ပြည်တွင်းကုန်သွယ်မှုသတင်း

        ပဲခူးတိုင်းဒေသကြီး၊ တောင်ငူမြို့ရှိ ညောင်ပင်ဈေးတွင် ဖရဲသီးများ အများအပြားဝင်ရောက်လျှက် ရှိပါသည်။ ဖရဲသီးတွင် ဒေသအခေါ် ဒုံးကျည်သီးနှင့် ဗမာသီးဟူ၍ နှစ်မျိုးနှစ်စား ရှိပါသည်။ ဒုံးကျည်သီး၏ အားသာချက်မှာ အလုံးသေး၍ ဈေးကောင်းပေးဝယ်ရပြီး အရသာမှာ ပို၍ ချိုမြပါသည်။ ဗမာ ဖရဲသီး၏ အားသာချက်မှာမူ အလုံးအရွယ်အစား အင်မတန်ကြီးသော်လည်း တန်ဖိုးနည်းပါသည်။

         ဗမာသီး၏ အချိုမှာ ဒုံးကျည်သီးအား မမှီသော်လည်း အလုံးကြီး ကြိုက်နှစ်သက်သူများမှာ ဝယ်ယူစားသုံးကြပါသည်။ ဖရဲသီး ဗမာသီးများကို မုံရွာဘက်မှ တင်ပို့ပေးသည်ဟု သိရှိရပြီး ဖရဲခင်း စတင်စိုက်ပျိုးချိန်မှစ၍ အသီးကင်းလေးများပေါ်သောအချိန်ရောက်သောအခါကတည်းက ဧကလိုက် အပြတ်ငွေကြိုပေးကာ ဝယ်ယူထားကြောင်း သိရှိရပါသည်။

       တောင်ငူမြို့ ညောင်ပင်ဈေးရှိ ဖရဲသီးဈေးနှုန်းများအနေဖြင့် ဒုံးကျည်သီး တစ်လုံးလျှင် ၁၀၀၀ တန်မှစ၍ ၂၅၀၀ ကျပ်ထိရောင်းရပြီး၊ ဗမာ ဖရဲသီး တစ်လုံးလျှင် ၂၅၀၀ မှ စ၍ ၃၀၀၀ ကျပ်ထိ ရောင်းရကြောင်း တောင်ငူမြို့ ညောင်ပင်ဈေးတွင် ဖရဲသီး ရောင်းချသူတစ်ဦး၏ ပြောကြားချက်အရ သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ပြည်ခရိုင်၊ ရွှေတောင်မြို့နယ်တွင် ဖရဲသီးများ စတင်ထွက်ပေါ်ပြီး ဈေးကွက်တွင် ရောင်းချနေကြောင်း တွေ့ရှိရပါသည်။ ရွှေတောင်မြို့နယ်အနေဖြင့် ဖရဲသီးစိုက်ပျိုးဧက(၁၀၀)နီးပါးရှိပြီး မီးလောင်အုပ်စုတွင် ဧက (၂၀)ခန့် စိုက်ပျိုးထားသည်ဟု သိရှိရပါသည်။ ဖရဲသီးကို မေလမှစ၍ ဖေဖော်ဝါရီလအတွင်းစိုက်ပျိုးကြပါသည်။ ဖရဲသီးတစ်ဧကလျှင် ဖရဲပင်ပေါင်း ၂၀၀၀ကျော်ခန့် စိုက်ပျိုးနိုင်ပြီး စိုက်ပျိုးပြီး (၂)လအတွင်း အသီးများ စတင်ဆွတ်ခူးရပါသည်။ ဖရဲတစ်ဧက စိုက်ပျိုး ထုတ်လုပ်ကုန်ကျစရိတ်မှာ (၆)သိန်းကျပ်ခန့်ကုန်ကျ၍ ထွက်ရှိလာသော ဖရဲသီးအလုံး အကြီး၊ အသေးပေါ် မူတည်၍ အခင်းပြတ်ရောင်းချရာ ကျပ်(၉)သိန်း ကျော်ရရှိသည့်အတွက် တစ်ဧကလျှင် အသားတင် အကျိုးအမြတ်အနေဖြင့် (၃)သိန်းကျပ်ခန့်ရရှိကြောင်း သိရှိရပါသည်။ ယခင်နှစ်တွင် ဖရဲတစ်ဧက စိုက်ပျိုးထုတ်လုပ်ကုန်ကျစရိတ်မှာ (၃)သိန်းကျပ်ခန့်သာကုန်ကျပြီး ယခုနှစ်တွင် သွင်းအားစုများ၊ စိုက်စရိတ်ဈေးနှုန်းများကြီးမြင့်လာသည့်အတွက် ယခင်နှစ်ထက် တစ်ဆခန့် မြင့်တက်လာပါသည်။ ယခင်နှစ်တွင် တစ်ဧကအခင်းပြတ် ရောင်းချသည့်ဈေးမှာ (၉)သိန်းကျပ်ခန့် ရရှိသည့်အတွက် ယခုနှစ်အတိုင်း ဈေးငြိမ်နေကြောင်း တွေ့ရှိရပါသည်။ ယခင်နှစ်တွင် ဖရဲစိုက် တောင်သူ အသားတင်အကျိုးအမြတ်မှာ (၆)သိန်းကျပ်ခန့်ရရှိခဲ့သဖြင့် ယခုနှစ်ထက်စာလျှင် အကျိုး အမြတ် ပိုမိုရရှိခဲ့ပါသည်။ ယခုနှစ်တွင် ဖရဲစိုက်ပျိုးသူတောင်သူများအနေဖြင့် အကျိုးအမြတ် များလျော့နည်းသွားခြင်းမှာ သွင်းအားစုနှင့်စိုက်စရိတ်များကြီးမြင့်လာခြင်း၊ ဖရဲသီးဈေးမှာ ယခင်နှစ် ကအတိုင်း ဈေးငြိမ်နေခြင်းတို့ကြောင့်ဖြစ်သည်ဟု သိရှိရပါသည်။

       ရွှေတောင်မြို့နယ်၊ မီးလောင်အုပ်စု၊ ဝါလည်ကျေးရွာတွင် ဖရဲသီးကိုဆောင်းရာသီတွင် စိုက်ပျိုးကြပြီး ထွက်ရှိလာသောဖရဲသီးများကို ရန်ကုန်-ပြည် ကားလမ်းဘေးရှိ ဝါလည်ကျေးရွာတွင် တဲများထိုး၍ ရောင်းချကြောင်း သိရှိရပါသည်။ ဈေးနှုန်းများအနေဖြင့် အလုံး အကြီး၊ အသေးအလိုက် ၁၀၀၀ကျပ်မှ ၃၀၀၀ကျပ်အထိ ရောင်းချကြောင်း သိရှိရပါသည်။ ဖရဲသီးမှာလူကြိုက်များပြီး စားသုံးမှုများသဖြင့် ပြည်တွင်းဈေးကွက်အနေဖြင့် ပြည်မြို့သို့တင်ပို့ရောင်းချသလို ရန်ကုန်မြို့သို့လည်း တင်ပို့ ရောင်းချကြောင်း သိရှိရပါသည်။

DOCA(ပဲခူး)

       နိုဝင်ဘာလကုန်ပိုင်းတွင် ဆောင်းမြေပဲဆန်အသစ်များ ဈေးကွက်သို့ စတင်ခြေချဝင်ရောက်လာပြီဖြစ်သဖြင့် ပြည်ဈေးကွက်သို့ ပြည်-အောင်လံကြားရှိ ကျေးရွာများ ၊ရွှေတောင်၊ မြန်အောင်နှင့်ကြံခင်းဘက်မှ ပေါ်ခါစဖြစ်၍ ဝင်ရောက်မှုနည်းနေသေးကာ နေ့စဉ်တစ်နေ့လျှင် အိတ် ၆၀၀/၇၀၀ ခန့် ဝင်ရောက်မှုရှိကြောင်း တွေ့ရှိရပါသည်။ ယခုအပတ် ဆီကြိတ်မြေပဲဆန် တစ်ပိဿာလျှင် ၄၅၀၀ ကျပ်ဖြင့် မြို့တွင်း ဆီစက်သမားများကဝယ်ယူမှုရှိပြီး ယခင်အပတ် ဈေးထက်စာပါက တစ်ပိဿာလျှင် ၂၀၀ကျပ်ခန့် ဈေးကျလာကြောင်း တွေ့ရှိရပါသည်။ မြေပဲလုံးဆန်(အနီ)တစ်ပိဿာလျှင် ၅၄၀၀ကျပ်ဖြင့် မန္တလေးဝယ်လက်များက အဝယ်ရှိနေသော်လည်း ယခင်အပတ်ကအတိုင်း ဈေးငြိမ်နေကြောင်း တွေ့ရှိရပါသည်။ မြေပဲလုံးဆန်(အဖြူ)တစ်ပိဿာလျှင် ၅၂၀၀ကျပ်ဖြင့် မြဝတီသို့ တင်ပို့ရန် အဝယ်ရှိပြီး တစ်နေ့လျှင် အိတ် ၅၀၀ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ ပြည်ဈေးကွက်အတွင်း ရှမ်းပြည်နယ်၊ တောင်ကြီး၊ အောင်ပန်းမှ ရှမ်းအာလူးများနှင့် မန္တလေးဘက်မှ တရုတ်အာလူးများဖြင့် အရောင်းအဝယ်ဖြစ်လျက်ရှိပါသည်။ ယခုအခါ ရှမ်းအာလူး များ အထွက်နည်းလာ၍ ပြည်ဈေးကွက်သို့ အဝင်နည်းကြောင်း သိရှိရပါသည်။ မန္တလေးမှ တရုတ် အာလူးများ နေ့စဉ် ပိဿာချိန် ၃၀၀၀-၄၀၀၀ အဝင်ရှိပြီး အရောင်းအဝယ်ပုံမှန် အနည်းငယ်ဖြစ်လျက်ရှိပါသည်။ ဈေးနှုန်းအနေဖြင့် လက်ကား(ပွဲရုံ)ဈေး တစ်ပိဿာလျှင် အာလူးအလုံး အကြီး အသေးပေါ်လိုက်၍ ကျပ် ၁၈၀၀-၂၀၀၀-၂၂၀၀၊ လက်လီဈေး ကျပ် ၂၄၀၀-၂၈၀၀ဈေးဖြင့် ဈေးအေးနေကြောင်း သိရှိရပါသည်။

DOCA(ပဲခူး)

      ပဲခူးတိုင်းဒေသကြီး၊ ပြည်ကုန်စည်ဒိုင်တွင်ရောင်းဝယ်လျှက်ရှိသော မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ၊ ဘိုကိတ်ပဲ၊ စားတော်ပဲ၊ ပဲကြီးဈေးများမှာ နိုဝင်ဘာလတတိယပတ်မှာ ပဲဈေးတက်နေပြီး စတုတ္ထပတ် မှာတော့ ဈေးကျလျက်ရှိကြောင်း သိရှိရပါသည်။

  ပြည်ကုန်စည်ဒိုင်တွင် မတ်ပဲတစ်တင်းဈေးမှာ ၅၈၅၀၀-၅၉၀၀၀ကျပ်ဖြင့် ရန်ကုန်အဝယ် တစ်ရက်ကိုအိတ် ၁၀၀/၂၀၀ခန့်အဝယ်ရှိပါသည်။ နိုဝင်ဘာလ စတုတ္ထပတ်မှာ မတ်ပဲဈေးကျပြီး ပဲတစ်တင်းကို ၅၈၀၀၀-၅၇၀၀၀-၅၆၅၀၀ကျပ်ဖြင့် ရန်ကုန်အဝယ်တစ်ရက်ကို အိတ် ၁၀၀/၂၀၀ခန့် အဝယ်ရှိပါသည်။

        နိုဝင်ဘာတတိယပတ်တွင် ပဲတီစိမ်းသီးနှံထိပ်စ တစ်တင်းလျှင် ၄၇၅၀၀-၄၈၅၀၀ကျပ်ဖြင့် ရန်ကုန်နှင့် မန္တလေးအဝယ်ရှိပြီး တစ်ရက်ကိုအိတ် ၆၀၀-၇၀၀ ခန့်တင်ပို့ပါသည်။ နိုဝင်ဘာ စတုတ္ထ ပတ်တွင် ပဲတီစိမ်း(ရိုးရိုး)တစ်တင်းကို ၄၇၀၀၀ကျပ်၊ ထိပ်စတစ်တင်းကို ၄၈၀၀၀ကျပ်ဖြင့် မန္တလေး အဝယ်ရှိခဲ့ပါသည်။

       ပဲစင်းငုံလက်ကျန်နည်းနေပြီဖြစ်ပြီး ပဲစင်းငုံတစ်တင်းကို နိုဝင်ဘာတတိယပတ်တွင် ၅၉၀၀၀ ကျပ်ဖြင့် တစ်ရက်ကိုအိတ် ၂၀၀ခန့် အဝယ်ရှိခဲ့ပါသည်။ နိုဝင်ဘာလ စတုတ္ထပတ်တွင် ပဲစင်းငုံ တစ်တင်းကို ၅၉၀၀၀ကျပ်ဖြင့် ဈေးအေးနေခဲ့ပြီး အရောင်းအဝယ်လည်းအေးနေခဲ့ပါသည်။

        ပြည်ကုန်စည်ဒိုင်တွင် နိုဝင်ဘာလတတိယပတ်တွင် ကုလားပဲ(HL) တစ်တင်းကို ၆၃၀၀၀-၆၄၀၀၀ကျပ်ဖြင့် မြို့တွင်းခွဲစက်သမားများ တစ်ရက်ကိုအိတ် ၃၀၀/၄၀၀ခန့် အဝယ်ရှိပါသည်။ နိုဝင်ဘာလစတုတ္ထပတ်တွင် ကုလားပဲဈေးကျလာပြီး ကုလားပဲ (HL)တစ်တင်းကို ၆၁၀၀၀-၆၁၅၀၀-၆၂၀၀၀ကျပ်၊ ကုလားပဲ (မြကြေးမှုံ)တစ်တင်းကို ၆၁၀၀၀-၆၁၅၀၀-၆၂၀၀၀ကျပ်ဖြင့် မြို့တွင်း ရန်ကုန်အဝယ်နှင့် နယ်စုံတင်ပို့မှုရှိပြီး တစ်ရက်ကိုအိတ် ၃၀၀/၃၅၀ခန့်အဝယ်ရှိပါသည်။

       နိုဝင်ဘာတတိယပတ်တွင် စားတော်ပဲ(ကျွန်း)တစ်တင်းကို ၁၁၀၀၀၀-၁၁၅၀၀၀ကျပ်ဖြင့် မြို့တွင်းအဝယ်တစ်ရက်ကိုအိတ် ၅၀/၁၀၀ခန့် အဝယ်ရှိပါသည်။ စတုတ္ထပတ်တွင် စားတော်ပဲ(ကျွန်း) ဈေးအနည်းငယ်ကျပြီး ပဲတစ်တင်းကို ၁၁၂၀၀၀ကျပ်ဖြင့် မြို့တွင်းအဝယ်ရှိခဲ့ပါသည်။

     ဘိုကိတ်ပဲတစ်တင်းကို နိုဝင်ဘာလတတိယပတ်တွင် ၄၂၀၀၀-၄၃၀၀၀ကျပ်ဖြင့် တစ်ရက်ကို အိတ် ၅၀ခန့် မြို့တွင်းအဝယ်ရှိခဲ့ပါသည်။ နိုဝင်ဘာ စတုတ္ထပတ်တွင် ဘိုကိတ်ပဲဈေး ၄၂၅၀၀-၄၃၀၀၀ ကျပ်ဖြင့် ဈေးတက်နေပြီး မြို့တွင်းနှင့်ရန်ကုန် အဝယ်တစ်ရက်ကိုအိတ် ၅၀/၁၀၀ခန့် အဝယ် ရှိခဲ့ပါသည်။

      ပြည်ကုန်စည်ဒိုင်တွင် ပြည်ပသို့တင်ပို့သော ပဲများသာအရောင်းအဝယ်ပုံမှန်သာရှိပြီး မြို့တွင်းအဝယ်ရှိသောပဲများမှာ အဝယ်သွက်လျက်ရှိကြောင်း သိရှိရပါသည်။

DOCA(ပဲခူး)