ပြည်တွင်းကုန်သွယ်မှုသတင်း

           မကွေးတိုင်းဒေသကြီး၊စားသုံးသူရေးရာဦးစီးဌာနမှ ဦးဝေယံမြင့်အောင်(ဒုကြီးကြပ်ရေးမှူး)က ၂၂.၅.၂၀၂၂ရက်နေ့ နံနက် (၁၀:၀၀) နာရီ အချိန်တွင် မကွေးမြို့၊ ရန်ဝေးရပ်၊ ခွါညိုလမ်း၊ အမှတ်(၈၆)တွင် MYANMAR ORGAINC MORINGA OIL (MOM)အမှတ်တံဆိပ်ဖြင့် မိသားစုတစ်ပိုင်တစ်နိုင် လုပ်ငန်းအဖြစ် လုပ်ကိုင်ဆောင်ရွက်နေသော ဒန်သလွန်စေ့ဆီ ထုတ်လုပ်မှုအခြေအနေနှင့်စပ်လျဉ်း၍ မြန်မာ့ဒန့်သလွန်စေ့ဆီ ထုတ်လုပ်ရောင်းချနေသည့် တွေ့ဆုံမေးမြန်းရာ ဒန့်သလွန်စေ့ဆီ ထုတ်လုပ်ရာတွင် အိန္ဒိယမျိုးများဖြစ်သော Momax 3 နှင့် ODC 3 မျိုးများမှာ ဆီကြိတ်ရန် အထူး ကောင်းမွန်ပြီး ဆီကြိတ်ရန်အတွက် အဆိုပါ ဒန့်သလွန်စေ့ ကုန်ကြမ်းများရရှိစေရန် မိမိကိုယ်တိုင် (၁၀)ဧကခန့် စိုက်ပျိုးထားကြောင်းနှင့် ဘေးပါတ်ဝန်းကျင် မှစိတ်ပါဝင်စားသော မြေပိုင်ရှင်များအား ဒန့်သလွန်မျိုးစေ့ထုတ်ပေး၍ ဓါတ်မြေဩဇာ လုံး၀မသုံးစွဲစေဘဲ ဇီဝနှင့်သဘာဝ မြေဩဇာများကိုသာ ‌ပေါင်းစပ်စိုက်ပျိုးစေပြီး ထွက်ရှိသော ဒန့်သလွန်စေ့များအား ပြင်ပပေါက် ဈေးအတိုင်း ပြန်လည်ဝယ်ယူကာ ဒန့်သလွန်စေ့ဆီ ထုတ်လုပ်ရာတွင် အသုံးပြုကြောင်း သိရှိရပါသည်။

          ဒန့်သလွန်စေ့ဆီတွင် ကျန်းမာရေးအတွက် အကျိုးပြုဓါတ်များဖြစ်သည့်  Oleic Acid ရာခိုင်နှုန်းများစွာ ပါဝင်သည့်အတွက် ဟင်းချက်ဆီ၊ အလှကုန်၊ ချောဆီ၊ အသားအရေချောမွေ့ စိုပြေစေဖို့ ခန္ဓာကိုယ်အလှပြုပြင်ရေးနှင့် ရေမွှေးအခြေခံဆီအဖြစ် အသုံးပြုနိုင်ကြောင်း သိရှိရပါသည်။ဒန့်သလွန်စေ့ဆီတွင် မြင့်မားစွာပါရှိသော Oleic Acid သည် သံလွင်ဆီထက်များစွာ သာလွန်သည့်အတွက် ဟင်းချက်ဆီအဖြစ် အသုံးပြုလိုသော်လည်း အစေ့ထုတ်လုပ်မှုမှာ အနည်းငယ်သာရရှိနိုင်ပြီး ဈေးနှုန်းမြင့်မားသည့်အတွက် အလှကုန်လုပ်ငန်းနှင့် ရေမွှေးလုပ်ငန်းများမှသာ အသုံးပြုသူပိုမိုများပြားလာကြောင်း၊ ဗီတာမင်A,Cနှင့်အခြား မပြည့်ဝဆီများစွာ ပါဝင်ကာ ကပ်ပါးပိုးမွှားများကို နှိမ်နင်းနိုင်သည့်အပြင် အသားအရေဆိုင်ရာဒဏ်ရာ၊ အင်းစက်ကိုက်ခြင်း၊ ပြည်တည်နာ၊ ခြေဖဝါးအက်ကွဲခြင်း၊ အဆစ်အမြစ်ရောင်ရမ်းခြင်း၊ ဂေါက်ရောဂါဖြစ်ခြင်းတို့ကို လိမ်းပေးနိုင်ကြောင်း၊ ဒန့်သလွန်စေ့ဆီသည် အဆီထုတ်ပြီး (၅)နှစ်ကျော်သည် အထိ ဆီချေးစော်နံခြင်း လုံးဝမဖြစ်ပေါ်သည့်အတွက် ဆံပင်အလှပြုပြင်ရေးနှင့် ဆံပင် ပျော့ပြောင်းနူးညံ့စေသည့် ခေါင်းလျှော်ရည်အဖြစ်အသုံးပြုကြကြောင်း၊ ဦးခေါင်းဆံပင်မှာရှိတဲ့  အညစ်အကြေးများကို ဖယ်ထုတ်ပေးသည့်အပြင် ထိရောက်သည့် သဘာဝသန့်စင်ပစ္စည်းဖြစ်သည့်အတွက် ဆံပင်ကိုအမြဲတန်းစိုပြေပျော့ပြောင်းစေပါကြောင်း၊ စေးကပ်မှုမရှိသည့်အတွက် ခေါင်းလိမ်းဆီအဖြစ် အသုံးပြုကြကြောင်း၊ ဒန့်သလွန်စေ့ဆီတွင်ပါရှိသည့် များပြားလှတဲ့ Antioxidantအပြင် အသားအရေကို ပြန်လည်နုပျိုစေသည့် အရည်အသွေးရှိနေ သောကြောင့် အသားအရေတွန့်ခြင်းများကို ပြန်ကောင်းစေခြင်း၊ အသားအရေဝင်းဝါ တောက်ပြောင်စေခြင်း၊ အသားအရေကို ချောမွတ်စေခြင်း၊ ဒန့်သလွန်စေ့ဆီတွင်ပါဝင်သည့် Oleic Acidဟာ အသားအရေထဲစိမ့်ဝင်သွားတဲ့အခါမှာ အသားအရေနှင့်ဆံပင်ကို အာဟာရများစွာပေးစွမ်းပြီး အစိုဓါတ်ကို ကြာရှည်စွာထိန်းပေးနိုင်သည့်အတွက် ဆံပင်သန်စွမ်းပြီး နူးညံ့ပျော့ပြောင်းစေကြောင်း၊ အမွှေးနံ့ကို ကြာရှည်စွာ ထိန်းပေးထားနိုင်သည့်အတွက် ရေမွှေးနှင့်အလှကုန်ပစ္စည်း ထုတ်လုပ်ရာတွင် များစွာအထောက်ကူပြုကြောင်း၊ ကြိုက်နှစ်သက်သည့်ရနံ့တစ်ခုခုနှင့် ဒန့်သလွန်စေ့ဆီကို ရောနှောအသုံးပြုပါက ရနံ့ပြယ်သွားခြင်းမျိုးမဖြစ်ဘဲ မွှေးရနံ့ကို ကြာရှည်စွာ ထိန်းထားနိုင်ပါကြောင်း၊ ဒန့်သလွန်စေ့ဆီကို မိတ်ကပ်တွင် ထည့်သွင်းအသုံးပြုပါက အခြားသော အခြေခံဆီများနှင့်မတူဘဲ ဝက်ခြံများကို ရှင်းလင်းဖယ်ရှားပေးခြင်း၊ ပြန်မဖြစ်အောင် ကာကွယ်ပေးခြင်း၊ နေလောင်ဒဏ်ကိုကာကွယ်ပေးခြင်း၊ ချောင်းဆိုး၊ အအေးမိ၊ ရင်ကြပ်၊ လည်ချောင်းနာ၊ အာသီးယောင်၊ ထိပ်ကပ်နာ၊ အစာအိမ်ယောင်ခြင်း၊ အစာချေခြင်း ပြဿနာ၊ ဝက်ခြံ၊ တင်းတိတ်၊ အမဲစက်၊ မှဲ့ခြောက်၊ အမာရွတ်များ၊ အရေပြားပိုးဝင်ခြင်း၊ မှို၊ နှင်းခူ၊ ပွေး၊ ဒက်၊ အရေပြား ယောင်ရမ်းခြင်း၊ အရေပြားပေါ်တွင် ဓါတုကြောင့်ဖြစ်သော ရောဂါအမျိုးမျိုးနှင့် နှုတ်ခမ်းကွဲ၊ ခြေဖနှောင့်ကွဲ၊ ဆီပူလောင်၊ မီးပူလောင် ဝေဒနာများတွင် လိမ်းပေးခြင်း၊ ခန္ဓာကိုယ် နာကျင်ကိုက်ခဲသော နေရာများအား လိမ်း၍ နှိပ်နယ်ပေးခြင်းဖြင့် သက်သာပျေက်ကင်းစေကြောင်း၊ သွေးတိုးနေပါက လက်ဖက်စားဇွန်း(၁)ဇွန်းခန့် သောက်သုံးပေးခြင်းဖြင့် သွေးတိုးခြင်း ဝေဒနာကိုသက်သာ ပျောက်ကင်းစေကြောင်း သိရှိရပါသည်။

          ဒန့်သလွန်စေ့ဆီ ထုတ်လုပ်ရာတွင် ဒန့်သလွန်စေ့ဆီ(၁ လီတာ) တစ်ဗူး ရရှိရန်အတွက် ဒန့်သလွန်စေ့ခြောက် ၅ ပိဿာ/ ၆ ပိဿာ ခန့်ကြိတ်ရကြောင်းနှင့် ဒန့်သလွန်စေ့ ၁ပိဿာလျှင် အစေ့၏ကောင်းမွန်မှုပေါ်မူတည်၍ (၁၅၀၀ဝိ/-)ကျပ်မှ (၃၀၀၀ဝိ/-)ကျပ် အတွင်း ဈေးပေးဝယ်ယူရပြီး ဒန့်သလွန်စေ့ဆီ(၁ လီတာ) တစ်ဗူးလျှင် (၂၂၀၀၀ဝိ/-)ကျပ်၊ (၀.၅ လီတာ) တစ်ဗူးလျှင် (၁၁၀၀၀ဝိ/-)ကျပ်၊ (၂၀ မီလီ) တစ်ဗူးလျှင် (၁၀၀၀ဝိ/-)ကျပ်ဝန်းကျင်ဖြင့် ပြန်လည်ရောင်းချရကြောင်းနှင့် လက်ရှိတွင် အဆိုပါ ဒန့်သလွန်စေ့ဆီအား မကွေးမြို့၊ ရန်ကုန်မြို့နှင့် မန္တလေးမြို့များမှ မှာယူမှုများရှိ၍ ရောင်းချရကြောင်းနှင့် ဆီကြိတ်ပြီး ထွက်ရှိလာသော အဖတ်များအား  တိရစ္ဆာန်အစားအစာနှင့် ဓါတ်မြေဩဇာအဖြစ် သုံးစွဲရန်အတွက် ပြန်လည်ရောင်းချရကြောင်း သိရှိရပါသည်။

          ဆက်လက်၍ မိမိထုတ်လုပ်ထားသော MYANMAR ORGAINC MORINGA OIL (MOM) အမှတ်တံဆိပ် ဒန့်သလွန်စေ့ဆီအား သုံးစွဲသူပြည်သူများ ဘေးကင်းလုံခြုံစိတ်ချစွာ သုံးစွဲနိုင်ရေးအတွက် မကွေးတိုင်းဒေသကြီးအသေးစားစက်မှုလက်မှု လုပ်ငန်းဦးစီးဌာနတွင် ဒန့်သလွန်စေ့ဆီ နမူနာအား စစ်ဆေးမှုခံယူရာ ထောက်ခံချက်အမှတ် အစ-၈(မက-၀၀၀၃၉၆)ဖြင့် ထောက်ခံချက် ရရှိထားပြီး နိုင်ငံတော်မှ မိမိကဲ့သို့ တစ်ပိုင်တစ်နိုင်လုပ်ငန်းရှင်များအား ကူညီထောက်ပံ့မှုများ ပြုလုပ်ပေးမည်ဆိုပါက အစားအသောက်နှင့်ဆေးဝါးကွပ်ကဲရေးဦးစီးဌာန (FDA) လက်မှတ်ရရန် အဆင့်မြှင့်တင်ဆောင်ရွက်ပြီး နိုင်ငံတကာသို့ တင်ပို့ရောင်းချနိုင်ရန်အထိ ဆက်လက်ကြိုးစား ဆောင်ရွက်လိုပါကြောင်း လုပ်ငန်းရှင် ဦးမင်းသက်ဝေမှ ပြောကြားခဲ့ပါသည်။

DOCA(မကွေး)

            ကြက်သွန်နီသည် နေ့စဉ်ဟင်းလျာများတွင် မပါမပြီး အလွန်အရေးပါသော စားဖိုဆောင်သီးနှံ တစ်မျိုးဖြစ်ပါသည်။ ဟင်းလျာများကို အနံ့၊ အရသာကောင်းမွန်စေရုံသာမက စားသုံးသူတို့၏ ကျန်းမာရေးကိုလည်း အထောက်အကူဖြစ်စေပါသည်။ ဖွံ့ဖြိုးဆဲနိုင်ငံများတွင် စီးပွားရေးလုပ်ငန်း၏ (၆၀%)မှာ ကြက်သွန်နီရောင်းဝယ်ရေးဖြစ်ပါသည်။ ကြက်သွန်နီ၏ ဇာတိဒေသမှာ တောင်အာရှဒေသ (သို့မဟုတ်) မြေထဲပင်လယ်ဖြစ်မည်ဟု ယူဆကြပါသည်။ ကြက်သွန်နီသည် အပူ၊ အအေး သင့်တင့်သော ရာသီဥတုကို ကြိုက်နှစ်သက်ပါသည်။ မြေအမျိုးအစားမှာ အစိုဓါတ်ရှိသောမြေများတွင် စိုက်ပျိုးနိုင်သည်။ မကွေးတိုင်းဒေသကြီးတွင် မိုးနှင့်ဆောင်းသာ ကြက်သွန်နီစိုက်ပျိုးကြပြီး မိုးကြက်သွန်နီ စတင်စိုက်ပျိုးချိန်သည် ဩဂုတ်လမှ အောက်တိုဘာလအထိဖြစ်ပြီး ရိတ်သိမ်းထွက်ရှိသည့်ကာလမှာ နိုဝင်ဘာလမှ ဇန်နဝါရီလအထိ ဖြစ်ပါသည်။ ဆောင်းကြက်သွန်နီ စတင်စိုက်ပျိုးသည့်ကာလမှာ ဒီဇင်ဘာလမှ ဇန်နဝါရီလအထိ စိုက်ပျိုးကြပြီး ရိတ်သိမ်းထွက်ရှိသည့်ကာလမှာ မတ်လမှဧပြီလအထိ ဖြစ်ပါသည်။ မကွေးတိုင်းဒေသကြီးအတွင်း ကြက်သွန်နီ စိုက်ပျိုးဧကသည် ၂၀၂၁-၂၀၂၂ ခုနှစ်၊ ဇန်နဝါရီလကုန်အထိ ( ၃၀၃၇၅ ) စိုက်ဧကရှိပြီး အထွက်နှုန်းမှာ ( ၁၂၂၆၅၁၆၅ ) ပိဿာထွက်ရှိရာ ပခုက္ကူ၊ ဆိပ်ဖြူ၊  မကွေး၊ ရေနံချောင်း၊ စလင်း (ဆင်ဖြူကျွန်း) မြို့နယ်နှင့် မြို့သစ်မြို့နယ်များတွင် အများဆုံးစိုက်ပျိုးကြပြီး ကုန်းကြက်သွန်နီ၊ ချောင်းကြက်သွန်နီဟူ၍ စိုက်ပျိုးကြပါသည်။ကုန်းကြက်သွန်နီများကို နုန်းဆန်မြေ၊ သဲနုန်းမြေများရှိသည့် လယ်ယာမြေများတွင် စိုက်ပျိုးလျက်ရှိပြီး၊ ချောင်း ကြက်သွန်နီများကို ယင်းချောင်း၊ ပင်းချောင်း၊ ယောချောင်းများ၏ လွင်ပြင်သဲ‌သောင်များတွင် စိုက်ပျိုးကြခြင်းဖြစ်ပြီး ရွှေဖလားထိပ်မောက်(ဒေသမျိုး)ကိုသာ အများဆုံး စိုက်ပျိုးကြပါသည်။ သိုလှောင်နိုင်သည့် ကာလအနေဖြင့် ကိုင်းမြေစိုက်ကြက်သွန်နီကို ( ၂ )လ သိုလှောင်နိုင်ပြီး လယ်မြေစိုက်ကြက်သွန်နီကို ( ၃ )လအထိ သိုလှောင်နိုင်ပါသည်။ လတ်တလော မကွေးမြို့တွင် ဖြစ်ပေါ်နေသော ကြက်သွန်နီဈေးနှုန်းမှာ လက်ကားဈေး (အနိမ့်စ၊ အလတ်စ၊ ထိပ်စ) (၆၀ဝိ၊ ၇၀ဝိ ၊ ၇၅ဝိ/-) ရှိပြီး၊ လက်လီဈေး (အနိမ့်စ၊ အလတ်စ၊ ထိပ်စ) မှာ (၇၀ဝိ၊ ၈၅ဝိ ၊ ၁၀၀ဝိ/-) အထိဈေးရှိကြောင်း၊ တိုင်းအတွင်း အပတ်စဉ် ကြက်သွန်နီ ဝင်ရောက်မှုမှာ ပိဿာချိန် (၆) သိန်း ကျော်ခန့် ဝင်ရောက်လျက်ရှိပြီး မကွေးတိုင်းမှ ထွက်ရှိသော ကြက်သွန်နီများကို ရန်ကုန်၊ မန္တလေး၊ မူဆယ်၊ ပြည်၊ စစ်တွေ၊ မြဝတီ၊ မော်လမြိုင်စသည့်ဒေသများသို့ ဈေးကွက်အခြေအနေအပေါ် မူတည်ပြီး တင်ပို့ကြောင်းနှင့် ဈေးကွက်သို့ တင်ပို့ရာတွင်လည်း ကြက်သွန်နီအရွယ်အစားအပေါ် မူတည်၍ (အနိမ့်စ၊ အလတ်စ၊ ထိပ်စ)ဟူ၍ ခွဲခြားပြီး တင်ပို့ရောင်းချကြကြောင်း သိရှိရပါသည်။

DOCA(မကွေး)

         ပဲခူးတိုင်းဒေသကြီး၊ ပြည်ခရိုင်တွင် မေလတတိယပတ်တွင် ကြက်ဥ/ဘဲဥဈေးများမှာ မေလပထမပတ်ထက်စာရင် ဈေးသိသိသာသာမြင့်တက်လာကြောင်း သိရှိရပါသည်။ မေလပထမပတ်တွင် ကြက်ဥတစ်လုံးလျှင် လက်လီဈေး ၁၅၀-၁၇၀ ကျပ်၊ ဘဲဥတစ်လုံးလျှင် လက်လီဈေး ၁၈၀-၂၀၀ကျပ်အထိ ဈေးရှိခဲ့ပါသည်။ မေလတတိယပတ်တွင် ကြက်ဥဈေးမှာ ပုံမှန်ဆိုဒ်တစ်လုံးလျှင် ၁၈၀-၂၀၀ ကျပ်နှင့် ဘဲဥတစ်လုံးလျှင် ၂၀၀-၂၅၀ ကျပ်အထိ ဈေးမြင့်တက်လာခဲ့ပါသည်။ ထိုသို့ ကြက်ဥ/ ဘဲဥများဈေးမြင့်တက်လာရခြင်းမှာ ကြက်မွေးမြူရေးခြံနှင့် ဘဲမွေးမြူရေးခြံများအနေဖြင့် ကြက်စာနှင့်ဘဲစာများ ဈေးမြင့်တက်လာခြင်း၊ ရာသီဥတုပူပြင်းသည့်အတွက် ကြက်ဥဥနှုန်းများ ကျဆင်းခြင်း၊ သယ်ယူပို့ဆောင်စရိတ်များမြင့်တက်လာခြင်းတို့ကြောင့် ကြက်ဥ/ဘဲဥဈေးနှုန်းများ မြင့်တက်လာခြင်းဖြစ်ကြောင်း လေ့လာသိရှိရပါသည်။

DOCA(ပဲခူး)

             ပြည်ခရိုင်၊ ပြည်မြို့နယ်တွင် မိုးရာသီဖြစ်သော မေလနှင့်ဇွန်လများတွင် ရာသီစာအင်ဥများ ထွက်ပေါ်လာပြီဖြစ်ပါသည်။ ပေါ်ခါစဖြစ်သည့်အတွက် စားသုံးသူများက ဝယ်ယူစားသုံးကြသည့်အတွက် ဈေးနှုန်းများလည်း မြင့်တက်လာခဲ့ပါသည်။ အင်ဥကို ပဲခူးရိုးမတကြော အင်တိုင်းတောများတွင် အင်ဥပင်များအောက်ခြေရှိသဲများကို ဂေါ်ပြားများဖြင့်တူးဆွရာမှ ရရှိပါသည်။ အင်ဥကို ကန်စွန်းရိုးနီဖြင့်ကြော်စားခြင်း၊ သံပုရာသီးများဖြင့်သုတ်စားခြင်းများဖြင့် စားသုံးကြပါသည်။ အင်ဥသည်များများစားလျှင်တောက်တက်၍ အဆိပ်အတောက်ဖြစ်တတ်သဖြင့် ကန်စွန်းရိုးနီများဖြင့် တွဲဖက်စားလျှင် သင့်တော်ပါသည်။ အင်ဥမှာ ဗီတာမင်ဘီ၊ဒီ၊ ကော့ပါး စသည့်ဓါတ်တို့ ပါဝင်သည့်အတွက် အာဟာရဖြစ်စေပါသည်။ သွေးတိုးနှလုံးရောဂါများရှိသူများမစားသင့်ဘဲ ရှောင်သင့်ပါသည်။ အင်ဥသည် ပေါ်ခါစတွင်ဈေးကောင်းပြီး နို့ဆီဗူးတစ်ဗူးလျှင် ၁၅၀၀-၂၀၀၀ ကျပ်ဈေးရှိပြီး အင်ဥလှိုင်လှိုင်ပေါ်ချိန်တွင် နို့ဆီဗူးတစ်ဗူးလျှင် ၅၀၀-၆၀၀ ကျပ်ထိ ဈေးကျသွားသဖြင့် စားသုံးသူများ ပိုမိုဝယ်ယူစားနိုင်ကြကြောင် းလေ့လာသိရှိရပါသည်။

DOCA(ပဲခူး)

             ပဲခူးတိုင်းဒေသကြီး၊ ပြည်ခရိုင်ရှိ၊ ပြည်မြို့နယ်တွင် နွေစပါးများ စတင်ထွက်ပေါ်နေပြီဖြစ်ပါသည်။ ပြည်ခရိုင်တွင်နွေစပါးစိုက်ဧကပေါင်း ၆၁၂၂၂ ဧက စိုက်ပျိုးပြီး ဆည်ရေရရှိသောမြို့နယ်များမှသာ နွေစပါးကိုစိုက်ပျိုးနိုင်သော်လည်း ပြည်မြို့နယ်တွင် နွေစပါးကို(၁၅၄၅၄)    ဧက စိုက်ပျိုးနိုင်ခဲ့သဖြင့် ပြည်ခရိုင် (၆)မြို့နယ်တွင် အများဆုံးစိုက်ပျိုးသည့် မြို့နယ်ဖြစ်ပါသည်။ စိုက်ပျိုးသည့် စပါးမျိုးများမှာ ရတနာတိုးစပါး၊ ရက်(၁၀၀)စပါး၊ ထိုင်းနှံကောက်စပါးမျိုးတို့ဖြစ်ပြီး  ပြည်မြို့နယ်အတွင်းရှိ ပေါင်းတလည်နှင့် ဝက်ထီးကန်မြို့များတွင် နွေစပါးများ မေလဒုတိယပတ်တွင် စတင်ထွက်ပေါ်နေပြီဖြစ်ပါသည်။ ယခုနှစ်နွေစပါးအထွက်နှုန်းအနေဖြင့် တစ်ဧကလျှင် တင်း (၈၀)ခန့် ထွက်ရှိကြောင်း သိရပါသည်။

            ပြည်မြို့နယ်အတွင်းရှိ ထွက်ရှိလာသည့် နွေစပါးများကို ပေါက်ခေါင်းမြို့နယ်သို့ တစ်နေ့လျှင် အိတ် ၁၅၀၀ခန့် တင်ပို့ရောင်းချကြောင်းသိရပါသည်။ နွေစပါးမှာ ဆန်ကြိတ်ခွဲရာတွင် အကျိုးအကြေနည်းသည့်အတွက် ဝယ်လက်အကြိုက်တွေ့သဖြင့် အရောင်းအဝယ်သွက်လျှက်ရှိပါသည်။  နွေစပါးဈေးနှုန်းများမှာ ပေါင်(၅၀)တင်း ၁၀၀လျှင် ၇၅၀၀၀၀-၈၀၀၀၀၀ ကျပ်ဈေးရှိပြီး နွေဆန်ဈေးမှာ (၂၄)ပြည် တစ်အိတ်လျှင် ၂၇၀၀၀-၂၈၀၀၀ ကျပ်ဖြင့် ပြည်ဈေးကွက်တွင် အရောင်းအဝယ်ဖြစ်လျှက်ရှိပါသည်။

  (DOCA)ပဲခူး