ပြည်တွင်းကုန်သွယ်မှုသတင်း

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့် ကုန်စည်ဒိုင်များဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များပိုမိုခိုင်မာအားကောင်းလာစေရေး ပူးပေါင်းဆောင်ရွက်လျက်ရှိပါသည်။ ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန်စာရင်းတို့ကိုလည်း အပတ်စဉ်၊ လစဉ်တင်ပြလျက်ရှိရာ ၂၀၂၃ခုနှစ်၊ မတ်လ (တတိယပတ်) အတွင်း အရောင်းအဝယ်ဖြစ်သည့်သီးနှံဈေးနှုန်းများကို ရွှေဘိုမြို့၊ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ပါသည်။

   ရွှေဘိုခရိုင်အတွင်း စိုက်ပျိုးထားသောဆောင်းမြေပဲများကိုရိတ်သိမ်းပြီးဖြစ်၍ ဖေဖော်ဝါရီလ (စတုတ္ထပတ်) မှစတင်ပြီး ရွှေဘိုဈေးကွက်သို့ မြေပဲလုံးဆံများစတင်ဝင်ရောက်လာကြောင်း၊ မတ်လ (တတိယပတ်) အတွင်း မြေပဲလုံးဆံတစ်တင်းလျှင် (၉၉၂၀ဝိ/-) ကျပ်ဖြင့် အရောင်းအဝယ်ဖြစ်လျက်ရှိပြီး အရောင်းအဝယ်ဖြစ်မှုမှာ (၄၅၀)တင်း/(၁၀)တန်ဖြစ်ကြောင်း၊ ယခင်နှစ်ကာလတူ၌ မြေပဲလုံးဆံတစ်တင်းလျှင် (၅၇၆၀ဝိ/-) ကျပ်ပေါက်ဈေးရှိခဲ့ပြီး ယခင်အပတ်၌ မြေပဲလုံးဆံတစ်တင်းလျှင် (၉၉၂၀ဝိ/-) ကျပ်ပေါက်ဈေးရှိခဲ့သဖြင့် ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ရာ တစ်တင်းလျှင် (၄၁၆၀ဝိ/-) ကျပ်ဈေးပိုခဲ့ပြီး  ယခင်အပတ်နှင့် ယခုအပတ် အရောင်းအဝယ်ဖြစ်သည့်ဈေးနှုန်းတို့မှာ တူညီနေပြီး ဈေးငြိမ်နေသော်လည်း အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့်ကုန်စည်ဒိုင်များဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များပိုမိုခိုင်မာအားကောင်းလာစေရေး ပူးပေါင်းဆောင်ရွက်လျက်ရှိပါသည်။ ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန်စာရင်းတို့ကိုလည်း အပတ်စဉ်၊ လစဉ်တင်ပြလျက်ရှိရာ  ၂၀၂၃ခုနှစ်၊ မတ်လ (တတိယပတ်) အတွင်း အရောင်းအဝယ်ဖြစ်သည့်သီးနှံနှင့် ဈေးနှုန်းအခြေအနေများကို ရွှေဘိုမြို့၊ ပဲ၊ နှမ်းကုန်စည်ဒိုင်ရှိ တာဝန်ရှိသူများအား ဆက်သွယ်မေးမြန်းခဲ့ပါသည်။

    ရွှေဘိုမြို့၊ ပဲ၊ နှမ်း ကုန်စည်ဒိုင်တွင် ဒီဇင်ဘာလနောက်ဆုံးပတ်မှစတင်၍ ပဲစင်းငုံများ စတင်အရောင်းအဝယ်ဖြစ်ခဲ့ပြီး မတ်လ (တတိယပတ်)ထိ အရောင်းအဝယ်ဖြစ်လျက်ရှိကြောင်း၊ မတ်လ (တတိယပတ်)၌ ပဲစင်းငုံတစ်တင်းလျှင် (၇၀၀၀ဝိ/-)ကျပ်ဖြင့် အရောင်းအဝယ်ဖြစ်ခဲ့ပြီး အရောင်းအဝယ်ဖြစ်မှုမှာ (၄၅၀)တင်း/(၁၅)တန်ဖြစ်ကြောင်း၊ ယခင်နှစ်ကာလတူ၌ ပဲစင်းငုံတစ်တင်းလျှင် (၄၃၅၀ဝိ/-)ကျပ်ပေါက်ဈေးရှိခဲ့ပြီး ယခင်အပတ်၌ ပဲစင်းငုံတစ်တင်းလျှင် (၆၉၀၀ဝိ/-)ကျပ်ပေါက်ဈေးရှိခဲ့သဖြင့် ယခင်နှစ်ကာလတူနှင့် အရောင်းအဝယ်ဖြစ်သည့်ဈေးနှုန်းတို့ကိုနှိုင်းယှဉ်ရာ တစ်တင်းလျှင် (၂၆၅၀ဝိ/-)ကျပ်နှင့်  ယခင်အပတ်နှင့် ယခုအပတ် အရောင်းအဝယ်ဖြစ်သည့်ဈေးနှုန်းတို့ကိုနှိုင်းယှဉ်ရာ တစ်တင်းလျှင် (၁၀၀ဝိ/-)ကျပ်ဈေးပိုခဲ့ကြောင်း သတင်းရရှိပါသည်။

DOCA(စစ်ကိုင်း)

      စိုက်ပျိုးရေးသုံးသွင်းအားစုများဖြစ်သော   ဓာတ်မြေဩဇာနှင့် ပိုးသတ်ဆေးများ  ကရင်ပြည်နယ်၊ ဘားအံမြို့တွင် အရောင်းအဝယ်အေးလျက်ရှိကြောင်း စိုက်ပျိုးရေးအရောင်းဆိုင်ထံမှ သိရသည်။ (၁၆-၃-၂၀၂၂)မှ (၂၂-၃-၂၀၂၃) ရက်အတွင်း အရောင်းအဝယ်ဖြစ်လျက် ရှိသော ဓာတ်မြေဩဇာဈေးနှုန်းများမှာ (15-15-15) 50 kg ပါ ၁ အိတ်မှာ ကျပ် ၁၄၀၀၀၀၊    (20-12-12) 50 kg ပါ ၁ အိတ်မှာ ကျပ် ၁၃၂၀၀၀၊ (46-0-0) 50 kg ပါ ၁ အိတ်မှာ ကျပ် ၉၅၀၀၀၊ ရွှေတောင်ပံ 50 kg ပါ ၁ အိတ်မှာ ကျပ် ၁၈၅၀၀၊ ပုလဲသာ 50 kg ပါ ၁ အိတ်မှာ ကျပ် ၉၄၀၀၀၊ Caso4.2H20-98%  25 kg ပါ ၁ အိတ်မှာ ကျပ် ၅၅၀၀ အရောင်းအဝယ် ဖြစ်နေကြောင်းသိရပြီး  (19-9-19) 50 kg ၊ (12-6-33) 50 kg တို့မှာ ပစ္စည်းပြတ်လပ်နေကြောင်း သိရှိရသည်။ ပိုးသတ်ဆေးမှာ စိုက်ပါ 100 cc မှာ ကျပ် ၃၅၀၀၊ အလန်း 15W 10:5 မှာ ကျပ် ၂၀၀၀ ၊ ဆာလဖာ 500g မှာ ကျပ် ၆၅၀၀ ဖြစ်ပြီး အင်မီတာကလိုဖေ့ 10g နှင့် အစိဖိတ် 250g တို့မှာပစ္စည်း ပြတ်လပ်နေကြောင်း သိရှိရပါသည်။

DOCA(ကရင်)

    ၂၀၂၃ခုနှစ်၊ မတ်လ(တတိယပတ်)အတွင်း မုံရွာမြို့နယ်တွက် အခြေခံစားကုန်များဖြစ်သော ရွှေဘိုပေါ်ဆန်းဆန်တစ်ပြည်လျှင် (၃၆၀၀) ကျပ်၊ ဧရာမင်းဆန်(အဟောင်း)တစ်ပြည်လျှင် (၃၄၀၀) ကျပ်နှင့် ဧရာမင်းဆန်(အသစ်တစ်ပြည်လျှင် (၃၂၀၀) ကျပ်ဖြင့် အရောင်းအဝယ်ဖြစ်လျက်ရှိပါသည်။ စားအုန်းဆီတစ်ပိဿာလျှင် (၆၉၀၀) ကျပ်၊ မြေပဲဆီတစ်ပိဿာလျှင် (၁၂၀၀၀) ကျပ်၊ နှမ်းဆီတစ်ပိဿာလျှင် (၁၁၀၀၀) ကျပ်တို့ဖြင့် အရောင်းအဝယ်ဖြစ်လျက်ရှိပါသည်။ ကြက်သွန်နီလက်လီတစ်ပိဿာလျှင် (၁၆၀၀) ကျပ်မှ (၁၈၀၀) ကျပ်ထိ၊ ကြက်သွန်ဖြူလက်လီ (ဗမာ) တစ်ပိဿာလျှင် (၅၀၀၀) ကျပ်မှ (၆၀၀၀) ကျပ်ထိ၊ ကြက်သွန်ဖြူ(ရှမ်း)တစ်ပိဿာလျှင် (၄၅၀၀) ကျပ်မှ (၅၀၀၀) ကျပ်ထိ၊ ကြက်သွန်ဖြူ(ကြူကုတ်)တစ်ပိဿာလျှင် (၄၅၀၀) ကျပ်မှ (၅၀၀၀) ကျပ်ထိ၊ ချင်းတက်တစ်ပိဿာလျှင် (၁၄၀၀) ကျပ်မှ (၁၅၀၀) ကျပ်ထိ၊ ငရုတ်ခြောက်အမျိုးအစားအလိုက် တစ်ပိဿာလျှင်  (၁၃၀၀၀)  ကျပ်မှ (၁၄၀၀၀) ကျပ်ထိ၊ အာလူးတစ်ပိဿာလျှင် (၂၅၀၀) ကျပ်မှ (၂၆၀၀) ကျပ်ထိ၊ ခရမ်းချဉ်သီးတစ်ပိဿာလျှင် (၁၀၀၀) ကျပ်မှ (၁၂၀၀)ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

     ကြက်ဥလက်လီဈေးနှုန်းမှာ (ကြီး) တစ်လုံးလျှင် (၂၅၀) ကျပ်၊ (သေး) တစ်လုံးလျှင် (၂၀၀) ကျပ်၊ ဘဲဥ (ကြီး) တစ်လုံးလျှင် (၃၅၀) ကျပ်၊ (သေး) တစ်လုံးလျှင် (၃၀၀) ကျပ်ရှိပါသည်။ မုံရွာမြို့၏ အသားငါးဈေးနှုန်းများမှာ ကြက်သား (CP) တစ်ပိဿာလျှင် ( ၁၀၀၀၀) ကျပ်မှ  (၁၁၀၀၀) ကျပ်ထိ၊ ကြက်သား (ဗမာ) တစ်ပိဿာလျှင် (၁၂၀၀၀) ကျပ်၊ ဝက်သားတစ်ပိဿာလျှင် (၁၇၀၀၀) ကျပ်မှ (၁၈၀၀၀) ကျပ်ထိ၊ အမဲသားတစ်ပိဿာလျှင် (၁၆၀၀၀) ကျပ်မှ (၁၇၀၀၀)ကျပ်ထိ၊ ငါးမြစ်ချင်းတစ်ပိဿာလျှင် (၇၀၀၀) ကျပ်၊ ငါးကြင်းတစ်ပိဿာလျှင် (၈၀၀၀) ကျပ်တို့ဖြင့် အရောင်းအဝယ်ဖြစ်နေကြောင်း သိရပါသည်။

     မတ်လ (တတိယပတ်) အတွင်း အခြေခံစားကုန်ဈေးနှုန်းများနှင့် ယခင်အပတ်ဈေးနှုန်းများကိုနှိုင်းယှဉ်လျှင် စားအုန်းဆီတစ်ပိဿာဈေးနှုန်းမှာ (၃၀၀)ကျပ်၊ ကြက်သွန်နီတစ်ပိဿာဈေးနှုန်းမှာ (၂၀၀) ကျပ်၊ ကြက်သွန်ဖြူ(ဗမာ)တစ်ပိဿာဈေးနှုန်းမှာ (၁၀၀၀)ကျပ်၊ ငရုတ်ခြောက်တစ်ပိဿာဈေးနှုန်းမှာ (၅၀၀၀) ကျပ်ဖြစ်၍  ဈေးကျလျက်ရှိကြောင်းနှင့် အခြားအခြေခံစားကုန်များ၏ဈေးနှုန်းများမှာ ကွာဟမှုမရှိကြောင်း မုံရွာမြို့၏ ဈေးရောင်းချသူများထံမှ သိရှိရပါသည်။

DOCA(စစ်ကိုင်း)

     ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်သည်ငရုတ်စိုက်ပျိုးထုတ်လုပ်မှု အောင်မြင်နေသော ဒေသတစ်ခုဖြစ်ပါသည်။ ညောင်တုန်းမြို့နယ်၏ ငရုတ်စိုက်ပျိုးအောင်မြင်မှု သတင်းသည် ဧရာဝတီတိုင်းဒေသကြီးအတွင်း ပျံ့နှံသွားပြီး ညောင်တုန်းမြို့နယ်နှင့် အနီးအနားမြို့များဖြစ်သည့် ပန်းတနော်၊ ဓနုဖြူ၊ မအူပင်၊ ဝါးခယ်မ၊ ဇလွန်၊ ဟင်္သတမြို့များထိ တိုးချဲ့စိုက်ပျိုးထုတ်လုပ်လျက်ရှိကြောင်း၊ ငရုတ်စိုက်ပျိုးထုတ်လုပ်သူများအသင်း၏ဥက္ကဌလည်းဖြစ် ခင်ငရုတ်ရောင်းဝယ်ရေးပိုင်ရှင်လည်းဖြစ်သည့် ဦးဌေးဝင်း၏ ပြောကြားချက်အရ သိရပါသည်။

        စားသုံးသူရေးရာဦးစီးဌာနမှ ညောင်တုန်းမြို့နယ်ဦးအောင်လွင်နှင့် ဝန်ထမ်းများသည် ၂၀၂၃ခုနှစ် မတ်လတတိယပတ်တွင် ငရုတ်စိုက်ပျိုးထုတ်လုပ်မှုအား ကွင်းဆင်းလေ့လာစိစစ်ခဲ့ပါသည်။ ငရုတ်စိုက်ပျိုးရောင်းဝယ်ရေးခြံတွင်  စိုက်ပျိုးထုတ်လုပ်သောငရုတ်မျိုးများမှာ မိုးထောင်နှင့် အောက်ဆွဲမျိုးများဖြစ်ပြီး ရောင်းချသော မျိုးစေ့ဖြင့် တွက်ချက်ပါက စိုက်ပျိုးမှု ခန့်မှန်းဧက ၃၀၀၀ နှင့် ၃၅၀၀ဧကကြား စိုက်ပျိုးထုတ်လုပ်ကြောင်းသိရှိရပါသည်။

       ငရုတ်မျိုးများကို မျိုးစေ့စတင်စိုက်ပျိုးသည်မှ ခူးဆွတ်ရိတ်သိမ်းနိုင်သည့်အချိန်အထိ တစ်ဧကလျှင် (၂၅)သိန်းခန့် ကုန်ကျနိုင်ပြီး ခူးဆွတ်ချိန် (၄)လအတွင်း တစ်လ (၂)ကြိမ်နှုန်းဖြင့် (၈)ကြိမ်ခူးဆွတ်နိုင်ပါကြောင်း အသင်းဥက္ကဌက ပြောကြားခဲ့ပါသည်။

      ငရုတ်သီးများကို (၁)ကြိမ်ဆွတ်ခူးပြီးတိုင်း အပင်အားဆေး၊ အသီးအားဆေး၊ သွင်းအားစုများကို စနစ်တကျအသုံးပြု ဆောင်ရွက်ရပြီး ခူးဆွတ်ပြီး သွင်းအားစုအသုံးပြုမှု ခန့်မှန်းကုန်ကျစရိတ်မှာ (၂၈)သိန်းခန့် ရှိကြောင်း ထပ်မံရှင်းပြပါသည်။ (၄)လအတွင်း ခူးဆွတ်ပြီး ငရုတ်သီးအစို ပိဿာ (၄၀၀၀)ခန့် ရရှိပြီး အစို ၁ပိဿာလျှင် ၂၀၀၀/-ကျပ် ဈေးနှုန်းဖြင့် ရောင်းချရပြီး သိန်း(၈၀)ကျပ်ခန့် ရရှိသဖြင့် ၁ ဧက တစ်ရာသီစိုက်ပျိုးထုတ်လုပ်ပြီး သိန်း(၃၀)ခန့် အကျိုးအမြတ်ရရှိကြောင်း ငရုတ်အသင်းဥက္ကဌ ဦးဌေးဝင်း၏ ပြောပြချက်အရ အောင်မြင်မှုရရှိနေသော ငရုတ်ဖြစ်ကြောင်း လေ့လာသိရှိရပါသည်။

  ဆက်လက်၍ စားသုံးသူရေးရာဦးစီးဌာနမှ မြို့နယ်ဦးစီးမှူး ဦးအောင်လွင်က ဈေးကွက်ရရှိနေသော ငရုတ်စိုက်ပျိုးထုတ်လုပ်မှု ပိုမိုစိုက်ပျိုးနိုင်ရေး၊ ဈေးကွက်ခိုင်မာရေး၊ ပိုးမွှားအန္တရာယ်ကာကွယ်ရေးနှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ဆောင်ပုဒ်ဖြစ်သော “ဖွံ့ဖြိုးကုန်သွယ်နိုင်ငံကြွယ်” ဆောင်ပုဒ်နှင့်အညီ ပြည်တွင်းမှ ဒေသတွင်း ထွက်ကုန်စည်များကို အရည်အသွေးပြည့်မီစွာစိုက်ပျိုးထုတ်လုပ်နိုင်ရေး၊ ပြည်ပသို့တင်ပို့ ရောင်းဝယ်နိုင်သည်အထိ တိုးမြင့်စိုက်ပျိုးနိုင်ရေးနှင့် ဝန်ကြီးဌာန၏ဆောင်ရွက်မှုများကိုသိရှိရေးတို့အတွက် အကျယ်တဝင့် အပြန်အလှန် ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)