ပြည်တွင်းကုန်သွယ်မှုသတင်း

စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့၊ ပိတောက်မြိုင်ဈေးတွင် ရာသီပေါ်သီးနှံ များ၊ အခြားဒေသမှဝင်ရောက်သည့် စားသောက်ကုန်ပစ္စည်းများကို ရောင်းချပေးလျက်ရှိရာ ယခုအခါ တွင် ရာသီစာ သခွပ်ပွင့်ခြောက်များကို ရွှေဘိုမြို့နယ်တို့မှ မှာယူရောင်းချလျက်ရှိကြောင်း သိရသည်။

၂၀၂၅ ခုနှစ်၊ ဇွန်လ တတိယပတ်အတွင်း ကျွန်းလှမြို့၊ ပိတောက်မြိုင်ဈေးတွင် ရောင်းချနေ သည့်  သခွပ်ပွင့်ခြောက် ဈေးနှုန်းများမှာ သခွပ်ပွင့်ခြောက် လက္ကား တစ်ပိဿာလျှင်(၁၈၀၀၀)ကျပ်၊ သခွပ်ပွင့်ခြောက် လက်လီ တစ်ပိဿာလျှင်(၂၀၀၀၀)ကျပ်၊ (၅၀)ကျပ်သားလျှင်(၁၀၀၀၀)ကျပ်နှင့် လက်တွင်းတစ်ဆုပ်စာ(၁)ပုံလျှင်(၁၀၀၀)ကျပ် ဈေးနှုန်းတို့ဖြင့် ရောင်းချလျက်ရှိပြီး သခွပ်ပွင့်သည် လူကြိုက်များပြီး ဆေးဘက်ဝင်သော အပွင့်တစ်မျိုးဖြစ်သည့်အတွက် အရောင်းအဝယ်ဖြစ်လျက် ရှိကြောင်း  သတင်း ရရှိပါသည်။

Doca(စစ်ကိုင်း)

ကျွန်းလှမြို့၊ သစ်ရာမြိုင်ဈေးတွင် ငရုပ်သီးခြောက်၊ အာလူး၊ ကြက်သွန်နီ နှင့် ကြက်သွန်ဖြူ တို့ကို ကန့်ဘလူဒေသထွက်နှင့် ရှမ်းပြည်နယ် အောင်ပန်းမြို့၊ မန္တလေးတိုင်းဒေသကြီးတို့မှ အများဆုံးမှာယူ ရောင်းချလျက်ရှိကြောင်း သိရှိရပါ သည်။

ယခု ၂၀၂၅ ခုနှစ်၊ ဇွန်လ ဒုတိယပတ်၌ ကျွန်းလှမြို့၊ သစ်ရာမြိုင်ရပ်ကွက်အတွင်း ရောင်းချနေသော ငရုပ်သီးခြောက်ဈေးနှုန်း အနေဖြင့် ငရုပ်သီးခြောက်(အရှည်)လက္ကား တစ်ပိဿာလျှင်(၁၅၀၀၀)ကျပ်၊ ငရုပ်သီးခြောက်(အရှည်)လက်လီ တစ်ပိဿာလျှင်(၁၆၀၀၀)ကျပ်၊ (၅၀)ကျပ်သားလျှင်(၈၀၀၀)ကျပ်၊ (၂၅) ကျပ်သားလျှင်(၄၀၀၀)ကျပ်နှင့်(၁၀)ကျပ်သားလျှင်(၁၆၀၀)ကျပ် ဈေးနှုန်းတို့ဖြင့် အရောင်းအဝယ်ဖြစ်လျက် ရှိသောကြောင့် ယခင်အပတ်ထက် ငရုပ်သီးခြောက်ဈေး အနည်းငယ်ကျဆင်းလျက်ရှိပြီး အရောင်းအဝယ် ဖြစ်လျက်ရှိကြောင်း သစ်ရာမြိုင်ဈေးတွင် ငရုပ်သီးခြောက်၊ ကြက်သွန်ဖြူ/နီနှင့် အာလူး အရောင်းအဝယ် လုပ်နေသည့် လုပ်ငန်းရှင်များထံမှ သိရှိရပါ သည်။

Doca(စစ်ကိုင်း)

           မြင်းခြံခရိုင်၊ တောင်သာမြို့နယ်အတွင်းရှိ ကျေးရွာများဖြစ်သော နစောင်ရွာ၊ ညောင်တိုရွာ၊ နန်းတည်းရွာနှင့် အင်းတဲရွာများတွင် ကြက်သွန်ဖြူ(ဆောင်း)သီးနှံများ ဒေသတွင်းစားသုံးရန် နှစ်စဉ် စိုက်ပျိုးထွက်ရှိကြောင်း၊ ၂၀၂၅ ခုနှစ်တွင် တောင်သာ မြို့နယ်၌  ကြက်သွန်ဖြူစိုက်ဧက (၃၂၀)ဧက စိုက်ပျိုးထားရှိမှုတွင် ဧကအားလုံး ရိတ်သိမ်းပြီးကြောင်း၊ အထွက်နှုန်းအနေဖြင့်(၁၃၅၀) ပိဿာခန့် ထွက်ရှိကြောင်း သက်ဆိုင်ရာဌာန၏ စာရင်းများအရသိရှိရသည်။ တောင်သာမြို့နယ်အတွင်းရှိ ကျေးရွာများမှ စိုက်ပျိုးထွက်ရှိသော ကြက်သွန်ဖြူများကို မြင်းခြံမြို့ပေါ်ရှိ ပွဲရုံများသို့ တောင်သူများ ကိုယ်တိုင် လာရောက်ရောင်းချပြီး အကျိုးအမြတ်လည်း ရရှိကြောင်းသိရှိရသည်။ စားဖိုဆောင်အုပ်စုဝင်ဖြစ်သော ကြက်သွန်ဖြူ ဆောင်းသီးနှံကို စက်တင်ဘာလနှင့် အောက်တိုဘာလတို့တွင် စိုက်ပျိုးပြီး ဇန်နဝါရီ၊ ဖေဖော်ဝါရီလနှင့် မတ်လတို့တွင် ရိတ်သိမ်းထွက်ပေါ်ကြောင်းသိရှိရသည်။

        မြင်းခြံမြို့၊ အေးမြသီတာဈေးတွင် ယခုဇွန်လ ဒုတိယပတ်တွင်ရောင်းချနေသော ဗမာကြက်သွန်ဖြူကြီးစ(၁) ပိဿာ(၉၀၀၀-၉၅၀၀) ကျပ်၊ အလတ်စ(၁)ပိဿာ (၇၅၀၀-၈၅၀၀)ကျပ်၊ အသေးစ (၁)ပိဿာ (၅၅၀၀-၆၅၀၀)ကျပ် ပေါက်ဈေးများဖြင့် အရောင်းအဝယ်ဖြစ်ကြောင်း သိရှိရသည်။ ယခုအချိန်တွင် ဒေသတွင်းကျေးရွာများမှ ဗမာကြက်သွန်ဖြူများ ထွက်ရှိချိန်ကာလဖြစ်သောကြောင့် ဈေးကွက်တွင် ဈေးနှုန်းသက်သာစွာဝယ်ယူ စားသုံးရကြောင်း၊ မြန်မာလူမျိုးတို့သည် ကြက်သွန်ဖြူကို ဟင်းလျာတိုင်းတွင် ချက်ပြုတ်စားသုံးကြသောကြောင့် ဈေးကွက်တွင်အရောင်းအဝယ် သွက်လျက်ရှိကြောင်း ကြက်သွန်ဖြူရောင်းချသူတစ်ဦး၏ ပြောပြချက်အရ သိရှိရသည်။ ဒေသတွင်း ကြက် သွန်ဖြူများ ထွက်ပေါ်ချိန်ကုန်ဆုံးပါက ရှမ်းပြည်နယ်တောင်ပိုင်း၊ အောင်ပန်းမြို့၊ မန္တလေးမြို့တို့မှ ဝယ်ယူတင်သွင်းပြီး မြင်းခြံဈေးကွက်သို့ဖြန့်ဖြူးရောင်းချကြောင်း သိရှိရသည်။ ကြက်သွန်ဖြူ စားသုံးခြင်းသည် နှလုံးကျန်းမာရေးကို အထောက်အကူပြုပြီး ခုခံအားစနစ်ကို မြှင့်တင်ပေးနိုင်ကြောင်း၊ အစာအိမ်နှင့်အူမကြီး ကင်ဆာဖြစ်နိုင်ခြေကို လျှော့ချပေးကြောင်း သိရှိရသည်။

DOCA(မန္တလေး)

            မန္တလေးတိုင်းဒေသကြီး၊ မြင်းခြံခရိုင်သည် ပဲမျိုးစုံ၊ ဆီထွက်သီးနှံ၊ ပြောင်းနှင့်ဆေးရွက် ကြီးများကို စိုက်ပျိုးလျက်ရှိရာ   ဆောင်းကြက်သွန်နီသီးနှံကိုလည်း အဓိကစီးပွားဖြစ် စိုက်ပျိုးကြ ကြောင်း၊ မြင်းခြံမြို့နယ်တွင် ဆောင်းကြက်သွန်နီကို ၈၆၀၀ ဧက၊ တောင်သာမြို့နယ်တွင် ၉၂၀၄ ဧက၊ နွားထိုးကြီးမြို့နယ်တွင် ၂၃၉၄ ဧက၊ စုစုပေါင်း (၂၀၁၉၈) ဧက စိုက်ပျိုးခဲ့ရာတွင် စိုက်ဧက အားလုံးရာနှုန်းပြည့် ရိတ်သိမ်းပြီးဖြစ်ကြောင်း ခရိုင်ကြေးတိုင်နှင့်မြေစာရင်း ဦးစီးဌာန၏ စာရင်းများ အရသိရသည်။

            ဆောင်းကြက်သွန်နီကို နိုဝင်ဘာလနှင့် ဒီဇင်ဘာလများတွင် စိုက်ပျိုးပြီး ၄ လခန့် အကြာ မတ်လနှင့်ဧပြီလတို့တွင် ရိတ်သိမ်းထွက်ပေါ်ကြောင်း ‌ရွှေဖလားကြက်သွန်နီဥမျိုးကိုသာ စိုက်ပျိုး ကြောင်း၊ တစ်ဧကလျှင် (၄-၆) ပြည်ခန့်ကုန်ကျကြောင်း၊ စိုက်ပျိုးရာတွင် မျိုးစေ့ကိုပျိုးထောင်းပြီး မျိုးပင်ရင့်ချိန်တွင် စိုက်ခင်းသို့ စိုက်ပျိုးကြပြီး၊ မျိုး၊ သွင်းအားစု၊ လုပ်သားခအပါအဝင် တစ်ဧက ကုန်ကျစရိတ်အနေဖြင့်လျှင် (၂၉) သိန်းခန့် ကုန်ကျကြောင်း၊ တစ်ဧကလျှင်ပျှမ်းမျှ အထွက်နှုန်း (၃၃၀၀)ပိဿာ ခန့်ထွက်ရှိပြီး၊ တောင်သူများက မြင်းခြံမြို့နယ်ရှိပွဲရုံများသို့ တိုက်ရိုက်တင်ပို့ ရောင်းချကြောင်း၊ ထွက်ပေါ်ချိန် ရောင်းဈေးအနေဖြင့် ဆောင်းကြက်သွန်နီ တစ်ပိဿာ ဈေးနှုန်းမှာ ၁၂၀၀ ကျပ် ပေါက်ဈေးဖြစ်ပြီး၊ တစ်ဧကလျှင် တောင်သူများအနေဖြင့် (၁၀)သိန်းခန့် အကျိုးအမြတ် ရရှိကြောင်း၊ ဒေသအတွင်းရှိကျေးရွာများမှ မြင်းခြံမြို့ပေါ်ပွဲရုံများသို့ လာရောက်ရောင်းချကြောင်း တောင်သူတစ်ဦး၏ ပြောပြချက်အရသိရှိရသည်။  ယခုဇွန်လတတိယပတ်တွင် ဆောင်းကြက်သွန်နီ တစ်ပိသာလျှင်(၁၃၀၀)ကျပ် ပေါက်ဈေးများရှိကြောင်း၊ ထိုပွဲရုံများမှတဆင့် ရန်ကုန်မြို့၊ ဘုရင့်နောင် ပွဲရုံများသို့ အဓိကတင်ပို့ပြီး၊ မန္တလေး၊ နေပြည်တော်၊ မော်လမြိုင်မြို့များသို့လည်း တင်ပို့လျက် ရှိကြောင်း ဆောင်းကြက်သွန်နီသည် ပြည်တွင်း၊ ပြည်ပဈေးကွက်ရှိသဖြင့် တောင်သူများအတွက် အကျိုးအမြတ်ရရှိသောကြောင့် စီးပွားဖြစ်နှစ်စဉ်စိုက်ပျိုးကြကြောင်း သိရှိရပါသည်။

DOCA(မန္တလေး)

             မြင်းခြံမြို့နယ်တွင်သည် အပူပိုင်းဒေသဖြစ်ပြီး ဆည်ရေသောက်အသင့်အတင့် ရှိ၍ ဟင်းသီးဟင်းရွက် မျိုးစုံစိုက်ပျိုးလျက်ရှိရာ ဒေသတွင်းစားသုံးရန်အတွက် မုန်ညင်းထုပ်(ခေါ်) မုန်ညင်းဖြူကို(ဆောင်း) သီးနှံတစ်ရာသီသာ စိုက်ပျိုးကြောင်း၊ အေးသောရာသီဥတုကို  ကြိုက်နှစ် သက်၍ ပုံသဏ္ဍာန်အားဖြင့် မုန်ညင်းထုပ်အရှည်မျိုးနှင့် မုန်ညင်းထုပ်အပုမျိုးဟူ၍ နှစ်မျိုးရှိကြောင်း  သိရှိရသည်။

            ၂၀၂၅ ခုနှစ်၊ ဇွန်လတတိယပတ်တွင် မြင်းခြံမြို့၊ အေးမြသီတာဈေးအတွင်း ရောင်းချနေ သော မုန်ညင်းထုတ် ၂၅ ကျပ်သားလျှင် (၈၀၀-၁၀၀၀) ကျပ်၊ (၅၀)ကျပ်သားလျှင် (၁၃၀၀-၁၈၀၀) ကျပ်၊ တစ်ပိဿာလျှင် (၂၅၀၀-၃၅၀၀)ကျပ် ပေါက်ဈေးများဖြင့် အရောင်းအဝယ်ဖြစ်လျက်ရှိကြောင်း၊ မေလ တတိယပတ်တွင် မုန်ညင်းထုပ်၂၅ ကျပ်သားလျှင် (၆၀၀-၈၀၀) ကျပ်၊ ၅၀ ကျပ်သားလျှင် (၁၀၀၀-၁၃၀၀) ကျပ်၊ တစ်ပိဿာလျှင် (၂၀၀၀-၂၅၀၀) ကျပ် ပေါက်ဈေးများဖြင့် အရောင်းအဝယ် ဖြစ်ခဲ့ကြောင်းသိရှိရသည်။ ကာလတူနှိုင်းယှဉ်ပါက ယခင်တစ်ပတ်ထက် ယခုတစ်ပတ်တွင် မုန်ညင်းဖြူ ၂၅ ကျပ်သားလျှင် (၂၀၀) ကျပ်၊ ၅၀ ကျပ်သားလျှင် (၃၀၀-၅၀၀) ကျပ်၊  တစ်ပိဿာလျှင် (၅၀၀-၁၀၀၀) ကျပ်ခန့်ဈေးနှုန်းများ မြင့်တက်ခဲ့ကြောင်း၊ ထိုသို့မြင့်တက်ခဲ့ခြင်းမှာ ဒေသထွက် မုန်ညင်းထုပ်များ ထွက်ပေါ်သောရာသီချိန် ကုန်ဆုံးပြီဖြစ်သောကြောင့်  ဈေးနှုန်းများမြင့်တက်ခဲ့ကြောင်း၊  လိုအပ်သော        မုန်ညင်းထုတ်များကို ရှမ်းပြည်နယ်၊ အောင်ပန်းမြို့နှင့် မန္တလေးမြို့ရှိ ကုန်စိမ်းပွဲရုံများမှတင်သွင်း၍  ဒေသတွင်းရောင်းချကြောင်း၊ သုံးစွဲမှုအနေဖြင့် စားသောက်ဆိုင်၊ ပင်လယ်စာဆိုင်၊ လက်ဖက်ရည်ဆိုင်နှင့်အသုပ်စုံဆိုင်များမှ အများဆုံးဝယ်ယူသုံးစွဲကြောင်း ကုန်စိမ်းရောင်းချသူတစ်ဦး၏ ပြောပြချက်အရကြောင်း သိရှိရပါသည်။

DOCA(မန္တလေး)