ကုန်သွယ်မှုသတင်းများ

    အစိုးရ၏ ကုန်စည်များပေါ်တွင် အခွန်လျှော့ချရန် ဆုံးဖြတ်ပြီးနောက်ပိုင်း ဖိလစ်ပိုင်နိုင်ငံ၏ ယခုနှစ် ဆန်တင်သွင်းမှုသည် တန်ချိန် ၄.၆ သန်းအထိ ရှိလာနိုင်ကြောင်း အမေရိကန် စိုက်ပျိုးရေး ဦးစီးဌာန (USDA) က ဖော်ပြထားသည်။ ဖိလစ်ပိုင်အစိုးရက သွင်းကုန်အခွန်ကို ၃၅ ရာခိုင်နှုန်းမှ ၁၅ ရာခိုင်နှုန်းသို့ လျှော့ချခဲ့ပြီးနောက် USDA  သည် ဖိလစ်ပိုင်နိုင်ငံ၏ ဆန်တင်သွင်းမှု ခန့်မှန်းချက်ကို အစောပိုင်းက မျှော်မှန်းထားသည့် တန်ချိန် ၄.၁ သန်းထက် တန်ချိန် ၅၀၀၀၀၀ ထပ်မံ တိုးမြှင့် ခဲ့ခြင်းဖြစ်သည်။

     ဗီယက်နမ်နိုင်ငံသည် ယခုနှစ် ပထမလေးလအတွင်း တရုတ်နိုင်ငံသို့ ငှက်ပျောသီး တန်ချိန် ၃၅၅၀၀၀ တင်ပို့လျက် ၎င်းဈေးကွက်သို့ ငှက်ပျောသီး အများဆုံးတင်ပို့သည့် ထိပ်တန်းနိုင်ငံအဖြစ် ရောက်ရှိလာကြောင်း၊ အဆိုပါပမာဏသည် ဒုတိယအကြီးဆုံးတင်ပို့သူ ဖိလစ်ပိုင်မှ တင်ပို့သည့် ပမာဏ၏ ၂.၄ ဆရှိပြီး တရုတ်နိုင်ငံမှ ငှက်ပျောသီးတင်သွင်းမှု၏ ၄၈.၆% ရှိကြောင်း၊ ဗီယက်နမ် အနေဖြင့် ကမ္ဘာ့ဒုတိယအများဆုံး ငှက်ပျောသီးတင်ပို့သည့် ဖိလစ်ပိုင်နိုင်ငံကို ကျော်တက်အောင် စွမ်းဆောင်နိုင်ခဲ့သည်မှာ ပထမဆုံးအကြိမ်ဖြစ်ကြောင်း သိရှိရသည်။