၂၉.၃.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
မန္တလေးတိုင်းဒေသကြီး၊ ရမည်းသင်းခရိုင်၊ ရမည်းသင်းမြို့နယ်၊ သဲကျွန်းအုပ်စု၊ အုတ်ဖိုအနောက်အုပ်စု၊ လယ်သာအုပ်စု၊ ကုလားမြော်ကျေးရွာအုပ်စုရှိ ကျေးရွာများတွင် စပျစ်စိုက်ပျိုးမှုကို ယခင်ကထက်ပိုမိုစိုက်ပျိုးလာကြရာ လက်ရှိစပျစ်စိုက်ဧကမှာ ဧက (၅၀၀၀) ခန့်ရှိပြီး ကိုင်းဖြတ်ကူးစနစ်ဖြင့်လည်းကောင်း၊ စင်တင်စနစ်ဖြင့်လည်းကောင်း စိုက်ပျိုးကြပါသည်။ ရမည်းသင်းခရိုင်အတွင်း စိုက်ပျိုးသည့်စပျစ်အမျိုးအစားများမှာ စားစပျစ်နှင့် ဝိုင်စပျစ်ဟူ၍ (၂) မျိုးရှိရာ အီတလီ NO. 3၊ Red Global ပန်းရောင်နှင့် အချွန်သီးအညိုများကို အများဆုံးစိုက်ပျိုးကြပြီး ဖေဖော်ဝါရီ၌ စတင်ထွက်ရှိကာ မတ်လဆန်းမှ ဧပြီလအထိ လှိုင်လှိုင်ထွက်ရှိကြောင်း၊ ခူးဆွတ်ပြီးလျှင် (၃) ပိဿာ၊ (၄) ပိဿာဆံ့သည့် စက္ကူပုံးများဖြင့် ထုပ်ပိုးကြကြောင်း သိရှိရပါသည်။
စျေးကွက်အနေဖြင့် ရမည်းသင်းခရိုင်မှထွက်ရှိသော စပျစ်သီးများကို ရန်ကုန်၊ မန္တလေး၊ မော်လမြိုင်၊ တောင်ကြီး၊ မကွေး၊ ပဲခူး၊ နေပြည်တော်၊ ပခုက္ကူ၊ ရေစကြို၊ မြစ်ကြီးနားနှင့် မူဆယ်မြို့များသို့ တင်ပို့ကြပြီး ပွဲရုံများနှင့်တိုက်ရိုက်ချိတ်ဆက်တင်ပို့ခြင်း၊ ကြားပွဲစားမှတစ်ဆင့် ရောင်းချခြင်းများရှိပါသည်။ လက်ရှိစျေးကွက်တွင် ခြံပွဲစားကောက်စျေးမှာ စပျစ်သီးတစ်ပိဿာလျှင် (၄၀၀၀) ကျပ်မှ (၄၅၀၀) ကျပ်ထိရှိပြီး လက်လီစျေးမှာ တစ်ပိဿာလျှင် (၆၀၀၀) ကျပ်ခန့်ဖြင့် ရောင်းချလျက်ရှိကြောင်း၊ ယခင်နှစ် စပျစ်ပေါ်ချိန်တွင် ခြံပွဲစားကောက်စျေးမှာ စပျစ်သီးတစ်ပိဿာလျှင် (၃၀၀၀) ကျပ်မှ(၃၅၀၀) ကျပ်ထိရှိကြောင်း၊ လက်လီစျေးမှာ တစ်ပိဿာလျှင် (၄၅၀၀) ကျပ်သာရှိခဲ့ပြီး ယခင်နှစ်ထက် စပျစ်တစ်ပိဿာလျှင် (၁၀၀၀) ကျပ်မှ (၁၅၀၀) ကျပ်ခန့်သာစျေးနှုန်းပိုမိုခဲ့ကြောင်း၊ ဝိုင်အတွက် စိုက်ပျိုးသောစပျစ်မှာ စိုက်ပျိုးသည့်တောင်သူအနည်းငယ်သာရှိ၍ ကုမ္ပဏီနှင့်ချိတ်ဆက်ရောင်းချပြီး ဝိုင်ထုတ်လုပ်သူအနည်းငယ်သာရှိကြောင်း၊ လက်ရှိစပျစ်ဝိုင်တစ်ပုလင်းလျှင် (၁၀၀၀၀) ကျပ်ခန့်ရှိကြောင်း၊ စပျစ်သည် နှစ်ရှည်သီးနှံဖြစ်၍ အကျိုးအမြတ်များစွာရှိသဖြင့် ပိုမိုစိုက်ပျိုးလာကြကား စပျစ်မှ တန်ဖိုးမြှင့်ထုတ်ကုန်များထုတ်လုပ်နိုင်ရန်လည်း ကြိုးပမ်းလျက်ရှိကြောင်း စပျစ်စိုက်ပျိုးထုတ်လုပ်သည့် လုပ်ငန်းရှင်တစ်ဦးထံမှ သိရှိရပါသည်။
DOCA(မန္တလေး)
မိတ္ထီလာစျေးကွက်တွင် ၂၀၂၃ခုနှစ်၊ မတ်လ (တတိယပတ်) အတွင်း နယ်ဝေးဒေသများသို့ ကြက်သွန်နီများကိုပုံမှန်တင်ပို့နေပြီး ယခင်အပတ်နှင့်နှိုင်းယှဉ်ပါက စျေးငြိမ်နေပါသည်။ မတ်လဆန်းပိုင်းက အစောထွက်ရှိသောဆောင်းကြက်သွန်နီများကိုသာ နယ်ဝေးသို့တင်ပို့နေပြီး ယခုမတ်လလယ်ပိုင်းမှ စတင်ရိတ်သိမ်းသောကြက်သွန်နီမှာ ဒေသတွင်းတောင်သူကြီးများနှင့် ကုန်သည်လှောင်လက်သမားများက သိုလှောင်ထားကြောင်း သိရပါသည်။ မတ်လ (တတိယပတ်) အတွင်း မိတ္ထီလာမှ ရန်ကုန်သို့ (၁၂) ဘီးကား (၆) စီးကို အခြားကုန်များနှင့် ရောနှောတင်ပို့ရာ ကုန်ချိန် (၄၈) တန်ဝန်းကျင်၊ ပဲခူးသို့ (၆) ဘီးကား (၁၂) စီးကိုလည်း အခြားကုန်များနှင့်ရော၍ စုစုပေါင်းကုန်ချိန် (၅၈) တန်၊ မောင်လမြိုင်သို့ (၁၂) ဘီးကား (၂) စီးကို သီးသန့်ကုန်အဖြစ် တင်ပို့ခဲ့ပါသည်။ ကုန်တင်ခမှာ တစ်ပိဿာလျှင် မိတ္ထီလာ-ရန်ကုန် (၁၀၅)ကျပ်၊ မိတ္ထီလာ-ပဲခူး (၁၀၀) ကျပ်၊ မိတ္ထီလာ-မော်လမြိုင် (၁၄၀) ကျပ်ရှိကြောင်း သိရပါသည်။ ကြက်သွန်နီတစ်ပိဿာလျှင် လက်ကားစျေးမှာ ယခင်တစ်ပတ်နှင့်ကွာခြားမှုမရှိဘဲ (၁၀၀၀-၁၁၀၀) ကျပ်ရှိကြောင်း စျေးကွက်မှသိရပါသည်။
DOCA(မန္တလေး)
မန္တလေးတိုင်းဒေသကြီး၊ ကျောက်ဆည်ခရိုင်သည် စိုက်ပျိုးရေးကိုအခြေခံ၍ (နွေ၊ မိုး၊ ဆောင်း)ဥတုသုံးပါးနှင့်အညီ ရာသီအလိုက် သီးနှံမျိုးစုံစိုက်ပျိုးသည့်ဒေသဖြစ်ပါသည်။ ရာသီးအလိုက်သီးနှံများကို စိုက်ပျိုးသည့်အနက်မှ ယခုအခါ တောင်သူများအနေဖြင့် ငရုတ်သီးနှံများ အားထားစိုက်ပျိုးလာကြသည်ကိုလည်းတွေ့ရှိရပါသည်။ ကျောက်ဆည်ခရိုင်တွင် ငရုတ်များအား နိုဝင်ဘာလနှင့် ဒီဇင်ဘာလများတွင်စိုက်ပျိုးကြပြီး (၂၀၂၂-၂၀၂၃) ဘဏ္ဍာနှစ်တွင် ငရုတ်စိုက်ဧက (၅၆၄၀)ဧကလျာထားသော်လည်း အမှန်စိုက်ဧကအနေဖြင့် ကျောက်ဆည်မြို့နယ်တွင် (၅၀၂၁)ဧက၊ စဉ့်ကိုင်မြို့နယ်တွင် (၉၆၅)ဧက၊ မြစ်သားမြို့နယ်တွင် (၂၅၁၁)ဧက၊ စုစုပေါင်း (၈၄၉၇)ဧကစိုက်ပျိုးနိုင်ခဲ့ပြီး (၆၂၀၉)ဧကရိတ်သိမ်းပြီးဖြစ်ကြောင်း သိရှိရပါသည်။ အထွက်နှုန်းမှာ (၁)ဧကလျှင် (၅၅၆)ပိဿာထွက်ရှိပြီး (၁)ဧကကုန်ကျစရိတ်အနေဖြင့် မျိုး၊ လုပ်သားခ၊ သွင်းအားစုများအပါအဝင် စုစုပေါင်း (၁၅)သိန်းခန့်ကုန်ကျကြောင်း၊ သာမို၊ ဒီမွန်၊ အက်စတာ၊ ၆၉၂ ငရုတ်မျိုးများကိုစိုက်ပျိုးကြပြီး တောင်သူများအနေဖြင့် ရာသီဥတုဒဏ်နှင့် ပိုးမွှားဒဏ်ခံနိုင်ပြီး သီးနှံများလှ၍ အထွက်နှုန်းကောင်းမွန်သော ၆၉၂မျိုးများကိုပိုမိုစိုက်ပျိုးလာကြကြောင်း သိရှိရပါသည်။ ငရုတ်စျေးနှုန်းအနေဖြင့် ငရုတ်စတင်ထွက်ရှိသည့်အချိန်တွင် အစို(၁)ပိဿာလျှင် (၂၅၀၀-၃၀၀၀)ကျပ်ရှိခဲ့ပြီး ယခုအချိန်တွင် (၄၀၀၀-၄၅၀၀)ကျပ်နှင့် ငရုတ်သီးခြောက်(၁)ပိဿာလျှင် (၇၀၀၀-၈၀၀၀)ကျပ်ရှိခဲ့ရာမှ ယခုအချိန်တွင် (၉၀၀၀-၁၀၀၀၀)ကျပ်၊ အညှာချွေပြီး(၁)ပိဿာလျှင် (၁၁၅၀၀/-)ကျပ်၊ ငရုတ်သီးမှုန့်(၁)ပိဿာလျှင် (၁၅၅၀၀/-)ကျပ်စျေးနှုန်းများဖြင့် အရောင်းအဝယ်ဖြစ်နေကြောင်း သိရှိရပါသည်။
DOCA(မန္တလေး)
မန္တလေးတိုင်းဒေသကြီး၊ကျောက်ဆည်ခရိုင်သည် မြေဆီမြေသြဇာကောင်းမွန်သောဒေသဖြစ်၍ စပါး၊ နှမ်း၊ ငရုတ် စသည့်သီးနှံမျိုးစုံစိုက်ပျိုးသည့်အပြင် ပြောင်းသီးနှံကိုလည်း စိုက်ပျိုးကြပါသည်။ လယ်မြေများနှင့် ဥယျာဉ်ခြံမြေများတွင် စိုက်ပျိုးမှုအများဆုံးနှင့် လူကြိုက်အများဆုံးသီးနှံဖြစ်သည့် ပြောင်းဖူးများကိုလည်း စီးပွားဖြစ်စိုက်ပျိုးလာကြပါသည်။ ကျောက်ဆည်ခရိုင်တွင် ပြောင်းဖူးစိုက်ဧက(၅၀၀)ဧကစိုက်ပျိုးထားပြီး ယခုအချိန်ထိ(၁၃၃)ဧကရိတ်သိမ်းပြီးဖြစ်ပါသည်။ပြောင်းဖူးစိုက်ပျိုးမှုတွင် ကုန်ကျစရိတ်မှာ သွင်းအားစုအပါအဝင် (၁)ဧကလျှင်(၂၅၀၀၀၀/-)ကျပ်ခန့်ကုန်ကျကြောင်း၊ စိုက်ပျိုးသည့်မျိုးများမှာ သကြားပြောင်း၊ ထောပတ်ပြောင်း၊ အစေးပြောင်း (ခ) ရှမ်းပြောင်းမျိုးများကို အများဆုံးစိုက်ပျိုးကြကြောင်း၊ ခရိုင်အတွင်း အများဆုံးစိုက်ပျိုးသောရွာများမှာ မြစ်သားမြို့နယ်၊ သိုတန်ကျေးရွာ၊ ပုဏ္ဏားရွာကျေးရွာ၊ ကျောက်ဆောက်ကုန်းကျေးရွာများတွင် သကြားပြောင်းများကိုအများဆုံးစိုက်ပျိုးကြပါသည်။ သကြားပြောင်းစိုက်ပျိုးပြီး(၃)လကျော်အကြာတွင် ပြောင်းဖူးများကိုစတင်ခူးဆွတ်၍ ရောင်းချကြကြောင်း၊ (၁)ဧကလျှင် ပြောင်းဖူး(၄၀၀၀)ဖူးခန့်ထွက်ရှိကြောင်း၊ သကြားပြောင်းဖူးစျေးနှုန်းများမှာ အရွယ်အစားအလိုက် လက်လီစျေးနှုန်းအနေဖြင့် (၃-၄)ဖူးလျှင် (၁၀၀၀/-)ကျပ်တို့ဖြင့် ရောင်းချလျက်ရှိကြောင်း၊ ဖောက်သည်စျေးအနေဖြင့် ပြောင်းဖူးတစ်ဖူးလျှင် (၁၅၀/-)ကျပ်၊ ပြုတ်ပြီးသေားပြောင်းဖူးတစ်ဖူးလျှင်(၅၀၀/-)ကျပ်စျေးနှုန်းများဖြင့် ရောင်းချလျက်ရှိကြောင်း၊ ယခုနှစ်ပြောင်းဖူးစိုက်ပျိုးမှုတွင် အကျိုးအမြတ်များပိုမိုရရှိကြောင်း၊ ယခင်နှစ်တွင် ပြောင်းဖူးတစ်ဖူးလျှင် ဖောက်သည်စျေးမှာ (၁၀၀/-)ကျပ်သာရရှိပြီး ယခုနှစ်တွင် (၁၅၀/-)ကျပ်စျေးဖြင့်ရောင်းချရသည့်အတွက် တစ်ဖူးလျှင် (၅၀/-)ကျပ် ပိုမိုရရှိသဖြင့် အကျိုးအမြတ် ပိုမိုရရှိခြင်းဖြစ်ကြောင်း၊ သကြားပြောင်းစိုက်တောင်သူ တစ်ဦး၏ပြောပြချက်အရ သိရှိရပါသည်။
ပြောင်းဖူးကို လူတိုင်းစားသုံးကြသဖြင့် အရောင်းသွက်ပြီး အိမ်ရှင်မများကလည်း ပြောင်းဖူးကိုပြုတ်၍စားသုံးကြသည့်အပြင် ပြုတ်ပြီးသောပြောင်းဖူးများကိုလည်း ဓားဖြင့်ပါးပါးလှီး၍ ခရမ်းချဉ်သီး၊ ကြက်သွန်နီ၊ နံနံပင်တို့ဖြင့်သုပ်၍လည်း စားသုံးကြပါသည် ။ ပြောင်းဖူးအစိမ်းကို ဂျစ်ဖြင့်ခြစ်၍ ပြောင်းဖူးကြော်အဖြစ်လည်းကောင်း၊ မာလာရှမ်းကောနှင့်ယမ်ယမ်အထုပ်များတွင်လည်း ပြောင်းဖူးကိုထည့်၍စားသုံးကြပါသည်။ ပြောင်းဖူးစားသုံးခြင်းဖြင့် ဗီတာမင်စီ၊ B1၊ B5၊ အမျှင်ဓာတ်နှင့်မဂ္ဂနီစီယမ်ဓာတ်တို့ပါဝင်ပြီး သွေးတွင်းမှသကြားဓာတ်ကိုလည်းထိန်းညှိပေးပါသည်။ ပြောင်းဖူးစားသုံးခြင်းဖြင့် အဟာရဓာတ်ကြွယ်ဝသည့်အပြင် စီးပွားဖြစ်ဝင်ငွေတိုးပြီး ကျွဲ ၊ နွားစာများကိုပါဖူလုံသည့်အတွက် တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။
DOCA(မန္တလေး)
မြင်းခြံခရိုင်တွင် ဆောင်းကြက်သွန်နီကို အောက်တိုဘာလ၊ နိုဝင်ဘာလနှင့် ဒီဇင်ဘာလတို့တွင် စတင်စိုက်ပျိုးခဲ့ပြီး ဖေဖော်ဝါရီလ၊ မတ်လနှင့် ဧပြီလတို့၌ ရိတ်သိမ်းထွက်ပေါ်လေ့ရှိပါသည်။ ယခုအချိန်တွင် ဆောင်းကြက်သွန်နီ(ခေါ်) နွေကြက်သွန်နီများထွက်ပေါ်ဝယ်ယူသည့်ကာလဖြစ်ပါသည်။
ဆောင်းကြက်သွန်နီဈေးနှုန်းများအနေဖြင့် ယခင်တစ်ပတ်(မတ်လ ဒုတိယပတ်)တွင် အကြီးတစ်ပိဿာလျှင်(၁၀၀၀ မှ ၁၂၀၀)ကျပ်ထိ၊ အလတ်တစ်ပိဿာလျှင်(၈၀၀ မှ ၉၀၀)ကျပ်ထိ၊ အသေးတစ်ပိဿာလျှင်(၆၀၀ မှ ၇၀၀)ကျပ်ထိဈေးနှုန်းများဖြင့် အရောင်းအဝယ်ဖြစ်ခဲ့ပါကြောင်း၊ မြင်းခြံဈေးကွက်သို့ ကြက်သွန်နီဝင်ရောက်မှုမှာ တစ်ရက်လျှင် ကုန်ချိန်(၃၂၀၀၀)ပိဿာကျော် နေ့စဉ်ဝင်ရောက်ခဲ့ကြောင်း၊ ယခု မတ်လ (တတိယပတ်) တွင်လည်း ဈေးနှုန်းပြောင်းလဲမှုမရှိဘဲ ယခင်အပတ်အတိုင်း ရောင်းဝယ်မှုဖြစ်ခဲ့ကြောင်း၊ ကုန်ချိန်ဝင်ရောက်မှုမှာ တစ်ရက်လျှင် (၆၃၀၀၀)ပိဿာကျော်ဝင်ရောက်လျက်ရှိကြောင်း၊ မြင်းခြံဈေးကွက်သို့ ကုန်ချိန်ဝင်ရောက်မှုမှာ ယခင်အပတ်ထက် ယခုအပတ်တွင် ကုန်ချိန်ပိဿာပေါင်း (၃၁၀၀၀)ကျော် နေ့စဉ်ဝင်ရောက်ခဲ့ပြီး ဈေးကွက်တင်ပို့မှုများမှာ ရန်ကုန်၊ နေပြည်တော်၊ မြဝတီနှင့် မော်လမြိုင်မြို့ကြီးများသို့ တင်ပို့ရောင်းချလေ့ရှိကြောင်း ကြက်သွန်နီကုန်သည်တစ်ဦးထံမှ သိရှိရပါသည်။
DOCA(မန္တလေး)
၂၀၂၃ခုနှစ်၊ မတ်လ (တတိယပတ်) အတွင်း ရွှေဘိုမြို့နယ်တွင် အခြေခံစားကုန်များဖြစ်သော ရွှေဘိုပေါ်ဆန်းဆန်(သစ်)တစ်ပြည်လျှင် ၃၅၀၀ကျပ်၊ ဧရာမင်းဆန်(သစ်)တစ်ပြည်လျှင် ၂၇၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ကြက်သွန်နီ(သစ်)လက်လီဈေးမှာ (ကြီး)တစ်ပိဿာလျှင် ၁၅၀၀ကျပ်၊ (လတ်)တစ်ပိဿာလျှင် ၁၂၀၀ကျပ်၊ (သေး)တစ်ပိဿာလျှင် ၈၀၀ကျပ်နှုန်းဖြင့် အရောင်းအဝယ်ဖြစ်လျက်ရှိပါသည်။ ကြက်သွန်ဖြူလက်လီဈေးမှာ (ဗမာ)တစ်ပိဿာလျှင် ၄၀၀၀ကျပ်မှ ၅၀၀၀ကျပ်ထိ၊ ရှမ်းကြက်သွန်ဖြူတစ်ပိဿာလျှင် ၅၀၀၀ကျပ်မှ ၅၅၀၀ကျပ်ထိ၊ (ကြူကုပ်)တစ်ပိဿာလျှင် ၅၀၀၀ကျပ်မှ ၆၀၀၀ကျပ်ထိ၊ ချင်းတစ်ပိဿာလျှင် ၁၃၀၀ကျပ်မှ ၁၅၀၀ကျပ်ထိ၊ ငရုတ်သီးခြောက်တစ်ပိဿာလျှင် အမျိုးအစားအလိုက် ၁၆၅၀၀ကျပ်မှ ၁၈၀၀၀ကျပ်ထိ၊ အာလူးတစ်ပိဿာလျှင် ၁၈၀၀ကျပ်မှ ၂၆၀၀ကျပ်ထိ၊ ခရမ်းချဉ်သီးတစ်ပိဿာလျှင် ၁၂၀၀ကျပ်ဖြင့် အရောင်းအဝယ်ဖြစ်နေပါသည်။
ကြက်ဥလက်လီဈေးနှုန်းမှာ (ကြီး)တစ်လုံးလျှင် ၂၅၀ကျပ်၊ (သေး)တစ်လုံးလျှင် ၂၃၀ကျပ်၊ ဘဲဥ(ကြီး)တစ်လုံးလျှင် (၃၀၀)ကျပ်၊ (သေး)တစ်လုံးလျှင် (၂၅၀)ကျပ်ရှိပါသည်။ ရွှေဘိုမြို့၏ အသားငါးဈေးနှုန်းများမှာ ကြက်သား (CP) တစ်ပိဿာလျှင် ၈၀၀၀ကျပ်မှ ၁၁၀၀၀ကျပ်ထိ၊ ကြက်သား(ဗမာ)တစ်ပိဿာလျှင် ၁၀၀၀၀ကျပ်မှ ၁၃၀၀၀ကျပ်ထိ၊ ဝက်သားတစ်ပိဿာလျှင် ၁၈၀၀၀ကျပ်မှ ၂၂၀၀၀ကျပ်ထိ၊ အမဲသားတစ်ပိဿာလျှင် ၁၄၀၀၀ကျပ်မှ ၁၆၀၀၀ကျပ်ထိ၊ ငါးမြစ်ချင်းတစ်ပိဿာလျှင် ၇၀၀၀ကျပ်၊ ငါးကြင်းတစ်ပိဿာလျှင် ၆၀၀၀ကျပ်ဖြင့် ရောင်းဝယ်နေကြောင်း သိရပါသည်။
စားသုံးဆီဈေးနှုန်းများမှာ ပဲဆီသန့်တစ်ပိဿာလျှင် ၁၂၅၀၀ကျပ်မှ ၁၃၀၀၀ကျပ်ထိ၊ စားအုန်းဆီတစ်ပိဿာလျှင် ၇၀၀၀ကျပ်နှင့် နှမ်းဆီတစ်ပိဿာလျှင် ၁၃၀၀၀ကျပ်ဖြင့် အရောင်းအဝယ်ဖြစ်နေကြောင်း သိရပါသည်။
DOCA(စစ်ကိုင်း)
တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ပြုစုတင်ပြအပ်ပါသည်။
တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ပြုစု တင်ပြအပ်ပါသည်။
၂၈.၃.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
