ပြည်တွင်းကုန်သွယ်မှုသတင်း

ထိုင်း အစားအစာ ပြည်ပတင်ပို့မှု ၅ % တိုးတက်မည်ခန့်မှန်း

          ရုရှား ယူကရိန်းပဋိပက္ခနှင့် နိုင်ငံအများအပြားတို့တွင် အစားအစာ မလုံလောက်မှုအ‌ပေါ် စိုးရိမ်မှုများ‌ကြောင့် ယခုနှစ်အတွက် ထိုင်းအစားအစာပြည်ပတင်ပို့မှုအနေဖြင့် ပထမသုံးလပတ်တွင် ၂၆ % တိုးတက်ခဲ့ပြီးနောက် ယခုနှစ်တစ်နှစ်လုံးအတွက် ၅% တိုးတက်မည်ဟု ထိုင်းအစားအစာ ပြည်ပတင်ပို့သူများကမျှော်မှန်းထားကြကြောင်း၊ ထိုင်းအစားအစာထုတ်လုပ်သူများအသင်းဂုဏ်ထူး ဆောင်ဥက္ကဋ္ဌက ရုရှား ယူကရိန်းပဋိပက္ခကြောင့် နိုင်ငံအများအပြားတို့အနေဖြင့်အစားအစာဖူလုံရေး နှင့်ပတ်သက်၍ စိုးရိမ်ပူပန်မှုများတိုးပွားလာကာ အစားအစာတင်သွင်းသူများအနေဖြင့်လည်း အစား အစာပြတ်လပ်မှုမရှိစေရေးအတွက် အရှိန်မြှင့်တင်ဆောင်ရွက်လျှက်ရှိကြကြောင်း၊ ထိုင်းနိုင်ငံသည် ရုရှား ယူကရိန်းပဋိပက္ခမှ အကျိုးအမြတ်ရရှိခဲ့ပြီး ပထမသုံးလပတ်တွင်ထိုင်းဘတ်ငွေ(၃၂၄) ဘီလီယံ အထိတင်ပို့နိုင်ခဲ့ပြီး ထိုင်းဘတ်ငွေအားနည်းခြင်းကလည်းအဓိကမောင်းနှင်အားတစ်ရပ်ဖြစ်ခဲ့ကြောင်း‌၊ အများဆုံးတင်ပို့နိုင်ခဲ့သည့် ထုတ်ကုန်(၁၀)မျိုးတွင်  အပင်နှင့်တိရစ္ဆာန်များမှ အဆီနှင့်စားသုံးနိုင်သောဆီ များ၊ သကြား၊ တင်လဲရည်၊ အစေ့အဆံများ၊ ပြောင်း၊ အသားများနှင့် အခြားစားသုံးနိုင်သောတိရစ္ဆာန် အစိတ်အပိုင်းများ၊ရေဘဝဲ၊အိမ်မွေးတိရစ္ဆာန်၊အစားအစာများ၊ ဆန်၊ငါးနှင့်ဟင်းခတ်အမွှေးအကြိုင်များ ပါဝင်ကြောင်း၊ တရုတ်နိုင်ငံအနေဖြင့် Zero Covid Policy  အရ  အဓိကနယ်စပ်စစ်ဆေးရေးဂိတ်များကို ပိတ်လိုက်ခြင်းကြောင့် လတ်ဆတ်၊ အေးခဲနှင့် အခြောက်ခံထားသော သစ်သီးဝလံများမှလွဲ၍ အစား အစာထုတ်ကုန်အများစုမှာ ပထမသုံးလပတ်တွင် တိုးတက်တင်ပို့နိုင်ခဲ့ကြောင်းသိရှိရပါသည်။

(ရင်းမြစ်- ဘန်ကောက်မြို့စီးပွားရေးသံမှူးပေးပို့သည့်သတင်း)

စီးပွားရေးစင်္ကြန်သစ်များအတွက် အခွင့်အရေးများပေးရန်ပြင်ဆင်လျှက်ရှိ

          ထိုင်းအစိုးရအနေဖြင့် စီးပွားရေးစင်္ကြန်(၄)ခုတို့တွင် ထုတ်ကုန်များ၏တန်ဖိုးကို မြှင့်တင်သွား ရန်နှင့်လူ့စွမ်းအားအရင်းအမြစ်ဖွံ့ဖြိုးတိုးတက်ရေးတို့အတွက် BCG စီးပွားရေးဟုခေါ်သည့်Bio၊ Circular နှင့် Green Economy လုပ်ငန်းများ၊ တီထွင်ဆန်းသစ်မှုနှင့် အဆင့်မြင့်နည်းပညာများ၊ R & D စသည့် လုပ်ငန်းများတွင် ရင်းနှီးမြှုပ်နှံသူများအား အမြင့်ဆုံးမက်လုံးများပေး၍ကမ်းလှမ်းသွားရန် စီစဉ်ထား ရာ အဆိုပါမက်လုံးအသစ်များကို ဝန်ကြီးချုပ် ပရာယွတ် ဉီး‌ဆောင်သည့် ရင်းနှီးမြှုပ်နှံမှုဘုတ်အဖွဲ့ အစည်းအဝေးတွင်မကြာမီဆုံးဖြတ်လိမ့်မည်ဖြစ်ကြောင်း၊ဝန်ကြီးချုပ်ဦးဆောင်သည့်အထူးစီးပွားရေး ဇုန်မူဝါဒကော်မတီက မေလ(၅)ရက်နေ့တွင် အထူးစီးပွားရေးဇုန်(၄)ခုကိုအတည်ပြုပေးခဲ့ပြီး အဓိက အားဖြင့် အရှေ့ပိုင်းစီးပွားရေးစင်္ကြန်နှင့်ဆင်တူဖြစ်စေရန်ရည်ရွယ်ကြောင်း၊ ဒေသတွင်းစီးပွားရေးကို မြှင့်တင်ရန်နှင့် တိုင်းဒေသကြီးများသို့ ဝင်ငွေနှင့်ပတ်သက်၍ ဗဟိုချုပ်ကိုင်မှုကိုဖြန့်ဝေပေးရန်ဖြစ် ကြောင်း၊ အဆိုပါဇုန်အသစ်(၄)ခုဖြစ်သည့် မြောက်ပိုင်းစီးပွားရေးစင်္ကြန်တွင် Digital ဗဟိုအချက် အခြာအဖြစ်မြှင့်တင်ရန် သတင်းဆက်သွယ်ရေး ကွန်ယက်ချိတ်ဆက်မှု၊ Smart City စီမံကိန်းနှင့် အော်ဂဲနစ်အစားအစာတို့အတွက် အခြေခံအဆောက်အဉီများကို ထောက်ပံ့ပေးရန်တို့အား အထူး အာရုံစိုက်သွားမည်ဖြစ်ကြောင်း‌၊ အရှေ့မြောက်ပိုင်းစီးပွားရေးစင်္ကြန်တွင် ဇီဝစီးပွားရေးနှင့် ၎င်း၏ ထောက်ပံ့ရေးကွင်းဆက်အတွက် ထုတ်လုပ်မှုအခြေစိုက်စခန်းဖြစ်လာရန် မျှော်မှန်းထားကြောင်း၊ အနောက်ပိုင်း ဗဟိုစီးပွားရေးစင်္ကြန်တွင် အော်ဂဲနစ်အစားအစာထုတ်လုပ်ရေး အခြေစိုက်စခန်း ဖြစ် လာစေရန်နှင့် Smart လယ်ယာစိုက်ပျိုးရေးမျှော်မှန်းထားပြီး အရှေ့ပိုင်းစီးပွားရေးစင်္ကြန်၊ မြန်မာ စသည်တို့နှင့် ကွန်ယက်ချိတ်ဆက်ဆောင်ရွက်သွားကာ ဖွံ့ဖြိုးတိုးတက်လာစေရန် ရည်ရွယ်ထား ကြောင်း၊ တောင်ပိုင်းစီးပွားရေးစင်္ကြန်တွင် မြေယာ၊ ရေကြောင်း၊ စွမ်းအင်၊ဒီဂျစ်တယ်နှင့်လူ့စွမ်းအား စသည့်နယ်ပယ်(၅)ခုတွင် ချိတ်ဆက်မြှင့်တင်သွားရန်ရည်ရွယ်ပြီး လယ်ယာကဏ္ဍ၊ ဇီဝ-ဓါတုနှင့်ဇီဝ စီးပွားရေးနှင့် ကျန်းမာရေးခရီးသွားလုပ်ငန်းတို့တွင် နည်းပညာနှင့် R & D တို့အတွက် အခြေခံ အဆောက်အဦ ဖွံ့ဖြိုးတိုးတက်ရေးကိုထောက်ပံ့ကူညီရန် ဒီဇိုင်းထုတ်ထားကြောင်းသိရှိရပါသည်။

(ရင်းမြစ်- ဘန်ကောက်မြို့စီးပွားရေးသံမှူးပေးပို့သည့်သတင်း)

ကမ္ဘာ့နိုင်ငံအသီးသီး၏ပို့ကုန်ကန့်သတ်ချက်များမြင့်တက်လာ

          ကမ္ဘာ့စားနပ်ရိက္ခာဈေးနှုန်းများ စံချိန်တင်မြင့်တက်လာခြင်း၊ စွမ်းအင်နှင့်ဓါတ်မြေဩဇာ ကုန် ကျစရိတ်များမြင့်တက်လာခြင်းနှင့်ရုရှားနှင့်ယူကရိန်းပဋိပက္ခတို့ကြောင့် နိုင်ငံအချို့သည်အစားအစာ တင်ပို့မှုကန့်သတ်ချက်များကို စတင်စေခဲ့ကြောင်း၊ မေလလယ်အထိ နိုင်ငံတကာ စားနပ်ရိက္ခာမူဝါဒ သုတေသနအဖွဲ့အစည်း(IFPRI)သည် အစားအစာနှင့်ဓါတ်မြေဩဇာထုတ်ကုန်များပေါ် တင်ပို့မှု ကန့် သတ်ပြုလုပ်ထားသည့်နိုင်ငံပေါင်း ၂၃ နိုင်ငံကိုမှတ်တမ်းတင်ခဲ့ကြောင်း၊ ပို့ကုန်ကန့်သတ်ချက်များ သည် ပို့ကုန်များကို ရပ်တန့်ရန်(သို့)ရပ်တန့်ရန်ရည်ရွယ်သောမူဝါဒများဖြစ်ကြောင်း၊ စားနပ်ရိက္ခာ တင်ပို့မှုကန့်သတ်ချက်များသည် ပြည်တွင်း စားနပ်ရိက္ခာဈေးနှုန်းများကို လျှော့ချရန်နှင့် ပြည်တွင်း စားနပ်ရိက္ခာ ဖူလုံမှုကို မြှင့်တင်ရန်ရည်ရွယ်ကြောင်း၊ ပို့ကုန်ကန့်သတ်ရေးမူဝါဒများတွင် ပို့ကုန်ခွန် ကောက်ခံခြင်း၊ ပို့ကုန်လိုင်စင်ခွင့်ပြုချက်လိုအပ်ခြင်းနှင့် ပို့ကုန်တားမြစ်ခြင်းတို့ပါဝင်ကြောင်း၊ ပို့ကုန် ကန့်သတ်ခြင်းကို တစ်နိုင်ငံတည်း‌ဆောင်ရွက်ပါက အချို့‌သောအခြေအနေများတွင် ပြည်တွင်း ဈေးနှုန်းများကိုလျှော့ချရန် အလားအလာရှိသော်လည်း နိုင်ငံအများအပြားက ကန့်သတ်ချက်ကို ကျင့်သုံးလာသည်နှင့်အမျှဈေးနှုန်းမတည်ငြိမ်မှု၊ထိတ်လန့်တကြားဝယ်ယူမှု၊ရှားပါးမှုနှင့်သိုလှောင်မှုတို့ ဖြစ်နိုင်ချေပိုများလာနိုင်ကြောင်း၊ ယနေ့အထိ ကမ္ဘာ့ဈေးကွက်အပေါ် သက်ရောက်မှုအကြီးဆုံး အစားအစာတင်ပို့မှုကန့်သတ်ချက်များမှာ အင်ဒိုနီးရှားက စားအုန်းဆီတင်ပို့မှုကို တားမြစ်ထားခြင်း၊ အိန္ဒိယနိုင်ငံက ဂျုံတင်ပို့မှုထိန်းချုပ်ထားခြင်းနှင့် ရုရှားက အစေ့အဆံ၊ဆီထွက်သီးနှံများနှင့် သကြား တင်ပို့မှုကိုကန့်သတ်ထားခြင်းနှင့် ကာဇက်စတန် က ဂျုံနှင့်ဂျုံမှုန့်ကိုခွဲတမ်းဖြင့် တင်ပို့စေခြင်းတို့ဖြစ် ကြောင်း၊ ဩစတြေးလျ သည်  ၂၀၂၂-၂၀၂၃ ခုနှစ် သီးနှံစိုက်ပျိုးရာသီအတွက် အပြုသဘောဆောင် သော အလားအလာကောင်းများရှိနေရာ ဩစတြေးလျ ပို့ကုန်လုပ်ငန်းရှင်များသည် ပို့ကုန်ကန့်သတ် ချက်များကြောင့် ဖန်တီးထားသောထောက်ပံ့မှုဆိုင်ရာကွာဟချက်အချို့ကို ဖြည့်ဆည်းပေးနိုင်မည့် အနေအထားသို့ရောက်ရှိနေကြောင်း၊ ကမ္ဘာ့ဈေးကွက်တွင် မသေချာမရေရာမှုများ တိုးတက်လာနေ ချိန်တွင် ဩစတြေးလျ၏အရည်အသွေးမြင့် စိုက်ပျိုးမွေးမြူရေးထုတ်ကုန်များကို ယုံကြည်စိတ်ချရ သောကုန်ပစ္စည်းများထောက်ပံ့သူဖြစ်ရေး ဂုဏ်သတင်းက အထူးအရေးကြီးကြောင်းသိရှိရပါသည်။

(ရင်းမြစ်-ကင်ဘာရာမြို့စီးပွားရေးသံမှူးပေးပို့သည့်သတင်း)

အင်ဒိုနီးရှားစားအုန်းဆီမူဝါဒပြောင်းလဲပြန်

          အင်ဒိုနီးရှားနိုင်ငံစက်မှုဝန်ကြီးဌာနက ဟင်းချက်ဆီလက်ကားရောင်းဈေးအတွက်  အစိုးရက ထောက်ပံ့ကြေးပေးသည့်အစီအစဉ် ရုပ်သိမ်းခြင်းကို ဇွန်လ (၇)ရက်နေ့မှစ၍သက်ရောက်သည်ဟု ကြေညာခဲ့ကြောင်း၊စားအုန်းဆီထုတ်လုပ်သူများက အဓိကကျသည့် စားသောက်ကုန်ဖြစ်သော ဟင်း ချက်ဆီကို ဈေးကွက်ပေါက်ဈေးထက်လျော့နည်းနေသော အစိုးရပြဌာန်းသည့်ဈေးနှုန်းဖြင့် ရောင်းချ ပေးရသည့်အတွက် စားအုန်းဆီထုတ်လုပ်သူများကို အစိုးရက ထောက်ပံ့ကြေးပေးအပ်နေသော အစီ အစဉ်ကို ရပ်ဆိုင်းလိုက်ခြင်းဖြစ်ကြောင်း‌၊ ကမ္ဘာ့စားအုန်းဆီကြမ်း Crude Palm Oil (CPO) ဈေးနှုန်း များ မြင့်တက်နေသည့်အလျောက် အင်ဒိုနီးရှား ပြည်တွင်း စားအုန်းဆီသန့်ဈေးနှုန်းက  တစ်လီတာ လျှင် ရူပီးယား ၂၀၀၀၀ ပေါက်ဈေး ဖြစ်နေချိန်တွင်  အစိုးရသတ်မှတ်သည့်ဈေးနှုန်း တစ်လီတာ လျှင် ရူပီးယား ၁၄၀၀၀ (၀.၉၆ ဒေါ်လာ)ဖြင့် စားအုန်းဆီထုတ်လုပ်သူများက ဈေးကွက်ကို ‌ပေးသွင်း ကြရကြောင်း၊ နစ်နာသည့်ဈေးနှုန်းကွာဟချက်ကို အစိုးရထံတွင်လျှောက်ထားပြီး ထောက်ပံ့ကြေး ရယူသည့်အစီအစဉ်ကိုရုပ်သိမ်းလိုက်ခြင်းဖြစ်ကြောင်း၊ ထောက်ပံ့ကြေးကို စားအုန်းဆီထောက်ပံ့ရေး ရန်ပုံငွေဌာန (Palm Oil Support Fund Agency)က ထုတ်ပေးနေရာ အဆိုပါထောက်ပံ့ကြေး ပေး သည့်အစီအစဉ်ကို ၂၀၂၂ ခုနှစ်၊မေလ(၃၁)ရက်တွင် ရပ်ဆိုင်းခဲ့ကြောင်း၊ထောက်ပံ့ကြေးအစီအစဉ်ကို လက်ကား ဟင်းချက်ဆီ ပြည်သူ့အစီအစဉ် Bulk cooking oil public program အစီအစဉ်ဖြင့် အစားထိုးလိုက်ကြောင်း‌၊ ၎င်းအစီအစဉ်က အများဆုံးဈေးနှုန်းများနှင့် ပြည်တွင်းဈေးကွက်အတွက်  ဟင်းချက်ဆီထုတ်လုပ်ရန် စားအုန်းဆီကြမ်းခွဲတမ်းများကိုလည်း ချမှတ်ကြောင်း၊ ကုန်သွယ်ရေး ဝန်ကြီးဌာန၊စိုက်ပျိုးစက်မှုဌာန ညွှန်ကြားရေးမှူးချုပ်က အစိုးရသတ်မှတ်ဈေးနှုန်းဖြင့် မပျက်မကွက် ရောင်းချရသည့်အတွက် နစ်နာရခြင်းများကို ငွေကြေးအစား ပြည်ပပို့ကုန် ခွဲတမ်းယူမည်လားဟု ကုမ္ပဏီ(၆၁)ခုအားမေးမြန်းခဲ့ရာ (၃၅) ခုက ပြည်ပတင်ပို့ရန် ခွဲတမ်းရယူလိုသည်ဟု ဖြေကြားခဲ့ကြ ကြောင်း၊ ကုမ္ပဏီ( ၆၁ )ခုတွင် ( ၅) ခုသာထောက်ပံ့ကြေးထုတ်ယူခဲ့သော်လည်း ကျန်ကုမ္ပဏီများက လိုအပ်သောစာရွက်စာတမ်းများတင်ပြရန် ပျက်ကွက်နေကြကြောင်း၊ မူဝါဒအသစ်အကြိုကာလ၌ အစိုးရက ဟင်းချက်ဆီလက်ကားဈေးနှုန်းကို အများဆုံးဈေးနှုန်း တစ်ကီလိုလျှင် ရူပီးယား ၁၅၅၀၀ သတ်မှတ်ထားပြီး ဈေးကွက်ပေါက်ဈေးက တစ်ကီလိုလျှင် ၁၆၆၂၀ ဖြစ်ကြောင်းသိရှိရပါသည်။

(ရင်းမြစ်-Myanmar Food Guide မှရရှိသည့်သတင်း)

သစ်သီးတင်ကားများအား ဇွန်လ(၁ )ရက်နေ့မှ စတင်၍ စစ်ဆေးမှုများဖြေလျှော့ပေး

          မြန်မာတရုတ်နယ်စပ်ဝမ်တိန်ဘက်မှ တရုတ်ပြည်မထဲသို့ထွက်ခွာမည့် သစ်သီးတင်ကားများ အား၂၀၂၂ ခုနှစ်၊ဇွန်လ(၁)ရက်နေ့မှစ၍ တရုတ်နိုင်ငံဘက်မှ စစ်ဆေးမှုများ ဖြေလျှော့ပေးခဲ့သည်ဟု မူဆယ်ကုန်စည်ဒိုင်အသင်းဥက္ကဋ္ဌက ဆင်ဟွာသတင်းသို့ပြောကြားခဲ့ကြောင်း၊ ယခင်က သစ်သီးကား များကို  နေရာ ၅ ခုခန့်၌ဆေးဖြန်းပြီး ယခု နေရာ ၂ ခု ခန့်၌သာဆေးဖြန်းရပြီး ဆေးဖြန်းဂိတ်များ လျှော့ပေးသော်လည်း လက်ရှိတွင် ယာဉ်မောင်းများကို အစားထိုးဖြင့်သာသွားရကြောင်း၊ကိုဗစ် ၁၉ ရောဂါနှင့်ပတ်သက်၍ ယခင်ကစာရွက်စာတမ်း ၄ မျိုးခန့်လိုသော်လည်းယခု ၂ မျိုးခန့်သာယူရ သဖြင့်သစ်သီးတင်ကားများနှင့်ပတ်သက်၍ဖြေလျှော့မှုများစွာဆောင်ရွက်ခဲ့ကြောင်း၊ ဆေးဖြန်းသည့် ဖြေလျှော့မှုများပေးသဖြင့်သစ်သီးများညှိုးနွမ်းမှုနည်းပါးသွားပြီးအသီးကားများအဆင်ပြေလာသကဲ့သို့ သစ်သီးကားများအချိန်ကြာရှည်စောင့်ဆိုင်းရခြင်းမလိုအပ်တော့သဖြင့် ကုန်သည်များအနေဖြင့် ဇွန်လ(၁)ရက်နေ့မတိုင်ခင်နှင့်နှိုင်းယှဉ်ပါကပိုမိုအကျိုးရှိလာကာမြန်မာတရုတ်နယ်စပ်ဂိတ်ဖြစ်သောကျင်စန်းကျော့ဂိတ်၌ နေ့စဉ်ကုန်တင်ယာဉ် အစီး(၄၀)ခန့်အဝင်အထွက်ရှိပြီးလက်ရှိတွင် မြန်မာ့ သရက်သီးများ တင်ပို့မှုများနေသည်ဟု အသင်းဥက္ကဋ္ဌက ပြောကြားခဲ့ကြောင်းသိရှိရပါသည်။

(ရင်းမြစ်-Myanmar Food Guide မှရရှိသည့်သတင်း)

             ယခင်နှစ်မေလတွင် မုံရွာမြို့နယ်၌ မန်ကျည်းအသားထိပ်စ တစ်ပိဿာလျှင် ကျပ် ၅၀၀၀၊ အသား အလတ်စ တစ်ပိဿာကျပ် ၄၀၀၀ နှင့် အသားအောက်စ တစ်ပိဿာကျပ် ၃၀၀၀ တို့ဖြင့် အရောင်းအဝယ်ဖြစ်ခဲ့ပြီး မန်းကျည်းအကြောမပါ အလုံးတစ်ပိဿာ ၆၀၀၀ကျပ်ဖြင့် အရာင်းအဝယ် ဖြစ်ခဲ့ကြောင်း သိရှိရပါသည်။

          ယခုနှစ်ဈေးနှုန်းအနေဖြင့် မေလတွင် မန်ကျည်းအသားထိပ်စ တစ်ပိဿာကျပ် ၆၀၀၀၊ အလတ်စတစ်ပိဿာ ကျပ် ၅၀၀၀၊ အောက်စတစ်ပိဿာလျှင် ကျပ်၄၀၀၀ နှင့် မန်ကျည်း အကြောမပါတစ်ပိဿာ ကျပ်၇၀၀၀ တို့ဖြင့် အရာင်းအဝယ်ဖြစ်နေသဖြင့် ကာလတူဈေးနှုန်း နှိုင်းယှဉ်ပါက ဈေးနှုန်းမြင့်တက်နေကြောင်း တွေ့ရှိရပါသည်။

          မုံရွာမြို့နယ်ထွက် မန်ကျည်းများကို မန္တလေးပွဲရုံများသို့ တစ်ပတ်လျှင် ကုန်ချိန်တစ်သောင်းခန့် တင်ပို့ရောင်းချရကြောင်း၊ ယခင်နှစ်က မန်ကျည်းဈေးနှုန်းလျှော့နည်းခဲ့သောကြောင့် အရောင်းသွက်ခဲ့ပြီး ယခုနှစ်တွင် ဈေးနှုန်းမြင့်သော်လည်း အရောင်းအဝယ်အေးခဲ့ကြောင်း သိရပါသည်။ ယခုနှစ် မုံရွာမြို့နယ်အတွင်း မန်းကျည်းအသားလက်ကျန် ငါးသိန်းခွဲခန့်ရှိပြီး အကြောမပါမန်ကျည်းသီး အလုံးလက်ကျန် တစ်သိန်းခွဲခန့် ရှိနိုင်ကြောင်း သိရှိရပါသည်။

DOCA(စစ်ကိုင်း)

             မန္တလေးတိုင်းဒေသကြီး ၊ ကျောက်ဆည်ခရိုင်တွင် ပဲတီစိမ်း (မိုးကြို/မိုး)ကို ၂၀၂၀ - ၂၀၂၁ ဘဏ္ဍာနှစ်တွင် (၁၅၀၁၁)ဧက စိုက်ပျိုးခဲ့ပြီး ယခုနှစ် ၂၀၂၁-၂၀၂၂ဘဏ္ဍာနှစ်တွင် ကျောက်ဆည်မြို့နယ်တွင် (၉၈၈၁)ဧက ၊ စဉ့်ကိုင်မြို့နယ်တွင်(၆၆၇၄)ဧက ၊ မြစ်သားမြို့နယ်တွင် (၃၁၂၃)ဧက ၊ တံတားဦးမြို့နယ်တွင် (၂၂၄)ဧက၊စုစုပေါင်း(၁၉၉၀၂)ဧက စိုက်ပျိုးလျှက်ရှိပြီး ယခင်နှစ်ထက် (၄၈၉၁) ဧက ပိုမိုစိုက်ပျိုးကြောင်း သက်ဆိုင်ရာဌာန၏ စာရင်းများအရသိရှိရပါသည် ။  ပဲတီစိမ်းမျိုးအနေဖြင့် ကျောက်စိမ်းမျိုး ၊ ရေဆင်း(၁၁)မျိုးများကိုသာ အများဆုံးစိုက်ပျိုးကျပြီး တစ်ဧကလျှင် မျိုးစေ့(၅-၆) ပြည်ခန့်ကုန်ကျကြောင်း၊ မျိုးစျေးနှုန်းအနေဖြင့် တစ်ပြည်လျှင်(၅၀၀၀/-)ကျပ်နှုန်းဖြင့်ဝယ်ယူစိုက်ပျိုးရပြီး တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ စုစုပေါင်း(၂၇၀၀၀၀/-)ကျပ်ဝန်းကျင် ကုန်ကျကြောင်းသိရှိရပါသည်။ ပဲတီစိမ်း(မိုးကြို/မိုး)ကို မတ်လတွင်စိုက်ပျိုးကြပြီး ယခုအချိန်တွင် ပဲတီစိမ်းများ စတင်ထွက်ရှိနေပြီ ဖြစ်ပါသည် ။ အထွက်နှုန်းအနေဖြင့် တစ်ဧကလျှင်(၁၀-၁၂)တင်းခန့် ထွက်ရှိကြောင်း ၊ ပဲတီစိမ်းစျေးနှုန်းအနေဖြင့် ကျောက်ဆည်ပွဲရုံများ၌ ပဲတီစိမ်းတစ်တင်းလျှင် (၄၈၀၀၀/-)ကျပ်စျေးနှုန်းများဖြင့် အရောင်းအဝယ်ဖြစ်နေပြီး တစ်ဧကအကျိုးအမြတ်အနေဖြင့် (၂၁၀၀၀၀/-)ကျပ်ဝန်းကျင်ခန့်ရရှိကြောင်း ၊ ကျောက်ဆည်မြို့နယ်၊ သံချပ်ကုန်းကျေးရွာရှိ တောင်သူတစ်ဦး၏ ပြောပြချက်အရ သိရှိရပါသည်။

DOCA(မန္တလေး)

           ရခိုင်ပြည်နယ်၊ ဘူးသီးတောင်မြို့နယ်၌ မေလအတွင်း ဓါတ်မြေဩဇာဈေးကွက်မှာ ယခင်နှစ်ထက် ဈေးနှုန်းနှစ်ဆခန့် မြင့်တက်လာပြီး အရောင်းအဝယ်ပုံမှန်ရှိနေကြောင်း သိရှိရပါ သည်။

          ၂၀၂၂ ခုနှစ် မေလဒုတိယပတ်အတွင်း အရောင်းအဝယ်ဖြစ်နေသော ဈေးနှုန်းများမှာ သံကွင်း (P₂O₅ 46% 50Kg)  တစ်အိတ်လျှင် ကျပ် ၈၉၀၀၀၊ Urea (ကော်မတ်) 50Kg တစ်အိတ်လျှင် ကျပ် ၉၁၅၀၀၊ Urea (ရွှေတောင်) 50Kg တစ်အိတ်လျှင် ကျပ် ၉၂၀၀၀၊ ဈေးကွက်ဖြစ်ပေါ်ခဲ့ပြီး မေလနောက်ဆုံးပတ်တွင် (P₂O₅ 46% 50Kg)  တစ်အိတ်လျှင် ကျပ် ၉၄၀၀၀၊ Urea (ကော်မတ်၊ ရွှေတောင်) 50Kg တစ်အိတ်လျှင် ကျပ် ၉၅၀၀၀ ဈေးနှုန်းဖြင့် အရောင်းအဝယ်ဖြစ်ပေါ်နေပြီး ဓါတ်မြေဩဇာ အရောင်းအဝယ်ပြုလုပ်နေသော ကုန်သည်များလက်ဝယ်တွင် လက်ကျန်နည်းပါး နေပါသဖြင့် စိုက်ပျိုးရာသီဖြစ်သော ဇွန်လတွင် သံကွင်း (P₂O₅ 46% 50Kg)  တစ်အိတ်လျှင် ကျပ်  ၁၀၀၀၀၀၊ Urea (ကောမတ်၊ ရွှေတောင်) 50Kg တစ်အိတ်လျှင် ကျပ် ၁၀၀၀၀၀ အထိ ဈေးနှုန်းမြင့်တက်နိုင်ကြောင်း လေ့လာသိရှိရပါသည်။

DOCA(ရခိုင်)

           မကွေးတိုင်းဒေသကြီးသည်  မြန်မာနိုင်ငံအလယ်ပိုင်း မြောက်လတ္တီတွဒ်(၁၈ ဒီဂရီ ၅၂ မိနစ်) နှင့် (၂၂ ဒီဂရီ ၄၃ မိနစ်)အကြား၊ အရှေ့လောင်ဂျီတွဒ် (၉၃ ဒီဂရီ ၅၂ မိနစ် နှင့် ၉၅ ဒီဂရီ ၅၁ မိနစ်) အကြားတည်ရှိပြီး (၁၇၃၀၅.၃၂)စတုရန်းမိုင်ကျယ်ဝန်းပြီး အရှေ့ဘက်တွင် မန္တလေးတိုင်းဒေသကြီး၊ နေပြည်တော်ကောင်စီနယ်မြေ တောင်ဘက်တွင် ပဲခူးတိုင်းဒေသကြီး၊ အနောက်ဘက်တွင် ချင်းပြည်နယ်နှင့် ရခိုင်ပြည်နယ်၊ မြောက်ဘက်တွင် စစ်ကိုင်းတိုင်းဒေသကြီးတို့နှင့် နယ်နမိတ်ချင်းထိစပ်လျှက်ရှိပြီး လူဦးရေ(၄)သန်းကျော်ရှိ၍ ကျေးလက်နေလူဦးရေမှာ (၈၅)ရာခိုင်နှုန်းဖြစ်ပါသည်။

          ယခုအခါ နိုင်ငံတော်မှ စားသုံးသူပြည်သူများ ကျန်းမာရေးနှင့်ညီညွတ်သော စားသုံးဆီများ သုံးစွဲနိုင်ရေးအတွက် ပြည်ပမှ စားအုန်းဆီတင်သွင်းမှုကို ယခင်က တစ်လလျှင် တန်ချိန် (၈၀၀၀၀) ခန့် တင်သွင်းနေရာမှ ယခုအခါ တစ်လတန်ချိန်(၅၀၀၀၀)အထိလျော့ချ၍ တင်သွင်းလျှက်ရှိရာ ပြည်တွင်း စားသုံးဆီသုံးစွဲမှုဖူလုံစေရေးအတွက် ဆီအိုးကြီးတိုင်းဖြစ်သည့် မကွေးတိုင်းဒေသကြီးမှလည်း ဆီထွက်သီးနှံများ တိုးချဲ့စိုက်ပျိုးရန် စီမံချက်များ ချမှတ်ဆောင်ရွက်ရသည့်အခြေအနေသို့ ရောက်ရှိလာခဲ့ပါသည်။ မကွေးတိုင်းဒေသကြီးအနေဖြင့် စားသုံးဆီထုတ်လုပ်မှု တိုးတက်မြင့်မားလာစေရေး အတွက် ဆီထွက်သီးနှံစိုက်ပျိုးထုတ်လုပ်မှု တိုးတက်မြင့်မားလာစေရန်၊ တစ်ဧကအထွက်နှုန်း တိုးတက်လာစေရန်၊ ပြည်ပစားသုံးဆီသုံးစွဲမှုလျော့ချလာစေရန်၊ ပြည်ထောင်စု၏ စားသုံးဆီဖူလုံမှုအား အထောက်အကူပြုနိုင်စေရန်ရည်ရွယ်၍ တိုင်းဒေသကြီးအတွင်းရှိ စိုက်ပျိုးရေးဦးစီးဌာန၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၊ စက်မှုလယ်ယာဦးစီးဌာန၊ ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာန၊ ကျေးလက်ဒေသဖွံ့ဖြိုးရေးဦးစီးဌာန၊ သမဝါယမဦးစီးဌာန၊ သစ်တောဦးစီးဌာန၊ ကျန်းမာရေးဦးစီးဌာန၊ စာသုံးသူရေးရာဦးစီးဌာန၊ စက်မှုကြီးကြပ်၊ အသေးစား စက်မှုလက်မှုလုပ်ငန်းဦးစီးဌာန၊ ရင်းနှီးမြုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ စီမံကိန်းရေးဆွဲရေးဦးစီဌာန၊ အထွေထွေအုပ်ချုပ်ရေးဦးစီးဌာနများပါဝင်သော ဆီထွက်သီးနှံတိုးချဲ့စိုက်ပျိုးနိုင်ရေး လုပ်ငန်းကော်မတီကိုဖွဲ့စည်း၍ သက်ဆိုင်ရာဌာနများမှ တာဝန်ယူဆောင်ရွက်ရမည့် လုပ်ငန်းတာဝန်များကို ကျေပွန်စွာ ဆောင်ရွက်စေခြင်းဖြင့် စားသုံးဆီထုတ်လုပ်မှု တိုးမြှင့်ရေးအတွက် ဆောင်ရွက်လျက်ရှိကြောင်း သိရှိရပါသည်။

          မကွေးတိုင်းဒေသကြီးမှ ၂၀၂၁-၂၀၂၂ဘဏ္ဍာနှစ်တွင် မြေပဲ(၁၇၈၇၉၂)၊ နှမ်း(၁၄၅၈၈၈)၊ နေကြာ(၁၀၆၉၂)ဧက စိုက်ပျိုးခဲ့ပြီး စားသုံးဆီ(၁၅၉၇၀၃)မက်ထရစ်တန် ခန့်မှန်းထွက်ရှိခဲ့ပြီး တိုင်းဒေသကြီး၏ ဆီဖူလုံမှု(၃၈၈)ရာခိုင်နှုန်းရှိခဲ့ကြောင်း စိုက်ပျိုးရေးဦးစီးဌာန၏ ကိန်းဂဏန်းများအရ သိရှိရပါသည်။ ၂၀၂၂-၂၀၂၃ဘဏ္ဍာနှစ်တွင် တိုင်းဒေသကြီး၏ ဆီဖူလုံမှု (၅၁၇)ရာခိုင်နှုန်းရရှိရေးအတွက် မြေပဲ(၇၈၉၉၉၀)၊ နှမ်း(၁၂၄၂၃၅၆)၊ နေကြာ(၄၆၆၃၈၀)ဧက စိုက်ပျိုးသွားရန် စီမံကိန်းများ ရေးဆွဲဆောင်ရွက်လျှက်ရှိပြီး နေကြာသီးနှံကို တိုးချဲ့စိုက်ပျိုးနိုင်ရေး ဆောင်းနေကြာ၊ မိုးနေကြာ တို့ကို သီးထပ်/ညှပ်စနစ်များဖြင့် စိုက်ပျိုးသွားရန် ဆောင်ရွက်လျက်ရှိကြောင်း သိရှိရပါသည်။

          ၂၀၂၂-၂၀၂၃ဘဏ္ဍာနှစ်တွင် နေကြာစိုက်ဧက တိုးမြှင့်ရေးနှင့် အထွက်နှုန်းတိုးတက်စေရေးအတွက် နေကြာမျိုးကောင်း/သန့် ရှာဖွေစုဆောင်းခြင်းလုပ်ငန်းများကို (၂၀၂၁-၂၀၂၂)မီနီ ဘတ်ဂျက်တွင် မျိုးတင်းရေ (၅၀၀၀)ဝယ်ယူနိုင်ရန်အတွက် တိုင်းဒေသကြီးအစိုးရရန်ပုံငွေမှ ကျပ်သိန်း(၂၃၀၀) လျာထားဆောင်ရွက်ခဲ့ပြီး (၂၀၂၂-၂၀၂၃) မိုးရာသီတွင် (မျိုးသန့်)မျိုးစေ့ထုတ် ဧက(၈၀၀)နှင့် ဆောင်းတွင် ဧက (၃၀၀)စိုက်ပျိုးရန် လျာထားဆောင်ရွက်လျှက်ရှိပြီး စုဆောင်းထားရှိသည့် နေကြာမျိုးများမှာ သီးညှပ် စိုက်ဧကများအတွက် တိုင်းဒေသကြီးအစိုးရအဖွဲ့မှ တစ်ဧက(၁ပြည်)နှုန်း အခမဲ့ဖြန့်ဖြူး ဆောင်ရွက်သွားမည်ဖြစ်ကြောင်း၊ နေကြာမျိုးတင်း (၅၀၀၀)ကို တိုင်းဒေသကြီးအစိုးရရန်ပုံငွေမှ ဝယ်ယူရာတွင် မကွေးခရိုင်၌(၂၂၀၀)တင်း ကျပ်သိန်း(၁၀၀၀)၊ မင်းဘူးခရိုင်၌ (၁၉၅၀) တင်းကျပ် သိန်း (၉၀၀)၊ ပခုက္ကူခရိုင်၌(၆၅၀)တင်း ကျပ်သိန်း(၃၀၀)နှင့် သရက်ခရိုင်၌ တင်း(၂၀၀) ကျပ်သိန်း (၁၀၀)ဖိုး ခွဲဝေချထားပေးပြီး ကျခံသုံးစွဲသွားမည်ဖြစ်ကြောင်း သိရှိရပါသည်။ သီးသန့်စိုက်ဧကများအတွက် မျိုးစေ့လိုအပ်ချက်အား ယခုနှစ်ဆောင်းရာသီစိုက်ပျိုးထားသော ဧရိယာများမှ ထွက်ရှိလာသည့် မျိုးစေ့များအား တိုင်းဒေသကြီးရန်ပုံငွေမှ ၂၀၂၂-၂၀၂၃ဘဏ္ဍာနှစ်တွင် နေကြာမျိုးစေ့များ ထောက်ပံ့နိုင်ရေးကို နေကြာသီးနှံစိုက်ပျိုးမည့် တောင်သူများအား တိတိကျကျတာဝန်ပေး၍ သက်ဆိုင်ရာ ရာအိမ်မှူး၊ ဆယ်အိမ်မှူးများမှတဆင့် မျိုးစေ့များထုတ်ပေးနိုင်ရေးနှင့် အမှန်တကယ် စိုက်ပျိုးမှုရှိ/မရှိ စိစစ်ကြပ်မတ်သွားရန်  စီစဉ်ဆောင်ရွက်ထားရှိကြောင်း သိရှိရပါသည်။

          ပြည်ထောင်စု၏ စားသုံးဆီဖူလုံမှုအား အထောက်အကူပြုနိုင်စေရန်အတွက် ဆီထွက်သီးနှံများသာမက ဆီထွက်သီးနှံအုပ်စုဝင်အဖြစ် သတ်မှတ်ထားခြင်းမရှိသည့် စပါးမှ ဆန်သားဖြစ်လာစေရန် ကြိတ်ခွဲမှုဖြစ်စဉ်တွင် ဘေးထွက်ပစ္စည်းအဖြစ်ရရှိသည့် ဖွဲနုမှ စာသုံးဆီ ထုတ်ယူသွားရန်နှင့် စက်မှုကုန်ကြမ်းသီးနှံဖြစ်သည့် ဝါမှ စားသုံးဆီ ထုတ်လုပ်သွားရန်လည်း စီမံချက်ချဆောင်ရွက်လျှက်ရှိကြောင်း သိရှိရပါသည်။ ဖွဲနုမှ ထုတ်ယူရရှိသော ဖွဲနုဆီသည် ပြည့်ဝအဆီ(အက်ဆစ်)ပါဝင်မှု ရာခိုင်နှုန်း အလွန်နည်းခြင်း၊ မကောင်းသော ကိုလက်စထရောမြင့်တက်မှုကို ကာကွယ်ပေးနိုင်၍ နှလုံးကျန်းမာရေးကို အထောက်အကူပြုကြောင်း ပညာရှင်များက ထောက်ခံထားသည့်အတွက် တိုင်းဒေသကြီးအတွင်း ဖွဲနုဆီထုတ်လုပ်နိုင်သည့် စက်ရုံ(၁)ရုံ တည်ဆောက်နိုင်ပါက နိုင်ငံတော်၏ စားသုံးဆီ လိုအပ်ချက်ကို တစ်ဖတ်တစ်လမ်းမှ ဖြည့်ဆည်းပေးနိုင်မည်ဖြစ်သည့်အတွက် ဆီထွက်သီးနှံဖွံ့ဖြိုး တိုးတက်ရေးနှင့် ဆက်စပ်သော စိုက်ပျိုးခြင်း၊ ထုတ်လုပ်ခြင်း၊ ဖြန့်ဖြူးခြင်း အစရှိသည့် ရင်းနှီးမြုပ်နှံလိုသည့် ပုဂ္ဂလိကအသင်းအဖွဲ့၊ ကုမ္ပဏီများရရှိရေးကိုလည်း ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနမှ ချိတ်ဆက်ဆောင်ရွက်သွားရန် စီမံချက်များ ချမှတ်လျှက်ရှိကြောင်း သိရှိရပါ သည်။ မြန်မာနိုင်ငံတွင် (၁၉၆၂ မှ ၂၀၀၈-၂၀၀၉ ထိ) ဖွဲနုဆီထုတ်လုပ်ခြင်း လုပ်ငန်းကို နိုင်ငံပိုင်အဖွဲ့အစည်းဖြစ်သည့် မြန်မာ့လယ်ယာထွက်ကုန်ပစ္စည်းရောင်းဝယ်ရေးမှ တာဝန်ယူဆောင်ရွက်ခဲ့ရာ ဖွဲနုဆီစက်ရုံ တည်ဆောက်ရေးနှင့်စပ်လျဉ်း၍ နည်းပညာနှင့် အတွေ့အကြုံများရှိသည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ တာဝန်ယူဆောင်ရွက်သွားရန် တိုင်းဒေသကြီးအစိုးရအဖွဲ့မှ တာဝန်ပေးထားပါကြောင်း လေ့လာသိရှိရပါသည်။

      စက်မှုကုန်ကြမ်းသီးနှံဖြစ်သည့်ဝါကို မကွေးတိုင်းဒေသကြီးတွင် ၂၀၂၁-၂၀၂၂ဘဏ္ဍာနှစ်တွင် (၁၄၁၁၆၂)ဧက စိုက်ပျိုးခဲ့ပြီး ၂၀၂၂-၂၀၂၃ ဘဏ္ဍာနှစ်တွင် (၁၈၄၀၀၀)ဧက စိုက်ပျိုးသွားရန် လျာထားလျှက်ရှိပြီး ထွက်ရှိလာသောဝါကို ကြိတ်ခွဲကာ ဝါစေ့ဆီထုတ်လုပ်၍ ပြည်တွင်းစားသုံးဆီ လိုအပ်ချက်ကို တစ်ဖက်တစ်လမ်းမှ ဖြည့်ဆည်းဆောင်ရွက်သွားရန် စီစဉ်လျှက်ရှိကြောင်း သိရှိရပါသည်။

          ပြည်တွင်းစားသုံးဆီဖူလုံရေးအတွက် မကွေးတိုင်းဒေသကြီးအတွင်း ဆီထွက်သီးနှံစိုက်ဧက တိုးတက်ရေးဆောင်ရွက်မှုနှင့်အတူ တိုင်းဒေသကြီးအတွင်းရှိ ဆီစက်များ၏ ဆီကြိတ်အထွက်နှုန်း တိုးတက်ရေးအတွက် ဆီစက်များအား အဆင့်မြှင့်တင်နိုင်ရေးကိုလည်း စက်မှုကြီးကြပ်၊ အသေးစား စက်မှုလက်မှုလုပ်ငန်းများမှ ဆီစက်များ၏ကြိတ်ခွဲမှု၊ ထုတ်လုပ်မှု၊ ပဲဖတ်၊နှမ်းဖတ်များတွင် ဆီကျန်ရှိမှုရာနှုန်း၊ ဆီစက်လုပ်ငန်းရှင်များနှင့် ကန်ထရိုက်လယ်ယာစနစ် ဖော်ဆောင်ရေးလုပ်ငန်းများ ကြီးကြပ်ဆောင်ရွက်သွားရန် တာဝန်ခွဲဝေချထားပေးထားကြောင်း သိရှိရပါသည်။

          မကွေးတိုင်းဒေသကြီးသည် မြန်မာနိုင်ငံအလယ်ပိုင်း မိုးနည်းရေရှားရပ်ဝန်းတွင် တည်ရှိ၍ မိုးရေချိန်ပျမ်းမျှလက်မ(၄၀)ခန့်သာ ရရှိပါသည်။  တစ်နှစ်ပျမ်းမျှမိုးရွာရက်မှာလည်း ရက်(၅၀)ခန့်သာရှိပြီး မိုးရေကိုသာအဓိကထား၍ စိုက်ပျိုးကြရာ ရာသီဥတုဖောက်ပြန်သည့်နှစ်များတွင် သီးနှံ အထွက်နည်း၍ တောင်သူများအရှုံးနှင့် ရင်ဆိုင်ရသည့်အခြေအနေမျိုး ကြုံတွေ့ရကြောင်း တိုင်းဒေသကြီးစားသုံးဆီဖူလုံရေးအတွက် ဆီထွက်သီးနှံစိုက်ဧကများ တိုးတက်လာရေး ဆောင်ရွက် သည့်နည်းတူ သီးနှံရေလိုအပ်ချိန်တွင် ရေရရှိရေး မြစ်ရေတင်စီမံကိန်းဧရိယာများအတွင်း ဆီထွက် သီးနှံစိုက်ဧကများ တိုးချဲ့စိုက်ပျိုးသွားရန်နှင့် မျိုးစေ့ထုတ်ဇုန်များသို့ ရေပေးဝေမှုနှင့် ပက်သက်၍ လိုအပ်သည့် စီမံခန့်ခွဲမှုများကို ဆည်မြောင်းနှင့်ရေအသုံးချမှုစီမံခန့်ခွဲရေးဦးစီးဌာနနှင့် စိုက်ပျိုးရေး ဦးစီးဌာနတို့ ပူးပေါင်းဆောင်ရွက်သွားရန် တာဝန်များခွဲဝေ သတ်မှတ်ထားကြောင်း သိရှိရပါသည်။

          တိုင်းဒေသကြီးဆီထွက်သီးနှံ ဖွံ့ဖြိုးတိုးတက်ရေးကဏ္ဍတွင် ကုန်ထုတ်သမအသင်းများ ဖွဲ့စည်းရေး၊ အကျိုးတူကန်ထရိုက်လယ်ယာစနစ် ဖော်ဆောင်ခြင်းနှင့် မျိုးစေ့ထုတ်သမအသင်းများ တောင်သူအစုအဖွဲ့များ ဖွဲ့စည်းလာရေးနှင့် ဆီစက်များအဆင့်မြှင့်တင်ခြင်း လုပ်ငန်းများကို သမဝါယမဦးစီးဌာနအား တာဝန်ယူဆောင်ရွက်သွားရန် လုပ်ငန်းတာဝန်များခွဲဝေပေးထားကြောင်း သိရှိရပါသည်။

          ပြည်တွင်းစားသုံးဆီဖူလုံရေးအတွက် တိုင်းဒေသကြီးအတွင်း ဆီထွက်သီးနှံတိုးချဲ့စိုက်ပျိုးရေးနှင့် ဆီထွက်သီးနှံကဏ္ဍဖွံ့ဖြိုးတိုးတက်ရေးအတွက် တိုင်းဒေသကြီးအတွင်းရှိ သက်ဆိုင်ရာဌာနများမှ ဟန်ချက်ညီညီ ပူးပေါင်းဆောင်ရွက်ခြင်းဖြင့် တိုင်းဒေသကြီးအတွင်း စားသုံးဆီထုတ်လုပ်မှု တိုးတက်မြင့်မားလာမည်ဖြစ်ပြီး ပြည်ပမှစားသုံးဆီတင်သွင်းမှု လျော့ချနိုင်ပြီး နိုင်ငံခြားငွေ သုံးစွဲမှုကို ချိုးခြံနိုင်မည်ဖြစ်ပါကြောင်း မကွေးတိုင်းဒေသကြီး၏ ဆီထွက်သီနှံကဏ္ဍဖွံ့ဖြိုးတိုးတက်ရေး ဆောင်ရွက်မှုအခြေအနေအား ရေးသားတင်ပြလိုက်ရပါသည်။

DOCA(မကွေး)