ပြည်တွင်းကုန်သွယ်မှုသတင်း

          ဧရာ၀တီတိုင်းဒေသကြီး၏ ပြည်ပပို့ကုန်များတွင် တစ်ခုအပါအ၀င်ဖြစ်သော ပုသိမ်ထီး စျေးကွက်မှာ ပြည်တွင်း/ပြည်ပစျေးကွက်ရှိပြီး ပြည်တွင်းစျေးကွက်မှာ ငွေဆောင်၊ ချောင်းသာ၊ ငပလီကမ်းခြေသုံး ထီးများ နေပြည်တော်၊ ရန်ကုန်၊ မန္တလေး၊ ပုဂံညောင်ဦး၊ အင်းလေး၊ မော်လမြိုင်မြို့များရှိ ဟိုတယ် များတွင်လည်း အလှဆင်ထီးများ အသုံးပြုလျက် ရှိကြောင်းသိရှိရသည်။

          ပုသိမ်ထီးပြုလုပ်ရာတွင် သစ်၊ ထီးရိုးဝါး၊ သရကူဝါး၊ တယ်သီး၊ ဖဲဖျင်၊ ပိတ်စ ပြည်တွင်း ဒေသထွက်ကုန်များကို အသုံးပြု၍ ပြုလုပ်ပြီး ပြည်ပနိုင်ငံမှ ဝယ်ယူသည့် ကုန်ကြမ်းပစ္စည်းများ မပါဝင်ဘဲ မြန်မာအနုပညာကို ဖော်ထုတ်ထားသည့် ဆေးဆိုးခြင်း၊ ပန်းချီရေးဆွဲခြင်း စသည်တို့ဖြင့် အလှဆင် ထားပြီး ထီးတစ်ချောင်းလုံးကို လက်ဖြင့်သာ ပြုလုပ်ထားသောကြောင့် ပြည်ပနိုင်ငံသားများ ​Hand Made လက်မှုအနု ပညာတစ်ခု အနေဖြင့် လူကြိုက်များကြောင်း၊ ပုသိမ်ထီးပြုလုပ်ရာတွင် ရဟန်းဆောင်းထီး ၊ သီလရှင် ဆောင်းထီး၊ အလှဆောင်းထီး၊ မိုးရေခံ ထီး၊ အိမ်တော်ရာထီး၊ စားပွဲတင်ထီး၊ မီးအိမ်ထွန်းထီး၊ ဟိုတယ်အလှဆင်ထီး၊ ကမ်းခြေသုံးထီး အမျိုးမျိုးပြုလုပ် ရောင်းချလျှက်ရှိပြီး ယခု လက်ရှိအချိန် ရှင်ပြု၊ နားသများတွင် အသုံးပြုရန် ၁၄” အလှဆောင်းဖဲထီးများကို မန္တလေး၊ နေပြည်တော်၊ ရန်ကုန်၊ ပုဂံ၊ ညောင်ဦးမြို့များမှ မှာယူလျှက် ရှိကြောင်း ပုသိမ်မြို့၊ ရွှေစာထီးလုပ်ငန်းမှ သိရှိရသည်။

DOCA(ဧရာဝတီ)

             စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့် ဝန်ထမ်းများအဖွဲ့သည် ပြည်တွင်း၌ စားသုံးဆီဖူလုံရေးအတွက် ဆီထွက်သီးနှံများ ပိုမိုတိုးချဲ့စိုက်ပျိုးထုတ်လုပ်နိုင်ရေး၊ ပြည်တွင်းဆီစက်လုပ်ငန်းများနှင့် ဆီထွက်သီးနှံကဏ္ဍ ပိုမိုဖွံ့ဖြိုးတိုးတက်လာစေရေးအတွက်ရည်ရွယ်၍ မေလ(၁၉)ရက်၊ နံနက် (၁၀:၀၀)နာရီ အချိန်တွင် ပခုက္ကူမြို့၊ စက်မှုဇုန်ရှိ ဆီစက်လုပ်ငန်းရှင်များနှင့် တွေ့ဆုံမေးမြန်းခဲ့ပါသည်။

            ခရိုင်ဦးစီးမှူးမှ ဆီစက်လုပ်ငန်းရှင်များကို ဆီစက်များရှိလက်ကျန်အခြေအနေများ၊ စက်ကြိတ်စွမ်းအားနှင့် လအလိုက်ကြိတ်ခွဲထုတ်လုပ်နိုင်မှုအခြေအနေများအား မေးမြန်းရာ " SSS" ဆီစက်မှာ ဆီကြိတ်စက်ကြီး(၄)လုံးဖြင့် လည်ပတ်နေပြီး နေ့/ည ဆီကြိတ်ခွဲနေကြောင်း၊ မြေပဲ နှင့် နှမ်းကို အဓိကထား၍ ကြိတ်ခွဲထုတ်လုပ်ပြီး မော်တာမြင်းကောင်ရေ(၈၀)အားဖြင့် အသုံးပြုနေကြောင်း၊ တစ်ရက်လျှင် ဆီ(၁၅)ပေပါခန့် ကြိတ်ခွဲထုတ်လုပ်နိုင်ကြောင်း၊ လျှပ်စစ်မီးလာသည့် အချိန်များလျှင် ပို၍ဆီကြိတ်ခွဲမှုပြီးစီးကြောင်း၊ မြေပဲလက်ကျန်မှာ (၂၅)ပိဿာဝင် အိတ်(၅၅၀/၆၀၀) ခန့် ရှိပြီး နှမ်းလက်ကျန်မှာ (၂၅)ပိဿာဝင် အိတ်(၃၀၀)ခန့်ရှိနိုင်ကြောင်း၊ မြေပဲဈေးမှာ စားအုန်းဆီအဝင်ပေါ် တွင်မူတည်၍ ဈေးနှုန်းပြောင်းလဲနိုင်ကြောင်း သိရှိခဲ့ရပါသည်။

           ဆက်လက်၍ "ဂရိတ်"ဆီစက်လုပ်ငန်းရှင်မှ မြေပဲလက်ကျန် အိတ်ရေ(၂၀၀၀)ခန့်နှင့် နှမ်းလက်ကျန်အိတ်ရေ(၅၀၀)ခန့်ရှိကြောင်း၊ မြေပဲ အိတ်ရေ(၂၀၀၀)မှာ လုံးဆံ(၅၀၀)အိတ်အပါအဝင်ဖြစ်ပြီး ကျန်သည်မှာ အဆံမကြိတ်ခွဲရသေးသော မြေပဲတောင့်များဖြစ်ကြောင်း၊ ဆီကြိတ်သည့် စက်စွမ်းအားမှာ မော်တာ မြင်းကောင်ရေ(၂၀၀)ခန့်အသုံးပြုထားကြောင်း၊ ဆီစက်အကြီးများတွင်သာ လက်ကျန် ကျန်ရှိနိုင်ပြီး ဆီစက်အများစုတွင် လက်ကျန်အနည်းငယ်သာရှိနိုင်ကြောင်း၊ စိုက်တောင်သူများတွင် လက်ကျန်မှာ မျိုးစေ့ထားသည်မှလွဲ၍ မရှိနိုင်ကြောင်း၊ ဇွန်၊ ဇူလိုင် ရောက်မှသာ မြေပဲ ၊ နှမ်း ပေါ်မည်ဖြစ်ကြောင်း၊ ဆီထွက်သီးနှံများ ‌ဈေးကောင်းရနေသဖြင့် တောင်သူများ ပိုမိုစိုက်ပျိုးလာနိုင်ကြောင်း၊ မြေပဲ /နှမ်း တင်ပို့မှုကို မြဝတီကုန်သွယ်ရေးဇုန်မှ ခေတ္တဆိုင်းငံ့ထားသော်လည်း စားအုန်းဆီအဝင်နည်းသောကြောင့် မြေပဲဈေးမှာ ကျဆင်းမှုမရှိဘဲ ယခင်က(၄၀၀၀)ကျပ်၊ ယခု(၄၁၀၀/၄၂၀၀)ကျပ်ခန့် ဈေးပိုတက်လာသည်ကိုတွေ့ရကြောင်း၊ ပခုက္ကူမြို့နယ်တွင် ဆီစက်နှင့်ဆုံအရေအတွက်မှာ (၆၀/၆၅)ဝန်းကျင်ခန့်ရှိ၍ ဆီစက်ကြီးမှာ(၆/၇)ခု ခန့်သာရှိပြီး ကျန်စက်များမှာ ဆီစက်အသေးများဖြစ်ကြောင်း၊ ကုန်သည်များတွင်လည်း လက်ကျန် အနည်းငယ်သာရှိနိုင်ကြောင်း၊စားအုန်းဆီကိုလည်း ဆီလုပ်ငန်းရှင်များမှ မဲစနစ်ဖြင့် ခွဲတမ်းရမည်ဟု သိရပါကြောင်း၊ စားအုန်းဆီကို အကြော်ဆိုင်များတွင် အများဆုံး အသုံးပြုပြီး (၆၀၀၀ မှ ၇၀၀၀)ကျပ်ထိ ရောင်းချရကြောင်း၊ ဂရိတ်ဆီစက်အနေဖြင့် ဆီပေပါများကို သန့်ရှင်းပြီး ဆေးအဝါရောင်များ စတင်သုတ်နေပြီဖြစ်ကြောင်း ကုန်အမှတ်တံဆိပ်နှင့် ပတ်သက်၍လည်း စိစစ်ခွင့်ပြုချက်ရရှိပြီးဖြစ်ကြောင်း၊ ဌာနဆိုင်ရာမှ ထုတ်ပြန်ထားသော ညွှန်ကြားချက်များကို သိရှိလိုက်နာပြီး ပူးပေါင်းဆောင်ရွက်သွားမည်ဖြစ်ကြောင်း ဆီလုပ်ငန်းရှင်၏ ပြောကြားချက်အရ သိရှိရပါသည်။

DOCA(မကွေး)

              မွန်ပြည်နယ်၊ စားသုံးသူရေးရာဦးစီးဌာန၊ ကျိုက်ထိုမြို့နယ်တာဝန်ခံနှင့် ဝန်ထမ်းများသည် ၁၇.၅.၂၀၂၂ ရက်နေ့ နေ့လည်ပိုင်းတွင် ကျိုက်ထိုမြို့နယ်၊ ဗိုလ်ချုပ်လမ်းရှိ ဒူးရင်းသီးရောင်းချလျက်ရှိသော ဈေးဆိုင်တန်းများသို့ သွားရောက်၍ ဒူးရင်းသီးရောင်းဝယ်ဖောက်ကားမှု၊ ဈေးနှုန်း၊ ဈေးကွက် အခြေအနေများအား စုံစမ်းမေးမြန်းခြင်း ပြုလုပ်ခဲ့ကြောင်း သိရှိရပါသည်။

                ထိုသို့ စုံစမ်းမေးမြန်းရာတွင် ဒူးရင်းသီးရောင်းချသူ ဆိုင်ရှင်တစ်ဦး၏ ပြောပြချက်အရ ဘီးလင်း မြို့နယ် ဝင်းက၊ ယက္ကန်းသည်မ၊ မရမ်းကုန်း၊ အလူးလေး ကျေးရွာများမှ ဒေသထွက် ဒူးရင်းသီးများအား ရောင်းချလျက်ရှိကြောင်း၊ ရံဖန်ရံခါ ရေးမြို့နယ်နှင့် သထုံမြို့နယ် ကျိုက္ကော်မှ ဒူးရင်းသီးများအား ရောင်းချလျက်ရှိကြောင်း၊ ရံဖန်ရံခါ ရေးမြို့နယ်နှင့် သထုံမြို့နယ် ကျိုက္ကော်မှ ဒူးရင်းသီးများအား မှာယူရောင်းချလျက်ရှိကြောင်း၊ ဒေသခံလူများနှင့် ဘုရားဖူးခရီးသွားများ အများအပြားဝယ်ယူမှုရှိကြောင်း၊ ဒူးရင်းသီး ဈေးနှုန်းမှာ ပျမ်းမျှအားဖြင့် အလုံးကြီး (၁၂၀၀၀) ကျပ်၊ အလုံးလတ် (၈၀၀၀) ကျပ်၊ အလုံးသေး (၅၀၀၀) ကျပ်ခန့် ဖြစ်ပေါ်ကြောင်း၊ ပေါ်ဦးပေါ်ဖျားရာသီဖြစ်သဖြင့် ယခင်နှစ်ထက် ဈေးနှုန်း နှစ်ဆခန့် မြင့်သော်လည်း အရောင်းအဝယ်ကောင်းလျက်ရှိကြောင်း သိရှိရပါသည်။

                 သထုံခရိုင်တွင် ကွက်ကောက်စာရင်းအရ ဒူးရင်းသီး စိုက်ဧက (၄၀၀၀) ဝန်းကျင်ခန့်ရှိပြီး တစ်ဧကလျှင် အထွက်နှုန်း (၃၀၀၀) ခန့်ရှိကြောင်း၊ ဒူးရင်းသီး လှိုင်လှိုင်ပေါ်သောအချိန်တွင် ရန်ကုန်တိုင်းဒေသကြီးနှင့် နေပြည်တော်သို့ တင်ပို့ရောင်းချလျှက်ရှိကြောင်း သိရှိရပါသည်။

DOCA(မွန်)

           ကွမ်းသီးနှင့် သီဟိုများသည် မြန်မာနိုင်ငံတောင်ပိုင်း တနင်္သာရီတိုင်းဒေသကြီးနှင့် မွန်ပြည်နယ်တို့တွင် အများဆုံးစိုက်ပျိုးလျက်ရှိပါသည်။ ကွမ်းသီးတွင် ကွမ်းသီးအလုံးစျေးနှင့် ကွမ်းသီးခွဲခြမ်းစျေးဟူ၍ စျေးနှုန်း (၂)မျိုးရှိပြီး သီဟိုစေ့တွင် အခွံမချွတ်ရသေးသောအပင်မှ ဆွတ်ခူးသော အသီးအကြမ်းစျေးနှင့် အခြောက်လှန်းသန့်စင်ပြီး အချောစျေးဟူ၍ စျေးနှုန်း ( ၂ ) မျိုးရှိကြောင်း သိရှိရပါသည်။

          တနင်္သာရီတိုင်းဒေသကြီး၊ ထားဝယ်မြို့ပေါ်ရှိ ဖြစ်ပေါ်လျက်ရှိသော ကွမ်းသီးစျေးမှာ မေ​၁၈ ရက်တွင်  ကွမ်းသီးအလုံး(အခွံမပါ)တစ်ပိဿာလျှင် ကျေးရွာအတွင်း ဝယ်ယူသောစျေးမှာကျပ် ၅၀၀ဝ နှုန်းရှိပြီး နေလှန်းအခြောက်ခံသန့်စင်ထုပ်ပိုးပြီး ရန်ကုန်စျေးကွက်သို့တင်ပို့ရာ ရောင်းစျေးမှာ တစ်ပိဿာလျှင် ကျပ်၅၈၀၀နှုန်း စျေးရှိနေပြီး ကွမ်းသီးခွဲခြမ်း တစ်ပိဿာလျှင် ကျပ် ၅၅၀ဝ နှုန်း ပေါက်ဈေးရှိကြောင်း သိရှိရပါသည်။ သီဟိုစျေးနှုန်းမှာ သီဟိုစေ့အကြမ်း တစ်ပိဿာလျှင် ကျပ် ၃၄၀ဝ ရှိပြီး  သီဟိုစေ့အချောတစ်ပိဿာ လျှင် ကျပ်၂၂၃၀ဝ ရှိကြောင်း သိရှိရသည်။

          ကွမ်းသီးနှင့် သီဟိုစေ့ဈေးနှုန်းများမှာ ယခင်အပတ်နှင့် ယခုပတ်နှိုင်းယှဉ်လျှင် ဈေးနှုန်းမှာ တည်ငြိမ်လျက်ရှိကြောင်းနှင့် အရောင်းအဝယ်မှာ ပုံမှန်လည်ပတ်လျက်ရှိကြောင်း စုံစမ်းသိရှိရပါသည်။

DOCA(တနင်္သာရီ)

          ပခုက္ကူကုန်စည်ဒိုင်တွင် အရောင်းအဝယ်ဖြစ်လျက်ရှိသော ပဲမျိုးစုံသီးနှံများမှာ ပဲစဉ်းငုံနီ၊ ကုလားပဲမျိုးစုံ၊ ပဲတီစိမ်းကြီး ၊ ပဲဇီးကွက်၊ ပြောင်းဖူးစေ့( CP)နှင့် အခြားပဲမျိုးစုံ၊ မန်ကျည်းတောင့်များ အရောင်းအဝယ်ဖြစ်လျှက်ရှိပါသည်။

         မေလ(၈)ရက်နေ့မှ (၁၄)ရက်နေ့အတွင်း ဖြစ်ပေါ်လျက်ရှိသာ ပဲစဉ်းငုံနီဈေးနှုန်းမှာ တစ်တင်းလျှင် (၄၂၁၀၀-၄၂၃၀၀)ကျပ်၊ ကုလားပဲဝါလုံးကြီး(929) တစ်တင်းလျှင် (၄၃၈၀၀-၄၄၀၀၀)ကျပ်၊ ကုလားပဲဖြူ လုံးကြီး(V6) တစ်တင်းလျှင် (၄၈၀၀၀) ကျပ်၊ ပဲတီစိမ်းကြီးတစ်တင်းလျှင်(၄၆၈၀၀)ကျပ်၊ ပဲဇီးကွက် တစ်တင်း လျှင်(၄၂၈၀၀)ကျပ်၊ ပြောင်းဖူးစေ့(CP) တစ်တင်းလျှင်(၁၇၁၀၀)ကျပ်၊ ပဲလွန်းပြာတစ်တင်းလျှင် (၃၁၀၀၀) ကျပ်၊ မန်ကျည်းတောင့် တစ်ပိဿာလျှင် (၁၇၈၀)ကျပ်ဖြစ်ပြီး အရောင်းအဝယ်ဖြစ်မှုမှာ ပဲစဉ်းငုံနီ(၄၀၀) အိတ်၊ ကုလားပဲဝါလုံးကြီး (929)(၁၀၀)အိတ်၊ ကုလားပဲဖြူလုံးကြီး(V6) (၂၀၀) အိတ်၊ ပဲတီစိမ်းကြီး(၆၀၀) အိတ်၊ ပဲဇီးကွက်(၁၅၀) အိတ်၊ ပဲလွန်းပြာ(၁၀၀)အိတ်၊ ပြောင်းဖူးစေ့ (CP)(၁၀၀) အိတ်၊ မန်ကျည်းတောင့် ပိဿာချိန်(၉၀၀၀)နှင့် တင်ပို့မှုမှာ ကုန်းလမ်းမှ ပဲယင်းနီ၊ ထောပတ်ပဲဖြူ၊ ကုလားပဲမျိုးစုံ၊ ပဲတီစိမ်းကြီး၊ စွန်တာနီပဲများကို ရန်ကုန်သို့ တင်ပို့လျှက်ရှိပြီး ပဲဈေးနှုန်းများမှာလည်း အချိန်နှင့်တပြေးညီ ပြောင်းလဲနေကြောင်း ကုန်စည်ဒိုင်မှ သိရှိရပါသည်။

DOCA (မကွေး)