ကုန်သွယ်မှုသတင်းများ
ယခုကဲ့သို့သော မိုးဦးကျကာလတွင် ကျေးလက်ဒေသများ၌ နေအိမ်များ၊ နွားတင်းကုပ်များ၊ ထင်းတဲများအား အမိုးများမိုးကြပါသည်။ အများအားဖြင့် မိုးဦး/ လေဦးကျတွင် ယခင်နှစ်မှမိုးထားသော အမိုးများအား အသစ်ပြန်၍မိုးကြခြင်းဖြစ်ပါသည်။
ဖြူးမြို့ရှိ ဒေသတွင်းကျေးလက်ဒေသများ၌ အများအားဖြင့် ခေါင်းမိုးမိုးရာတွင် တောင်ထန်းအား အဓိကထား၍မိုးကြပါသည်။ ထို့ကြောင့် ယခုကာလသည် တောင်ထန်းများ အရောင်းသွက်သောကာလဖြစ်ပါသည်။
တောင်ငူမြို့ ညောင်ပင်ဈေးတွင် ရာသီပေါ်ခဝဲသီးများဈေးကောင်းရနေပါသည်။ တောင်ငူမြို့တွင် စစ်တောင်းမြစ်နှင့် ခပေါင်းချောင်းများတည်ရှိသဖြင့် မြစ်၊ ချောင်းကမ်းနံဘေးရှိ ကျေးရွာ များတွင် ဟင်းသီးဟင်းရွက်များကိုတစ်နိုင်တစ်ပိုင်စိုက်ပျိုးကြပါသည်။
တောင်ငူမြို့၊ အမှတ်(၁၁)ရပ်ကွက်၊ ဈေးလမ်းရှိ “ထက်” ဆိုင်ကယ်အရောင်းဆိုင်တွင် ကျောင်းဖွင့်ရာသီ၌ ဆိုင်ကယ်များရောင်းအားကောင်းကြောင်းသိရပါသည်။ ယခင်ကာလများတွင် အရောင်းပါးခဲ့သော်လည်း မေလအတွင်းနှင့်ဇွန်လအစပိုင်းအထိ ရောင်းအားအကောင်းဆုံးဖြစ်ပါသည်။
တောင်ငူမြို့၏ ထုတ်ကုန်များအနက် တစ်ခုအပါအဝင်ဖြစ်သော "ဖိုးလမင်း" ကော်ဖီမှုန့်သည် အနံ့အရသာနှင့်ပြည့်စုံပြီး လူကြိုက်များလှသည့် ကော်ဖီမှုန့်အမျိုးအစားတစ်ခုဖြစ်သည်။ "ဖိုးလမင်း" ကော်ဖီမှုန့်ကို တောင်ငူမြို့၊ အမှတ်(၁)၊ ၆ လမ်း၊ ၁၄ရပ်ကွက်တွင်ထုတ်လုပ်ပြီး တောင်ငူမြို့အပါအဝင် မြန်မာတစ်နိုင်ငံလုံးသို့ ဖြန့်ဖြူးရောင်းချလျက်ရှိပါသည်။
ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်၏ လမ်းညွှန်ချက်အရ တောင်ငူခရိုင်ဆန်ကုန်သည်နှင့်ဆန်စက်ပိုင်ရှင်များက ဆန်များကိုလည်းကောင်း၊ ဆီကုန်သည်နှင့် ဆီလုပ်ငန်းရှင်များက စားသုံးဆီများကိုလည်းကောင်း ၂၀၂၄ခုနှစ်၊ ဇွန်လ ၂ရက်နေ့မှစ၍ သက်သာသောနှုန်းထားဖြင့် နေ့စဉ် ရပ်ကွက်များသို့ mobile မော်တော်ယာဉ်ဖြင့် လှည့်လည်ရောင်းချပေးလျက်ရှိပါသည်။
