ပြည်တွင်းကုန်သွယ်မှုသတင်း

       တောင်ငူမြို့၊ ညောင်ပင်ဈေးတွင် အခြေခံစားသောက်ကုန်များဖြစ်သော ခရမ်းချဉ်သီးနှင့် ကြက်သွန်ဖြူ/နီများမှာ ဈေးနှုန်းမြင့်တက်လျက်ရှိပါသည်။ ကြက်သွန်နီ/ဖြူများမှာ အောက်တိုဘာလကုန်မှစ၍ မြင့်တက်လျက်ရှိပြီး ခရမ်းချဉ်သီးမှာ နိုဝင်ဘာလ၊ ပထမအပတ်ကုန်မှစ၍ ဈေးနှုန်းမြင့်တက်လာပါသည်။

            ကြက်သွန်နီ (၁) ပိဿာလျှင် စက်တင်ဘာလလအစ၌ (၃၅၀၀) ကျပ်ခန့်မှ စက်တင်ဘာလ၊ နောက်ဆုံးအပတ်တွင် (၅၀၀၀) ကျပ်နှင့် နိုဝင်ဘာလ၊ ပထမအပတ်တွင် (၈၀၀၀) ကျပ်ထိဈေးနှုန်းမြင့်တက်သွားပြီး၊ ကြက်သွန်ဖြူမှ စက်တင်ဘာလ၌ (၁) ပိဿာလျှင် (၁၄၀၀၀) ကျပ်မှ နိုဝင်ဘာလတွင် (၁၈၀၀၀) ကျပ်ထိဈေးနှုန်းမြင့်တက်လာပါသည်။

            ခရမ်းချဉ်သီးဈေးနှုန်းအနေဖြင့် အောက်တိုဘာလတွင် (၁)ပိဿာလျှင် (၄၀၀၀) ကျပ်ခန့်ရှိခဲ့ရာမှ နိုဝင်ဘာလ၊ ဒုတိယအပတ်၌ (၁) ပိဿာလျှင် (၈၀၀၀) ကျပ်မှ  အလုံးလှလျှင်လှသလို (၁၀၀၀၀) ကျပ်ထိဈေးနှုန်းမြင့်တက်သွားကြောင်း တောင်ငူမြို့ ညောင်ပင်ဈေးရှိ ခရမ်းချဉ်သီးရောင်းချသူနှင့် ကြက်သွန်ဖြူ/နီရောင်းချသူများထံမှသိရှိရပါသည်။

DOCA(ပဲခူး)

        ဖရုံသီးကိုစားသုံးခြင်းဖြင့် ကျန်းမာရေးအတွက် များစွာအထောက်အကူပြုပြီး ကောင်းကျိုးများစွာရရှိစေပါသည်။ ဖရုံသီးတွင် ဗီတာမင်အေ၊ ဘီကွန်ပလက်၊ စီနှင့်အီး၊ ပိုတက်ဆီယမ်၊ မဂ္ဂနီဆီယမ်၊ ကယ်လဆီယမ်၊ မဂ္ဂနီစ်၊ သံဓာတ်၊ ဇင့်ဓာတ်၊ ကြေးနီနှင့် အခြားဓာတ်တိုးများပါဝင်ပါသည်။ ဖရုံသီးကိုစားသုံးခြင်းဖြင့် ကျန်းမာရေးကို များစွာအ‌ထောက်အကူပြုသည်။ မျက်လုံးကျန်းမာရေးကိုကောင်းမွန်စေခြင်း၊ ခုခံနိုင်စွမ်းတိုးစေခြင်း၊ အစာခြေစနစ်ကောင်းမွန်စေခြင်း၊ ကိုယ်အလေးချိန်လျှော့ချရန် ကူညီပေးနိုင်ခြင်း၊ အရေပြားကျန်းမာရေးအတွက် ကောင်းမွန်ပြီး ငယ်ရွယ်နုပျိုစေခြင်း၊ ယောင်ရမ်းခြင်းကိုလျော့ကျစေခြင်း၊ ကင်ဆာ၊ နှလုံးရောဂါ၊ ဆီးချိုရောဂါ၊ အဆစ်ရောင်ရောဂါနှင့် သွေးဖိအားလျော့ကျခြင်းတို့ကို သက်သာစေနိုင်ပါသည်။

       ရွှေဖရုံသီးသည် ရာသီသီးနှံဖြစ်ပြီး မိုးဦးကာလ မေလနှင့်ဇွန်လတွင် စတင်စိုက်ပျိုးကြသည်။ ရွှေဖရုံသီးကို စိုက်ပျိုးပြီး အပင်သက်တမ်း(၁၀၀-၁၂၀) ရက်ကြာလျှင် အသီးများရင့်မှည့်ပြီး စတင်ခူးဆွတ်နိုင်ပါသည်။ ရွှေဖရုံသီးသည် အသီးစားရုံသာမက အညွန့်ကိုပါစားသုံးနိုင်သည့်အတွက် စိုက်ပျိုးသင့်သော ရာသီပေါ်သီးနှံဖြစ်ပါသည်။ ရွှေဖရုံသီးကို အလုံးအရွယ်အစား အကြီး/အသေးပေါ်မူတည်၍ စျေးနှုန်းအမျိုးမျိုးဖြင့် ဝယ်ယူကြကြောင်းသိရပါသည်။ (၂၀၂၄)ခုနှစ်၊ အောက်တိုဘာလ၊ တတိယအပတ်တွင် ဖရုံသီးလက်ကားစျေးမှာ (၈၀၀-၁၀၀၀)ကျပ်၊ လက်လီစျေး(၁၀၀၀-၁၂၀၀) ကျပ်တို့ဖြင့်ရောင်းဝယ်ကြကြောင်း သီးနှံရောင်းဝယ်သူများထံမှသိရပါသည်။ ရွှေဖရုံသီးသည် အရင်းနည်းပြီး အပိုဝင်ငွေရသည့်အတွက် တောင်သူများအနေဖြင့် တွက်ခြေကိုက်သောကြောင့် စိုက်ပျိုးသင့်ကြောင်း ရေးသားတင်ပြလိုက်ရပါသည်။

DOCA(ပဲခူး)

               မွန်ပြည်နယ်သည်ကျွဲကောသီးထွက်ရှိရာ ပြည်နယ်တစ်ခုဖြစ်ပါသည်။ ကျွဲကောသီးအများဆုံးထွက်ရှိသော မြို့နယ်များမှာ ကျိုက်ထို၊ ဘီးလင်း၊ သထုံ၊ မုဒုံ၊ မော်လမြိုင်မြို့နယ်များဖြစ်ပြီး ယခု နိုဝင်ဘာလ တတိယအပတ်တွင် ဖြစ်ပေါ်နေသော ကျွဲကောသီးဈေးနှုန်းများမှာ ပန်းရောင်ကျွဲကောသီး(အကြီး) ၂ကီလိုအထက် ၅၀၀၀ကျပ်၊ ပန်းရောင်ကျွဲကောသီး(အလတ်) ၂ကီလို ၄၀၀၀ ကျပ်၊ ပန်းရောင်ကျွဲကောသီး(အငယ်) ၂ကီလိုအောက် ၃၀၀၀ ကျပ်၊ ကျွဲကောသီးအဖြူ(အကြီး) ၂ကီလို ၄၀၀၀ ကျပ်၊ ကျွဲကောသီးအဖြူ (အငယ်) ၁.၅ကီလို ၂၀၀၀ ကျပ်ဖြစ်ပေါ်လျက်ရှိကြောင်းသိရှိရပြီး အဆိုပါကျွဲကောသီးများကို မော်လမြိုင်-ရန်ကုန် ကားလမ်းဘေး ဝဲ/ယာ ဆိုင်များနှင့် ရန်ကုန်၊ မကွေးနှင့် အခြားမြို့နယ်များသို့ တင်ပို့ရောင်းချလျက်ရှိကြောင်း သိရှိရပါသည်။

DOCA(မွန်)

            ဧရာဝတီတိုင်းဒေသကြီး၊ ကန်ကြီးထောင့်မြို့နယ်အတွင်းရှိ ဘိလပ်မြေဈေးနှုန်းများမှာ ကြံနှစ်ကောင်အမှတ်တံဆိပ် ဘိလပ်မြေ (၁) အိတ်လျှင် ကျပ် (၁၅၀၀၀)၊ ထိုင်းဆင်အမှတ်တံဆိပ်ဘိလပ်မြေမှာ ပစ္စည်းပြတ်နေပြီး၊ Alpha အမှတ်တံဆိပ်ဘိလပ်မြေ (၁) အိတ်လျှင် ကျပ် (၁၂၀၀၀)၊ Alphacy အမှတ်တံဆိပ် ဘိလပ်မြေ (၁) အိတ်လျှင် ကျပ် (၁၁၈၀၀) ရှိကြောင်း သိရှိရပါသည်။

             ယခုအပတ်အတွင်း ကန်ကြီးထောင့်မြို့နယ်၏ ဘိလပ်မြေဈေးနှုန်းမှာ တည်ငြိမ်လျက်ရှိနေကြောင်း ကန်ကြီးထောင့်မြို့နယ်ရှိ အိမ်ဆောက်ပစ္စည်းအရောင်းဆိုင် စိန်ထိုက်၊ အုန်းရှစ်ကျော်အေးနှင့် ကိုအေးထွန်းဆိုင်များမှ သိရှိရပါသည်။

DOCA(ဧရာဝတီ)

               ဧရာဝတီတိုင်းဒေသကြီး၊ ပုသိမ်ခရိုင်ဈေးကွက်အတွင်း ကြက်သွန်နီဈေးနှုန်းများ ယခုအပတ်အတွင်း အနည်းငယ်ပြန်လည်ကျဆင်းလာကြောင်းတွေ့ရှိရပါသည်။ ယခင်လများတွင် ကြက်သွန်နီဈေးနှုန်းမှာ (၁) ပိဿာလျှင် ၅၅၀၀ ကျပ် မှ ၆၀၀၀ ကျပ်အထိ မြင့်တက်ခဲ့ပြီး၊ ယခု နိုဝင်ဘာလဒုတိယအပတ်တွင် ကြက်သွန်နီဈေးနှုန်း အနည်းငယ်ပြန်လည်ကျဆင်းလာပြီး (၁) ပိဿာလျှင် ၄၀၀၀ ကျပ် မှ ၄၂၀၀ ကျပ် ပြန်လည်ကျဆင်းသွားကြောင်း သိရှိရပါသည်။

              ထိုသို ကြက်သွန်နီဈေးနှုန်း အတက်အကျဖြစ်ရခြင်းမှာ  ရာသီပွဲတော်များရှိ၍ သီတင်းကျွတ်ပွဲတော်၊ တန်ဆောင်တိုင်ပွဲတော်များ၊ ကထိန်မင်္ဂလာ၊ အလှူအတန်းပွဲများ များပြားသောလများဖြစ်၍ စားသုံးသူများဝယ်အားများသောကြောင့် ဈေးနှုန်းများမြင့်တက်ရခြင်းဖြစ်ကြောင်း သိရှိရပါသည်။

DOCA(ဧရာဝတီ)