ပြည်တွင်းကုန်သွယ်မှုသတင်း

        ပဲခူးတိုင်းဒေသကြီးတွင် စိုက်ပျိုးရေးကို အဓိကထားလုပ်ကိုင်ကြသော်လည်း ယခုအခါတွင် ဒေသတွင်း အသား၊ငါး စားသုံးမှုဖူလုံစေရန်နှင့် ပိုလျှံသည်များကို တိုင်းဒေသကြီးပြင်ပနှင့်  ပြည်ပနိုင်ငံများသို့ တင်ပို့ရန်ဆိုသော မွေးမြူရေးနှင့်ကုသရေးဦးစီးဌာန၏ ရည်မှန်းချက်နှင့်အညီ မွေးမြူရေးကို စီးပွားဖြစ် မွေးမြူခြင်းများ အပြင် မိသားစု တစ်နိုင်တစ်ပိုင်အပြင် စီးပွားဖြစ် မွေးမြူလာကြကြောင်း သိရှိရသည်။ မွေးမြူရေးတွင် ငါးမွေးမြူရေးအပြင် နွား၊ ကျွဲ၊ ဝက်၊ ဘဲ ၊ဆိတ်၊ ငုံးများစသည့် မွေးမြူရေးလုပ်ငန်းများ လုပ်ကိုင်လာကြကြောင်း သိရှိရသည်။ ပဲခူးတိုင်းဒေသကြီးအတွင်းရှိ မွေးမြူရေးလုပ်ငန်းများအကြောင်းကို မွေးမြူရေးနှင့်ကုသရေးဦးစီးဌာနမှ တာဝန်ရှိသူများအား သွားရောက်တွေ့ဆုံ မေးမြန်းခဲ့ပါသည်။

             ပဲခူးတိုင်းဒေသကြီးအတွင်း ၂၀၂၂ ဇန်နဝါရီလအထိ တိရစ္ဆာန် မွေးမြူမှု အခြေအနေမှာ အောက်ပါအတိုင်းဖြစ်ပါသည်_

         အဆိုပါ မွေးမြူထားရှိမှုများမှ တစ်နှစ်တာကာလတွင်း  ကျွဲ၊နွားနို့ ပိဿာ( ၉၅၂ )သိန်းခန့် ၊ ကျွဲနွားသားရေ (ချပ်ရေ) ၃ သောင်း‌ကျော်ခန့် သိုးဆိတ်သားရေ (ချပ်ရေ) ၂ သောင်းခန့် ၊ အသားထုတ်လုပ်မှု စုစုပေါင်း ပိဿာ (၈၇၄) သိန်း ခန့် ၊ ဉစုစုပေါင်း လုံးရေ သိန်း (၃၀၀၀) ခန်ထုတ်လုပ်နိုင်ခဲ့ကြောင်း သိရှိရသည်။ မွေးမြူရေးတိုးတက်လာသည်နှင့်အမျှ ပဲခူးတိုင်းဒေသကြီးအတွင်း မွေးမြူရေးအစာ ထုတ်လုပ်ရောင်းချသည့် ကုမ္ပဏီ (၈) ခုကလည်း တစ်နှစ်တာကာလအတွင်း တိရစ္ဆာန်အစာတန်ချိန် (၃) သိန်းခန့် ထုတ်လုပ်၍ မြန်မာပြည်အနှံအပြားသို့ တင်ပို့ရောင်းချနိုင်ခဲ့ကြောင်း သိရှိရပါသည်။

ကျွဲ နွားမွေးမြူရေး ဆောင်ရွက်မှုများ

     နွားမွေးမြူရေးအနေဖြင့် နွားမျိုးကောင်းမျိုးသန့်များ မွေးမြူနိုင်ရန်အတွက် မွေးမြူရေးနှင့်ကုသရေးဦးစီးဌာနမှ မေထုန်မဲ့သားစပ်လုပ်ငန်းဖြင့် တစ်နှစ်တာကာလအတွင်း ခိုင်းနွား (၁၅၂၄၈) ကောင်၊နို့စားနွား (၂၃၉၃) ကောင်၊ အသားစားနွား(၁၄၇၂) ကောင်၊စုစုပေါင်း (၁၉၁၁၃) ကောင်ကို မေထုန်မဲ့နည်းဖြင့် သားစပ်ပေးနိုင်ခဲ့ပြီး သားပေါက်ကောင်ရေ (၁၀၇၅၅) ကောင်ရှိကြောင်း သိရှိရသည်။

      ခိုင်းကျွဲနွားကောင်းများ မွေးမြူခြင်းဖြင့် လယ်ယာစိုက်ပျိုးရေးနှင့် ကျေးလက်ဒေသ သယ်ယူပို့ဆောင်ရေးတွင် တောင်သူဦးကြီးများအတွက် အထောက်အကူများစွာဖြစ်ပြီး၊ နို့စားနွားများအနေဖြင့် စားသုံးသူပြည်သူများ အာဟာရဖြည့် ဓာတ်စာအနေဖြင့် နို့မှုန်၊နို့ဆီ၊  ထောပတ်၊ ဒိန်ချဉ် လုပ်ငန်းနှင့် နို့စိမ်း လုပ်ငန်းများသို့ တင်ပို့ရောင်းချနိုင်ပြီး ၊ အသားစားနွားအနေဖြင့် ပြည်တွင်းအသားစားသုံးမှုဖူလုံစေရန်နှင့် ပိုလျှံသည်များကို ပြည်ပသို့တင်ပို့ရန် ရည်ရွယ်၍ မွေးမြူလျက်ရှိကြောင်း သိရှိရသည်။

        ခြံလှောင်စနစ်ဖြင့် နွားမွေးမြူရေးဖွံ့ဖြိုးတိုးတက်စေရန် ရည်ရွယ်၍ တိရစ္ဆာန်အစာပင်ဖြစ်သော (နေပီယာမြက်) စိုက်ပျိုးခြင်းလုပ်ငန်းများကိုလည်း ဆောင်ရွက်လျက်ရှိရာ မွေးမြူရေးနှင့်ကုသရေးဦးစီးဌာန မြို့နယ်ရုံးများတွင် စံပြစိုက်ကွက်များအဖြစ် (၂၉) ဧက ၊ ပုဂ္ဂလိက စိုက်ပျိုးထားရှိမှု (၁၁၁.၇၁) ဧက ၊ အခြားဌာန၊ တပ်ရင်းတပ်ဖွဲ့များအနေဖြင့် (၁၇) ဧက စုစုပေါင်းစိုက်ပျိုးထားရှိမှု (၁၅၇.၇၁) ဧက ရှိကြောင်း သိရှိရသည်။ စီးပွားဖြစ်နွားမွေးမြူသူများအနေဖြင့်  တိရစ္ဆာန်အစာပင်(နေပီယာ) များကို ကိုယ်တိုင်စိုက်ပျိုးကြောင်း သိရှိရပြီး  ဖြည့်စွက်နွားစာများအဖြစ် ပြောင်းဖူးဆန်၊ ဝါကြိတ်ဖတ်တို့ကို ရောနှောကျွေးမွေးကြောင်း သိရှိရသည်။

ဆိတ်မွေးမြူရေး ဆောင်ရွက်မှုများ

          ဆိတ်မွေးမြူရေးလုပ်ငန်းများကို အများအားဖြင့် မိသားစုတစ်နိုင်တစ်ပိုင်မွေးမြူကြပြီး စီးပွားဖြစ်မွေးမြူသူမှာ နည်းပါးကြောင်း၊ ကျေးရွာများတွင် တစ်နိုင်တစ်ပိုင်မွေးမြူသူများအနေဖြင့် ဆိတ်များကို အစာဝယ်မကျွေးပဲ စားကျက်ကွင်းများသို့ လွှတ်ကျောင်းစနစ်ဖြင့် မွေးမြူကြကြောင်းသိရှိရသည်။ ဆိတ်မွေးမြူရာတွင် အသားတိုး ဆိတ်နှင့် မျိုးပွားစိတ်ဟူ၍ နှစ်မျိုးမွေးမြူကြပြီး ဆိတ်မတစ်ကောင်လျှင် တစ်နှစ်  နှစ်သား ပုံမှန်မွေးဖွားကြောင်း ဆိတ်တကောင်သည် တစ်နှစ်လျှင် လေးကောင်မှ ခြောက်ကောင်အထိ မျိုးပွားနိုင်၍ ရင်းနှီးရသက်သာသည့်အပြင် အချိန်တိုအတွင်း တွက်ခြေကိုက်၍ ပဲခူးတိုင်းဒေသကြီးအတွင်းရှိ မြို့နယ်/ကျေးရွာများတွင် ဆိတ်မွေးမြူရေး လုပ်ငန်းများကိုလည်း တိုးချဲ့လုပ်ကိုင်လာကြကြောင်း သိရှိရပါသည်။

ကြက် နှင့် ဘဲ မွေးမြူရေး ဆောင်ရွက်မှုများ

          ကြက်မွေးမြူရေးလုပ်ငန်းအနေဖြင့် ပဲခူးတိုင်းဒေသကြီးအတွင်း မျိုးကြက်ဉထုတ်လုပ်သော မျိုးကြက်ခြံ ( ၁၁)  ခြံ ရှိကြောင်း သိရှိရပြီး၊ ယင်းကြက်ခြံများတွင် ကြက်ကောင်ရေ အထီး (၇၂၆၄၅) ကောင်၊ အမ (၈၁၉၀၇၁) ကောင် မွေးမြူထားကြောင်း သိရှိရသည်။ ကြက်ဉ ထုတ်လုပ်မှုအနေဖြင့် တစ်နှစ်လျှင် လုံးရေ ( ၁၂၀၀ ) သိန်းခန့် ထုတ်လုပ်နိုင်ပြီး ပဲခူးမြို့ ညောင်အင်း-၁ မျိုးကြက်ခြံမှ အများဆုံး ထုတ်လုပ်ကြောင်း သိရှိရသည်။ ကြက်ဉများကို  ပဲခူးတိုင်းနှင့် ရန်ကုန်တိုင်းတို့အား အဓိက ဖြန့်ဖြူး ရောင်းချလျက် ရှိကြောင်း သိရှိရသည်။ ကြက်သားပေါက်ထုတ်လုပ်သော ဖောက်စက်အနေဖြင့် (၆) ခုရှိပြီး တစ်နှစ်ထုတ်လုပ်မှုအနေဖြင့်  ကြက်ပေါက် ကောင်ရေ(၂၁၀) သိန်းခန့် ထုတ်လုပ်နိုင်ပြီး ပဲခူးမြို့ ညောင်အင်းစက်မူဇုန်မှ အများဆုံးထုတ်လုပ်၍  မြန်မာပြည်အနှံ ဖြန့်ဖြူးရောင်းချလျက်ရှိကြောင်း သိရှိရသည်။

          ဘဲမွေးမြူရေးအနေဖြင့် ပဲခူးတိုင်းဒေသကြီးအတွင်း သနပ်ပင်မြို့နယ်၊ ကမာစဲကျေးရွာတွင် ခေတ်မီနည်းစနစ်ဖြင့် ဘဲသားပေါက်ထုတ်လုပ်သော ဖောက်စက် ၁ ခုရှိပြီး တစ်နှစ်လျှင် ဘဲကောင်ရေ (၁၁) သိန်းခန့် ထုတ်လုပ်လျက်ရှိသည်။ မိရိုးဖလာ ဘဲလေးသားဖောက်လုပ်ငန်းအနေဖြင့် (၂) ခု ရှိပြီး တစ်နှစ် ထုတ်လုပ်မှုအနေဖြင့် ဘဲပေါက်ကောင်ရေ (၄) သိန်းခန့် ထုတ်လုပ်နိုင်ပြီး သနပ်ပင်မြို့နယ်တွင် အများဆုံး ထုတ်လုပ်ကြောင်း သိရှိရသည်။ ဘဲပေါက်များကို ရွှေဘို၊ မန္တလေး၊ ရန်ကုန်၊ ဧရာဝတီမြို့များသို့ ဖြန့်ဖြူးတင်ပို့လျက်ရှိကြောင်း သိရှိရသည်။

ဝက် မွေးမြူရေး ဆောင်ရွက်မှုများ

         ဝက်မွေးမြူရေးလုပ်ငန်းအနေဖြင့်  တစ်ပိုင်တစ်နိုင်နှင့် စီးပွားဖြစ်မွေးမြူသူများ ဝင်ငွေတိုးတက်လာစေခြင်းဖြင့် ဒေသဖွံ့ဖြိူးမှု အထောက်အကူဖြစ်စေရန် အဓိကထားမွေးမြူလျက်ရှိကြောင်း သိရှိရသည်။ ပဲခူးတိုင်းဒေသကြီးအတွင်း ဝက်သားပေါက် ထုတ်လုပ်သော လုပ်ငန်းအနေဖြင့် (၂) ခုရှိပြီး ပဲခူးတိုင်းဒေသကြီး အတွင်း တစ်နှစ်လျှင် ဝက်ပေါက်ကောင်ရေ (၂) သိန်းခန့်ထုတ်လုပ်လျက်ရှိပြီး ဒိုက်ဦးမြို့၊ ဘောနီမျိုးဝက်ခြံနှင့် ဖြူးမြို့နယ် ၊ လှေဒုံးကျေးရွာမျိုးဝက်ခြံမှ အများဆုံးထုတ်လုပ်လျက်ရှိကြောင်း သိရှိရသည်။ ဝက်ပေါက်ထုတ်လုပ်သော လုပ်ငန်းများမှ ဝက်ပေါက်များကို ပဲခူး၊တောင်ငူ၊ လှည်းကူး၊ မအူပင်၊ မန္တလေး၊ တောင်ကြီးသို့ တင်ပို့ဖြန့်ဖြူးရောင်းချလျက်ရှိကြောင်း သိရှိရသည်။

ပျားမွေမြူရေး ဆောင်ရွက်မှုများ

         ပဲခူးတိုင်းဒေသကြီးအတွင်း ပျားမွေးမြူမှု ဖွံ့ဖြိုးရေးအနေဖြင့် တစ်နှစ်တာကာလအတွင်း ပျားအုံတိုးပွားရေးအတွက် ပျားအုံပေါင်း (၅၆၀) အုံ၊ ပျားရည်ထုတ်လုပ်မှုပေါင်း (၅) သိန်းကျော်ရှိပြီး ဝတ်မှုန်ကူး ဝန်ဆောင်မှု ဧကပေါင်း (၁) သိန်းကျော်ခန့် ဆောင်ရွက်နိုင်ခဲ့ကြောင်း သိရှိရသည်။

တိရိစ္ဆာန် မွေးမြူရေးကဏ္ဍ ဝန်ဆောင်မှုများ

     မွေးမြူရေးနှင့်ကုသရေးဦးစီးဌာနအနေဖြင့် ကူးစက်ရောဂါကျရောက်ခြင်းကြောင့် တိရစ္ဆာန်များ သေဆုံးပြီး ဆုံးရှုံးမှုမရှိစေရေးအတွက်လဲ တိရစ္ဆာန်ကူးစက်ရောဂါကာကွယ်ရေးလုပ်ငန်းများအနေဖြင့် ကျွဲ၊ နွား ခွာနာလျှာနာ ‌ရောဂါကာကွယ်ဆေး၊ ကျွဲ၊နွား လည်ချောင်းကွဲရောဂါ ကာကွယ်ဆေး၊ ကျွဲ၊ နွားဒေါင့် သန်းရောဂါ ကာကွယ်ဆေး၊ ကျွဲ၊နွား ပေါင်ပုပ်ရောဂါ ကာကွယ်ဆေး၊ဝက်ဝမ်းကျရောဂါ ကာကွယ်ဆေး၊ ကြက်လည်လိမ်ရောဂါ ကာကွယ်ဆေးများ ထိုးနှံပေးလျက်ရှိကြောင်း သိရှိရသည်။

        မွေးမြူရေးလုပ်ငန်း လုပ်ကိုင်နေသူများ အနေဖြင့် မိမိတို့ တိရစ္ဆာန်များအား ဆုံးရှုံးမှု မရှိစေရန် ကာကွယ်ဆေးများ ကြိုတင်ထိုးနှံထားရန် နှင့် မွေးမြူးရေး လုပ်ငန်းများနှင့် ပတ်သက်၍ လိုအပ်သော အသိပညာများနှင့် တိရိစ္ဆာန်ကျန်းမာရေးဝန်ဆောင်မှုများကို မြို့နယ်မွေးမြူရေးနှင့် ကုသရေး ဦးစီးဌာနများကို ဆက်သွယ်၍ ဆောင်ရွက်နိုင်ကြောင်း သိရှိရပါသည်။

DOCA(ပဲခူး)

                  စစ်ကိုင်းတိုင်းဒေသကြီးသည် ဆန်ပိုလျှံသည့်ဒေသများဖြစ်သော ရွှေဘိုခရိုင်၊ ကလေးခရိုင်၊ ကသာခရိုင်များတွင် ဧပြီလ ပထမပတ်တွင် စပါး/ဆန်ဈေး အနည်းငယ်မြင့်တက်နေပါသည်။ စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီးထွက်မှုမှာ ယခင်အပတ်က ရန်ကုန်သို့အိတ်ရေ ၂၇၆၀၀၊ မန္တလေးသို့အိတ်ရေ ၆၉၈၀၀၊ မကွေးသို့အိတ်ရေ ၁၀၀၀၊ နေပြည်တော်သို့ အိတ်ရေ ၉၀၀၀၊ ရှမ်း(တောင်) သို့ အိတ်ရေ ၅၅၀၀၊ ရှမ်း(မြောက်)သို့ အိတ်ရေ ၅၅၀၀၊  စုစုပေါင်းအိတ်ရေ (၁၁၈၄၀၀)အိတ်၊ တန်အားဖြင့် (၅၉၂၀)စီးထွက်ခဲ့ပြီး၊ ယခုအပတ်တွင် စစ်ကိုင်းတိုင်းဒေသကြီးမှ အခြားတိုင်းဒေသကြီးများသို့ ဆန်စီး ထွက်မှုမှာ ရန်ကုန်သို့ အိတ်ရေ ၃၇၀၀၀၊ မန္တလေးသို့ အိတ်ရေ ၄၉၆၀၀၊ မကွေးသို့ အိတ်ရေ ၁၀၀၀၊ နေပြည်တော်သို့ အိတ်ရေ ၁၀၀၀၀၊ ရှမ်း(တောင်)သို့ အိတ်ရေ ၆၀၀၀၊ ရှမ်း(မြောက်)သို့ အိတ်ရေ ၅၀၀၀၊ စုစုပေါင်းအိတ်ရေ (၁၀၈၆၀၀)အိတ်၊ တန်အားဖြင့်(၅၄၃၀)စီးထွက်ခဲ့သည့်အတွက် ယခင်အပတ်နှင့် နှိုင်းယှဉ်လျှင် ယခုအပတ်တွင် အိတ်ရေ (၉၈၀၀)၊ တန်အားဖြင့် (၄၉၀) ပိုမိုစီးထွက်ခဲ့ပါသည်။

               စစ်ကိုင်းတိုင်းဒေသကြီးအတွင်း ဧပြီလ (ပထမ)ပတ်တွင် ဖြစ်ပေါ်နေသော အခြေခံစားကုန် ဈေးနှုန်းများမှာ ရွှေဘိုခရိုင်တွင် ရွှေဘိုပေါ်ဆန်း(စပါး) တင်း၁၀၀လျှင် ကျပ်(၁၅၀၀၀၀၀)၊ ပေါ်ဆန်း (ဆန်)၂၄ပြည်ပါ တစ်အိတ်လျှင်ကျပ်  ၅၃၀၀၀၊ ဧရာမင်း(စပါး)တင်း ၁၀၀လျှင် ၁၀၀၀၀၀၀၊ ဧရာမင်း(ဆန်) ၂၄ ပြည်ပါ တစ်အိတ် ကျပ် ၄၃၀၀၀၊ ရေဦးမြို့မှ ပေါ်ဆန်း (စပါး) တင်း ၁၀၀လျှင် ကျပ် ၁၅၀၀၀၀၀၊ ပေါ်ဆန်း(ဆန်) တစ်အိတ်လျှင်ကျပ် ၅၄၀၀၀၊  ဧရာမင်း (စပါး) တင်း၁၀၀ လျှင် ၉၅၀၀၀၀၊ ဧရာမင်း (ဆန်)၂၄ ပြည်ပါ တစ်အိတ်  ၄၂၀၀၀ ကျပ်များဖြင့် အရောင်းအဝယ်ဖြစ်နေကြောင်း သိရပါသည်။

            ကလေးခရိုင်၊ ကလေးမြို့နယ်မှ ဧည့်မထ(စပါး) တင်း၁၀၀ လျှင် ၈၅၀၀၀၀၊ ဧည့်မထ(ဆန်)‌ ၂၄ပြည်ပါ တစ်အိတ်မှာ ကျပ် ၂၇၀၀၀၊ ငစိန်(စပါး) တင်း ၁၀၀ လျှင် ၈၀၀၀၀၀ ၊ ငစိန်(ဆန်)၂၄ပြည်ပါ တစ်အိတ်မှာ ၂၆၅၀၀၊ ဧရာမင်း (စပါး)တင်း ၁၀၀ လျှင် ကျပ် ၁၀၀၀၀၀၀၊ ဧရာမင်း(ဆန်)၂၄ပြည်ပါ တစ်အိတ်မှာကျပ် ၃၇၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

             ကသာခရိုင်၊ ကောလင်းမြို့နယ်မှ မှော်ဘီ(၂)(စပါး) တင်း ၁၀၀လျှင် ကျပ်၈၅၀၀၀၀၊ မှော်ဘီ(၂) ဆန် ၂၄ပြည် တစ်အိတ်လျှင် ကျပ် ၃၂၀၀၀၊ ဆင်းဧကရီ(၃)(စပါး) တင်း၁၀၀လျှင် ကျပ် ၆၅၀၀၀၀၊ ဆင်းဧကရီ-၃ဆန် ၂၄ပြည် တစ်အိတ်မှာ ကျပ် ၂၅၀၀၀၊ ဧရာမင်း (စပါး) တင်း ၁၀၀ လျှင် ကျပ် ၉၅၀၀၀၀၊ ဧရာမင်းဆန် ၂၄ ပြည် ဆန် တစ်အိတ်လျှင် ကျပ် ၃၅၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

              မုံရွာခရိုင်၊ မုံရွာမြို့တွင် ဧရာမင်း(စပါး)တင်း ၁၀၀ လျှင် ကျပ် ၉၉၀၀၀၀၊  ဧရာမင်း(ဆန်) ၂၄ပြည် တစ်အိတ်မှာ ကျပ် ၄၀၀၀၀ ဖြင့် အရောင်းအဝယ်ဖြစ်နေကြောင်း သိရပါသည်။

DOCA(စစ်ကိုင်း)                                                                          

          ကယားပြည်နယ်သည် စပါး၊ ပြောင်း၊ နှမ်း သီးနှံတို့ကို အဓိကစိုက်ပျိုးသောဒေသ ဖြစ်ပြီး ၂၀၂၁ ခုနှစ်၊ အောက်တိုဘာလမှ ၂၀၂၂ ခုနှစ်၊ မတ်လအထိ အခြားဒေသမှ ပြည်နယ်တွင်းသို့ ဆန်တင်သွင်းမှုမှာ (၁၇၄၈၈)အိတ်၊ (၈၇၄)တန်၊ ကယားပြည်နယ်မှ အခြားဒေသသို့ ဆန်တင်ပို့မှုမှာ (၂၀၈၂၄)အိတ်၊ (၁၀၄၁)တန်၊ ပြောင်းတင်ပို့မှုမှာ (၁၈၄၃၀၅)အိတ်၊ (  ၉၀၂၉) တန်နှင့် နှမ်း တင်ပို့မှုမှာ (၆၆၁၀)အိတ်၊ (၁၆၂)တန်တို့ဖြစ်ပြီး ဆန်ကို ရန်ကုန်၊ မန္တလေးသို့လည်းကောင်း၊ ပြောင်းကို မြဝတီမြို့သို့လည်းကောင်း၊ နှမ်းကို မန္တလေးသို့လည်းကောင်း အများဆုံးတင်ပို့ခဲ့ကြောင်း မြို့ဦးဂိတ်စာရင်းများအရ သိရှိရပါတယ်။

DOCA(ကယား)

            ငှက်ပျောသီးကို မြန်မာလူမျိုးတို့၏ ရိုးရာဓလေ့ကျင်းပကြသည့် အလှူမင်္ဂလာပွဲများ ဘာသာရေးပွဲများနှင့် ကိုးကွယ်ယုံကြည်မှုဆိုင်ရာပွဲများတွင် မပါမဖြစ်အသုံးပြုကြပါသည်။ငှက်ပျောသီးသည် ကျန်းမာရေးနှင့် ညီညွတ်ပြီးအဟာရပြည့်ဝသည့်အတွက် မြန်မာလူမျိုးများနှစ်ခြိုက်စွာ စားသုံးလေ့ရှိသော အသီးအနှံတစ်မျိုးလည်းဖြစ်သည်။ငှက်ပျောကို အိမ်ခြံစည်းရိုးများနှင့် လယ်ကန်သင်းများတွင် တစ်နိုင်တစ်ပိုင် စိုက်ပျိုးကြသကဲ့သို့ စီးပွားဖြစ်စိုက်ခင်းအဖြစ်လည်း စိုက်ပျိုးလေ့ရှိကြောင်း သိရှိရသည်။   

            ငှက်ပျောကို မုံရွာဒေသဝန်းကျင်းရှိ၊ ကနီ၊ ကနဲ၊ ဘုတလင်၊ အရာတော်မြို့နယ်များနှင့် ဝက်လက်မြို့နယ်များမှ အဓိကစိုက်ပျိုးကြောင်း လေ့လာသိရှိရပါသည်။ ငှက်ပျောမျိုးများစွာရှိသည့်အနက် ဒေသနှင့်ကိုက်ညီပြီး ဈေးကွက်ဝယ်လိုအားရှိသည့် ဖီးကြမ်းငှက်ပျောမျိုးနှင့် သီးမွှေးငှက်ပျောမျိုးများကို အဓိကထားစိုက်ပျိုးကြပြီး မုံရွာ၊ မန္တလေး ဈေးကွက်သို့ တင်ပို့ကြောင်းသိရှိရပါသည်။ လက်ရှိမုံရွာ ငှက်ပျောဈေးကွက်၌ ငှက်ပျောကုန်သည် (၁၅) ဦး ခန့်ရှိပြီး ဒေသတွင်ဈေးကွက်၌ လက်လီ၊လက္ကားရောင်းချလျှက်ရှိပြီး မုံရွာမှတဆင့် ပခုက္ကူ၊ ရေစကြိုနှင့် ကလေး၊ တမူးမြို့များသို့လည်း  ပုံမှန်တင်ပို့ရောင်းချလျှက်ရှိကြောင်းသိရှိရသည်။

      လက်ရှိ မုံရွာငှက်ပျောဈေးကွက်၌ ငှက်ပျောဖီးကြမ်းတစ်ဖီးလျှင် အကြီးအသေးပေါ် မူတည်၍ (၅၀၀)ကျပ်မှ (၈၀၀)ကျပ်ဖြင့်လည်းကောင်း သီးမွှေးငှက်ပျောတစ်ဖီးလျှင် (၆၀၀)ကျပ်မှ (၁၀၀၀) ကျပ် ဖြင့်လည်းကောင်း ရောင်းဝယ်လျှက်ရှိပြီး တစ်ရက်ပျှမ်းမျှ ငှက်ပျောဖီး(၃၀၀၀) ခန့် အရောင်းအဝယ် ဖြစ်လျှက်ရှိကြောင်းလေ့လာသိရှိရပါသည်။ ယခုလအတွင်း မုံရွာဈေးကွက်သို့ ငှက်ပျောအဝင်များခဲ့သလို နယ်မြို့များမှ အမှာရှိနေသည့်အတွက် ယခင်နှစ်ကထက် အရောင်းအဝယ်သွက်လျှက်ရှိကြောင်း လေ့လာတင်ပြလိုက်ရပါသည်။

DOCA(စစ်ကိုင်း)

            ကျေးရွာတစ်ရွာထုတ်ကုန်တစ်မျိုး((OVOP)ဆိုသည်မှာပြည်တွင်းပြည်ပဈေးကွက်ရရှိရန် ရည်ရွယ်လျက် ဒေသကျေးရွာအလိုက် ထုတ်ကုန်တစ်မျိုကို အထူးပြုပြီး ဒေသအမည်ဖြင့် ထုတ်လုပ်‌ဆောင်ရွက်ခြင်းဖြစ်သည့် ကျေးရွာတစ်ရွာထုတ်ကုန်တစ်မျိုး(OVOP) လုပ်ငန်းများကို ဂျပန်နှင့် ထိုင်းနိုင်ငံအပါအဝင် နိုင်ငံတော်တော်များတွင် အကောင်အထည်ဖော်ဆောင်ရွက်နေသည့် လုပ်ငန်းတစ်ခုဖြစ်သလို မြန်မာနိုင်ငံတွင်လည်း (OVOP) လုပ်ငန်းများကို သက်ဆိုင်ရာ အစိုးရဌာန၊ အဖွဲ့အစည်းများမှ အားပေးမြှင့်တင်ပံ့ပိုးပေးမှုများရှိခဲ့ကြောင်း လေ့လာသိရှိရပါသည်။

          ‌ကျေးရွာတစ်ရွာ(သို့)ဒေသတစ်ခုစီတိုင်းတွင် နာမည်ကျော်ကြားသည့် ထုတ်ကုန်တစ်မျိုးစီရှိကြမြဲဖြစ်သည့် မုံရွာမြို့၏ အနောက်ဘက်ကမ်း ၊ဆားလင်းကြီးမြို့နယ်၏ အနောက်တောင်ဘက်တွင်ရှိသည့် ကျွဲခိုတောကျေးရွာ၏ ကြက်မွှေးလုပ်ငန်းမှာ ဒေသတွင်းဈေးကွက်၌ နာမည်ရနေသည့် လုပ်ငန်းတစ်ခုဖြစ်ပါသည်။ ကျွဲခိုတောကျေးရွာသည် အိမ်ခြေ(၂၀၀) ကျော်ရှိပြီး၊ ကြက်မွှေးလုပ်ငန်းကို ယခင်ကတည်းက မိရိုးဖလာတစ်နိုင်တစ်ပိုင် လုပ်ကိုင်လာခဲ့ရာမှ ယခုဆိုလျှင် တစ်ရွာလုံးနီးပါး ကြက်မွှေးလုပ်ငန်းကို ကျယ်ကျယ်ပြန့်ပြန့် လုပ်ကိုင်လာကြကြောင်းသိရှိရပါသည်။ ကြက်မွှေးပြုလုပ်ရာတွင် ကုန်ကြမ်းအဖြစ် အသုံးပြုသည့် ကြက်မွှေးများကို မုံရွာမြို့နယ်ရှိ မွေးမြူရေးကြက်ခြံများနှင့် ဒေသတွင်းရှိ မွေးမြူရေးကြက်ခြံများမှ ဝယ်ယူစုဆောင်းရရှိပြီး ကြက်မအမွှေးတစ်ပိဿာကို (၈၀၀- ၁၀၀၀)ကျပ်နှင့် ကြက်ဖအမွှေးတစ်ပိဿာကို (၁၅၀၀-၁၈၀၀)ကျပ်ပေးဝယ်ရကြောင်း၊ ကြက်မွှေးတစ် ပိဿာကို အသုံးပြုပါက ကြက်မွှေးချောင်း (၈)ချောင်းရှရိကြောင်းသိရှိရပါသည်။ ကြက်မွှေးတွင် အသုံးပြုသည့် ကြိမ်လုံးကို အထက်အညာဒေသဖြစ်သည့် ကလေးဝ၊ မော်လိုက်ဒေသများမှ ထွက်ရှိသည့် ကြိမ်များကို ဝယ်ယူအသုံးပြုရကြောင်းသိရှိရသည်။ ကြိမ်တစ်ထုပ်ကို (၁၈၀၀၀- ၂၀၀၀၀) ကျပ်ဖြင့် ဝယ်ယူအသုံးပြုပြီး ကြိမ်တစ်ထုပ်ကို ကြက်မွှေးအတွက် အသုံးပြုရမည့် ကြိမ်ချောင်း (၂၀၀) ချောင်း ရရှိကြောင်းလည်း သိရှိရပါသည်။

         ကျွဲခိုတောကျေးရွာတွင် ကြက်မွှေးလုပ်ငန်းများကို တစ်ရွာလုံးနီးပါး လုပ်ကိုင်ကြပြီး လုပ်ငန်းရှင်တစ်ဦးလျှင် ကျပ်(၅)သိန်းမှ (၁၀)သိန်းထိ ရင်းနှီးလုပ်ကိုင်ရကြောင်း၊ မိသားစုတစ်စုလျှင် (၄-၅) ယောက်လုပ်ကိုင်ပြီး တစ်ရက်လျှင် တစ်ဦးကို ကြက်မွှေးချောင်း(၂၀)ချောင်းခန့်ပြီးစီးကြောင်း ၊ ကြက်မွှေးတစ်ချောင်းလုပ်အားခအနေဖြင့် တစ်ချောင်းလျှင် (၃၀၀)ကျပ်ရရှိသည့်အတွက် တစ်ရက်လျှင် လုပ်အားခ (၆၀၀၀) ကျပ်ဝင်ငွေရရှိကြောင်းလေ့လာသိရှိရပါသည်။ထွက်ရှိလာသည့် ကြက်မွှေးများကို မုံရွာဈေးကွက်ရှိဆိုင်များနှင့် မန္တလေး၊ လားရှိုး၊ မူဆယ်၊မြိတ်နှင့်ထားဝယ်မြို့ကြီးများအထိပါ တင်ပို့ရောင်းချရကြောင်းသိရှိရပါသည်။

        ကျွဲခိုတောကျေးရွာ၏ ကြက်မွှေးလုပ်ငန်းမှာ တစ်ဖြေးဖြေးနှင့် ကျယ်ပြန့်လာပြီး လုပ်ငန်းများ ပိုမိုဖြစ်ထွန်းလာသည်နှင့်အမျှ ဒေသခံများအနေဖြင့်လည်း အလုပ်အကိုင်အခွင့်အလမ်းများ ရရှိလာခဲ့ကြောင်း ကြက်မွှေးလုပ်ငန်းများကို ကျေးရွာတစ်ရွာ ထုတ်ကုန်တစ်မျိုး (OVOP)အသွင်ဖြင့် သက်ဆိုင်ရာ အစိုးရဌာနအဖွဲ့အစည်းများမှ လိုအပ်သောအရင်းအနှီးနှင့် ဈေးကွက်များ ချိတ်ဆက်ဖော်ဆောင်ပံ့ပိုးပေးနိုင်မည်ဆိုပါက ပြည်တွင်းဈေးကွက်သာမက ပြည်ပဈေးကွက်အထိပါ ဈေးကွက်ဝေစုရရှိနိုင်မည်ဖြစ်ပါကြောင်း ရေးသားတင်ပြလိုက်ရပါသည်။

DOCA(စစ်ကိုင်း)