စစ်ကိုင်းတိုင်းဒေသကြီး၊ မုံရွာခရိုင်၊ ချောင်းဦးမြို့နယ် ငါးလုံးတင်ကျေးရွာတွင် ဒေသခံများအနေဖြင့် မိရိုးဖလာ တောင်သူလုပ်ငန်းများအပြင် ဂျုံရိုးခမောက်လုပ်ငန်းကို စီးပွားဖြစ်လုပ်ကိုင်လျက်ရှိကြပါသည်။စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ဝန်ထမ်း(၁)ဦးသည် စီးပွားဖြစ်လုပ်ကိုင်လျက်ရှိသည့် ဂျုံရိုးခမောက်လုပ်ငန်းအစုအဖွဲ့ အဖွဲ့ခေါင်းဆောင် ဒေါ်ခင်သန်းဝင်းနှင့် တွေ့ဆုံ၍ ဂျုံရိုးခမောက်(ခေါ်) ဂျုံရိုးဦးထုပ်လုပ်ငန်းအကြောင်း ဆွေးနွေးမေးမြန်းခဲ့ရာ ဂျုံရိုး ခမောက်လုပ်ငန်းသည် မြန်မာ့လက်မှုပညာများထဲတွင် တစ်ခုအပါအဝင်ဖြစ် ပါသည်။ ရှေးနှစ်ပေါင်းများစွာကတည်းကပင် မိရိုးဖလာလုပ်ငန်းအဖြစ်ဆောင်ရွက်ခဲ့ကြပြီး မြန်မာလူမျိုးများ နှစ်သက်စွာ အသုံးပြုခဲ့သော ဦးထုပ်တစ်မျိုးဖြစ်ပါသည်။ ချောင်းဦးမြို့နယ်၊ ငါးလုံးတင်ကျေးရွာ အုပ်စုရှိ ငါးလုံးတင်ကျေးရွာ၊ မထိသာကျေးရွာနှင့် ဆင်မြေကျေးရွာများတွင် ဂျုံစိုက်ဧက (၂၀၀၀)ကျော်မှ ရရှိသော ဂျုံရိုးများကိုစုဆောင်း၍ ကြိုးကျစ်ခြင်းလုပ်ငန်းများကို ကျေးရွာသူရွာသားများအားလုံး လုပ်ကိုင်ကြပါသည်။ ငါးလုံးတင်ကျေးရွာတွင် ဂျုံရိုးခမောက် ထုတ်လုပ်သည့် လုပ်ငန်းရှင် (၇)ဦး ခန့်ရှိပါသည်။
ဂျုံရိုးအဆစ်ချိုးခြင်းနှင့် အဆစ်ခွဲခြားခြင်း
ဂျုံခမောက်လုပ်ကိုင်ရန် ကုန်ကြမ်းဂျုံရိုးများကို ရိတ်သိမ်းမည့် အခင်းသို့ ရိတ်သိမ်းခမယူပဲ အခင်းရှင်အား အနှံပေး ၊ဂျုံရိုးများပြန်ယူစနစ်ဖြင့် ရိတ်သိမ်းပေးခြင်း၊ ကုန်ကြမ်းဂျုံအရိုးများကို လုပ်သားအင်အား (၂၀)ဦးခန့်မှ ရေစိမ်ခြင်း၊ ကြိုးကျစ်ခြင်း၊ ဂျုံအရိုးများကို အခြောက်လှန်း၍ သန့်စင်ပြီးပါက ဂျုံရိုးများကို သုံးဆစ်ချိုးယူ၍ အဆင့်အတန်း(၃)မျိုးခွဲခြားပါသည်။ ဂျုံရိုးတစ်ရိုး၏ အပေါ်ဆုံးအဆစ်သည် နူးညံ့သည့်အတွက် ဂျုံရိုးဦးထုပ်အချောအတွက်လည်းကောင်း၊ အလယ်အဆစ်မှာ ဦးထုပ်ကြမ်းချောအတွက်လည်းကောင်း၊ နောက်ဆုံးအဆစ်မှာ ဦးထုပ်အကြမ်းအတွက် လည်းကောင်း အဆင့်ခွဲခြား၍ ဦးထုပ်(၃)မျိုး(၃)စား ထုတ်လုပ်ပါသည်။ ဂျုံရိုးအဆစ်များကို ကောင်း၊ သင့်၊ ညံ့ (၃)စားခွဲ၍ တစ်ပိဿာစည်းများ စည်းထားသည်ကိုလည်းသိရှိရပါသည်။
ကြိုးကျစ်ခြင်း နှင့် ကုန်ချောထုတ်လုပ်ပုံအဆင့်ဆင့်
ဂျုံရိုးဦးထုပ်တစ်လုံး ဖြစ်ပေါ်စေရန်အတွက် ရှေးဦးစွာ ပထမအဆင့်အနေဖြင့် ကုန်ကြမ်း ဂျုံရိုးကို ကျစ်ပင်စပိုင်းဖြစ်သော အပေါ်နှံကို ချိုးယူကြရပါသည်။ ကုန်ချောထုတ်လုပ်ပုံအဆင့်ဆင့်မှာ -ချိုးပြီးသော ဂျုံရိုးများကို (၁၀)မိနစ်ခန့် ရေစိမ်ပြီးပါက ကြိုးကျစ်နိုင်ပါသည်။ (ရေစိမ်မှသာ ဂျုံရိုးများ ပျော့ပြောင်းသွားသည့်အတွက် ကြိုးကျစ်ရန် အဆင်ပြေမှာ ဖြစ်ပါသည်) ဂျုံရိုးဦးထုပ် တစ်လုံးစာအတွက် ကျစ်ကြိုးအရှည် အတောင်(၄၀)ခန့် လိုအပ်သည်။ ( ဂျုံရိုး တစ်ပိဿာစည်း တစ်စည်းလျှင် ကျစ်ကြိုးအခွေ(၁၂)ခွေ ရရှိပါသည်) ကြိုးကျစ်ပြီးပါက ဆက်ထားသည့်ဂျုံရိုးတွင် ထွက်နေသည့်အစလေးများကို ကပ်ကျေးနှင့် ညှပ်ထုတ်ရပါသည်။ ဂျုံကျစ်ကြိုးကို ရေအနည်းငယ်စွတ်ပြီး အပ်ချုပ်စက်နှင့် ဂျုံရိုးဦးထုပ်များ ချုပ်ကြပါသည်။(ကျား၊ မ၊ လူကြီး၊ လူငယ်မရွေး အသုံးပြုနိုင်သည့် ဒီဇိုင်းပုံစံ (၇) မျိုးခန့် ချုပ်လုပ်ကြပါသည်) ချုပ်ပြီးဦးထုပ်များကို နေရောင်တွင် အချိန်အနည်းငယ် လှန်းပါ သည်။ ဂျုံရိုး၏သဘာဝအရောင်သည် ညိုဝါရောင်ဖြစ်၍ ကန့်မှုန့်ကိုမီးရှို့ပြီး ပေါင်းခံအိုးနှင့် တစ်ည ပေါင်းခံကာ အရောင်ချွတ်လိုက်ပါက အဖြူရောင်သမ်းလာပါသည်။ အဖြူရောင်သမ်းနေသော ဦးထုပ် များကို နေရောင်ခြည်အောက်တွင် တစ်ရက်လှန်းပါသည်။ အချို့ဦးထုပ်များပေါ်ကို ဆေးရောင်စုံဖြင့် ပန်းအလှရေးဆွဲကြပါသည်။ နောက်ဆုံးအဆင့်အနေဖြင့် ဦးထုပ်မေးသိုင်းကြိုးတပ်ရန် ရိုက်သီးကွင်း ကလေးနှစ်ခု ရိုက်တပ်ပြီးပါက ဈေးကွက်သို့ တင်ပို့ရောင်းချရန် အသင့်ဖြစ်ပြီးဖြစ်ပါသည်။
ဈေးကွက်၊ ဈေးနှုန်းအခြေအနေ
ဂျုံရိုးဦးထုပ်တစ်လုံးလျှင် ဖောက်သည်ဈေးမှာ အရွယ်အစားအမျိုးမျိုးပေါ်မူတည်၍ ယခင်နှစ်က (၁၆၀၀/-မှ၂၂၀၀ /-ကြား)ရရှိပြီး ဈေးဆိုင်များတွင် လက်လီရောင်းဈေးနှုန်းများမှာ ကျပ်(/၂၅၀၀-မှ ၄ဝဝဝ/-) ဈေးအသီးသီးဖြင့်ရောင်းချကြပါသည်။ စစ်ကိုင်းတိုင်းဒေသကြီးမှ ရန်ကုန်မြို့၊ မြစ်ကြီးနားမြို့၊ ပခုက္ကူမြို့၊ မြင်းခြံမြို့များသို့ အများဆုံးတင်ပို့ရောင်းချခဲ့သော်လည်း ယခုနှစ်တွင် စစ်ကိုင်းတိုင်းဒေသကြီးအထက်ပိုင်းဖြစ်သော ဟုမ္မလင်း၊ မော်လိုက်၊ ဖောင်းပြင် မြို့များအထိ တိုးချဲ့ တင်ပို့နိုင်ပြီဖြစ်ကြောင်း၊ ချောင်းဦးဒေသထွက် ဂျုံရိုးခမောက်သည် ချုပ်ရိုးချုပ်သား ခိုင်ခံ့ခြင်း၊ ကျစ်လစ်မှုရှိခြင်း၊ မိုးရေမထိပါက ဆေးအရောင်မှိန်မသွားပဲ (၄ နှစ်မှ ၅နှစ်)အထိ တာရှည်ခံခြင်းကြောင့် လူကြိုက်များလာပြီး အရောင်းသွက်လျက်ရှိကြောင်း၊ တစ်နှစ်ပတ်လုံးတင်ပို့ ရောင်းချရာ လုပ်ငန်းရှင်တစ်ဦးလျှင် အလုံးရေ (၁)သိန်းကျော် (၂)သိန်းဝန်းကျင်ခန့် ရောင်းချနိုင်ကြောင်း သိရှိရပါသည်။
အလုပ်အကိုင်အခွင့်အလမ်းများနှင့် လုပ်သားခပေးချေရမှု အခြေအနေ
ဂျုံရိုးကျစ်ခြင်းလုပ်ငန်းသည် လွယ်ကူပြီး ကျွမ်းကျင်စွာရက်လုပ်ပါက လူတစ်ဦးလျှင် တစ်ရက် ဦးထုပ်(၃/၄)လုံးစာ ရက်လုပ်နိုင်ပါသည်။ ဦးထုပ်တစ်လုံးလျှင် ကျစ်ကြိုး အတောင်(၄၅) တောင်ခန့်ကုန်ကျကြောင်း၊ပိုမို၍ ကျယ်ပြန့်လိုပါက အတောင်ရေ(၅၀-၆၀)တောင် အသုံးပြုချုပ် လုပ်ပါကြောင်း၊ ကျစ်ကြိုးဈေးနှုန်းမှာ အတောင်(၄၅)တောင်ကို ကျပ်(၁၀၀၀ မှ ၁၂၀၀ ကြား)၊ စက်ချုပ်ရာတွင် လှပသေသပ်သည့် ဦးထုပ်များရရန် အမျိုးသမီးတစ်ဦး၏ ကျွမ်းကျင်မှုအရ တစ်ရက်လျှင် ဦးထုပ် လုံးရေ(၄၀/၅၀)ခန့် ချုပ်လုပ်နိုင်ပါသည်။ စက်ချုပ်အလုပ်သမားတစ်ဦး တစ်ရက်လုပ်ခမှာ ကျပ်(၄၀၀၀ မှ ၅၀၀၀ ကြား) ရရှိပါသည်။ ဂျုံရိုးဦးထုပ် ထုတ်လုပ်သည့် လုပ်ငန်းရှင်တစ်ဦးသည် အလုပ်သမား (၁၅ ဦး မှ ၂၀ဦးထိ) ငှားရမ်းလုပ်ကိုင်လျက်ရှိကြောင်း သိရှိရပါသည်။
သုံးသပ်ချက်
ဂျုံရိုးခမောက်(ခေါ်) ဂျုံရိုးဦးထုပ်၏ အားသာချက်များမှာ ကုန်ကျစရိတ် သက်သာသော လက်မှုလုပ်ငန်းတစ်ခုဖြစ်ခြင်း၊ ရိုးရှင်းလှပပြီး ပေါ့ပါးခြင်း၊ အများဝယ်ယူနိုင်သည့် ဈေးနှုန်းဖြစ်သည့်အတွက် လူသုံးများသည့် ဈေးကွက်ဝင် ထုတ်ကုန်တစ်မျိုးဖြစ်ခြင်း၊ နေပူဒဏ်ကာကွယ်ပေး၍ စက်ဘီးစီးရာတွင်လည်းကောင်း၊ တောင်ယာလုပ်ငန်း လုပ်ကိုင်ရာတွင်လည်းကောင်း အသုံးပြုနိုင်ခြင်း၊ အိမ်တွင်းလက်မှုလုပ်ငန်းဖြစ်ပြီး အလုပ်အကိုင်အခွင့်အလမ်းများ များစွာပေးနိုင်ခြင်း၊ အလေးဖိအား ဒဏ်ခံနိုင်ပြီး၊ ရိုသေစွာကိုင်တွယ်ပါက ၄/၅နှစ်ထိ အသုံးပြုနိုင်ပါကြောင်း သိရှိရပါသည်။
ဂျုံရိုးခမောက်(ခေါ်) ဂျုံရိုးဦးထုပ်၏ အားနည်းချက်များမှာ ဂျုံရိုး၏ အပေါ်ပိုင်းကိုသာ အသုံးပြု မှုများပြီး၊ အောက်ပိုင်းကို အသုံးပြု၍ ထုတ်လုပ်မှုနည်းခြင်း၊ မိုးရေထိပါက အရောင်ပျက်တတ်သည်ကိုလည်း သိရှိရပါသည်။
ဂျုံရိုးခမောက်(ခေါ်) ဂျုံရိုးဦးထုပ်လုပ်ငန်းသည် ဒေသခံပြည်သူများအတွက် ဝင်ငွေရှာဖွေပေးနိုင်ခြင်း၊ အလုပ်အကိုင်အခွင့်အလမ်းများ ရရှိခြင်းတို့ကြောင့် ကျေးလက်ဒေသ လူမှုဘဝဖွံ့ဖြိုး တိုးတက်စေရန်အတွက် “အရင်းအနှီး၊ နည်းပညာ၊ ဈေးကွက်” စသည့် အထောက်အပံ့ကောင်းများ ပံ့ပိုးပေးနိုင်ပါက တန်ဖိုးမြှင့်ထုတ်ကုန်လုပ်ငန်းများ ပိုမိုဖွံ့ဖြိုးတိုးတက်လာပြီး နိုင်ငံစီးပွားရေး တိုးတက်မှုကိုလည်း တစ်ထောင့်တစ်နေရာကပါဝင်ရာရောက်လာနိုင်ပါကြောင်း၊ မြန်မာ့ရိုးရာ လက်မှုပညာလုပ်ငန်းတစ်ခုဖြစ်သည့် ဂျုံရိုးခမောက်(ခေါ်) ဂျုံရိုးဦးထုပ်ကို ပြည်တွင်းတွင်သာမက ပြည်ပဈေးကွက်အထိပါ အရောက်တင်ပို့နိုင်ရေးအတွက် ပြည်တွင်း/ပြည်ပကုန်စည်ပြပွဲများနှင့် ဈေးရောင်းပွဲတော်များတွင် ပြသသင့်ပါကြောင်း သုံးသပ်တင်ပြလိုက်ရပါတော့သည်။
DOCA(စစ်ကိုင်း)
