တရုတ်နိုင်ငံ၊ ဘရာဇီးလ်နိုင်ငံ၊ ဩစတြေးလျနိုင်ငံနှင့် အိန္ဒိယနိုင်ငံများ၏ စီးပွားရေးနှင့်ကုန်သွယ်ရေးဆိုင်ရာ သတင်းများ

ပေကျင်းမြို့သတင်း

အစားအစာ လုံခြုံစိတ်ချလုံလောက်မှုရှိစေရေး ဉီးစားပေးဆောင်ရွက်သွားရန် တိုက်တွန်းခဲ့သည့်သတင်း

၁။      နိုင်ငံ၏ အစားအစာလုံခြုံစိတ်ချရမှုရှိစေရေး လယ်ယာထွက်ကုန်ပစ္စည်းများ လုံလောက်အောင် ရောင်းချနိုင်ရေးတို့ကို ဉီးစားပေးဆောင်ရွက်သွားရန် လိုအပ်ကြောင်း၊ နွေဉီးရာသီ ကောက်ပဲသီးနှံ စီမံခန့်ခွဲမှုစနစ်၊ လယ်ယာလုပ်ငန်းပြင်ဆင်မှု၊ နည်းပညာပိုင်းဆိုင်ရာ လမ်းညွှန်ချက်များ ခိုင်မာအားကောင်းလာစေရန်၊ စိုက်ပျိုးရေးထုတ်ကုန်များလုံလောက်စေရန်၊ ဈေးနှုန်းများ တည်ငြိမ်စေရန် ဉီးစားပေး ဆောင်ရွက်သွားရမည်ဖြစ်ကြောင်း၊ ကောက်ပဲသီးနှံထုတ်လုပ်ရေး မူဝါဒထောက်ပံ့မှုများ ဆောင်ရွက်ပေးသွားမည်ဖြစ်ကြောင်း၊ သက်ဆိုင်ရာအချက်အလက်များအား နိုင်ငံတော်ကောင်စီ၏ တရားဝင် website ၌ ထုတ်ပြန်ကြေငြာထားကြောင်း၊ တစ်နှစ်ပတ်လုံး ကောက်ပဲသီးနှံ ထုတ်လုပ်ထွက်ရှိမှုပမာဏ ကီလိုဂရမ် (၆၅၀)ဘီလီယံအထက် ဆက်လက်ရရှိရန်၊ နိုင်ငံ၏ မျိုးစေ့ထုတ်လုပ်မှု တိုးတက်လာစေရန်၊ မွေးမြူရေး လုပ်ငန်းများမှ ထုတ်လုပ်ထွက်ရှိမှု တည်ငြိမ်စေရန်၊ အဓိကဖြစ်ပွားတတ်သည့် တိရစ္ဆာန်ရောဂါများ၊ အပင်ပိုးမွှား ကာကွယ် ထိန်းသိမ်းရန်လိုအပ်ကြောင်း၊ နိုင်ငံ၏ အစားအစာလုံခြုံစိတ်ချရမှုရှိခြင်း၊ အရေးပါသည့် လယ်ယာထွက်ကုန်ပစ္စည်းများ လုံလောက်စွာရောင်းချခြင်းတို့ဖြင့် စီးပွားရေး၊ လူမှုရေးကဏ္ဍများ ဖွံ့ဖြိုးတိုးတက်လာမည်ဖြစ်ပြီး ရည်မှန်းချက်များအောင်မြင်လာစေရန် အခြေခံကောင်းများ ဖြစ်ပေါ်လာမည်ဖြစ်ကြောင်း၊ တရုတ်နိုင်ငံသည် လယ်ယာစိုက်ပျိုးရေးကဏ္ဍ ဖွံ့ဖြိုးတိုးတက်စေရေး၊ လယ်ယာစိုက်ပျိုးရေး နည်းပညာအခက်အခဲများ ကိုင်တွယ်ဖြေရှင်းရေး၊ ပြည်တွင်းမျိုးစေ့ ထုတ်လုပ်ရေး ၊ ကျေးလက်ဒေသများတွင် ဆင်းရဲနွမ်းပါးမှုတိုက်ဖျက်ရေး စသည့် အစီအစဉ်များနှင့် ပတ်သက်၍ ၂၀၂၁ ခုနှစ်၊ ဖေဖော်ဝါရီ လကုန်ပိုင်းတွင် ကြေငြာချက်ထုတ်ပြန်ခဲ့ကြောင်း၊ တရုတ်နိုင်ငံသည် လယ်ယာစိုက်ပျိုးရေး၊ ကျေးလက်ဒေသများ ဖွံ့ဖြိုးတိုးတက်ရေးအတွက် ဉီးစားပေးလုပ်ဆောင်လျှက်ရှိသည်မှာ (၁၈)နှစ်ဆက်တိုက် ရှိပြီ ဖြစ်ကြောင်း သိရှိရပါသည်။

(ရင်းမြစ်- ပေကျင်းမြို့ စီးပွားရေးသံမှူး ပေးပို့သည့်သတင်း)

ဟောင်ကောင်သတင်း

အမေရိကန်နိုင်ငံမှ ဟောင်ကောင်ဒေသအပေါ် သဘောထား အနည်းငယ်ပိုမိုကောင်းမွန်လာသည့် သတင်း

၂။       အမေရိကန်သမ္မတ ဂျိုးဘိုင်ဒန်လက်ထက်တွင် အမေရိကန်နိုင်ငံမှ ဟောင်ကောင် ဒေသ အပေါ် သဘောထား အနည်းငယ် ပိုမိုကောင်းမွန်လာသည်ဟု မှတ်ယူရကြောင်း၊ ၂၀၂၀ ပြည့်နှစ်၊ ဇွန်လက  ဟောင်ကောင်ဒေသအတွက် ပြဌာန်းခဲ့သည့် အမျိုးသားလုံခြုံရေးဥပဒေနှင့်ပတ်သက်၍ အမေရိကန်နှင့် ပေကျင်းတို့အကြား တင်းမာမှုများဖြစ်ပွားခဲ့ရာ အဆိုပါတင်းမာမှုကြောင့် ပေကျင်း နှင့်ဟောင်ကောင်ဒေသရှိ အဆင့်မြင့်အရာရှိကြီးများအား ကန့်သတ်ပိတ်ပင်မှုများကို ယခုအချိန်ထိ ဆက်လက်ပြုလုပ်လျှက်ရှိသော်လည်း နိုင်ငံတကာငွေကြေးအချက်အချာကျသည့် ဟောင်ကောင်ဒေသ၏အနေအထားကို ကြီးမားသည့်ထိခိုက်မှုမရှိနိုင်ကြောင်း၊ အဆိုပါကန့်သတ်မှုကြောင့် ပို့ကုန်သွင်းကုန်လုပ်ငန်းများ (အထူးသဖြင့် သတိထားဆောင်ရွက်ရသည့် အဆင့်မြင့်နည်းပညာများတင်ပို့မှု) အပေါ် သက်ရောက်မှုများဖြစ်စေခဲ့ကြောင်း၊ သို့သော်ဟောင်ကောင်ဒေသမှ အစိုးရိမ်ဆုံးအရာဖြစ်သည့် ဟောင်ကောင်ဒေါ်လာနှင့် အမေရိကန်ဒေါ်လာ လဲလှယ်မှု၌ Peg လုပ်ထားမှုအား ဝါရှင်တန်မှဖယ်ရှားရန် ဆက်လက်တွန်းအားပေးဆောင်ရွက်မှု မရှိကြောင်း၊ အမေရိကန်သမ္မတ ဂျိုးဘိုင်ဒန်အုပ်ချုပ်မှုလက်ထက် ပထမဆုံးအကြိမ် အစီရင်ခံစာ ပြင်ဆင်ထုတ်ပြန်ချက်တွင်  အနည်းငယ်ပြောင်းလဲမှုရှိကြောင်း၊ အဆိုပါအစီရင်ခံစာတွင် ဟောင်ကောင်ဒေသသည် ကိုယ်ပိုင် အုပ်ချုပ်ခွင့်ဆက်လက်ရရှိနေဆဲဖြစ်ကြောင်းနှင့် တရုတ်ပြည်မကြီးမှ ငွေကြေးမူဝါဒ အပေါ်တွင် မှီခိုမှုမရှိကြောင်း၊ ပေါ်လွင်အောင်အသားပေးရေးသားဖော်ပြထားကြောင်းသိရှိရပါသည်။

(ရင်းမြစ်- ဟောင်ကောင်မြို့ စီးပွားရေးသံမှူး ပေးပို့သည့်သတင်း)

Brasilia သတင်း

‌ဈေးကွက်အတွင်းသို့ သီးနှံဝင်ရောက်မှု နည်းပါးသဖြင့် ပြောင်းစေ့အရောင်းအဝယ်များ ကျဆင်းလျှက်ရှိသည့်သတင်း

၃။      ၂၀၂၁ ခုနှစ်၊ ဧပြီလဆန်းပိုင်းတွင် ဘရာဇီးလ်နိုင်ငံပြောင်းဈေးကွက်သို့ သီးနှံဝင်ရောက်မှု နည်းပါးသဖြင့် အရောင်းအဝယ်များကျဆင်းခဲ့ကြောင်း၊ လတ်တလောကာလတွင် တောင်သူများ အနေဖြင့် ပဲပုတ်စေ့သီးနှံ ရိတ်သိမ်းမှုအား အဓိကထားလုပ်ဆောင်နေရသဖြင့် အခြားသီးနှံများ တင်ပို့ရောင်းချမှုများအား ခေတ္တရပ်နားထားရကြောင်း၊ ဝယ်လိုအားရှိ၍ ဈေးနှုန်းအမြင့်ဖြင့် ဈေးကွက်ဖြစ်ပေါ်နေသော်လည်း ပြောင်းသီးနှံများ ဈေးကွက်သို့ဝင်ရောက်မှု လျော့နည်းနေသည့် အတွက် အရောင်းအဝယ်ဖြစ်မှုတွင် ကျဆင်းလျှက် ရှိနေကြောင်း၊ နိုင်ငံတကာဈေးကွက်အနေဖြင့် ချီကာဂိုစတော့ဈေးကွက်တွင် သီးနှံရောင်းဝယ်မှုကဏ္ဍကို တိုးချဲ့သတ်မှတ်ပေးထားကြောင်း၊ ဘရာဇီးနိုင်ငံ၏ပြောင်းသီးနှံဈေးကွက်သည် ဈေးနှုန်းအမြင့်များဖြစ်ပေါ်နေသော်လည်း မျှော်လင့် မထားသည့်အရောင်းအဝယ်ကျဆင်းမှုများဖြစ်ပေါ်လျှက်ရှိကြောင်း၊ ဘရာဇီးလ် သီးနှံဈေးကွက် တစ်ခုလုံးကိုခြုံငုံကြည့်ပါက ဈေးကွက်သို့ ဒေသအသီးသီးမှသီးနှံများတင်ပို့ရန် အခက်အခဲများ ရှိနေကြောင်း၊ တောင်သူများအနေဖြင့်လည်း ပြောင်းစေ့များဈေး ကွက်တင်ပို့ရေးထက် ပဲပုတ်စေ့ အချိန်မီရိတ်သိမ်းပြီးစီးရေးအပေါ်တွင်သာ အာရုံစိုက်လုပ်ဆောင်နေရကြောင်း၊ သီးနှံဈေးကွက် တွင် သီးနှံဝယ်ယူရေးအမှာစာများမြင့်တက်နေသော်လည်း လုပ်ငန်းရှင်များ၏ လတ်တလော အခက်အခဲများကြောင့် အနာဂတ်ရောင်းဝယ်မှုများအပေါ်တွင်ပါ ရိုက်ခတ်နိုင်ကြောင်း၊ စိုက်ပျိုး ရေးထွက်ကုန်များဆိုင်ရာ စီးပွားရေး အကျိုးဆောင်ကုမ္ပဏီမှ စိုက်ပျိုးရေး သုတေသန ပညာရှင်က ပြောကြားခဲ့ကြောင်း၊ ပြည်တွင်း ဈေးကွက်တွင် ပြောင်းစေ့ ၁ အိတ်ပေါက်ဈေးမှာ Santos ဆိပ်ကမ်းအရောက်တန်ဖိုးဘရာဇီးလ်ဟဲရာ ၈၀.၅၀ မှ ၉၀.၀၀ ၊ Paranagua ဆိပ်ကမ်း အရောက် တန်ဖိုးမှာ ဘရာဇီးလ်ဟဲရာ ၇၉.၀၀  မှ ၈၇.၀၀ ၊ Parana ပြည်နယ် Cascavel ဈေးကွက်တွင် ဟဲရာ ၉၃.၀၀ မှ ၉၅.၀၀ ၊ Sao Paulo  ပြည်နယ်  Mogiana  ဈေးကွက်တွင် ဟဲရာ ၉၅ မှ ၉၇၊Campinas  ဈေးကွက်တွင် ဟဲရာ ၉၈ မှ ၁၀၀၊  Rio Grande do Sul  ပြည်နယ်Erechim   ဈေးကွက်တွင် ဟဲရာ ၉၄ မှ  ၉၆၊ Minas Gerais ပြည်နယ် Uberlandia  တွင် ဟဲရာ ၈၄  မှ ၈၅ ၊Rio Verde ဈေးကွက်တွင် ဟဲရာ ၈၅ မှ  ၈၆၊ Mato  Grosso ပြည်နယ်ရှိ Rondonopolis ဈေးကွက်တွင် ဟဲရာ ၇၈ မှ ၈၀ အသီးသီးတို့ဖြင့် အရောင်းအဝယ်များဖြစ်ပေါ်လျှက်ရှိကြောင်း သိရှိရ ပါသည်။

ချီကာဂိုစတော့ဈေးကွက် ပဲပုတ်စေ့ဈေးနှုန်းများမြင့်တက်ခဲ့ပြီး ၇ နှစ်အတွင်း အကောင်းဆုံး အခြေအနေ သို့ရောက်ရှိသည့်သတင်း

၄။      ၂၀၂၁ ခုနှစ်၊ဧပြီတတိတယပတ်၌ ချီကာဂိုစတော့ဈေးကွက်(Chicago Commodity Exchange –CBOT)၏ပဲပုတ်စေ့ဈေးနှုန်းများသည်အမြင့်ဈေးနှုန်းများဖြင့်ဈေးကွက်ပိတ်ခဲ့ပြီး ၇ နှစ်အတွင်း အကောင်း ဆုံးအခြေအနေသို့ ရောက်ရှိခဲ့ကြောင်း၊၂၀၂၁ ခုနှစ်၊ မေလတွင် ကုန်ပစ္စည်း တင်ပို့ပေးရမည့် ပဲပုတ်စေ့ ကြို ပွိုင့်ဈေးကွက်တွင် ယခင်ဈေးနှုန်းထက်အမေရိကန်ဒေါ်လာ ၂၁.၂၅ ဆင့် ဈေးနှုန်းပိုမိုမြင့်တက်ခဲ့ပြီး ပဲပုတ် စေ့ ၁ စည်လျှင် အမေရိကန် ဒေါ်လာ ၁၄.၅၇ ဖြင့် အရောင်းအဝယ်ဖြစ်ခဲ့ကြောင်း၊ ကုန်စည်အလိုက် ဈေးနှုန်းများတွင် ဇူလိုင်လအတွက် ပဲပုတ်စေ့ အခွံ(တိရစ္ဆာန်အစာ) ကြိုပွိုင့်ဈေးနှုန်းသည် ယခင်ဈေးနှုန်းထက် အမေရိကန်ဒေါ်လာ ၃.၄၀ ပိုမို မြင့်တက်ခဲ့ပြီး ၁  တန်လျှင် အမေရိကန်ဒေါ်လာ ၄၁၄.၇၀ ဈေးဖြင့် လည်းကောင်း၊ ပဲပုတ်စေ့ဆီ ကြိုပွိုင့်ဈေးကွက်တွင်  ယခင်ဈေးနှုန်းထက် ၁.၂၇ ဆင့် ဈေးနှုန်း မြင့်တက်ခဲ့ပြီး ၅၅.၁၄ ဆင့်ဖြင့် လည်းကောင်းအရောင်းအဝယ်ဖြစ်ခဲ့ကြောင်း၊ ကမ္ဘာ့သီးနှံဈေးကွက်သို့ ပဲပုတ်စေ့ ဝင်ရောက်မှု လျော့ကျနိုင်ကြောင်းသုံးသပ်ထားပြီး လတ်တလော သီးနှံစိုက်ပျိုးချိန်နှင့် ရိတ်သိမ်းချိန်တွင် ဖြစ် ပေါ်နေသော ရာသီဥတုအခြေအနေများကြောင့် အမေရိကန်ပဲပုတ်စေ့၏ဈေးနှုန်းများ ပိုမိုမြင့်တက် စေ လျှက်ရှိသည်ဟု စီးပွားရေးအကြံပေးကုမ္ပဏီကပြောကြားခဲ့ကြောင်း၊ ၎င်းအပြင် ပဲပုတ်စေ့ စိုက်ပျိုးဖြစ် ထွန်းမှုအခြေအနေများအား အမေရိကန်စိုက်ပျိုးရေးဌာန(U.S. Department of Agriculture -USDA)က သတင်းများထုတ်ပြန်လျှက်ရှိရာ အမေရိကန်နိုင်ငံတွင် ဧပြီလ (၁၈ ) ရက်ထိ ပဲပုတ်စေ့ စိုက်ပျိုးဧရိယာ၏ ၃% ကိုသာစိုက်ပျိုးပြီးစီးသည်ဟု စိုက်ပျိုးရေးဌာနက သတင်းထုတ်ပြန်ထားကြောင်း သိရှိရပါသည်။

(ရင်းမြစ်- Brasilia စီးပွားရေးသံမှူးပေးပို့သည့်သတင်း)

 

 

ဩစတြေးလျနိုင်ငံ

ပို့ကုန်ဝန်ဆောင်မှု မြှင့်တင်မည့် Action Plan ထုတ်ပြန်သည့်သတင်း

၅။      ဩစတြေးလျနိုင်ငံ ကုန်သွယ်ရေး၊ ရင်းနှီးမြှုပ်နှံမှုနှင့် ခရီးသွားဝန်ကြီးဌာန ဝန်ကြီးက ပို့ကုန် ဝန်ဆောင်မှု လုပ်ငန်းစီမံချက်(Action Plan)တစ်ရပ်ကို ၂၀၂၁ ခုနှစ်၊ ဧပြီလဆန်းတွင် မဲလ်ဘုန်း မြို့၌ ထုတ်ပြန်ခဲ့ရာ အဆိုပါစီမံချက်သည် ကမ္ဘာ့အဆင့်မီ ဩစတြေးလျ ဝန်ဆောင်မှုစီးပွားရေး လုပ်ငန်းများအား နိုင်ငံတကာတွင် ယှဉ်ပြိုင်နိုင်စွမ်းကို အထောက်အပံ့ပေးရန်နှင့် ဩစတြေးလျ စီးပွားရေးလုပ်ငန်းများ ဈေးကွက်အသစ်များရှာဖွေနိုင်ရန်၊ စီးပွားရေးလုပ်ငန်းများ ကြီးထွား တိုးတက်လာစေရန်၊ အလုပ်အကိုင်များ ပိုမိုရရှိရန်နှင့် နိုင်ငံတကာဈေးကွက်မှ ရရှိနိုင်မည့် အခွင့်အလမ်းများကိုရယူနိုင်ရန် ကူညီပေးမည်ဖြစ်ကြောင်း၊ ဩစတြေးလျနိုင်ငံသည် ဗိသုကာ၊ အင်ဂျင်နီယာ၊ ဥပဒေဆိုင်ရာ ဝန်ဆောင်မှုများမှသည် ကျန်းမာရေး၊ ဘဏ္ဍာရေးဝန်ဆောင်မှုများ၊ ဒစ်ဂျစ်တယ်နှင့်ဆက်သွယ်ရေး၊ သယ်ယူပို့ဆောင်ရေးနှင့် အခြားဝန်ဆောင်မှု ကဏ္ဍများရှိ ကျွမ်းကျင်ပညာရှင်များမှ ရေရှည်အကျိုးအမြတ်များစွာရရှိလျှက်ရှိကြောင်း၊ ၎င်းလုပ်ငန်းစီမံချက် သည် ကမ္ဘာ့နိုင်ငံအနှံ့သို့ ဩစတြေးလျပို့ကုန်ဝန်ဆောင်မှု ချဲ့ထွင်နိုင်ရေးအတွက်  အရေးပါသော ကဏ္ဍမှပါဝင်မည်ဖြစ်ပြီး အစိုးရသည် ကမ္ဘာ့ဈေးကွက်တွင် ဩစတြေးလျဝန်ဆောင်မှု စီးပွားရေး လုပ်ငန်းများအောင်မြင်ရေးအတွက် ကူညီဆောင်ရွက်ပေးမည်ဖြစ်ကာ နိုင်ငံတကာ ယှဉ်ပြိုင်နိုင် စွမ်းကို မြှင့်တင်သွားရန် ဆက်လက်ဆောင်ရွက်သွားမည်ဖြစ်ကြောင်း၊ လုပ်ငန်းစီမံချက်ကို ဝန်ဆောင်မှု ကဏ္ဍနှင့်ပူးပေါင်း ရေးဆွဲထားပြီး လုပ်ငန်းဆောင်ရွက်ချက်(၈၁)ချက်အား သတ်မှတ် ဖော်ထုတ်ထားပြီး Action Plan အသေးစိတ်ကို www.services-exports.gov.auတွင် လေ့လာ ကြည့်ရှိနိုင်ကြောင်းသိရှိရပါသည်။

(ရင်းမြစ်- ဩစတြေးလျနိုင်ငံ စီးပွားရေးသံမှူးပေးပို့သည့်သတင်း)

အိန္ဒိယနိုင်ငံ

၆။      အိန္ဒိယနိုင်ငံ၌ ဆန်စပါးစိုက်ပျိုးထုတ်လုပ်သည့် တောင်သူများထံသို့ အစိုးရမှ အထောက် အပံ့များ ပေးအပ်မှုမှာ ကုန်ထုတ်လုပ်မှုတန်ဖိုး၏ ၁၀% ထက်ကျော်လွန်လျက်ရှိရာ ကမ္ဘာ့ ကုန်သွယ်ရေးအဖွဲ့ (WTO) ၏ စိုက်ပျိုးရေးပို့ကုန်ဆိုင်ရာ သဘောတူညီချက်များတွင် ဖော်ပြပါရှိ သော သဟဇာတ ဖြစ်မှုဆိုင်ရာ သက်သာခွင့် (peace clause) စကားရပ်အရ ကင်းလွတ်ခွင့် ပြုပေးရန် အိန္ဒိယနိုင်ငံက WTO ၌ ဒုတိယအကြိမ် တောင်းဆိုလိုက်ပါသည်။ အိန္ဒိယက WTO သို့ သတင်းပေးပို့ အစီရင်ခံရာတွင် ၂၀၁၉-၂၀ ခုနှစ်၌ ဆန်စပါးစိုက်ပျိုး ထုတ်လုပ်မှုတန်ဖိုးမှာ ဒေါ်လာ ၄၆.၀၇ ဘီလီယံရှိပြီး ယင်း လုပ်ငန်းကဏ္ဍအတွက် တောင်သူများသို့ အထောက်အပံ့ပေးအပ်မှုမှာ ဒေါ်လာ ၆.၃၁ ဘီလီယံ (ထုတ်လုပ်မှု၏ ၁၃.၇% ခန့်) ဖြစ်ကြောင်း၊ ၎င်း ပမာဏသည် WTO ၏ စည်းမျဉ်းစည်းကမ်းများအရ ဖွံဖြိုးဆဲနိုင်ငံများအနေဖြင့် စားသောက်ကုန် ထုတ်လုပ်မှု၌ ပေးအပ်နိုင်သည့်ထောက်ပံ့မှု ၁၀% ထက် ကျော်လွန်လျက်ရှိသော်လည်း ပြည်တွင်း စားနပ် ရိက္ခာဖူလုံရေး ရည်ရွယ်ချက်ဖြင့် အစိုးရ၏ အရန်ရိက္ခာဝယ်ယူသိုလှောင်မှု အစီအစဉ်အရ ဆောင်ရွက်ခြင်းဖြစ်ကြောင်း၊ အိန္ဒိယအစိုးရ၏ အဆိုပါ ဝယ်ယူရေး အစီအစဉ်သည် WTO ဝန်ကြီးများအဆင့် ဘာလီအစည်းအဝေး၏ စားနပ်ရိက္ခာ ဝယ်ယူသိုလှောင်မှုဆိုင်ရာ ဆုံးဖြတ်ချက် မတိုင်မီကပင် တည်ရှိလုပ်ဆောင်ခဲ့ခြင်းဖြစ်ကြောင်း၊ အိန္ဒိယအစိုးရအနေဖြင့် အဆိုပါ အရန်ရိက္ခာ ဝယ်ယူထားရှိမှုမှ စီးပွားရေးအရ ပြည်ပတင်ပို့ခြင်းကို ဆောင်ရွက်ခြင်း မပြုသကဲ့သို့ ၎င်းအရန် ရိက္ခာအား ဝယ်ယူသူများသို့လည်း ပြည်ပ တင်ပို့မှု မပြုပါ ဟူသော စည်းကမ်းချက်ဖြင့် ပြည်တွင်း ဈေးကွက်၌ ရောင်းချပေးခြင်းသာဖြစ်ကြောင်း၊ အစိုးရ၏ အရန်ရိက္ခာ အစီအစဉ်သည် နိုင်ငံ အတွင်းရှိ ထိခိုက်လွယ်ပြီး ဆင်းရဲ နွမ်းပါးသည့် လူဦးရေအတွက် ရည်ရွယ်လုပ်ကိုင်ခြင်း ဖြစ်ကြောင်း၊ သို့ဖြစ်ရာ ဆန်စပါးကဏ္ဍ၌ ကန့်သတ်ထားသည့် ပမာဏထက် ကျော်လွန်၍ အိန္ဒိယ အစိုးရက တောင်သူများသို့ ပေးအပ်သည့် အထောက်အပံ့သည် သဟဇာတ ဖြစ်မှုဆိုင်ရာ သက်သာခွင့် စကားရပ်အရ WTO အဖွဲ့ဝင်နိုင်ငံများ၏ တန်ပြန်အရေးယူ ဆောင်ရွက် ခြင်းမှ ကင်းလွတ်မှုရရှိရေး ခွင့်ပြုပေးရန်ဖြစ်ကြောင်း ဖော်ပြခဲ့ပါသည်။

၇။      အိန္ဒိယနိုင်ငံသည် ၂၀၁၈-၁၉ ခုနှစ်တွင်လည်း peace clause အရ သက်သာခွင့်ရရန် WTO ၌ တောင်းဆိုခဲ့ခြင်းဖြစ်ပြီး ထိုစဉ်က အမတော်ကြေးထောက်ပံ့မှုအား သတ်မှတ် အမြင့်ဆုံး ပမာဏထက် ကျော်လွန်ပေးအပ်လျက် သဟဇာတဖြစ်မှုသက်သာခွင့်တောင်းခံခြင်းမှာ ကမ္ဘာ့ ကုန်သွယ်မှုကို ပုံပျက် ယွင်းစေကြောင်း အမေရိကန်၊ အီးယူ၊ ကနေဒါ၊ ဘရာဇီး၊ ဂျပန်နှင့် ပါရာဂွေး စသည့် နိုင်ငံများက ဝေဖန်မေးခွန်းထုတ်ခဲ့ကြပါသည်။      အိန္ဒိယအစိုးရကမူ ပြည်တွင်းစားနပ် ရိက္ခာဖူလုံရေးအတွက် ၂၀၁၃ ခုနှစ် အမျိုးသား စားနပ် ရိက္ခာ အက်ဥပဒေကို ပြဌာန်းမှုနှင့်အတူ အထောက်အပံ့ပြုသည့် အခြေခံရည်ညွှန်းဈေးနှုန်း (MSP) နှင့် ပြည်သူ့ဖြန့်ဖြူးရေးစနစ်တို့ကို ဖော်ဆောင်ခြင်းဖြစ်ကြောင်း၊ ၎င်းအစီအစဉ်များသည် တောင်သူများအတွက် အခြေခံ ရည်ညွှန်း ဈေး ခိုင်မာစွာရရှိစေရေး၊ သီးနှံများ၏ ဈေးနှုန်းတည်ငြိမ်ရေး၊ လူမှု ပတ်ဝန်းကျင်အတွင်း ထိခိုက် လွယ်မှုရှိပြီး ဝင်ငွေနည်းပါးသူများ အတွက် ကောက်ပဲသီးနှံများအား သင့်တင့်သည့်နှုန်းထားဖြင့် ညီညွတ်မျှတစွာ ဖြန့်ဖြူးပေးနိုင်ရေးနှင့် သဘာဝ ရာသီဥတုဖြစ်စဉ်များနှင့် မမျှော်မှန်းနိုင်သည့် အရေးပေါ်အခြေအနေတို့အတွက် လုံလောက်သည့် အရန်ရိက္ခာ ထားရှိနိုင်ရေးတို့ကို ရည်ရွယ် လျက် ဆောင်ရွက်ခြင်းဖြစ်ကြောင်း ခုခံပြောဆိုခဲ့ပါ သည်။          ကမ္ဘာ့ကုန်သွယ်ရေးအဖွဲ့၌ အိန္ဒိယ ၏ သက်သာခွင့်ရရန်တောင်းဆိုမှုနှင့် စပ်လျဉ်း၍ ဂျဝါဟာ လာနေရူး တက္ကသိုလ်မှ ပါမောက္ခ Mr. Biswajit Dhar က Peace Clause အရ ကင်းလွတ်ခွင့် တောင်းခံမှုအပေါ် စိန်ခေါ်မှုပြုလုပ်ရန် မဖြစ်နိုင်ကြောင်း၊ ယခုကဲသို့ ပြောင်းလွယ် ပြင်လွယ်မှုရှိမှသာ ကပ်ရောဂါကာလအတွင်း အရေး ကြီးသည့် လုပ်ငန်းရပ်တစ်ခုဖြစ်သော ဆင်းရဲနွမ်းပါးသူများထံသို့ စားနပ်ရိက္ခာများ အခမဲ့ ထောက်ပံ့ခြင်းကို လုပ်ဆောင်နိုင်မည် ဖြစ်ကြောင်း ပြောကြားခဲ့ပါသည်။

ရင်းမြစ်          (နယူးဒေလီမြို့ရှိ စီးပွားရေးသံမှူးပေးပို့သည့် သတင်း)