ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ မကွေးခရိုင်၊ မကွေးမြို့၊ နံကပ်ကျွန်းအုပ်စု၌ ကုန်တင်ယာဉ်ကြီးများ စစ်ဆေးရေးဂိတ်အား မကွေးမြို့အတွင်း အဆင့်မြှင့်တင်ထားသော လမ်းများမပျက်စီးစေရန် ထိန်းသိမ်းခြင်း၊ ကုန်တင်ယာဉ်များဖြင့် မြို့တွင်း ကားမရှုပ်စေရန်ရည်ရွယ်၍  ဖွင့်လှစ်ထားရှိခဲ့ပြီး နယ်စုံမှ ဝင်ရောက်လာသော ကုန်တင်ယာဉ် (၁၀)ဘီး/ (၁၂)ဘီးနှင့် တွဲကားများအား မြို့တွင်းသို့ ဝင်‌ရောက်ခွင့်မပြုဘဲ ကုန်တင်ယာဉ်ကြီးများ စစ်ဆေးရေးဂိတ်၌ သက်ဆိုင်ရာဌာနများပါဝင်သော တရားမဝင်ကုန်သွယ်မှု တိုက်ဖျက်ရေး အထူးအဖွဲ့မှ တရားမဝင်တင်သွင်းလာသောကုန်စည်များ၊ ကန့်သတ်ပစ္စည်းများ၊ မူးယစ်ဆေးဝါးများ သယ်ဆောင်လာခြင်း မရှိစေရေးစစ်ဆေးပြီးမှ မြို့တွင်းရှိ သက်ဆိုင်ရာ ကုန်သည်ပွဲရုံများသို့ မြို့တွင်းသယ်ယူပို့ဆောင်ရသည့် ကားများဖြင့် ပြန်လည်ကဲ့ယူ၍ ပေးပို့လျက်ရှိပါသည်။

    စားသုံးသူရေးရာဦးစီးဌာနမှလည်း ယင်းကုန်တင်ယာဉ်ကြီးများ စစ်ဆေး‌ရေးဂိတ်တွင် နေ့စဉ် တာဝန်ကျ ဝန်ထမ်းများမှ မကွေးမြို့သို့ ဝင်ရောက်လာသော ကုန်စည်များ၌ တရားမဝင်တင်သွင်းလာသော ကုန်စည်များနှင့် ကုန်စည်များတွင် ကုန်အညွှန်းအမှတ်အသားဆိုင်ရာ သတ်မှတ်ချက်များ ပြည့်စုံမှန်ကန်စွာ ပါဝင်မှုရှိ/မရှိတို့အား ကြီးကြပ်စစ်ဆေးလျက်ရှိပါသည်။

    သင်္ကြန်မတိုင်ခင်(၁.၄.၂၀၂၄)မှ(၁၂.၄.၂၀၂၄)ရက်နေ့ထိ ဆန်ဝင်ရောက်မှုအနေဖြင့် ဧရာဝတီတိုင်း မှ (၁၂၀၇၅)အိတ်၊ မန္တလေးတိုင်းမှ (၄၅၉)အိတ်၊ စစ်ကိုင်းတိုင်းမှ (၇၆၀)အိတ်၊ ရန်ကုန်တိုင်းမှ (၇၂၀)အိတ်နှင့် ပဲခူးတိုင်းမှ (၃၆၀)အိတ် စုစုပေါင်း (၁၄၃၇၅)အိတ် ဝင်ရောက်ခဲ့ပြီး စားအုန်းဆီအနေဖြင့် (၄၁၅)ပေပါ၊ ဘိလပ်မြေ (ကြံ့နှစ်ကောင်)တံဆိပ် ကျောက်ဆည်မှ (၄၄၈၅)အိတ်နှင့် (အပါချီ )တံဆိပ် ပျဉ်ညောင်မှ (၇၅၀)အိတ်ဝင်ရောက်ခဲ့ကြောင်းနှင့် သင်္ကြန်ကာလအတွင်း ယာဉ်လိုင်းများပိတ်၍ ကုန်စည် စီးဆင်းမှုမရှိခဲ့ပါ။ သင်္ကြန်အပြီး (၁၄.၄.၂၀၂၄)မှ (၂၃.၄.၂၀၂၄)ရက်နေ့အထိ ဝင်ရောက်မှုမှာ ဆန် (ဧရာဝတီတိုင်း)မှ (၆၁၆၀)အိတ်၊ ရန်ကုန်တိုင်းမှ (၂၉၆)အိတ်နှင့် မန္တလေးတိုင်းမှ (၃၃၉)အိတ် စုစုပေါင်း (၆၇၉၅)အိတ် ဝင်ရောက်ခဲ့ကြောင်း၊ စားအုန်းဆီ (၂၇၄)ပေပါနှင့် ဘိလပ်မြေအား ကျောက်ဆည်မြို့မှ (ကြံ့နှစ်ကောင်)တံဆိပ် (၁၄၄၀)အိတ် ဝင်ရောက်ခဲ့ပြီး ပုံမှန် ကုန်စည်များ စီးဝင်/ စီးထွက်လျက်ရှိပြီး  ကုန်သွယ်မှုကဏ္ဍ မှန်ကန်မြန်ဆန် အောင်ဆောင်ရွက်လျက်ရှိကြောင်း သိရှိရပါသည်။

DOCA(မကွေး)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်သည် မြေလတ်ဒေသတွင်တည်ရှိပြီး ရေနံထွက်ရှိရာဒေသဖြစ်သည့်အလျောက် ရေနံတူးဖော်ခြင်းလုပ်ငန်းကိုလုပ်ကိုင်ကြသလို စိုက်ပျိုးရေးလုပ်ငန်း၊ စားသောက်ကုန်လုပ်ငန်းနှင့် အခြားအသေးစားစက်မှုလက်မှုလုပ်ငန်းများကို လုပ်ကိုင်ကြလျက်ရှိပါသည်။

       အထက်မင်းလှမြို့နယ်၌ ရေနံမီးသွေးမှတဆင့်ထုတ်လုပ်သော လောင်စာတောင့်လုပ်ငန်းလုပ် ကိုင်သူ လုပ်ငန်းရှင် (၈)ဦးခန့်ရှိပြီး ရွာတော်ကျေးရွာရှိ "မျိုးမဟာ" လောင်စာတောင့်လုပ်ငန်းမှာ လည်းတစ်ခုအပါအဝင်ပင်ဖြစ်ပါသည်။ လောင်စာတောင့်ထုတ်လုပ်ရာတွင် လိုအပ်သော ကုန်ကြမ်းများမှာ ရေနံမီးသွေး၊ ကော်မှုန့်နှင့် ကျောက်မှုန့်(ခေါ်)ဂါလီတို့ဖြစ်ကြောင်း၊ အဓိကကုန်ကြမ်းတစ်ခု ဖြစ်သည့် ရေနံမီးသွေး(ခေါ်)ရေနံဂျိုးများကို မင်းလှမြို့အနီး မန်းသံပုရာကန်ရေနံချက်စက်ရုံ(PIC)မှ တစ်တန်လျှင် ကျပ်(၆၀၀၀၀၀)ဖြင့် ဝယ်ယူရကြောင်း၊ ကျန်ကော်မှုန့်နှင့် ကျောက်မှုန့်များကို မန္တလေးမြို့မှ ဝယ်ယူကြောင်း၊ လောင်စာတောင့်အဖြစ်ထုတ်လုပ်ရာတွင် ရှေးဦးစွာ ရေနံမီးသွေးများကို ကြိတ်စက်ဖြင့်ကြိတ်ရကြောင်း၊ ကြိတ်ပြီးသော ရေနံမီးသွေးများ အမှုန့်အဆင့်ရောက်သည့်အခါ ကြိုထားသောကော်ရည်မှုန့်နှင့် ကျောက်မှုန့်တို့အချိုးကျရောစပ်၍ မွှေစက်ထဲသို့ထည့်ကာ ရောမွှေပြီး တစ်ညခန့်သိပ်ထားပေးရကြောင်း၊ တစ်ညခန့်သိပ်ပြီးနောက် မနက်ရောက်သည့်အခါတွင် အလျား(၂) လက်မခွဲ၊ အဝိုင်းပတ်ပတ်လည်(၁)လက်မခွဲခန့်ရှိသော ပုံစံခွက်ထဲသို့ထည့်၍  ရိုက်ပေးရကြောင်း၊ ထို့နောက် ရိုက်ထားပြီးသော လောင်စာတောင့်အခဲများအား (၁၅)ရက်ခန့် နေလှန်းပေးရကြောင်း၊ နေလှန်းပြီး လောင်စာတောင့်များအား ရောင်းချရန် တစ်အိတ်လျှင် (၂၅)ပိဿာခန့်စီထုပ်၍ ရောင်းချကြောင်း သိရှိရပါသည်။

  လုပ်အားအနေဖြင့် အလုပ်သမား(၁၀)ဦးခန့်ရှိပြီး တစ်ဦးလျှင် လောင်စာတောင့်ထုတ်လုပ်နိုင်မှုမှာ အခဲရေ(၁၀၀၀ မှ ၂၀၀၀)ထိရှိကြောင်း၊ အလုပ်သမားတစ်ဦး၏ တစ်နေ့တာလုပ်အားခမှာ ရိုက်နိုင်သည့်အခဲပေါ်မူတည်၍ ကျပ်(၅၀၀၀ - ၁၅၀၀၀-၂၀၀၀၀)ကြားပေးရကြောင်း၊ လောင်စာတောင့်လုပ်ငန်း၏ တစ်နေ့တာကုန်ကျစရိတ်အနေဖြင့် လုပ်အားခ၊ ဒီဇယ်ခ၊ မီတာခနှင့် အခြားသွင်းအားစုစရိတ်အပါအဝင် စုစုပေါင်းကုန်ကျစရိတ်မှာ ကျပ်(၈၀၀၀၀ မှ ၁၀၀၀၀၀)နီးပါးကုန်ကျကြောင်း၊ လောင်စာတောင့်လုပ်ငန်းတစ်ခုလုံး၏ စလယ်ဆုံးကုန်ကျစရိတ်မှာ ကျပ်သိန်း(၁၅၀ မှ ၂၀၀)ထိ ကုန်ကျကြောင်း၊ မိမိ၏လောင်စာတောင့်လုပ်ငန်းမှာ မြို့နယ်စည်ပင်သာယာရေးအဖွဲ့လိုင်စင်နှင့် အသေးစား စက်မှုလက်မှုလုပ်ငန်းဦးစီးဌာန၏  မှတ်ပုံတင်လည်းရရှိထားသည့်အပြင် အခွန်လည်းပုံမှန် ဆောင်ထားသော လုပ်ငန်းတစ်ခုဖြစ်ပါကြောင်း၊ ထပ်မံ၍လည်း လောင်စာတောင့်လုပ်ငန်းရုံ(၂)ခုတိုးချဲရန် ရည်ရွယ်ထားကြောင်း၊ ဈေးကွက်အနေဖြင့် လောင်စာတောင့်(၁)ပိဿာလျှင် ကျပ်(၁၇၀၀)ဖြင့် ရန်ကုန်၊ မန္တလေး၊ ပြည်၊ မော်လမြိုင်မြို့များသို့ တင်ပို့ရောင်းချကြောင်း ရွာတော်ကျေးရွာနေ လောင်စာတောင့်လုပ်ငန်းပိုင်ရှင် ဦးမျိုးမင်းထွန်းထံမှ သိရှိရပါသည်။

DOCA(မကွေး)

       ဝါးတန်းဆန်စပါးကုန်စည်ဒိုင်သို့ (၉-၄-၂၀၂၄) ရက်နေ့မှ (၁၂-၄-၂၀၂၄) ရက်နေ့အထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုက‌လေး၊ မော်ကျွန်း၊ ကျိုက်လတ်၊ ဓနုဖြူ၊ ဟင်္သာတ၊ လပ္ပတ္တာ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၆၂၇၈၀) အိတ်၊ ပေါ်ကျွဲ (၆၁၄၀) အိတ်၊ ဧည့်မထ(၁၃၄၅၄၉) အိတ်နှင့် ဆန်ကွဲ (၃၁၅၅၀) အိတ်ဝင်ရောက်ခဲ့ပြီး ပဲခူး (အရှေ့) ညောင်လေးပင်နှင့် ဖြူးမြို့နယ်များမှ ဧည့်မထ (၉၆၇၁) အိတ်နှင့် ပဲခူးတိုင်း(အနောက်)၊ သာယာဝတီ၊ လက်ပံတန်း၊ သုံးဆယ်မြို့နယ်များမှ ဧည့်မထ (၃၀၄၈၅) အိတ်၊ ငစိန် (၁၇၆၅) အိတ်နှင့် ရန်ကုန်တိုင်း၊ ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ တိုက်ကြီး၊ ပျော်ဘွယ်၊ ဥက္ကံမြို့နယ်များမှ ဧည့်မထ (၂၅၄၇၀) အိတ်ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)

       ရန်ကုန်တိုင်းဒေသကြီး၊ လှိုင်မြို့နယ်၊  သီရိမင်္ဂလာဈေးတွင် ၂၀၂၄ခုနှစ်၊ ဧပြီလ ( ၉ ) ရက်နေ့မှ ဧပြီလ ( ၁၂ ) ရက်နေ့အထိဖြစ်ပေါ်ခဲ့သော သစ်သီးဝလံဈေးနှုန်းများမှာ ခရမ်း၊ ပဲခူးမှ ဖရဲသီး (855) တစ်လုံးလျှင် အလုံးကြီး ကျပ်၁၀၀၀၀၊ အလုံးလတ် ကျပ်၉၀၀၀၊ အလုံးသေး ကျပ်၈၀၀၀၊ ခရမ်း၊ ပဲခူးမှ ဖရဲသီး (211) တစ်လုံးလျှင် အလုံးကြီး ကျပ်၅၀၀၀၊ အလုံးလတ် ကျပ်၄၅၀၀၊ အလုံးသေး ကျပ်၃၀၀၀၊ မော်လမြိုင်မှ ကျွဲကောသီးတစ်လုံးလျှင် အလုံးကြီး ကျပ်၂၀၀၀၊ အလုံးလတ် ကျပ်၁၅၀၀၊ အလုံးသေး ကျပ်၁၀၀၀၊ ပုပ္ပါး၊ တိုက်ကြီးမှ မာလကာသီးတစ်လုံးလျှင် အလုံးကြီး ကျပ်၁၀၀၀၊ အလုံးလတ် ကျပ်၈၀၀၊ အလုံးသေး ကျပ်၆၀၀၊ ပြင်ဦးလွင်မှ ဘောက်သီးတစ်ပိဿာလျှင် အလုံးကြီး ကျပ်၅၀၀၀၊ အလုံးလတ် ကျပ်၄၀၀၀၊ အလုံးသေး ကျပ်၃၀၀၀၊ ပြင်ဦးလွင်မှ စတော်ဘယ်ရီ အလုံးကြီးတစ်ခြင်းလျှင် ကျပ်၁၅၀၀၀၊ အလုံးလတ်တစ်ခြင်းလျှင် ကျပ်၁၀၀၀၀၊ ကျိုက်ထိုမှ ပိန္နဲသီးတစ်လုံးလျှင် အလုံးကြီး ကျပ်၃၀၀၀၀၊ အလုံးလတ် ကျပ်၂၀၀၀၀၊ အလုံးသေး ကျပ်၁၀၀၀၀၊ မှော်ဘီမှ စိမ်းစားဥအလုံးကြီးတစ်တွဲလျှင် ကျပ်၁၀၀၀၊ ပြည်မှ ဆီးသီးခြောက် (အချို) အလုံးကြီးတစ်ပိဿာလျှင်  ကျပ်၁၅၀၀၊ ကျိုက်ကော်မှ နာနတ်သီးတစ်လုံးလျှင် အလုံးကြီး ကျပ်၁၅၀၀၊ အလုံးလတ် ကျပ်၁၀၀၀၊ အလုံးသေး ကျပ်၈၀၀ဈေးနှုန်းတို့ရှိကြောင်း သီရိမင်္ဂလာ ဈေးရှိ မြန်မာနိုင်ငံသစ်သီးဝလံပန်းမန်ဟင်းသီးဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)

   မွန်ပြည်နယ်၊ ဘီးလင်းမြို့နယ်တွင် ဆန်းပန်း (ဖြူ/ဝါ) စိုက်ပျိုးနေသောတောင်သူများ အကျိုးအမြတ်များရရှိနေကြောင်းသိရသည်။ ပန်းစိုက်ပျိုးချိန်မှာ ရက်သတ္တပတ်(၁၀) ပတ်ခန့်စိုက်ပျိုးရပြီး ပျိုးပင်တစ်ပင်၏ တန်ဖိုးမှာ (၁၆) ကျပ်ရှိကြောင်း၊ တစ်ဧကလျှင် ပျိုးပင် (၄) သိန်းခန့်စိုက်ပျိုးနိုင်ပြီး တစ်ဧကသွင်းအားစုကုန်ကျစရိတ်မှာ ကျပ်သိန်း(၁၀၀)ခန့်ရှိပြီး တစ်ဧကအထွက်နှုန်းမှာ (၈၀) ရာခိုင်နှုန်းကျော်ခူးဆွတ်ရရှိကြောင်းသိရသည်။ ယခုနှစ်ဈေးကွက်ပေါက်ဈေးအရ ဆန်းပန်း(ဖြူ/ဝါ) တစ်ပွင့်လျှင် (၁၉၀) ကျပ်ခန့်ရရှိပြီး ခူးဆွတ်ရရှိသော ဆန်းပန်း (ဖြူ/ဝါ)များကို ရန်ကုန်၊ ဘားအံ၊ မော်လမြိုင်၊ ထားဝယ်မြို့များရှိ ပန်းဒိုင်များသို့ တင်ပို့ကြောင်းသိရသည်။ ဘီးလင်းမြို့နယ်၊ ရွှေလှေ၊ ညောင်ပုလ္လင်၊ လိပ်ခုံး၊ မုသင်၊ ကျောက်ရေတွင်းကျေးရွာများတွင် စိုက်ပျိုးကြပြီး စုစုပေါင်းဧကအားဖြင့် ဧက(၁၀၀)ခန့်ရှိပြီး ယခုနှစ် ပန်းစိုက်ပျိုးသောတောင်သူများအနေဖြင့် အကျိုးအမြတ်ဖြစ်ထွန်းကြောင်း ရွှေလှေကျေးရွာတွင် ပန်းစိုက်ပျိုးနေသော ဦးအောင်မျိုးထွန်းထံမှသိရှိရပါသည်။

DOCA(မွန်)