ပဲခူးတိုင်းဒေသကြီး၊ နတ်တလင်းခရိုင်အတွင်းရှိ မြို့နယ်များတွင် မိုးရာသီပေါ်ဒေသထွက် ဟင်းသီးဟင်းရွက်များဖြစ်ကြသော ရွှေဖရုံသီး၊ ပဲတောင့်ရှည်၊ ရုံးပတီသီး၊ သခွားသီး၊ ကြက်ဟင်းခါး သီး(အကြီး)၊ ကြက်ဟင်းခါးသီး(အသေး)နှင့် ခဝဲသီးများထွက်ရှိလျက်ရှိရာ ကုန်စိမ်းဒိုင်များတွင် စိုက်ပျိုးသူတောင်သူများလာရောက်ရောင်းချခြင်းဖြင့် ဝင်ငွေများရရှိနေပါသည်။
သဲကုန်းမြို့နယ်သည် ဟင်းသီးဟင်းရွက်အများဆုံးစိုက်ပျိုးသောမြို့နယ်ဖြစ်ပါသည်။ ၂၀၂၃ခုနှစ်၊ ဇွန်လ၊ စတုတ္ထအပတ်အတွင်း သဲကုန်းမြို့နယ်၊ ပုတီကုန်းမြို့၊ “စိမ်းရောင်စို” ကုန်စိမ်းဒိုင်နှင့် အခြားမြို့နယ်ရှိ ကုန်စိမ်းဒိုင်များတွင် ရွှေဖရုံသီးတစ်လုံးလျှင် (၂၀၀၀-၂၅၀၀) ကျပ်၊ ပဲတောင်ရှည်တစ်တောင့်လျှင် (၇၀-၁၀၀) ကျပ်၊ ရုံးပတီအတောင့်တစ်ရာလျှင် (၁၀၀၀) ကျပ်၊ သခွားသီးတစ်လုံးလျှင် (၈၀-၁၀၀) ကျပ်၊ ကြက်ဟင်းခါးသီး(အကြီး)တစ်လုံးလျှင် (၇၀-၈၀) ကျပ်၊ ကြက်ဟင်းခါးသီး(အသေး)တစ်လုံးလျှင် (၇၀၀-၈၀၀) ကျပ်၊ ခဝဲသီးတစ်တောင့်လျှင် (၄၀၀) ကျပ်နှုန်းပေါက်ဈေးရှိသဖြင့် ဟင်းသီးဟင်းရွက်စိုက်တောင်သူများ ဝင်ငွေများရရှိနေသကဲ့သို့ ကုန်သည်များအနေဖြင့်လည်း ကုန်များကိုဝယ်ယူပြီး ပြန်လည်ထုပ်ပိုးကာ ရန်ကုန်မြို့သို့တစ်ဆင့် ပြန်လည်တင်ပို့ရောင်းချခြင်းတို့ကြောင့် အကျိုးအမြတ်များရရှိနေကြကြောင်း သိရှိရပါသည်။
DOCA(ပဲခူး)