မုံရွာမြို့ ဒေသထုတ်ကုန် ဝက်အူတောင့်နှင့် ကြက်သားတောင့်

   မုံရွာမြို့မှထွက်ရှိသော ဝက်အူတောင့်နှင့် ကြက်သားတောင့်များသည် နာမည်ကျော်ကြားပြီး ခရီးသွားဧည့်သည်များနှင့် အနယ်နယ်အရပ်ရပ်မှ စားသုံးသူများ၏ အမှာစာများရရှိသော စားသောက် ကုန်ပစ္စည်းတစ်မျိုးဖြစ်ပါသည်။ မုံရွာမြို့ပေါ်၌ ဝက်အူတောင့်နှင့် ကြက်သားတောင့်များကို တစ်ပိုင်တစ်နိုင် အိမ်တွင်းစားသောက်ကုန်လုပ်ငန်းအဖြစ် ထုတ်လုပ်ရောင်းချသူပေါင်း (၁၅)ဦးခန့်ရှိသည်။ ဦးအညို၊ ဦးအတန်၊ ဒေါ်ဘူး၊ မခိုင်၊  ရေဦးစသည့်နာမည်များဖြင့် ရောင်းချလျက်ရှိပြီး၊ ယင်းတို့မှာ နာမည်ကျော်ကြား ထင်ရှားသည့်ဆိုင်များဖြစ်သည်။ ဝက်အူတောင့်နှင့် ကြက်သားတောင့်များကို အတောင့် ခေါ် အချောင်း ခေါ် အဆစ်လိုက်လည်းကောင်း၊ လေလုံအောင်ပိတ်ပြီး ထုပ်ပိုးမှု ပုံစံသစ်များဖြင့်လည်းကောင်း ရောင်းချကြသည်။

ဦးအညိုဆိုင်

      ဦးအညိုဆိုင်သည် မုံရွာမြို့၊ ဆူးလေကုန်းရပ်ကွက်၌ တည်ရှိပြီး၊ သားဖြစ်သူ ကိုဝင်းနိုင်က မိဘ၏ အမွေကိုဆက်ခံကာ ၁၉၈၉ခုနှစ်က စတင်လုပ်ကိုင်ခဲ့သည်။ ကုန်ကြမ်းများဖြစ်သော ဝက်သား၊ ကြက်သား၊ ဆိတ်အူနှင့် ဝက်အူတို့ကို မုံရွာမြို့ရှိ ဈေးများမှဝယ်ယူပြီး၊ မိမိတို့မိသားစု အိမ်တွင်း တစ်ပိုင်တစ်နိုင် စီးပွားရေးလုပ်ငန်း အဖြစ်လုပ်ကိုင်သည်။ ယခု လုပ်သားတစ်ဦး တစ်ရက်လျှင် (၁၀၀၀၀)ကျပ်ဖြင့် တစ်ဦးအား အလုပ်အကိုင် အခွင့်အလမ်းပေးထားနိုင်သည်။ ရောင်းဈေးနှုန်းများမှာ ကြက်အူတောင့် တစ်ဆစ်လျှင်  ၃၀၀ကျပ်၊ ဝက်အူတောင့် တစ်ဆစ်လျှင်  ၃၂၀ ကျပ်မှ ၄၀၀ ကျပ်ကြား၊ အထုပ်ရောင်းဈေးမှာ ကြက်အူတောင့် သို့မဟုတ် ဝက်အူတောင့် တစ်ထုပ်(၁၃၀ ဂရမ်)လျှင် ၆၀၀၀ကျပ် ဈေးနှုန်းအသီးသီးဖြင့် တစ်လလျှင် ဝက်နှင့် ကြက်နှစ်မျိုးပေါင်း ပိဿာ ၁၀၀ခန့် ထုတ်လုပ် ရောင်းချသည်။ ဒေသတွင်းဈေးကွက်သာမက ရန်ကုန်၊  မန္တလေး၊ ပြင်ဦးလွင် စသည့်မြို့များမှ အမှာစာဖြင့် ဝယ်ယူရောင်းချလျက်ရှိကြောင်း သိရသည်။

မခိုင်ဆိုင်

      မခိုင်ဆိုင်သည် မုံရွာမြို့၊  ချမ်းမြသာစည်ရပ်ကွက်၌ တည်ရှိပြီး ၂၀၁၀ခုနှစ်က စတင်၍ မိသားစု အိမ်တွင်းတစ်ပိုင်တစ်နိုင် စီးပွားရေးလုပ်ငန်းအဖြစ်လုပ်ကိုင်သည်။ ယခုလုပ်သားတစ်ဦး စားစရိတ်ငြိမ်း တစ်ရက်လျှင် (၇၀၀၀)ကျပ်ဖြင့် နှစ်ဦးအား အလုပ်အကိုင် အခွင့်အလမ်းပေးထားနိုင်သည်။ ကုန်ကြမ်းဖြစ်သော ဝက်သား၊ ကြက်သား၊ ဆိတ်အူနှင့် ဝက်အူတို့ကို မုံရွာမြို့၊ မြသလ္လာဈေးမှ ဝယ်ယူသည်။ ရောင်းဈေးနှုန်းများမှာ ကြက်အူတောင့် တစ်ဆစ်လျှင်  ၃၅၀ကျပ်၊ ဝက်အူတောင့် တစ်ဆစ်လျှင် ၅၀၀ ကျပ် ဈေးနှုန်းအသီးသီးဖြင့်  တစ်လလျှင် ဝက်နှင့် ကြက်နှစ်မျိုးပေါင်း ပိဿာ ၁၄၀ ခန့် ထုတ်လုပ်နိုင်ပြီး  မုံရွာမြို့ရှိ စားသုံးသူများနှင့် ခရီးသွားဧည့်သည်များသို့ ရောင်းချသည်။

   မုံရွာမြို့ ဒေသထုတ်ကုန် ဝက်အူတောင့်နှင့် ကြက်အူတောင့်များသည် ပလတ်စတစ်၊ ဓါတုဆိုးဆေးနှင့် အသားတုများကို လုံးဝသုံးစွဲခြင်းမရှိဘဲ စစ်မှန်သောဝက်သားနှင့်ကြက်သားများကို အသုံးပြုသဖြင့် အရသာကောင်းမွန်သောကြောင့် မြန်မာပြည်အနှံ့ နာမည်ကျော်ကြားလူကြိုက်များ သည့် စားသောက်ကုန်ဖြစ်သည်။ မုံရွာမြို့သို့ လာရောက်သည့် ခရီးသွားဧည့်သည်များအနေဖြင့် မိဘဆွေမျိုး၊ ဆရာသမားနှင့်မိတ်ဆွေများအား အိမ်ပြန်လက်ဆောင်ပေးရန် အစဉ်အမြဲ ဝယ်ယူလေ့ရှိသည့်  မုံရွာမြို့ဒေသထုတ်ကုန်တစ်မျိုးမှာ ဝက်အူတောင့်နှင့် ကြက်အူတောင့်များဖြစ်ကြောင်း တင်ပြလိုက်ရပါသည်။

DOCA(စစ်ကိုင်း)