မြန်မာနိုင်ငံသည် ဧရိယာစတုရန်းမိုင်ပေါင်း ၂၆၁၂၂၈ ကျယ်ဝန်းပြီး သစ်တောမြေဖုံးလွမ်း ဧရိယာမှာ စတုရန်းမိုင်ပေါင်း ၁၄၉၇၈ရှိကာ မြန်မာ့သစ်တောတွင် အပင်ကြီး၊ အပင်ငယ် မျိုးပေါင်း ၅၂၀၄မျိုး၊ ဝါး ၈၆မျိုး၊ ကြိမ် ၃၄မျိုး၊ မြက် ၃၈၆မျိုး၊ ငှက်၁၂၄၀မျိုး ရှိကြောင်း လေ့လာသိရှိရပါသည်။
ကြိမ်ဟူသော ဝေါဟာရသည် မြန်မာ့ဝေါဟာရဖြစ်ပြီး၊ ရူပဗေဒ ပညာရပ်တွင် CHLAMUS ၊ အင်္ဂလိပ်အခေါ် CANE ဟုလည်းကောင်း၊ RATTAN ဟုလည်းကောင်းခေါ်ဝေါ်ပါသည်။ ကမ္ဘာပေါ် တွင် ကြိမ်အမျိုးပေါင်း ၃၇၅ မျိုးရှိရာ မြန်မာနိုင်ငံ၌ ၃၄မျိုးခန့်ရှိပြီး ကုန်းပေါ်တွင်ပေါက်သော ကုန်းကြိမ်နှင့် ရေစပ်တွင်ပေါက်သော ရေကြိမ်ဟူ၍ နှစ်မျိုးခွဲခြားကာ ကုန်းကြိမ်သည် ပင်စည်ကြီး ပြီး၊ ရေကြိမ်သည် နွယ်ဆန်သည့်အပင်မျိုးဖြစ်ကာ ပင်လုံးသေးပါသည်။ မြန်မာနိုင်ငံတွင် ကြိမ်ပေါက်ရောက်ရန် ရေမြေတောတောင်သဘာဝရာသီဥတုနှင့်ကိုက်ညီသော ကချင်ပြည်နယ်၊ စစ်ကိုင်းတိုင်းဒေသကြီး၊ ရခိုင်ပြည်နယ်နှင့် တနင်္သာရီတိုင်းဒေသကြီးတို့တွင် အများဆုံးပေါက်ရောက် ပါသည်။
မြန်မာနိုင်ငံတွင် ပေါက်ရောက်သောကြိမ်အမျိုးအစားများမှာ သိုင်းကြိမ်၊ နွံကြိမ်၊ ကြိမ်ခါး၊ လက်ပံကြိမ်၊ ရေကြိမ်၊ ကြိမ်နီ၊ ကြိမ်ဖြူလေးခေါ် ထားဝယ်ကြိမ်၊ ရမထာကြိမ်၊ ကပေါင်းကြိမ်၊ သာပေါင်းကြိမ်၊ လက်မဲကြိမ်၊ ကြိမ်ပုတ်၊ ဂရေလီကြိမ်၊ ဝါးပိုးကြိမ်၊ ကြိမ်ဖန်၊ အူပွကြိမ်၊ ဆင်ကြိမ်၊ ဝါး အူကြိမ်၊ ကြာနှာမောင်း၊ ကြိမ်နီကြီး၊ တိုက်ကြိမ်၊ ကလာကြိမ်၊ သောင်ကြိမ်၊ စန်းသော်ကြိမ်၊ မြစ်ပြ ကြိမ်၊ ကြက်ဥကြိမ်၊ ကြိမ်မဲ၊ မျောက်ချေးကြိမ်၊ ကြိမ်တက်၊ ကြိမ်စိမ်း၊ နောက်ချေးကြိမ်၊ မျောက် တလွှဲကြိမ်၊ ကြိမ်ဖြူ၊ ခါးဆက်ကြိမ်၊ နောက်ကြောကြိမ်၊ လက်ဝါးကြိမ်များ ဖြစ်ကြသည်။ ရေကြိမ်၊ ကြိမ်နီနှင့် ကြက်ဥကြိမ်တို့ကို လက်မှုအနုပညာပစ္စည်းများ ထုတ်လုပ်ရာတွင် အများဆုံးအသုံးပြုပါ သည်။
မြန်မာနိုင်ငံတွင် အသုံးအများဆုံးကြိမ်မှာ သိုင်းကြိမ်၊ ရေကြိမ်၊ ကြိမ်နီ၊ ကြိမ်ဖြူကလေး၊ ရမထာကြိမ်၊ ကပေါင်းကြိမ်၊ သာပေါင်းကြိမ်၊ လက်မဲကြိမ်၊ ကြိမ်ပုတ်၊ ဂရေလီကြိမ်၊ ကြိမ်ခါး၊ ဝါးပိုးကြိမ်၊ ကြိမ်ဖန်နှင့် ကြက်ဥကြိမ်တို့ဖြစ်ပါသည်။ ကြိမ်ထည်ပရိဘောဂလုပ်ငန်းတွင် အသုံးပြု သည့်ကြိမ်အမျိုးအစားများမှာ ကြိမ်ပေါင်းခေါ် ကြိမ်နှာမောင်း၊ ရမထာကြိမ်၊ ကြက်ဥကြိမ်နှင့် ရေ ကြိမ်တို့ ဖြစ်ပါသည်။ ပရိဘောဂပြုလုပ်ရန် လိုအပ်သော စက်ကရိယာများမှာ ကြိမ်ဖြောင့်စက်၊ နန်း ဆွဲစက်နှင့် အခွံချွတ်စက်တို့ ဖြစ်ပါသည်။
ထုတ်လုပ်ပုံအဆင့်ဆင့်
ကြိမ်ထည်ပစ္စည်းများ မပြုလုပ်မီ အသုံးပြုမည့် ကြိမ်ချောင်း၊ ကြိမ်လုံးများ၌ ချေးညှော် အညစ်အကြေးကင်းစင်ရန်အတွက် ဓါးဖြင့်ဦးစွာခြစ်၍ အဆစ်သတ်ရသည်။ ကြိမ်လုံးပတ်အကြီး/ အသေးပေါ် မူတည်၍ ဓါးခုံတွင် လေး/ငါး/ခြောက်ပင် စိတ်ယူရသည်။ ကြိမ်လုံးများကို အစိတ်သေးသေးလေး ရအောင်ခွဲစိတ်ပြီးနောက် နန်းခံနှင့် (၃)ကြိမ်ခန့် ထပ်မံနန်းဆွဲရပါသည်။ သို့မှသာ ကြိမ်အစိတ် ကလေးများ အရွယ်ညီသွားမည်ဖြစ်ပါသည်။ နန်းဆွဲထားသည့်ကြိမ်များ အရွယ်ချင်း တူရန် နန်းတိုက်သည်ဟုခေါ်ပါသည်။ ခွဲစိတ်ပြီးကြိမ်များ၏ အလယ်အူကိုဆွဲထုတ်၍ အကြောသာ ကျန်အောင် ထပ်မံပြုလုပ်ရပါသည်။ ထိုသို့ပြုလုပ်ခြင်းဖြင့် ကြိမ်ပင်များ ပျော့ပြောင်းပြီး ကွေးညွတ်၍ရကာ လိုအပ်သလို ပုံဖော်နိုင်ရန်ဖြစ်သည်။ ကြိမ်ထည်လုပ်ငန်းအဆင့်ဆင့်တွင် စွဲမြဲစေရန် သေးငယ်သည့် ဖိုသံ(၁၅စင်တီမီတာ၊၃၀စင်တီမီတာ)များဖြင့် ဆက်ရပါသည်။ သေချာစွာ နန်းဆွဲပွတ်တိုက်ထားသော ကြိမ်များမှာ ခေါက်ဆွဲမျှင်ကဲ့သို့ သေးသွယ်ပျော့ပျောင်းသဖြင့် ခွေသွင်း ရစ်ပတ်ရ လွယ်ကူပါသည်။
ထုတ်ကုန်များနှင့် ဈေးကွက်ကွင်းဆက်
ကြိမ်ထုတ်ကုန်များကို ထုတ်လုပ်သည့် နည်းလမ်းမှာ(၂)နည်းရှိသည်။ ပထမနည်းမှာ အိမ် တွင်းမှုလုပ်ငန်းအနေဖြင့် ထုတ်လုပ်သည့်နည်းစနစ်ဖြစ်သည်။ ဤနည်းတွင် ထုတ်လုပ်သူများသည် ထုတ်ကုန်ပစ္စည်းများကို ၎င်းတို့၏ မိသားစုဝင်လုပ်အားများဖြင့် ထုတ်လုပ်ပြီး ထုတ်ကုန်ပစ္စည်းများကို ဒေသတွင်းရှိဈေးကွက်/ပွဲစားများ သို့မဟုတ် ပြည်ပပို့ကုန်လုပ်ငန်းကုမ္ပဏီများသို့ ရောင်းချကြပါသည်။ ဒုတိယနည်းမှာ ကုမ္ပဏီထုတ်လုပ်သည့်စနစ်(သို့မဟုတ်) ကုမ္ပဏီကန်ထရိုက်စနစ်ဖြင့် ထုတ်လုပ်သည့်နည်းတို့ဖြစ်ပါသည်။ ထုတ်လုပ်သူအများစုနှင့် ကုမ္ပဏီများတွင် ကြိမ်ပစ္စည်းများ ထုတ်လုပ်ရန် ၎င်းတို့၏ကိုယ်ပိုင်အလုပ်သမားများနှင့် စက်ရုံများရှိသည်။ လတ်တလော ဝယ်လိုအားနှင့် ဈေးနှုန်းများပေါ်မူတည်၍ ကြိမ်ထုတ်ကုန်များကို ပြည်တွင်းဈေးကွက် သို့မဟုတ် ပြည်ပဈေးကွက်သို့ တင်ပို့ရောင်းချကြသည်။
ကြိမ်ကိုအသုံးပြု၍ မြန်မာ့ရိုးရာလက်မှုပညာများအဖြစ် လူ့အသုံးအဆောင်ပစ္စည်း အမျိုးမျိုး၊ အိမ်အသုံးအဆောင်ပစ္စည်းအမျိုးမျိုး၊ ဟိုတယ်အသုံးအဆောင်ပစ္စည်း အမျိုးမျိုးတို့ကို ပြုလုပ်ကြပါသည်။
စစ်ကိုင်းမြို့မှနာမည်ကျော်ကြားသော ကြိမ်လက်ရာများ
မြန်မာ့လက်မှုပညာဖြင့် ကြိမ်ထည်ပစ္စည်းမျိုးစုံ ထုတ်လုပ်ရောင်းချသော စစ်ကိုင်းမြို့နယ် တင်းတိပ်ကျေးရွာအုပ်စု မကျည်းစဉ်၊ မကျည်းကုန်း၊ တင်းတိပ်၊ ငွေပဒေသာ၊ တောင်ငူကုန်း ကျေးရွာများတွင် ကြိမ်လုပ်ငန်းလုပ်ကိုင်သူ (၅၀)ဦးခန့်ရှိပြီး၊ မန္တလေး-စစ်ကိုင်း-မုံရွာကား လမ်းပေါ်ရှိ ကားလမ်းဘေးတစ်ဖက်တစ်ချက်တွင် ဝယ်ချင့်စဖွယ်လက်ရာမျိုးစုံ ကြိမ်ထည်ပစ္စည်း များကို ချိတ်ဆွဲ၊ခင်းကျင်းထားသည့် ကြိမ်အချောထည်ပစ္စည်းအရောင်းဆိုင်(၇)ဆိုင်ရောင်းချလျက် ရှိပါသည်။ အနုပညာလက်ရာမြောက်လှသော ကြိမ်ချောထည်ပစ္စည်းများ ရောင်းချနေသော ဆိုင်ကြီးများက ဝယ်သူများကို ဆွဲဆောင်လျက် ရှိနေပါသည်။ စစ်ကိုင်းမြို့သည် မြန်မာ့အနုပညာ လက်ရာ ကြိမ်ထည်ပစ္စည်းအမျိုးမျိုးဖြင့် နာမည်ကျော်ကြားပါသည်။ ကြိမ်ကုန်ကြမ်းကို ကချင်ပြည်နယ်နှင့် မန္တလေးမြို့တို့မှ ဝယ်ယူပြီး၊ ကုန်ချောပစ္စည်းများကို မြန်မာပြည်အနှံ့ တင်ပို့ရောင်းချပါသည်။ မကျည်းစဉ်ကျေးရွာသူ/ ရွာသားများသည်ကြိမ်ထည်လုပ်ငန်းကို မိရိုးဖလာ လုပ်ငန်းအဖြစ် လုပ်ကိုင်ကြသူများဖြစ်ပြီး ပုံခွေ၊ ပုံရိုက်၊ ကြိမ်တုပ်၊ နန်းဆွဲ၊ အရောင်တင်ခြင်း လုပ်ငန်းများကို အမျိုးသားများက ဦးဆောင်လုပ်ကိုင်ကြပြီး၊ ကြိမ်ထိုးခြင်းလုပ်ငန်းကို အမျိုးသမီးများက လုပ်ကိုင်ကြပါသည်။ ကြိမ်ကုန်ချော ဈေးနှုန်းများမှာ အမှီပါကုလားထိုင် ကြီး/လတ်/ငယ် ၁၉ဝဝဝိ/ မှ ၇၅ဝဝဝိ/၊ ကြိမ်ဆက်တီအရွယ်မျိုးစုံ ကျပ် ၆သိန်းမှ ၁၉သိန်း၊ စားပွဲဝိုင်းကြီး/လတ်/ ငယ် ကျပ် ၄သောင်းမှ ၁သိန်း၈သောင်း၊ ကြိမ်လိုက်ကာ(၅)ချပ်တစ်စုံ ကျပ်၁သိန်းခွဲမှ ၂ သိန်း ၊ စာအုပ်စင် ကျပ် ၃သောင်းမှ ၁သိန်း၊ စာထည့်ခွက် ၄ဝဝဝိ/မှ ၂၅ဝဝဝိ/၊ ဦးထုပ်တစ်လုံး ၂ဝဝဝိ/မှ ၅ဝဝဝိ/-၊ ခေါင်းအုံးကြီး/လတ်/ငယ် ၂၅ဝဝိ/မှ ၅၅ဝဝိ/၊ ရေအိုးအုပ်ဆောင်းတစ်ခု ၃ဝဝဝိ/မှ၃၅ဝဝိ/၊ ထမင်းအုပ်ဆောင်း တစ်ခု ၇၅ဝဝိ/မှ ၂၅ဝဝဝိ/၊ ဆရာမဆွဲခြင်းတစ်ခု ၈၅ဝဝိ/မှ၁၅ဝဝဝိ/၊ တစ်ရှူးဘောက်စ် ၇ဝဝဝိ/- ဈေးနှုန်း အသီးသီးဖြင့် ရောင်းချကြောင်းသိရပါသည်။
သုံးသပ်တင်ပြချက်
မြန်မာ့ကြိမ်ထည် လက်မှုအနုပညာလက်ရာများသည် သေသပ်လှပသဖြင့် ကမ္ဘာ့နိုင်ငံ အသီးသီးက ဝယ်ယူအားပေးရသည် လက်ရာမွန်ပစ္စည်းများအဖြစ် ထင်ရှားကျော်ကြားနေပါသည်။ နေအိမ်၊ တိုက်ခန်းများသာမက ဟိုတယ်များတွင်အလှဆင်ပစ္စည်းအဖြစ် အသုံးပြုနိုင်သည့် အသုံး အဆောင်ပစ္စည်းများအဖြစ် စိတ်ကြိုက်ရွေးချယ် သုံးစွဲနေကြပါသည်။ နိုင်ငံတော်အစိုးရနှင့် ကြိမ် လုပ်ငန်းရှင်များ ပူးပေါင်း၍ ကြိမ်လုပ်ငန်းများ တိုးတက်ရေးနှင့် ပြည်ပသို့ ကြိမ်ထည်ပစ္စည်းများ ပိုမိုတင်ပို့နိုင်ရေး နည်းလမ်းများရှာဖွေ ဆောင်ရွက်သင့်ပါသည်။ သို့မှသာ မြန်မာ့ကြိမ်ထည်လုပ်ငန်းမှ နိုင်ငံတော်အတွက် နိုင်ငံခြားဝင်ငွေ ပိုမိုရှာဖွေပေးနိုင်ပြီး ကြိမ်လုပ်ငန်းရှင်နှင့် လုပ်သားတို့ဘဝ ပိုမိုတိုးတက်လာမည်ဖြစ်ကြောင်း တင်ပြလိုက်ရပါသည်။
DOCA(စစ်ကိုင်း)
