ပြည်တွင်းကုန်သွယ်မှုသတင်း

    မြန်မာနိုင်ငံသည် စိုက်ပျိုးရေးကို အဓိကထားသည့်နိုင်ငံဖြစ်သည့်အလျောက် စားသုံးရန်အတွက်သာမက  ပြည်ပသို့လည်း တင်ပို့သည့် ဆီထွက်သီးနှံများဖြစ်ကြသည့် မြေပဲ၊ နှမ်း၊ ပန်းနှမ်း၊ နေကြာ၊ မုန်ညင်းစေ့ ၊ ဝါတို့ကို စိုက်ပျိုးကြရာတွင် မြေပဲ၊ နှမ်း ၊ နေကြာတို့မှာ စားသုံးရန်အတွက်ဖြစ်ပြီး မုန်ညင်းဆီကိုအများစုမှာ တိုင်းရင်းဆေးဝါးထုတ်လုပ်ရာတွင် အသုံးပြုကြပါသည်။ ဝါစေ့ဆီများကိုမူ စက်မှုကုန်ကြမ်းအဖြစ် အသုံးပြုကြောင်း သိရှိရပါသည်။ မြေပဲ၊နှမ်း၊ နေကြာ ထွက်ရှိရာဒေသတို့တွင် မြေပဲကို ဆုံဆီ၊ စက်ကြီးဆီဟူ၍ ခွဲခြားထားပြီး မြေပဲဆံတစ်တင်းကြိတ်လျှင် ဆီ (၈) ပိဿာထွက်ရှိပြီး နှမ်းဖတ်(၈)ပိဿာ နှမ်းတစ်တင်းကြိတ် လျှင် (၇)ပိဿာခွဲမှ (၈)ပိဿာ အထိ ထွက်ရှိကြောင်းသိရှိရပြီး  နေကြာစေ့ တစ်တင်းကြိတ်လျှင် တစ်ပိဿာမှ (၅) ပိဿာအထိ ထွက်ရှိပြီး နှမ်းဖတ် (၆) ပိဿာ ထွက်ရှိကြောင်း သိရှိရပါသည်။ တစ်တင်းကြိတ်ခမှာ (၅၀၀၀) ကျပ်အထိ ရှိကြောင်းသိရှိရပါသည်။ ဆီကြိတ်ခွဲသူတို့မှာ မိမိတို့ ကြိတ်ခွဲသည့် မြေပဲ၊ နှမ်း၊ နေကြာ တို့ကို ကြိတ်ခွဲခပေးပြီး ထွက်ရှိလာသည့် နှမ်းဖတ်များကိုမူ မိမိတို့အိမ်တွင် မွေးမြူထားသည့် ကျွဲ၊ နွား၊ ဝက်တို့အတွက် နှမ်းဖတ်ရည် စိမ်ပြီး ရောနှော ကျွေးကြကြောင်း တိရစ္ဆာန်မွေးမြူမှုမရှိသော ဆီကြိတ်ခွဲ သူတို့မှာ မိမိတို့ကြိတ်သည့် ဆီစက်များတွင် နှမ်းဖတ်တစ်ပိဿာလျှင် (၂၅၀၀) ကျပ်ဖြင့်ရောင်းချပြီး နှမ်းဖတ်ချဉ်တည်သူများနှင့် တိရစ္ဆာန်များကျွေးရန်အတွက် ဝယ်ယူသူများမှာ တစ်ပိဿာလျှင် (၃၅၀၀) ကျပ်ဖြင့် ဆီစက်များမှ ဝယ်ယူရကြောင်း သိရှိရပါသည်။ ဆီကြိတ်ခွဲခများ ယခင်နှစ်ထက် ဈေးပိုရခြင်းမှာ လျှပ်စစ်မီး ရရှိမှုအခြေနေနှင့် စက်သုံးဆီများကို အသုံးပြု၍ ကြိတ်ခွဲရခြင်း၊ အလုပ်သမား လုပ်ခများဈေးတက်လာခြင်းတို့ကြောင့် ထွက်ရှိလာသည့် နှမ်းဖတ်ဈေးတို့မှာ ကွာခြားကြောင်း သိရှိရပြီး ပြည်တွင်းတွင် မွေးမြူရေးအစားစာအတွက်သာမက ပိုလျှံသည်များကို ပြည်ပသို့ တင်ပို့ရောင်းချရကြောင်းသိရှိရပြီး တရုတ်ပြည်သို့ အများဆုံး တင်ပို့ရကြောင်း သိရှိရပါသည်။

DOCA(မန္တလေး)

      ကျောက်ဆည်ခရိုင်သည် စိုက်ပျိုးရေးကိုအဓိကထားလုပ်ကိုင်သော ဒေသတစ်ခုဖြစ်သည့်အတွက် သီးနှံမျိုးစုံစိုက်ပျိုးကြပါသည်။ သီးနှံမျိုးစုံစိုက်ပျိုးကြသည့်အနက် ရာသီမ‌ရွေးစိုက်ပျိုးနိုင်ပြီး ရာသီမ‌ရွေးစားသုံးနိုင်သော စျေးကွက်ဝယ်လိုအားရှိသည့် သင်္ဘောပင်များကိုလည်း တိုးချဲ့စိုက်ပျိုးလာကြပါသည်။ သင်္ဘောပင်စိုက်ပျိုးရာတွင် မျိုးကောင်းမျိုးသန့်များ ရွေးချယ်ပျိုးထောင်၍ ပျိုးပင် များဖြစ်ထွန်းလာပါက မြေကျင်းတူး၍ (၂)ပေခြား(၃)ပေခြား စိုက်ပျိုးကြပါသည်။ တစ်ဧကကုန်ကျ စရိတ်အနေဖြင့်(၃၅၀၀၀၀-၄၀၀၀၀၀/-)ကျပ်အထိရှိပြီး မြေဆီ၊မြေသြဇာကျွေးသည့် အပေါ်မူတည်၍ အသီးအပွင့်ဝေဆာ၍ အပင်သက်တမ်းကြာနိုင်ကြောင်း သင်္ဘောခြံများမှ အများအားဖြင့် သင်္ဘောသီးအမှည့်ကို ဦးစားပေးရောင်းချကြကြောင်း၊ ရောင်းတန်းမဝင်သောအသီးစိမ်းများကို သင်္ဘောသီး ထောင်း ရောင်းချသောသူများမှ လာရောက်ဝယ်ယူကြ‌ကြောင်း ၊သင်္ဘောသီးအမှည့်တစ်လုံး( အကြီး) (၁၅၀၀-၂၀၀၀/-)ကျပ်၊အလတ်တစ်လုံးလျှင် (၈၀၀-၁၀၀၀/-)ကျပ် အထိရောင်းချရပြီး  သင်္ဘောသီး အစိမ်းတစ်လုံးလျှင် ဖောက်သည်စျေးအနေဖြင့် အလုံးအကြီးအသေးပေါ်မူတည်၍ (၃၀၀-၅၀၀/-) ကျပ်အထိ ရောင်းချရကြောင်း ၊ သင်္ဘောသီးအမှည့်ဖျော်ရည်အဖြစ် သောက်သုံးကြသလို သင်္ဘောသီး အစိမ်းကို ရခိုင်သုပ်၊ ဗမာသုပ်အဖြစ် စားသုံးကြပါသည်။ သင်္ဘောသီး အမှည့်နှင့်အစိမ်းကို စားသုံးသူများ ဝယ်ယူစားသုံးကြသဖြင့် တောင်သူဦးကြီးများအနေဖြင့် နေ့စဉ်ဝင်ငွေတိုးစေသော သင်္ဘောပင်များကို တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

       ပုသိမ်ခရိုင်၊ ကန်ကြီးထောင့်မြို့သည် စိုက်ပျိုးသီးနှံအဖြစ် ဆန်စပါးနှင့် မတ်ပဲကို ဦးစားပေးစိုက်ပျိုးသော မြို့ဖြစ်ပြီး မတ်ပဲကို နွေရာသီတွင် အဓိကထား စိုက်ပျိုးကြသည်။

       ပုသိမ်ခရိုင်၊ ကန်ကြီးထောင့်မြို့တွင် ယခင်နှစ်၌ မတ်ပဲစိုက်ဧကစုစုပေါင်း (၂၁၆၀၀) ဧကခန့်စိုက်ပျိုးပြီး တစ်ဧကအထွက်နှုန်းမှာ (၁၀)တင်းခန့်ထွက်ရှိကာ မတ်ပဲဈေးနှုန်းမှာ တစ်တင်းလျှင် (၆၈၀၀၀)ကျပ်ခန့်ရှိခဲ့သည်။ မတ်ပဲကို ယခင်နှစ်စိုက်ဧကအတိုင်းသာ  စိုက်ပျိုးခဲ့သော်လည်း တစ်ဧကအထွက်နှုန်းမှာ (၁၄) တင်းခန့်တိုးတက်ထွက်ရှိခဲ့သည့်အပြင် ယခုနှစ်မတ်ပဲဈေးနှုန်းမှာလည်း တစ်တင်းလျှင် (၁) ကျပ်သိန်းခန့်ထိ ဈေးနှုန်းကောင်းမွန်လာခဲ့ကြောင်းတွေ့ရှိရသည်။

     ဈေးနှုန်းကောင်းမွန်လာသောကြောင့် တောင်သူဦးကြီးများအနေဖြင့် တစ်ဧကအထွက်နှုန်းတိုးတက်ရေး ကြိုးပမ်းစိုက်ပျိုးလျက်ရှိကြပြီး ကန်ကြီးထောင့်မြို့၊ စိုက်ပျိုးရေးသုတေသနဦးစီးဌာနမှ ထောက်ခံချက်ရရှိထားသည့် မျိုးကောင်းမျိုးသန့်များနှင့် ဒေသထွက်မျိုးကောင်းမျိူးသန့်များကိုသာ ဉီးစားပေးစိုက်ပျိုးကြသည်ဟု တောင်သူ ဦးချမ်းငြိမ်းအောင်ထံမှ မေးမြန်းစုံစမ်းသိရှိရပါသည်။ မတ်ပဲသည် နိုင်ငံတကာဝယ်လိုအားများသည့် သီးနှံဖြစ်၍ အိန္ဒိယ၊ မလေးရှား၊ အင်ဒိုနီးရှား၊ ဗီယက်နမ်၊ စင်္ကာပူနိုင်ငံများသို့ အများဆုံးတင်ပို့ထားပြီး အီးယူနိုင်ငံသို့လည်း တင်ပို့လျက်ရှိကြောင်းသိရှိရပါသည်။

DOCA(ဧရာဝတီ)

၂၀.၅.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်၌ ၂၀၂၄ခုနှစ်၊ မေလ(ဒုတိယပတ်)တွင် အရောင်းအဝယ်ဖြစ်လျက်ရှိသော စားသုံးဆီဈေးနှုန်းများမှာ မြေပဲဆုံဆီတစ်ပိဿာလျှင် ကျပ် (၁၄၅၀၀)၊ စက်ပဲဆီသန့် တစ်ပိဿာလျှင် ကျပ်(၁၂၀၀၀-၁၂၅၀၀)ဖြစ်ပြီး၊ ပဲရောဆီတစ်ပိဿာလျှင် ကျပ်(၈၅၀၀)၊ နှမ်းဆီတစ်ပိဿာလျှင် ကျပ်(၁၂၅၀၀)၊ စားအုန်းဆီတစ်ပိဿာလျှင် ကျပ် (၆၁၀၀)၊ နေကြာဆီတစ်ပိဿာလျှင် ကျပ် (၁၅၀၀၀) ဈေးနှုန်းတို့ဖြင့် အရောင်းအဝယ်ဖြစ်လျက်ရှိပါသည်။

      ယခင်ဧပြီလ(ဒုတိယပတ်)ဈေးနှုန်းတို့နှင့်နှိုင်းယှဉ်ရမည်ဆိုလျှင် မေလ(ဒုတိယပတ်)တွင် မြေပဲဆီ၊ နှမ်းဆီများမှာ ဈေးငြိမ်လျက်ရှိကြောင်း၊ နေကြာဆီတစ်ပိဿာလျှင် ကျပ်(၅၀၀) ဈေးနှုန်းမြင့်တက်ကာ အရောင်းအဝယ်ဖြစ်လျက်ရှိပြီး စားအုန်းဆီကို သတ်မှတ်ရည်ညွှန်းဈေးအတိုင်း ရောင်းချလျက်ရှိကြောင်း စားသုံးဆီကြိတ်ခွဲထုတ်လုပ်သည့် လုပ်ငန်းရှင်များထံမှသိရှိရပါသည်။

     ပခုက္ကူမြို့ရှိ စားသုံးသူများသည် မြေပဲဆီကိုသာ အဓိကစားသုံးမှုများပြီး လုပ်ငန်းရှင်များကလည်း မြေပဲဆန်၊ မြေပဲဆီများထုတ်လုပ်ရောင်းဝယ်ဖောက်ကားလျက်ရှိပြီး မြန်မာနိုင်ငံနေရာဒေသအနှံ့အပြားသို့ မြေပဲဆီများထုတ်လုပ်တင်ပို့ရောင်းချဖြန့်ဖြူးလျက်ရှိကြောင်းသိရှိရသည်။

DOCA(မကွေး)