ပြည်တွင်းကုန်သွယ်မှုသတင်း

             ပဲခူးတိုင်းဒေသကြီး၊ တောင်ငူခရိုင်၊ အုတ်တွင်းမြို့နယ်၊ အမြန်လမ်းမိုင်တိုင်အမှတ် ၁၃၂/၃ ၊ လမ်းမအနောက် ဖက်တွင် စိန်တလုံးသရက်စိုက်ခင်းများ အောင်မြင်ဖြစ်ထွန်းလျှက်ရှိရာ ယခုအခါ အသီးများပေါ်နေပြီ ဖြစ်ပါသည်။ စိန်တလုံးသရက်သီးမျိုးများကို မန္တလေးတိုင်းဒေသကြီး၊ ကျောက်ဆည်မြို့နယ်၊ ဟံမြင့်မိုရ် ကျေးရွာတွင် သွားရောက်ဝယ်ယူပြီး အပင်သက် ၅ နှစ် တွင် အသီးစသီးကြောင်း သိရပါသည်။ အသီးစသီးခါစက တစ်ပင်လျှင် အလုံး ၂၀ မှ ၃၀ အထိသာသီးပြီး အပင်သက်တမ်းရင့်လျှင် အလုံး ၈၀ မှ ၁၀၀ အထိသီးကြောင်း သိရှိရပါသည်။

              အသီးတိုင်းကို အိပ်စွပ်ပေးရပါသည်။ ယခင်နှစ်က အစွပ်အိတ် တစ်အိတ်လျှင် ၃၅ ကျပ် ပေးရပြီး ယခုနှစ်တွင် ၄၅ ကျပ်ပေးရကြောင်း သိရပါသည်။ အုတ်တွင်းမြို့နယ်မှထွက်ရှိသည့် သရက်သီးများကို ဒေသတွင်းနှင့် ရန်ကုန်မြို့ သီရီမင်္ဂလာဈေးသို့ တင်ပို့ရောင်းချရကြောင်း သိရပါသည်။

              ယခင်နှစ်က စိန်တလုံးသရက်သီး အကြီး တစ်လုံးလျှင် ၇၀၀ ကျပ်၊ အလတ် တစ်လုံးလျှင် ၅၀၀ ကျပ်၊ အသေးတစ်လုံးလျှင် ၃၀၀ ကျပ် ရောင်းချရပြီး ယခုနှစ်တွင်မူ အကြီးတစ်လုံးလျှင် ၁၀၀၀ ကျပ်၊ အလတ်တစ်လုံးလျှင် ၇၀၀ ကျပ်နှင့် အသေးတစ်လုံးလျှင် ၅၀၀ ကျပ် ရောင်းချရကြောင်း စိန်တလုံးသရက်ခြံပိုင်ရှင် ဦးဝင်းသိန်းထွန်းထံမှ သိရှိရပါသည်။

DOCA(ပဲခူး)

           ပြည်ကုန်စည်ဒိုင်တွင် ပဲမျိုးစုံရောင်းဝယ်လျှက်ရှိရာ ယခင်လကပဲဈေးများ ကောင်းနေရာမှ ဧပြီလဆန်းပိုင်းမှစ၍ ပဲဈေးများပြန်လည်ကျလာသည်ကို တွေ့ရပါသည်။

        ပြည်ကုန်စည်ဒိုင်တွင် မတ်လဒုတိယပတ်မှာ မတ်ပဲဈေးတစ်ဖြည်းဖြည်းမြင့်လာခဲ့ပြီး ပဲတစ် တင်းကို ၄၅၀၀၀-၄၆၀၀၀ကျပ်၊ တတိယပတ်တွင် ပဲတစ်တင်းကို ၄၇၀၀၀ကျပ်၊ နောက်ဆုံး ပတ်တွင် ၄၈၂၀၀-၄၈၅၀၀-၄၉၀၀၀-၄၉၅၀၀ကျပ်ထိ ဈေးမြင့်လာခဲ့ပြီး အရောင်း အဝယ်ဖြစ်မှု မှာလည်း တစ်ရက်ကိုအိတ် ၃၀၀/၄၀၀ခန့် အဝင်ရှိပြီး ရန်ကုန်အဝယ် နှင့်လှောင်သမားများ အရောင်း အဝယ်ဖြစ်ခဲ့ပါသည်။ ဧပြီလအစမှစ၍ ပဲဈေးကျလာခဲ့ပြီး ပဲတစ်တင်းကို ၄၇၀၀၀-၄၇၂၀၀-၄၇၅၀၀ ကျပ်ထိ တစ်ဖြည်းဖြည်းကျလာခဲ့ပြီး ပထမပတ်တွင် ၄၃၅၀၀-၄၅၀၀၀ကျပ်ထိ ဈေးကျလာ ခဲ့ပါသည်။ ဝယ်လက်မှာ ပုံမှန်အရောင်းအဝယ်ရှိပြီး တစ်ရက်ကိုအိတ် ၃၀၀/၄၀၀ခန့် အဝယ်ရှိခဲ့ပါ သည်။

        မတ်လပထမပတ်နှင့် ဒုတိယပတ် ပဲစင်းငုံသီးနှံတစ်တင်းကို ၄၄၀၀၀-၄၅၀၀၀ကျပ်ဈေးဖြင့် အရောင်းအဝယ်ဖြစ်ခဲ့ပြီး ရန်ကုန် အဝယ်နှင့် လှောင်သမားများအဝယ်ရှိခဲ့ပါသည်။ တတိယပတ်တွင် ပဲတစ်တင်းကို ၄၄၀၀၀ကျပ်ဖြင့် ဈေးအေးနေခဲ့ပြီး နောက်ဆုံးပတ်တွင် ပဲတစ်တင်းကို ၄၅၀၀၀-၄၅၅၀၀ ကျပ်ဖြစ်ခဲ့ပါသည်။  ဧပြီလပထမပတ်တွင် ပဲစင်းငုံတစ်တင်းလျှင် ၄၅၀၀၀ကျပ်ဖြင့် ဈေးအေးခဲ့ပြီး တစ်ရက်ကိုအိတ် ၃၀၀/၄၀၀ခန့် ရန်ကုန်အဝယ်ရှိခဲ့ပါသည်။

     ကုလားပဲသီးနှံဈေးမှာ မတ်လဒုတိယပတ်တွင် ပဲတစ်တင်းကို ၄၄၀၀၀-၄၅၀၀၀-၄၆၀၀၀ ကျပ်ဖြင့် အရောင်းအဝယ်သွက်ခဲ့ပြီး မြို့တွင်းရောင်းချမှုနှင့် ရန်ကုန်သို့တင်ပို့မှုရှိခဲ့ပြီး တစ်ရက်ကို အိတ် ၉၀၀/၁၀၀၀ခန့် အရောင်းအဝယ်ဖြစ်ခဲ့ပါသည်။ မတ်လတတိယပတ်တွင် ၄၅၀၀၀-၄၅၅၀၀ကျပ် မှ ၄၄၀၀၀ကျပ်ထိ ဈေးကျလာခဲ့ပြီး နောက်ဆုံးပတ်တွင် ၄၄၅၀၀-၄၅၀၀၀ကျပ်ထိ ဈေးမြင့်လာခဲ့၍ အရောင်းအဝယ်မှာ ကောင်းလျှက်ရှိပြီး တစ်ရက်ကို အိတ် ၈၀၀/၉၀၀ခန့် အဝယ်ရှိ ပါသည်။ ဧပြီလပထမပတ်တွင် ကုလားပဲတစ်တင်းကို ၄၃၀၀၀-၄၃၅၀၀ကျပ်ထိ ဈေးကျလာခဲ့ပြီး ခွဲစက်သမားများနှင့် လှောင်သမားများအဝယ်ရှိခဲ့ပါသည်။

        ပြည်ကုန်စည်ဒိုင်၏ ဘိုကိတ်သီးနှံဈေးမှာ မတ်လဒုတိယပတ် ပဲတစ်တင်းကို ၃၄၀၀၀-၃၅၀၀၀ကျပ်ဈေးဖြစ်ခဲ့ပြီး တတိယပတ်တွင် ပဲတစ်တင်းကို ၃၅၅၀၀-၃၆၀၀၀ကျပ်ဖြင့် လက်လီ/ လက်ကားအရောင်းအဝယ်ရှိခဲ့ပြီး တစ်ရက်ကို လက်လီ ၁၄/၁၅အိတ်ခန့် လက်ကားအဝယ် တစ်ရက် ကို ၄၀/၅၀ အိတ်ခန့် ရန်ကုန်တင်ပို့မှုရှိခဲ့ပါသည်။ နောက်ဆုံးပတ်တွင် ပဲတစ်တင်းကို ၃၆၀၀၀ ကျပ်ဖြစ်ခဲ့ရာမှ ဧပြီလပထမပတ်တွင် ပဲတစ်တင်းကို ၃၅၀၀၀ကျပ်သို့ ဈေးကျလာခဲ့ပါသည်။

        ပဲဈေးအနည်းငယ်ပြန်လည်ကျဆင်းလာရခြင်းမှာ နိုင်ငံခြားငွေလဲလှယ်မှု သတ်မှတ်ချက်ကြောင့်လည်းဖြစ်နိုင်ကြောင်းနှင့် ဈေးနှုန်းကျဆင်းမှုရှိသော်လည်း ပြည်ကုန်စည်ဒိုင်အနေဖြင့် ပဲမျိုးစုံမှာ ပုံမှန်အရောင်းအဝယ်ဖြစ်လျှက်ရှိကြောင်း သိရှိရပါသည်။

DOCA(ပဲခူး)

           လက်ပံတန်းမြို့၊ မှော်အင်းအုပ်စု၊ လွှစင်ကုန်းကျေးရွာတွင် အိမ်တွင်းမှုလုပ်ငန်းဖြစ်သည့် တံမြက်စည်းလုပ်ငန်းကို အသေးစားအိမ်တွင်းမှု လုပ်ငန်းတစ်ခုအဖြစ် လုပ်ကိုင်ဆောင်ရွက်လျက်ရှိပါသည်။ ကုန်ကြမ်းအနေဖြင့် တံမြက်စည်းအဆံကိုသာ အဓိကထားအသုံးပြုပြီး ပဲခူးရိုးမတောင်ပေါ်မှ အဓိကကုန်ကြမ်းရရှိပါသည်။ ကုန်ကြမ်းဖြစ်သည့် တံမြက်စည်းအဆံကို ပြာသိုလပြည့်မှ တပို့တွဲလကုန်အထိသာ ကုန်ကြမ်းအနေဖြင့် တစ်နှစ်မှတစ်ကြိမ်သာရရှိပြီး ကုန်ကြမ်းများကိုလည်း တံမြက်စည်းလုပ်ရန် အထုံး (၄၀၀၀၊ ၅၀၀၀)ခန့် ဝယ်ယူစုဆောင်းသိုလှောင်ထားပါသည်။ တံမြက်ဆံအစည်း အပင်(၁၀၀) လျှင် ယခင်နှစ်က ကျပ် ၅၀၀ မှ ကျပ် ၆၀၀ အထိ ဝယ်ယူအသုံးပြုခဲ့ရပြီး ယခုနှစ်တွင် ကျပ် ၇၀၀မှ ၈၀၀ အထိ ဝယ်ယူအသုံးပြုခဲ့ရသည်။ တံမြက်စည်းပြုလုပ်သည့် ရိုးတံတစ်ချောင်းလျှင် ယခင်နှစ်က ကျပ် ၄၀မှ ၅၀ ကျပ်သာဝယ်ယူပြီး ယခုနှစ်တွင် ကျပ် ၅၀မှ ၆၀ထိ ဝယ်ယူ အသုံးပြုရသည်။ တံမြက်ဆံအပင်ကောင်းလျှင် တစ်စည်းလျှင် အများဆုံး (၃) ချောင်းခန့် ပြုလုပ်နိုင်ပြီး တံမြက်ဆံ အပင်နည်းလျှင် (၂) ချောင်းခန့် ပြုလုပ်နိုင်ပါသည်။

         တံမြက်စည်းတစ်ချောင်း၏ ကုန်ကျစရိတ်မှာ ပျှမ်းမျှကျပ် ၅၀၀ ခန့်အထိကုန်ကျပြီး တစ်ချောင်း ရောင်းရငွေကျပ်၈၀၀ အထိ‌ရောင်းချ၍ တစ်ချောင်းလျှင် ပျှမ်းမျှငွေ ၃၀၀ကျပ် အထိ အကျိုးအမြတ်ရရှိပါသည်။ တစ်ရက်လျှင် တံမြတ်စည်းအချောင်း၃၀ခန့်ပြုလုပ်နိုင်ပြီး ၁လလျှင်အချောင်း ၉၀၀ခန့် ပြုလုပ်နိုင်သည့်အတွက် တစ်နှစ်လျှင်ပျှမ်းမျှ (၁၀၉၅၀) ခန့်ပြုလုပ်လျက်ရှိပါသည်။ တံမြတ်စည်း ပြုလုပ်ခြင်းကို ဈေးကွက်အနေဖြင့် မိမိတို့မြို့နယ်မှ ရန်ကုန်နှင့် အခြားမြို့နယ်များအထိ လက်လီ၊  လက်ကားဖြန့်ဖြူးရောင်းချကြောင်း သိရှိရပါသည်။

        တစ်နှစ်ပါတ်လုံးလုပ်ကိုင်ရသော လုပ်ငန်းဖြစ်၍ မိသားစု(၅) ယောက်ခန့်ဖြင့် လုပ်ကိုင်ဆောင်ရွက်လျက် ရှိပါသည်။ ယခုအခါတံမြက်စည်းဈေးကွက် အလုပ်အကိုင်အခွင့်အလမ်းများ ပိုမိုရရှိ လာသောကြောင့် လက်ပံတန်းမြို့၊မှော်အင်းအုပ်စု၊ ကြက်ကလေးကျေးရွာမှလည်း အသေးစားအိမ်တွင်းမှုလုပ်ငန်းတစ်ခုဖြစ်သည့် တံမြတ်စည်းလုပ်ငန်းကို ဒေသအိမ်တွင်းမှုလုပ်ငန်းတစ်ခုအနေဖြင့် လုပ်ကိုင်ဆောင်ရွက်လျက်ရှိကြောင်း သိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ ပြည်ခရိုင်တွင် နေကြာသီးနှံကို ဒေသတွင်း စားသုံးဆီဖူလှုံမှုရှိစေရေးအတွက် ဆီထွက်သီးနှံများစိုက်ပျိုး၍ ဆီကြိတ်ခွဲထုတ်လုပ်နိုင်ရေးကို ပဲခူးတိုင်းဒေသကြီး အစိုးရအဖွဲ့၏ စီမံဆောင်ရွက်မှုဖြင့် သက်ဆိုင်ရာခရိုင်အလိုက်၊ မြို့နယ်အလိုက် အကောင်အထည်ဖော် ဆောင်ရွက်လျှက်ရှိရာ ပြည်ခရိုင်အနေဖြင့် နေကြာစိုက်ပျိုးထုတ်လုပ်မှုနှင့် နေကြာဆီ ကြိတ်ခွဲထုတ်လုပ်နိုင်ရန် စီစဉ်ဆောင်ရွက်လျှက်ရှိပါသည်။ နေကြာသီးနှံကို သီးသန့်သီးညှပ်အဖြစ် စိုက်ပျိုးလျှက်ရှိရာ ၂၀၂၁-၂၀၂၂ ခုနှစ်တွင် ဆောင်းနေကြာစိုက်ဧကမှာ ၄၅၉ဧက စိုက်ပျိုးခဲ့ပြီး ယခုနှစ်တွင် ၁၁၇၄၉ ဧကထပ်မံတိုးချဲ့စိုက်ပျိုးထုတ်လုပ်ရန် လျာထားဆောင်ရွက်သွားမည်ဖြစ်ကြောင်း သိရှိရပါသည်။

     နေကြာစိုက်ပျိုးလျှင် တစ်ဧကစိုက်ပျိုးထုတ်လုပ်ကုန်ကျစရိတ်မှာ (၃)သိန်းကျော်ခန့် ကုန်ကျပြီး အထွက်နှုန်းအနေဖြင့် တစ်ဧကလျှင် ၁၈တင်းခန့် ထွက်ရှိသည်ဟုသိရပါသည်။ နေကြာ တစ်ဧက ဝင်ငွေအနေဖြင့် ၄၅၀၀၀၀ကျပ် ခန့်ရရှိပြီး အကျိုးအမြတ်အနေဖြင့် တစ်ဧကလျှင် (၁)သိန်း ကျပ်ခန့် ရရှိသည်ဟုလေ့လာသိရှိရပါသည်။ နေကြာစိုက်ပျိုးသူ တောင်သူများအနေဖြင့် ထွက်ရှိလာသော နေကြာစေ့များကို နီးစပ်ရာပွဲရုံများသို့လည်းကောင်း၊ ဆီစက်များသို့လည်းကောင်း၊ ဆီစက်များတွင် အခကြေးငွေပေးပြီး ဆီကြိတ်၍လည်းကောင်း ရောင်းချခြင်းများလည်းရှိပါသည်။ ယခင်က ပြည်ပမှ စားအုန်းဆီများဈေးနှုန်းချိုသာစွာဖြင့် တင်သွင်းလာသောကြောင့် နေကြာဆီကို စားသုံးမှုလျော့နည်းလာသည်နှင့်အညီ နေကြာစိုက်ပျိုးထုတ်လုပ်သူ၊ နေကြာဆီကြိတ်ခွဲထုတ်လုပ်သူများ မရှိသလောက် နည်းပါးသွားကြောင်း သိရှိရပြီး ယခုနှစ်ပိုင်းမှသာ ပြည်ပမှတင်သွင်းသည့် စားအုန်းဆီ ဈေးမြင့်လာသဖြင့် ပြည်တွင်းမှထွက်ရှိသော မြေပဲ၊ နှမ်းနှင့် နေကြာများကို ဆီကြိတ်ခွဲထုတ်လုပ်မှု တိုးလာကြောင်း သိရှိရပါသည်။

     ယခုအချိန်တွင် ပြည်ခရိုင်၊ ပြည်မြို့ရှိ ဒေါ်လာဆီစက်တွင် နေကြာဆီအနည်းငယ်သာ ကြိတ်ခွဲထုတ်လုပ်မှုရှိပြီး ဆီကြိတ်ရန်အတွက် နေကြာကို အခြားပြည်နယ်နှင့် တိုင်းများမှနေကြာ တစ်တင်းလျှင် ၂၅၀၀၀ကျပ်ဖြင့် ဝယ်ယူ၍ ကြိတ်ခွဲရပါသည်။ နေကြာဆီကြိတ်ခွဲရာတွင် နေကြာ တစ်တင်းလျှင် နေကြာဆီ (၃)ပိဿာခန့်ထွက်ရှိကြောင်းသိရှိရပါသည်။ နေကြာ တစ်တင်းကြိတ်ခွဲရာတွင် ကုန်ကျစရိတ်အနေဖြင့် နေကြာတစ်တင်းလျှင် ၂၅၀၀၀ကျပ် ကြိတ်ခွဲခ ၃၀၀ကျပ်ဖြင့် စုစုပေါင်း ၂၅၃၀၀ကျပ်ခန့်ကုန်ကျကြောင်းသိရှိရပါသည်။ ဝင်ငွေရရှိမှုမှာ နေကြာတစ်တင်းဆီကြိတ်လျှင် ၃ ပိဿာခန့်ထွက်ရှိ၍ နေကြာဆီတစ်ပိဿာလျှင် ၈၅၀၀ကျပ်ခန့်ရရှိပြီး ဝင်ငွေ ၂၅၅၀၀ကျပ်ခန့် ရရှိပါ သည်။ နေကြာ တစ်တင်းကြိတ်လျှင် နေကြာကြိတ်ဖတ် ၅ပိဿာထွက်ရှိပြီး တစ်ပိဿာလျှင် ၁၀၀၀ ကျပ် ခန့်ရရှိသဖြင့် စုစုပေါင်းဝင်ငွေရရှိမှုမှာ ၃၀၅၀၀ကျပ်ခန့်ရရှိသဖြင့် အကျိုးအမြတ်အနေဖြင့် နေကြာ တစ်တင်းဆီကြိတ်လျှင် ၅၂၀၀ကျပ်ခန့်ရရှိကြောင်း သိရပါသည်။

       နေကြာဆီဈေးကွက်အနေဖြင့် နေကြာဆီသည် အနံပျင်းခြင်း၊ အာခေါင်ရှခြင်းတို့ကြောင့် ပဲဆီ၊ နှမ်းဆီနှင့်ယှဉ်ပါက စားသုံးသူများက ကြိုက်နှစ်သက်မှု နည်းပါးကြောင်းသိရပါသည်။ နေကြာဆီကို တချို့သော ကျန်းမာရေးလိုက်စားသူများနှင့် သွေးတိုး၊ ဆီးချိုသမားများမှ ကျန်းမာရေးအတွက် ဝယ်ယူစားသုံးကြသဖြင့် ဈေးမှာ ပဲဆီ၊ နှမ်းဆီ ကဲ့သို့ ဈေးတန်းတူနေပြီး တစ်ပိဿာလျှင် ၈၅၀၀-၉၀၀၀ကျပ်ခန့် ရောင်းချကြောင်းသိရပါသည်။

    နေကြာသီးနှံကို တစ်ဧကထုတ်လုပ်မှု အကျိုးအမြတ်ရရှိရေးနှင့် တစ်တင်းထုတ်လုပ်မှုစရိတ် လျော့ချနိုင်ရေးအတွက် အထွက်နှုန်းကောင်းမွန်သည့် နေကြာမျိုးစေ့များနှင့် နည်းစနစ်မှန်ကန်စွာ စိုက်ပျိုးနိုင်ခြင်း၊ အရည်အသွေးကောင်းမွန်ပြီး စားသုံးသူကြိုက်နှစ်သက်မည့် နေကြာဆီကြိတ်ခွဲနိုင်မည့် စက်များတပ်ဆင်ခြင်း၊ နေကြာဆီဈေးကွက် ပိုမိုရရှိလာနိုင်စေရေးအတွက် စားသုံးသူများ နေကြာဆီစားသုံးခြင်းဖြင့် ရရှိနိုင်မည့် အာဟာရတန်ဖိုးများသိရှိအောင် အသိပညာပေး အစီအစဉ်များပြုလုပ်ဆောင်ရွက်မည်ဆိုလျှင် နေကြာစိုက်ပျိုးထုတ်လုပ်သူနှင့် နေကြာဆီ ကြိတ်ခွဲထုတ်လုပ်သူများ အကျိုးအမြတ် ပိုမိုရရှိမည်ဖြစ်ကြောင်း သိရှိရပါသည်။

DOCA(ပဲခူး)

               ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူမြို့၊ တိုင်းထက်လွန်ဘဲဥပွဲရုံသို့ ဘဲဥများလာရောက်ပို့ဆောင် ရောင်းချလျှက်ရှိသည်ကို တွေ့ရှိရသဖြင့် မေးမြန်းကြည့်ရာ တောင်ငူမြို့နယ်၊ ကံကိုးကျေးရွာအုပ်စု၊ အင်းပုတ်ကျေးရွာ ဘဲမွေးမြူရေးမှဖြစ်ကြောင်း သိရှိရပါသည်။ ၂၀၂၂ ခုနှစ်၊ ဧပြီလ ၅ ရက်နေ့တွင် စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူသည် အင်းပုတ်ကျေးရွာသို့ သွားရောက်၍ ဘဲမွေးမြူရေးလုပ်ငန်းရှင် ဦးသိန်းအား တွေ့ဆုံမေးမြန်းခဲ့ပါသည်။

              ၎င်းဘဲမွေးမြူရေးလုပ်ငန်းတွင် ဘဲအကောင် ၄၀၀၀ မွေးမြူထားပြီး တစ်ရက်လျှင် ဘဲဥ အလုံးရေ ၁၅၀၀ မှ ၁၈၀၀ အထိရကြောင်း သိရပါသည်။ အစာအဖြစ် ဆန်ကွဲသေးနှင့် ပုဇွန်ခွံတို့ကို ရောစပ်ကျွေးကြောင်း၊ ဆန်ကွဲသေး ပိဿာ ၃၀ တစ်အိတ်လျှင် ၂၄၅၀၀ ကျပ်၊ ပုဇွန်ခွံ တစ်အိတ်လျှင် ၃၈၀၀၀ ကျပ် ဝယ်ရကြောင်း၊ ဆန်ကွဲ ၆ အိတ်နှင့် ပုဇွန်ခွံ ၂ အိတ် ရောစပ်ပြီးကျွေးကြောင်း၊ တစ်ရက်လျှင် အစာ ၂ အိတ်ကုန်ကြောင်း သိရပါသည်။

              ဘဲပေါက်များကို ပဲခူးမြို့မှ ဝယ်ယူကြောင်း၊ ၆ လဆက်တိုက်ဥပြီး ၆ လနားပါကြောင်း၊ အရွယ်ရောက် ဥဘဲမတစ်ကောင်လျှင် ၇၀၀၀ ကျပ်၊ အထီးတစ်ကောင်လျှင် ၅၀၀၀ ကျပ် ရောင်းရကြောင်း၊ အင်းပုတ်ကျေးရွာ အနီးအနားရှိ ကျေးရွာများမှ တပိုင်တနိုင်မွေးမြူလိုသူများ လာဝယ်ကြောင်း၊ ဥတုံးဘဲမတစ်ကောင် ၃၅၀၀ ကျပ် ရောင်းရကြောင်း၊ ဘဲဥရောင်းချမှုအနေဖြင့် အလုံးသေး ၁၆၀ ကျပ်၊ အလုံးလတ် ၁၈၀ ကျပ်နှင့် အလုံးကြီး ၂၀၀ ကျပ်ရောင်းရကြောင်း သိရပါသည်။

            ယခုအခါတွင် နွေစပါးများစိုက်ပျိုးထားရှိရာ အနှံများထွက်လာပြီ ဖြစ်သောကြောင့်ဘဲများကို လယ်ကွင်းထဲတွင် လွတ်ကျောင်းခြင်းမပြုဘဲ ခြံလှောင်၊ ရေချ၊ အစာကျွေးပြုလုပ်ရသဖြင့် အစာဖိုးကုန်ကျပါကြောင်း၊ လယ်ကွင်းထဲသို့ လွှတ်ကျောင်းရချိန်တွင် အစာဖိုးကုန်ကျမှုနည်းသဖြင့် အမြတ်ရပါကြောင်း ဘဲမွေးမြူရေးလုပ်ငန်းရှင်ဦးသိန်း၏ ပြောပြချက်အရ သိရှိရပါသည်။

Bago(ပဲခူး)