ပြည်တွင်းကုန်သွယ်မှုသတင်း

           ရှမ်းပြည်နယ်(အရှေ့ပိုင်း) သည် တိုင်းရင်းသားလူမျိုးများစွာရှိပြီး စိုက်ပျိုးရေးကို အဓိကထား လုပ်ကိုင်စားသောက်နေထိုင်ကြပါသည်။ မြေပြန့်လွင်ပြင်များတွင် စပါးကိုအများဆုံးစိုက်ပျိုးကြပြီး စားဖိုဆောင်သီးနှံများကို တောင်ကုန်း၊ တောင်စောင်းများနှင့် လူနေထိုင်ရာခြံဝင်းများတွင် စိုက်ပျိုးကြပါသည်။ ကျိုင်းတုံမြို့မှ (၂၁)မိုင်ခန့်ကွာဝေးသော လွိုင်မွေမြို့သည် စားဖိုဆောင်သီးနှံ အများဆုံး စိုက်ပျိုးလုပ်ကိုင်ကြပြီး ပင်လယ်ရေမျက်နှာပြင်အထက် (၅၅၄၂)ပေတွင် တည်ရှိသည့် တောင်ပေါ် ဒေသဖြစ်ကာ ရှမ်း၊ လားဟူ၊ အာခါ လူမျိုးအများစုနေထိုင်ကြပါသည်။

          လွိုင်မွေမြို့သို့ စားသုံးသူ ရေးရာဦးစီးဌာနမှ တာဝန်ရှိသူများသည် (၇-၇-၂၀၂၂)ရက်နေ့တွင် လွိုင်မွေအုပ်စု၊ ဟိုလပ် အာခါကျေးရွာသို့သွားရောက်၍ တောင်သူ ဦးအားကျိနှင့် တွေ့ဆုံကာ စားဖိုဆောင်သီးနှံဖြစ်သည့် ဂျင်းစိုက်ပျိုးရောင်းချမှုအခြေအနေများအား ကွင်းဆင်းလေ့လာမေးမြန်းခဲ့ပါသည်။ လွိုင်မွေဒေသတွင် ဂျင်းကိုနှစ်စဉ် မတ်လတွင်အများဆုံးစိုက်ပျိုးလေ့ရှိကြပါသည်။  ဂျင်းဈေး ကောင်းလျှင် စိုက်ပျိုးပြီး (၃)လအကြာ ဂျင်းအပင်ပေါက်လျှင် စိုက်ပျိုးထားသည့် ဂျင်းကို ပြန်လည်တူးဖော်၍ အပင်ပေါက်လာသည့် အတက်များကို ချိုး(ခုတ်)ကာ အသစ်စိုက်ပျိုး၍ တူးဖော်ထားသည့် ဂျင်းအဟောင်းများကို ရောင်းချလေ့ရှိပါသည်။ ဂျင်းအသစ်ကို စိုက်ပျိုးပြီး (၁၀)လအကြာတွင် တူးဖော်ရောင်းချကြပါသည်။

          ဂျင်း ဧကတစ်ဝက်ခန့် စိုက်ပျိုးမည်ဆိုပါက အပင်အကွာအဝေးပေါ်မူတည်ပြီး ဂျင်းမျိုး (၄၀)ခြင်း ခန့် စိုက်ပျိုးရကြောင်း၊ တစ်ခြင်းလျှင် (၁၀)ပိဿာခန့်ရှိပြီး ဧကတစ်ဝက်ခန့်စိုက်လျှင် မျိုးပိဿာ (၄၀၀) ခန့် စိုက်ပျိုးရကြောင်းသိရှိရပါသည်။ သွင်းအားစုများအနေဖြင့် နွားချေး၊ ကျွဲချေး အိတ်(၃၀)ခန့်ထည့် ရကြောင်း၊ နွားချေး တစ်အိတ်လျှင် (၁၅၀၀)ကျပ်ပေးရကြောင်း၊ မြေပြုပြင်ခ၊ စိုက်ပျိုးခ၊ ပေါင်းရှင်းခ၊ တူးဖော်ခများအဖြစ်စုစုပေါင်းကျပ် (၅)သိန်းခန့် ကုန်ကျကြောင်း၊ ဂျင်းမျိုးခမှာ ပုံမှန်မရှိပဲ ယခင်နှစ်က တစ်ပိဿာကျပ် (၁)ထောင်ကျော်ရှိကြောင်း၊ ယခုနှစ်တွင်ဂျင်းဈေး တစ်ပိဿာ(၅၀၀)ကျပ်သာရှိသည့် အတွက် ဂျင်းမျိုးဖိုးကုန်ကျမှုနည်းပါးကြောင်း သိရှိရပါသည်။

          အခြားသီးနှံများနှင့် နှိုင်းယှဉ်လျှင် ဂျင်းသည် ပိုးသတ်ဆေး၊ မြေဩဇာများကျွေးရလေ့မရှိကြောင်း လည်းသိရှိရပါသည်။ ဂျင်းများရင့်၍ ပြန်လည်တူးဖော်သည့်အခါ မျိုးတစ်ခြင်းလျှင် ဂျင်းအသစ် (၈)ခြင်း ခန့်တူးဖော်ရရှိသည့်အတွက် ဧကတစ်ဝက်ကို ဂျင်းမျိုး (၄၀၀)ပိဿာခန့်စိုက်လျှင် ဂျင်းသစ် (၃၂၀၀) ပိဿာခန့် ထွက်ရှိပြီး ထွက်ရှိသည့်ဂျင်းများကို ကျိုင်းတုံဈေးကွက်သို့ ရောင်းချကြောင်းသိရှိရပါသည်။

          ယခင်နှစ်က ဂျင်းဈေးကောင်း၍ တစ်ပိဿာ (၁)ထောင်ကျပ်ခန့် ရောင်းချရသည့်အတွက် အကျိုး အမြတ်များသော်လည်း ယခုနှစ်ဂျင်းဈေးကျ၍ တစ်ပိဿာ (၅၀၀)ခန့်သာရှိပြီး ယခင်နှစ် တူးဖော်ပြီးဂျင်း များပင် လက်ကျန်များရှိနေသေးကြောင်းသိရှိရပါသည်။ ကျေးလက်နေ အာခါတောင်သူများအတွက် ဂျင်းဈေး များပြန်လည်ကောင်မွန်လာစေရန် မျှော်လင့်လျက်ရှိကြောင်း ရေးသားလိုက်ရပါသည်။

DOCA(ရှမ်း)

          ရန်ကုန်တိုင်းဒေသကြီး လှိုင်မြို့နယ် သီရိမင်္ဂလာဈေးတွင် ဇွန်လ (၂၈) ရက်နေ့မှ ဇူလိုင်လ (၄)ရက်နေ့ အထိဖြစ်ပေါ်ခဲ့သော သစ်သီးဝလံဈေးနှုန်းများမှာ နဂါးမောက်သီး(အနီ)ဂျပ်ဖာ အလုံးကြီး ၁၈ လုံးပါ ကျပ် ၁၈၀၀၀၊ အလုံးလတ် ၂၄ လုံးပါ ကျပ် ၁၆၀၀၀၊ အလုံးသေး ၃၀ လုံးပါ ကျပ် ၉၀၀၀ ၊ တပ်ကုန်း၊ ဝမ်းတွင်း မှ ဖရဲသီး (211) အလုံးကြီး ကျပ် ၁၅၀၀၊ အလုံးလတ် ကျပ် ၁၂၀၀၊ အလုံးသေး ကျပ် ၁၀၀၀ မှ ၈၀၀ ၊ မော်လမြိုင်၊ တိုက်ကြီး မှ ကျွဲကောသီး အလုံးကြီး ကျပ် ၃၀၀၀ မှ ၂၅၀၀၊ အလုံးလတ် ကျပ် ၂၀၀၀ မှ ၁၅၀၀၊ အလုံးသေး ကျပ် ၁၂၀၀ မှ ၁၀၀၀၊ ၈၀၀ မှ ၅၀၀၊ သီပေါ မှ နာနတ်သီး အလုံးကြီး ကျပ် ၇၀၀၊ အလုံးလတ် ကျပ် ၅၀၀ ၊ အလုံးသေး ကျပ် ၄၀၀ မှ ၃၀၀၊ မှော်ဘီ၊ တိုက်ကြီး မှ မာလကာသီး အလုံးကြီး ကျပ် ၄၀၀၊ အလုံးလတ် ကျပ် ၃၀၀ ၊ အလုံးသေး ကျပ် ၂၀၀ မှ ၁၀၀၊ မန္တလေး(ပေါ်တော်မူ) မှ သရက်သီး (ရင်ကွဲ) အလုံးကြီး သေတ္တာ အလုံးကြီး ၉၀ လုံးပါ ကျပ် ၁၅၀၀၀၊ အလုံးလတ် သေတ္တာ အလုံး ၁၁၀ ပါကျပ် ၁၂၀၀၀၊ အလုံးသေး သေတ္တာ အလုံး  ၁၂၀ ပါ ကျပ် ၁၀၀၀၀၊ မန္တလေး(ပေါ်တော်မူ) မှ သရက်သီး (ရင်ကွဲ) (အိတ်စွပ်)အလုံးကြီး သေတ္တာ အလုံး ၉၀ လုံးပါ ကျပ် ၂၃၀၀၀၊ အလုံးလတ် သေတ္တာ အလုံး ၁၁၀ ပါကျပ် ၁၇၀၀၀၊ မန္တလေး(ပေါ်တော်မူ) မှ သရက်သီး (မချစ်စု) (အိတ်စွပ်) အလုံးကြီး သေတ္တာ အလုံး ၇၀ လုံးပါ ကျပ် ၃၅၀၀၀၊ အလုံးလတ် သေတ္တာ အလုံး ၉၀ ပါကျပ် ၂၇၀၀၀ ဈေးတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံ ပန်းမန်ဟင်းသီးဟင်းရွက်စိုက်ပျိုး ထုတ်လုပ်တင်ပို့ရောင်းချသူများအသင်း (MFVP) မှ သိရှိရပါသည်။

DOCA(ရန်ကုန်)

         ရွှေဘိုခရိုင်အနေဖြင့် ၂၀၂၁-၂၀၂၂ခုနှစ်တွင် နွေစပါးအမျိုးအစားအလိုက် (၁၀၀၇၅၂)ဧက စိုက်ပျိုးပြီး ၂၀၂၂ ဇွန်လကုန်အထိ  နွေစပါး အမျိုးအစားအလိုက် ရေဦးမြို့နယ်တွင် (၇၆၈၀)ဧက၊ တန့်ဆည်မြို့နယ်တွင် (၂၅၄၅)ဧက၊ ဒီပဲယင်းမြို့နယ်တွင် (၄၃၁၀)ဧကနှင့် ကျောက်မြောင်း မြို့နယ်တွင် (၆၃)ဧက  စုစုပေါင်း (၁၄၅၉၈)ဧက (၁၅)ရာခိုင်နှုန်းခန့် ရိတ်သိမ်းပြီးစီး၍ အထွက်နှုန်းအနေဖြင့် တစ်ဧကလျင်  ၈၃.၈၃တင်းနှုန်း ထွက်ရှိကြောင်း လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှ သိရှိရသည်။

          ရွှေဘိုခရိုင်အတွင်း ၂၀၂၁-၂၀၂၂နွေစပါး ပေါ်ချိန် ပေါက်ဈေးမှာ ရွှေဝါထွန်း စပါး တင်း၁၀၀လျှင် ၆၅၀၀၀၀ကျပ်၊ (၇၄၇)စပါး တင်း၁၀၀လျှင် ၆၇၀၀၀၀ကျပ်ရှိပြီး ၊ ရွှေဝါထွန်းဆန် စက်ကျ (၁၁၁)ပေါင်ဝင် အိတ်တစ်အိတ်လျှင် (၂၉၀၀၀)ကျပ်၊ ၇၄၇ဆန် စက်ကျ (၁၁၁)ပေါင်ဝင် အိတ်တစ်အိတ်လျှင် (၂၉၀၀၀)ကျပ်ဖြင့် မန္တလေးမြို့သို့ အဓိကထား၍ ပေးပို့လျက်ရှိပြီး မကွေးမြို့၊ ချောက်မြို့ ၊ ညောင်ဦးမြို့များသို့လည်း တင်ပို့ရောင်းချလျက်ရှိပါသည်။ယခုလက်ရှိအခြေအနေမှာ ဆန်ဈေး၊ စပါးဈေးအေးနေ၍ အရောင်းအဝယ်မှာလည်း ပုံမှန်သာ ရောင်းချလျက်ရှိကြောင်း သတင်းရရှိပါသည်။

DOCA(စစ်ကိုင်း)

       မိတ္ထီလာခရိုင်အတွင်း ကြက်သွန်နီဈေးမှာ ယခင်တစ်ပတ်ထက်အနည်းငယ် ကျဆင်းပြီး ရန်ကုန်နှင့် မော်လမြိုင်သို့ ပုံမှန်တင်ပို့ကာ ပဲခူးသို့ တင်ပို့မှုများကြောင်း သိရသည်။ယခုတစ်ပတ် မိတ္ထီလာမှ ရန်ကုန်သို့ (၁၂)ဘီးကား (၂/၃)ရက်ခြား တစ်စီးနှင့် ပဲခူးသို့ နေ့စဉ် (၆)ဘီးကားဖြင့် တင်ပို့နေသည်။ မလှိုင်မှလည်း မော်လမြိုင်သို့ တစ်ပတ်အတွင်း (၁၂)ဘီးကား ၃ စီးတင်ပို့ခဲ့ပါသည်။ ကားသယ်ခ နှုန်းထားအနေဖြင့် တစ်ပိဿာလျှင် ရန်ကုန်သို့ ၁၀၀ဝိ/-၊ ပဲခူးသို့ ၉၀ဝိ/-နှင့် မော်လမြိုင်သို့ ၁၂၀ဝိ/- ဈေးရှိပါသည်။ ကြက်သွန်နီဈေးအနေဖြင့် ယခင်တစ်ပတ်ဈေးအောက် တစ်ပိဿာ ၂၀ဝိ/- ကျဆင်းလာရာ လက်ရှိဈေးမှာ လက္ကားဈေး တစ်ပိဿာလျှင် ၁၂၀၀/-၊ ၁၃၀ဝိ/-ရှိပြီး လာမည့်ရက်များ၌ မြဝတီသို့ ကြက်သွန်နီ အသေးစများ တွဲကားဖြင့် တင်ပို့ရန် ပြင်ဆင်နေကြောင်း ဈေးကွက်မှ သိရသည်။

DOCA(မန္တလေး)

           ၂၀၂၂ခုနှစ် ဇူလိုင်လ ပထမပတ်အတွင်း ရွှေဘိုမြို့နယ်တွင် အခြေခံစားကုန်များဖြစ်သော ရွှေဘိုပေါ်ဆန်း ဆန်တစ်ပြည် ၂၃၀၀ကျပ်၊ ဧရာမင်းဆန် တစ်ပြည်လျှင် ၂၀၀၀ကျပ်ဖြင့် အရောင်း အဝယ်ဖြစ်လျက်ရှိသည်။ ကြက်သွန်နီ လက်လီဈေးမှာ (ကြီး)တစ်ပိဿာလျှင် ၂၂၀၀ကျပ်၊ (လတ်) တစ်ပိဿာလျှင်  ၂၀၀၀ကျပ်၊ (သေး)တစ်ပိဿာလျှင် ၁၈၀၀ကျပ်နှုန်းဖြင့် အရောင်းအဝယ် ဖြစ်လျက်ရှိသည်။ ကြက်သွန်ဖြူလက်လီဈေးမှာ (ဗမာ)တစ်ပိဿာလျှင် ၃၅၀၀ကျပ်မှ ၄၀၀၀ကျပ်ထိ၊ ရှမ်းကြက်သွန်ဖြူ တစ်ပိဿာလျှင် ၂၅၀၀ကျပ်မှ ၃၀၀၀ကျပ်ထိ ၊ (ကြူကုပ်) တစ်ပိဿာလျှင် ၄၀၀၀ကျပ်မှ ၄၅၀၀ကျပ်ထိ၊ ချင်းတစ်ပိဿာ ၁၈၀၀ကျပ်မှ ၂၀၀၀ကျပ်ထိ ၊ ငရုတ်သီးခြောက် အမျိုးအစားအလိုက် ၇၅၀၀ကျပ်မှ ၁၀၀၀၀ကျပ်ထိ အာလူး တစ်ပိဿာလျှင် ၁၅၀၀ကျပ်မှ ၂၆၀၀ကျပ်ထိ၊ ခရမ်းချဉ်သီး တစ်ပိဿာလျှင် ၁၂၀၀ ကျပ်ဖြင့် အရောင်းအဝယ် ဖြစ်နေပါသည်။

          ကြက်ဥ လက်လီဈေးနှုန်းမှာ (ကြီး)တစ်လုံးလျှင် ၂၀၀ကျပ်၊ (သေး) တစ်လုံးလျှင် ၁၅၀ကျပ် ၊ ဘဲဥ (ကြီး) တစ်လုံးလျှင် (၂၅၀)ကျပ်၊ (သေး)တစ်လုံးလျှင် (၂၀၀)ကျပ်ရှိသည်။ ရွှေဘိုမြို့၏ အသား/ငါး ဈေးနှုန်း များမှာ ကြက်သား(CP)  တစ်ပိဿာလျှင် ၈၀၀၀ကျပ်မှ ၈၅၀၀ကျပ်ထိ၊ ကြက်သား (ဗမာ)တစ်ပိဿာလျှင် ၁၀၀၀၀ ကျပ်မှ ၁၃၀၀၀ကျပ်ထိ၊  ဝက်သား တစ်ပိဿာလျှင် ၁၄၀၀၀ကျပ်မှ ၁၈၀၀၀ကျပ်ထိ၊ အမဲသား တစ်ပိဿာလျှင် ၁၄၀၀၀ကျပ်မှ ၁၆၀၀၀ကျပ်ထိ၊  ငါးမြစ်ချင်း တစ်ပိဿာလျှင် ၅၀၀၀ကျပ်၊ ငါးကြင်း တစ်ပိဿာလျှင် ၅၀၀၀ကျပ်ဖြင့် ရောင်းဝယ်နေကြောင်း သိရသည်။

          ပဲဆီသန့် ဈေးနှုန်းမှာ တစ်ပိဿာလျှင် ၈၅၀၀ကျပ်မှ ၁၀၀၀၀ကျပ်ထိ၊  စားအုန်းဆီ တစ်ပိဿာလျှင် ၈၈၀၀ကျပ်၊ နှမ်းဆီ တစ်ပိဿာလျှင် ၈၅၀၀ကျပ်ဖြင့် အရောင်းအဝယ်ဖြစ်နေကြောင်း သိရသည်။

DOCA(စစ်ကိုင်း)