ကသာခရိုင်၊ အင်းတော်မြို့၊ အောင်ဇေယျရပ်ကွက်၌ Dnae- Herbal Healthy Products အမည်ဖြင့် အလှကုန်ပစ္စည်းများကိုထုတ်လုပ်ပြီး ရန်ကုန်မြို့၌ ကုမ္ပဏီရုံးခန်း( United Myanmar & Asia Co,Ltd, Yangon, Myanmar) ဖွင့်လှစ်ကာ မြန်မာပြည်အနှံ့အပြားတွင် ဖြန့်ဖြူးရောင်းချခြင်းလုပ်ငန်းများကို ၂၀၁၆ခုနှစ်မှစတင်၍ လုပ်ကိုင်လျက်ရှိကြောင်း စွန့်ဦးတီထွင်လုပ်ငန်းရှင် ဒေါ်ငြိမ်းငြိမ်းအိထံမှသိရှိရသည်။
မြန်မာနိုင်ငံအတွင်း ပေါက်ရောက်သည့် သစ်သီးဝလံဟင်းသီးဟင်းရွက်ပန်းမန်များဖြစ်သော မန်ကျည်းသီး၊ ရှားစောင်းလက်ပတ်၊ လက်ဖက်ရွက်၊ ဒန်းရွက်၊ တမာ၊ ကျိတ်မှန်ရွက်၊ ဇီးဖြူသီး၊ ကင်ပွန်းသီး၊ သံပရာသီး၊ သလဲသီး၊ သနပ်ခါးနှင့် နှင်းဆီပန်း စသည်တို့မှ အဆီအနှစ်များကို ထုတ်ယူသည်။ ၎င်းအဆီအနှစ်များဖြင့် တန်ဖိုးမြှင့်အလှကုန်ပစ္စည်းများဖြစ်သော ခေါင်းလျှော်ရည်၊ ရေချိုးဆပ်ပြာ၊ လက်ဆေးဆပ်ပြာ၊ ပန်းကန်ဆေးဆပ်ပြာ၊ အဝတ်လျှော်ဆပ်ပြာ၊ ချိုင်းချွေးနံ့ပျောက်ဆေး (Spray, Body Lotion, Shower Scrub, Facial Mist) စသည့်အလှကုန်ပစ္စည်းများကို ထုတ်လုပ်ခြင်းဖြစ်ကြောင်းသိရှိရသည်။ ဒီနေ့ (Dnae) အလှကုန်ပစ္စည်းများသည် မြန်မာနိုင်ငံအစားအသောက်နှင့်ဆေးဝါးကွပ်ကဲရေးဦးစီးဌာန (FDA) ၏ ထောက်ခံချက်လက်မှတ်ရရှိပြီးဖြစ်သည်။
ဒီနေ့ (Dnae) အလှကုန်ပစ္စည်းများကို ရန်ကုန်၊ မန္တလေး၊ မုံရွာ၊ နေပြည်တော် စသည့်မြို့ကြီးများရှိ Super Market, E- Market များသို့ တင်ပို့ရောင်းချလျက်ရှိသည်။ အလှကုန်ပစ္စည်းအမျိုးမျိုးကို ပွင့်လင်းရာသီ၌ ပိုမိုထုတ်လုပ်ပြီး မိုးရာသီတွင် ထုတ်လုပ်မှုနည်းကြောင်း၊ တစ်လလျှင် ပျမ်းမျှဘူးအရေအတွက် တစ်သောင်းကျော်ထုတ်လုပ်နိုင်ပြီး ထုတ်ကုန်ပစ္စည်းများ၏ ခန့်မှန်းတန်ဖိုးသည် ကျပ်သိန်း ၂၅၀ခန့်ရှိကြောင်းသိရှိရသည်။ ယခုမိုးရာသီတွင် လုပ်သားအင်အား ၁၅ဦးခန့်ဖြင့် လုပ်ကိုင်နေကြပြီး လုပ်ငန်းကျွမ်းကျင်မှုပေါ်မူတည်၍ တစ်ဦးကိုတစ်လလျှင် ကျပ်၂သိန်းမှ ကျပ် ၄သိန်းအထိလုပ်ခလစာပေးထားသည်။
ဒီနေ့ (Dnae) အလှကုန်ပစ္စည်းများထည့်ရန် လှပသောဘူးခွံများကို တရုတ်ပြည်မှဝယ်ယူရ၍ ငွေကြေးအခက်အခဲနှင့် အချိန်ကြာမြင့်မှုအခက်အခဲများရှိနေသော်လည်း မြန်မာပြည်သူ/ပြည်သားများအနေဖြင့် အရည်အသွေးမှန်ပြီး စံချိန်စံညွှန်းပြည့်မီကာ သင့်တင့်သောဈေးနှုန်းတို့ဖြင့် ဝယ်ယူအသုံးပြုနိုင်ရန်အတွက် ပုံမှန်ဈေးနှုန်းဖြင့်ရောင်းချလျက်ရှိကြောင်း လုပ်ငန်းရှင် ဒေါငြိမ်းငြိမ်းအိ၏ပြောပြချက်အရ သိရှိရပါသည်။
DOCA(စစ်ကိုင်း)