ပြည်တွင်းကုန်သွယ်မှုသတင်း

       စစ်ကိုင်းတိုင်းဒေသကြီး၊ ရွှေဘိုခရိုင်အနေဖြင့် (၂၀၂၂-၂၀၂၃)ခုနှစ်ထွက် မိုးသီးနှံတွင် ပဲမျိုးစုံသီးနှံ စုစုပေါင်း(၂၇၅၃၈၃)ဧကစိုက်ပျိုးပြီး (မိုး)ပဲတီစိမ်းနှင့်(မိုးကြို)ပဲတီစိမ်း း(၁၇၇၂၀၂) ဧက၊ ပဲစဉ်းငုံ(၅၄၆၆၅)ဧက၊ ပဲလွန်း၊ စွန်တာပြာ၊ မတ်ပဲ၊ ပဲကြီးနှင့်အခြားပဲများကို ဧကအနည်းငယ်စီစိုက်ပျိုးကြသဖြင့် ပဲစဉ်းငုံသည်တစ်ခရိုင်လုံးရှိ ပဲမျိုးစုံစိုက်ဧက၏ (၃၀)%ကျော်စိုက်ပျိုးပြီး ဒုတိယအများဆုံးစိုက်ပျိုးကြောင်း၊ ရွှေဘိုခရိုင်၏ ပဲစဉ်းငုံစိုက်ဧက(၅၄၆၆၅)ဧကအနက် ရွှေဘိုမြို့နယ်တွင်(၁၃၁၅၁)ဧက၊ ဝက်လက်မြို့နယ်တွင် (၂၁၁၆၀)ဧကနှင့် ခင်ဦးမြို့နယ်တွင်(၂၀၃၅၄)ဧက စိုက်ပျိုးခဲ့ကြောင်း သက်ဆိုင်ရာဌာနများ၏ စာရင်းများအရသိရှိရပါသည်။

       ယခုအချိန်တွင် ရွှေဘိုခရိုင်အပြင် ရွှေဘိုခရိုင်နှင့် ခရိုင်ချင်းထိစပ်နေသည့် ကန့်ဘလူခရိုင်တွင် စိုက်ပျိုးထားသည့် ပဲစဉ်းငုံသီးနှံများ လှိုင်လှိုင်ပေါ်ထွက်လျက်ရှိပြီး တစ်ရက်လျှင် ရွှေဘိုမြို့ ပဲ၊ နှမ်းကုန်စည်ဒိုင်သို့ ပဲစဉ်းငုံများ နေ့စဉ်တင်း(၁၀၀၀၀)ကျော် ဝင်ရောက်လျက်ရှိကြောင်း၊ ရွှေဘိုခရိုင်အတွင်း ရှိမြို့နယ်များမှ ထွက်ရှိလာသောသီးနှံများကို တောင်သူများက မန္တလေးမြို့သို့လည်းကောင်း၊ ရွှေဘိုမြို့သို့လည်းကောင်း တင်ပို့ရောင်းချကြကြောင်း၊ ရွှေဘိုမြို့ ပဲ၊ နှမ်းကုန်စည်ဒိုင်အနေဖြင့် သီးနှံများရောင်းဝယ်ရာတွင် မန္တလေးဈေးကွက်နှင့် ရန်ကုန်ဈေးကွက်ကိုအခြေခံပြီး ရောင်းဝယ်ကြကြောင်း၊ ရောင်းဝယ်ရာတွင် ရွှေဘိုအထိုင်ရောင်းစနစ်နှင့် အရောက်ပို့စနစ်ဖြင့် နှစ်မျိုးရောင်းချကြကြောင်း၊ အထိုင်ရောင်းစနစ်တွင် လာရောက်ဝယ်ယူသူက တင်ပို့သည့်ကားခကို အကုန်အကျခံရပြီး အရောက်ပို့စနစ်တွင် ရောင်းချသူက ဝယ်ယူသူထံအရောက် တင်ပို့သည့်ကားခကို အကုန်အကျခံရကြောင်း၊ မန္တလေးသို့အရောက်ပို့စနစ်ဖြင့် ရောင်းချပါက ကားခလက်ရှိပေါက်ဈေးမှာ တစ်တင်းခွဲဝင်တစ်အိတ်လျှင် (၁၂၀ဝိ/-)ကျပ်ပေးရကြောင်းနှင့် ရန်ကုန်ဝယ်လက်များကလည်း ရွှေဘိုတွင်အထိုင်ထားပြီးဝယ်ယူကြကြောင်း၊ ကုန်သည်များအနေဖြင့်  ဝယ်ယူရရှိသည့်သီးနှံများကို မန္တလေးဈေးကွက်ပေါက်ဈေး၊ ရန်ကုန်ဈေးကွက်ပေါက်ဈေးနှင့် မိမိဝယ်ယူရသည့်ဈေးနှုန်းကိုက်ညီပါက နေ့ချင်းရောင်းချကြပြီး ဈေးမကိုက်ပါက လက်ဝယ်သိုလှောင်ထားကာ ဈေးနှုန်းကိုက်မှသာ ရောင်းချကြကြောင်း၊ ဇန်နဝါရီလ တတိယပတ်တွင် ပဲစဉ်းငုံတစ်တင်းပေါက်ဈေးမှာ (၅၆၀၀ဝိ/-)ကျပ်ရှိပြီး ယခင်နှစ်ကာလတူတွင် ပဲစဉ်းငုံတစ်တင်းပေါက်ဈေးမှာ (၄၁၀၀ဝိ/-)ကျပ်သာရှိသဖြင့် ကာလတူနှင့် ဈေးနှုန်းနှိုင်းယှဉ်ပါက ယခုနှစ်တွင်ယခင်နှစ်ထက် တစ်တင်းလျှင်(၁၅၀၀ဝိ/-)ကျပ်ဈေးပိုခဲ့ကြောင်း ပဲ၊ နှမ်းကုန်စည်ဒိုင်မှ တာဝန်ရှိသူများနှင့် ဆက်သွယ်မေးမြန်းမှုအရသိရှိရပါသည်။

DOCA(စစ်ကိုင်း)

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မုံရွာခရိုင် ဦးစီးမှူးရုံးမှ ဒု-ခရိုင်ဦးစီးမှူးနှင့် ‌ချောင်းဦးမြို့နယ်တာဝန်ခံတို့သည် (၂၄-၁-၂၀၂၃) ရက်နေ့ နံနက် (၁၀:၀၀)နာရီအချိန်တွင် မုံရွာမြို့၊ ချမ်းမြသာစည်ရပ်ကွက်ရှိ ပြည်သူများထံသို့ “တင်ဝင်း” ဆီရောင်းဝယ်ရေးမှ ကုမ္ပဏီများကဖြန့်ဖြူးသည့် စားအုန်းဆီများအား ဈေးကားဖြင့် ရောင်းချပေးနေမှုကို ကွင်းဆင်းစိစစ်ကြပ်မတ်ခဲ့ပါသည်။

     ထိုသို့ ဆောင်ရွက်ရာတွင် စားအုန်းဆီတင်သွင်းသည့် ကုမ္ပဏီများက လက်ကားကုန်သည်များသို့ ဖြန့်ဖြူးပေးသည့် စားအုန်းဆီများကို ရည်ညွှန်းလက်ကားဈေးအပေါ်တွင် သယ်ယူစရိတ် ထပ်ပေါင်းကာ အမြတ် ၂ % ထက်မပိုသော ဈေးနှုန်းဖြင့် လူတန်းစေ့ဝယ်ယူရရှိနိုင်ရန် ရည်ရွယ်၍ ရောင်းချပေးခဲ့ကြောင်း၊ လာရောက်ဝယ်ယူကြသော အိမ်ထောင်စုများအား တုံကင်နံပါတ်များပေး၍စောင့်ဆိုင်းစေခြင်း၊ စနစ်တကျ တန်းစီစေခြင်း၊ လူတစ်ဦးလျှင် (၁)ပိဿာနှုန်း တန်းတူညီမျှ ရောင်းချပေးနိုင်ခဲ့ကြောင်း သတင်းရရှိပါသည်။

DOCA(စစ်ကိုင်း)

       မုံရွာမြို့နယ်အတွင်း ခရမ်းချဉ်သီးကို မိုးဦးနှင့် မိုးနှောင်းကာလများတွင် ဒေသအတွင်း တစ်နိုင်တစ်ပိုင်စိုက်ပျိုးကြပါသည်။ ခရမ်းချဉ်သီးသည် အပူပိုင်းဒေသနှင့် သမနွေပိုင်းဒေသတို့တွင် ကောင်းမွန်စွာစိုက်ပျိုးဖြစ်ထွန်းပါသည်။

      ယခုအချိန်တွင် ဒေသတွင်းခရမ်းချဉ်သီးပေါ်သည့် ရာသီချိန်ဖြစ်သည့်အတွက် ဈေးကွက်တွင် ဒေသတွင်းထွက်ကုန် ခရမ်းချဉ်သီးများ လှိုင်လှိုင်ဝင်ရောက်လျက်ရှိပြီး မုံရွာမြို့နယ်အတွင်းဖြစ်ပေါ်နေသော ခရမ်းချဉ်သီးဈေးနှုန်းများမှာ ဇန်နဝါရီလ တတိယအပတ်တွင် ခရမ်းချဉ်သီးတစ်ပိဿာလျှင် ကျပ် (၁၅၀၀-၂၀၀၀) မှ ယခု ဇန်နဝါရီလ စတုတ္ထအပတ်တွင် ကျပ် (၂၂၀၀-၂၄၀၀) အထိ ဈေးနှုန်းမြင့်တက်လျက်ရှိပြီး အရောင်းအဝယ်သွက်ကာ ခရမ်းချဉ်စိုက်တောင်သူများအဆင်ပြေနေကြောင်း တောင်သူများထံမှသိရပါသည်။

DOCA(စစ်ကိုင်း)

       သရက်မြို့နယ်ပတ်ဝန်းကျင်ကျေးရွာများဖြစ်သော လုံးတော်၊ ကံလှ၊ ရင်ကြီး၊ ဆတ်လှ၊ မင်းတည်း၊ ပျဉ်ထောင်၊ မြွေပွေး၊ ရွာသစ်၊ ကျောက်အိုင်၊ ကျောက်အိုး၊ ငလှိုင်ခြုံ၊ ရှမ်းရွာကျော၊ ပေကတင်၊ ဘန့်ပြင်၊ အုန်းမွန်တောစသည့် ကျေးရွာများမှထွက်ရှိသည့် ဆီးသီးအစို၊ အခြောက်များ ဈေးကွက်အတွင်းသို့ ဝင်ရောက်လျက်ရှိပါသည်။ ဇန်နဝါရီလ(ဒုတိယ)ပတ်တွင် ဆီးသီးအစို၊ အခြောက် (၁)တင်းလျှင် ကျပ်(၆၅၀၀)ဖြစ်ပြီး၊ (တတိယ)ပတ်တွင် ကျပ်(၇၅၀၀)ဖြစ်၍ ယခင်အပတ်ထက် ကျပ် (၁၀၀၀)ဈေးမြင့်ခဲ့ပါကြောင်း၊ တစ်နေ့လျှင် တင်းရေ (၁၅၀ မှ ၁၈၀) ဝန်းကျင်အထိ နေ့စဉ် ဝင်ရောက်၍ အရောင်းအဝယ်ဖြစ်လျက်ရှိကြောင်း၊ ဝယ်ယူရရှိပြီးသော ဆီးသီးများကို ဆီးသီးအခွံ ချွတ်စက်ဖြင့် ဆီးစေ့ရအောင် ကြိတ်ခွဲပြီး ရရှိလာသောဆီးစေ့များအား (၁)တင်းလျှင် ကျပ်(၃၈၀၀၀ မှ ၄၀၀၀၀ ) ဈေးဖြင့် အောင်လံမြို့သို့ ရောင်းချရပါကြောင်း ဆီးသီးဝယ်ယူသူတစ်ဦးထံမှ သိရှိရပါသည်။

      ထို့အပြင် ဆီးသီးကောက်သူများမှ နေ့စဉ်ဆီးသီး‌ကောက်ယူ၍ ဈေးကွက်အတွင်းသို့ ရောင်းချရာတွင် ယခင်နှစ်က ဆီးသီး(၁)တင်းလျှင် ကျပ်(၃၅၀၀ မှ ၄၀၀၀)ခန့် သာရရှိပြီး၊ ယခုနှစ် ဆီးသီး (၁)တင်းဈေးမှာ ကျပ်(၆၀၀၀ မှ ၇၅၀၀)ဖြင့် ရောင်းချရ၍ အပိုဝင်ငွေတိုးလျက်ရှိပါကြောင်း အုန်းမွန်တောကျေးရွာရှိ ဆီးသီးကောက်သူဦးခင်ထွန်းထံမှ သိရှိရပါသည်။

DOCA(မကွေး)

     ရွှေဘိုခရိုင်အတွင်းရှိ မြို့နယ်များ၌ ဇန်နဝါရီလ ‌စတုတ္ထပတ်တွင် စပါး /ဆန်ဈေးနှုန်းမှာ တည်ငြိမ်နေပါသည်။ ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ဇန်နဝါရီလ တတိယပတ်တွင် ရန်ကုန်သို့ အိတ်ရေ ၄၄၀၀၀ အိတ်၊ မန္တလေးသို့ အိတ်ရေ ၅၄၀၀၀ အိတ်၊ နေပြည်တော်သို့ အိတ်ရေ ၁၁၅၀၀ အိတ်၊ ရှမ်း(တောင်)သို့ အိတ်ရေ ၁၀၅၀၀ အိတ်၊ ရှမ်း(မြောက်)သို့ အိတ်ရေ ၁၀၅၀၀ အိတ်၊ ပခုက္ကူသို့ အိတ်ရေ ၁၀၀၀ အိတ်၊ စုစုပေါင်းအိတ်ရေ ၁၃၁၅၀၀ အိတ်၊ တန်အားဖြင့် ၆၅၇၅တန်စီးထွက်ခဲ့ပါသည်။ ယခုအပတ်တွင် ရွှေဘိုခရိုင်မှ အခြားတိုင်းဒေသကြီးများသို့ ဆန်စီးထွက်မှုမှာ ရန်ကုန်သို့ အိတ်ရေ ၃၉၀၀၀ အိတ်၊ မန္တလေးသို့ အိတ်ရေ ၅၂၅၀၀ အိတ်၊ နေပြည်တော်သို့ အိတ်ရေ ၁၃၀၀၀ အိတ်၊ ရှမ်း(တောင်)သို့ အိတ်ရေ ၁၀၅၀၀ အိတ်၊ ရှမ်း(မြောက်)သို့ အိတ်ရေ ၁၀၅၀၀ အိတ်၊ ပခုက္ကူသို့ အိတ်ရေ ၁၀၀၀ အိတ်၊ စုစုပေါင်းအိတ်ရေ ၁၂၆၅၀၀ အိတ်၊ တန်အားဖြင့် ၆၃၂၅ တန်စီးထွက်ခဲ့သည့်အတွက် ယခင်အပတ်နှင့်နှိုင်းယှဉ်လျှင် ယခုအပတ်အတွင်း အိတ်ရေ ၅၀၀၀ အိတ်၊ တန်အားဖြင့် ၂၅၀တန်လျော့၍ စီးထွက်ခဲ့ပါသည်။

       ရွှေဘိုမြို့၏ ဇန်နဝါရီလ စတုတ္ထပတ်တွင် ဖြစ်ပေါ်နေသော စပါး/ဆန် ဈေးနှုန်းများမှာ ရွှေဘိုပေါ်ဆန်းစပါး တင်း ၁၀၀ လျှင် ကျပ် ၂၆၀၀၀၀၀၊ ရွှေဘိုပေါ်ဆန်းဆန် ၂၄ ပြည်ပါတစ်အိတ်လျှင် ကျပ် ၉၀၀၀၀၊ ဧရာမင်းစပါး တင်း ၁၀၀ လျှင် ကျပ် ၁၄၅၀၀၀၀၊ ဧရာမင်းဆန် ၂၄ ပြည်ပါတစ်အိတ်လျှင် ကျပ် ၆၅၀၀၀၊ ရွှေဘိုပေါ်ဆန်းစပါး(သစ်)တင်း ၁၀၀ လျှင် ကျပ် ၂၀၀၀၀၀၀၊ ရွှေဘိုပေါ်ဆန်းဆန်(သစ်) ၂၄ ပြည်ပါတစ်အိတ်လျှင် ကျပ် ၇၀၀၀၀ ၊ ဧရာမင်းစပါး(သစ်) တင်း ၁၀၀ လျှင် ကျပ် ၁၅၀၀၀၀၀၊ ဧရာမင်းဆန်(သစ်) ၂၄ ပြည်ပါတစ်အိတ်လျှင် ကျပ် ၆၀၀၀၀ ဖြင့် အရောင်းအဝယ်ဖြစ်နေကြောင်းသိရှိရပါသည်။

DOCA(စစ်ကိုင်း)