများကို ကျွန်းလှမြို့ ဒေသတွင်းဟင်းစလေများမှ လက်လီ/လက္ကားရောင်းချလျက်ရှိရာ ယခု ၂၀၂၅ ခုနှစ်၊ ဇွန်လ တတိယပတ်၏ အမဲသားဈေးနှုန်းများ အနေဖြင့် အမဲသားရှယ် (တစ်တုံးထဲသား) လက္ကားတစ်ပိဿာလျှင်(၂၅၀၀၀)ကျပ်၊ အမဲသားရှယ်(တစ်တုံးထဲသား) လက်လီတစ်ပိဿာလျှင်(၂၈၀၀၀)  ကျပ်၊အမဲသားရိုးရိုး(အသားပြွန်း)လက္ကားတစ်ပိဿာလျှင်(၂၂၀၀၀)ကျပ်၊အမဲသားရိုးရိုး(အသားပြွန်း)လက်လီ တစ်ပိဿာလျှင်(၂၄၀၀၀)ကျပ် အမဲပုဆိုးကြမ်း တစ်ပိဿာလျှင်(၁၂၀၀၀)ကျပ်နှင့် အမဲရိုး တစ်ပိဿာ (၁၀၀၀၀)ကျပ် ဈေးနှုန်းများဖြင့် အရောင်းအဝယ်ဖြစ်လျက်ရှိကြောင်း အမဲသားသည် ထံမှ သိရပါသည်။

Doca(စစ်ကိုင်း)

ဇွန်ပန်းသည် မွှေးကြိုင်သော သင်းရနံ့နှင့်အဖြူအဆင်းရှိပြီး အမျိုးသမီးတိုင်း ကြိုက်နှစ် သက်သောပန်း ဖြစ်ပါသည်။ ဇွန်ပန်းသည် အမည်နှင့်လိုက်ဖက်စွာ ဇွန်လမှာ စတင်ပွင့်တတ်ပြီး ဩဂုတ်လအထိ ပွင့်သောပန်းဖြစ်သည်။ ဇွန်ပန်းပင်သည် ချုံပင် သို့မဟုတ်နွယ်ပင်တစ်မျိုးဖြစ်ပြီး ဇွန်ကြီး ၊ဇွန်လေးဟူ၍ နှစ်မျိုးရှိပါသည်။

          ဇွန်ပန်းပင်သည် ပူအိုက်သောရာသီဥတုကို ကြိုက်နှစ်သက်ပါသည်။ ထို့ကြောင့် ဇွန်ပန်းပင်ကို မြန်မာပြည်အပူပိုင်းဒေသများ၌ အများဆုံးစိုက်ပျိုးလေ့ရှိပါသည်။ ဇွန်ပန်းပင်များကို အခြားပန်းပင် များကဲ့သို့ ခြံဖွဲ့၍စိုက်ပျိုးခြင်းမရှိသော်လည်း မိမိတို့နေအိမ်များတွင် တစ်ပိုင်တစ်နိုင်စိုက်ပျိုးကြ သည်။ ဇွန်ပန်းကုံးများကို ဘုရားပန်းကပ်လှူရန်၊ ပန်းပန်ရန်နှင့် ကားများ ဈေးဆိုင်များတွင် ချိတ်ဆွဲ ရန်တို့အတွက် ဝယ်ယူကြကြောင်း သိရှိရပါသည်။ ညနေခင်းအချိန်တွင် ရရှိလာသောဇွန်ပန်းများကို ကြိုးဖြင့်သီကုံး၍ ဖက်ကလေးများဖြင့်ထုပ်ခါ ပြင်ဆင်ထားပြီး နောက်နေ့နံနက်စောစောအချိန်တွင် ဈေးသို့သွား၍ ရောင်းချခြင်းဖြင့် အရင်းမစိုက်ရဘဲ မိသားစုဝင်ငွေရရှိနိုင်သောကြောင့်စိုက်ပျိုး သင့်သောပန်းတစ်မျိုးဖြစ်သည်။

ဇွန်ပန်းများကိုသီကုံးပြီး ကန့်ဘလူမြို့၊ မြို့မဈေးသို့လာရောက် ပန်းရောင်းချသည့်လုပ်ငန်း ရှင်၏ပြောပြချက်အရ ၂၀၂၅ခုနှစ်၊ ဇွန်လ၊ တတိယပတ်တွင် တစ်ရက်လျှင် ဇွန်ပန်းကုံး(၃၅မှ ၄၀)ခန့် အထိရရှိပြီး ဇွန်ပန်း (၁)ကုံးလျှင် (၃၅၀)ကျပ်၊ (၃)ကုံးလျှင် (၁၀၀၀)ကျပ်ဖြင့် ရောင်းချကြောင်း သိရှိရပါသည်။

Doca(စစ်ကိုင်း)

ထန်းပင်သည် နှစ်ရှည်သီးပင်ဖြစ်ပြီး ဒေသမရွေးတွင် စိုက်ပျိုးရလွယ်ကူသော အပင်တစ်မျိုး ဖြစ်ပါသည်။ ကန့်ဘလူခရိုင်အတွင်း၌ ယခင်ကပင် မိမိတို့၏ နေအိမ်ခြံစည်းရိုးများတွင် အမှတ်အ သားတစ်ခုအနေဖြင့်လည်းကောင်း၊ ထန်းသီး၊ ထန်းလက်တို့ကို အသုံးပြုရန်အတွက်လည်းကောင်း ရည်ရွယ်စိုက်ပျိုးကြပါသည်။ ထန်းသီးဆံသည် ထန်းပွင့်(ထန်းခိုင်)မှ ထွက်ရှိသော အသီးဖြစ်ပြီး  မြန်မာ့ရိုးရာ သဘာဝအစားအစာဖြစ်သဖြင့် လူအများနှစ်သက်စွာ စားသုံးကြပြီး ထန်းသီးဆံများကို ကန့်ဘလူမြို့နယ် အနှံ့အပြားမှထွက်ရှိကာ မြို့မဈေးသို့ လာရောက်ရောင်းချကြကြောင်း သိရသည်။

ယခုအခါ ထန်းသီးဆံများကို ကန့်ဘလူမြို့မဈေးတွင် ထန်းသီးဆံများ ရောင်းချလျက်ရှိ ကြောင်း၊ဈေးနှုန်းများမှာ ထန်းသီးဆံ(၄)ဆံပါ(၁)ထုပ်လျှင် (၃၅၀)ကျပ်၊ ထန်းသီးဆံ (၄)ဆံပါ (၃)ထုပ်လျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိပြီး၊ ထန်းသီးနုနုလေးများကိုကျောက် ကျောထိုးပြီးစားစား၊ မနုမရင့် ထန်းသီးဆံလေးကို ထန်းလျက်ရည်နှင့် တွဲဖက်စားသုံးကြကြောင်း သိရပါသည်။

Doca(စစ်ကိုင်း)