ယခုမိုးဦးကာလတွင် ပြည်မြို့နယ်၊ ဂန္ဓမာစက်မှုဇုန်အတွင်းရှိ ကြံတောကုန်းရပ်ကွက်တွင် ခြံစိုက်တောင်သူများအနေဖြင့် စိန်ခြယ်ပန်းများ စတင်စိုက်ပျိုးနေပြီဖြစ်ပါသည်။ စိန်ခြယ်ပန်းသည် ဘုရားပန်း၊ နတ်ပန်းများနှင့် အလှူမင်္ဂလာဆောင်အခမ်းအနားများတွင် အသုံးပြုကြသောပန်းများ ဖြစ်ပါသည်။ စိန်ခြယ်ပန်း တစ်ဧကစိုက်ပျိုးရာတွင် မျိုးစေ့တစ်ပုလင်းလျှင် (၇၀၀၀)ကျပ်နှုန်း ဝယ်ယူစိုက်ပျိုးကြပြီး ဇူလိုင်လပထမပတ်တွင် စတင်စိုက်ပျိုးပြီး ဇူလိုင်လကုန်တွင် အပွင့်များ စတင်ပွင့်ကာ ဩဂုတ်၊ စက်တင်ဘာလတို့တွင် ရောင်းတန်းဝင်ပန်းများထွက်ရှိပါသည်။ စိန်ခြယ်ကို ရေသွင်း၍စိုက်ပျိုးသကဲ့သို့ မိုးရေကောင်းစွာရရှိလျှင် ပို၍အပွင့်အရောင်လှပပါသည်။ စိန်ခြယ်ပန်း စိုက်ပျိုးရာတွင် အမြစ်စွဲစေရန်အတွက် ပုလဲဓါတ်မြေဩဇာကို (၁၀)ရက်တစ်ကြိမ်ထည့် ပေးရပါသည်။ ပန်းပင်ခါးလောက်ရောက်လာမှသာ မြေဩဇာကျွေးခြင်းကို ရပ်နားရပါသည်။ စတင်ထွက်ပေါ်လာသော စိန်ခြယ်ပန်းများကို ရောင်းချရာတွင် အခက်(၃)ခက်ပါ တစ်စည်းကို (၂၀၀)ကျပ်ဖြင့် စတင် ရောင်းချ ကြောင်း သိရပါသည်။ ပန်းများလှိုင်လှိုင်ပေါ်လာသောအခါမှသာ တစ်စည်းကို (၁၀၀)ကျပ်နှုန်းဖြင့် ရောင်းချကြပါသည်။ စိန်ခြယ်ပန်း တစ်ဧကစိုက်ပျိုး ထုတ်လုပ်ကုန်ကျစရိတ်မှာ (၂၀၀၀၀)ကျပ်ခန့် ကုန်ကျပြီး ပန်းများထွက်ပေါ်ချိန်တွင် တစ်နေ့ဝင်ငွေ ရရှိမှုမှာ (၅၀၀၀)ကျပ်ခန့်ရရှိကြောင်းသိရပါသည်။ စိန်ခြယ်ပန်းစိုက်ပျိုးသူတောင်သူများအနေဖြင့် ပန်းပွင့်မတုံးမချင်း နေ့စဉ်ဝင်ငွေများရရှိသဖြင့် စိုက်ပျိုးသင့်သောပန်းဖြစ်ပါသည်။ မိမိတို့ အိမ်ခြံဝန်းများအတွင်းတွင်လည်း တစ်နိုင်တစ်ပိုင်စိုက်ပျိုးထားရှိလျှင် အိမ်အတွက်လည်းလှပပြီး ဘုရားပန်း၊ နတ်ပန်းများကပ်လှူရာတွင် အသုံးဝင်မှာဖြစ်ပါသည်။
DOCA(ပဲခူး)