စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါဆောင်ရွက်လျက်ရှိရာ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်၊ တပ်ကုန်းကျေးရွာတွင် တစ်နိုင်တစ်ပိုင်အနေဖြင့်လည်းကောင်း၊ မိသားစုစားဝတ်နေရေးအပိုဝင်ငွေရရှိရန်အတွက်လည်းကောင်း ခရမ်းသီးကိုစိုက်ပျိုးကြကြောင်း၊ ခရမ်းသီးကိုစိုက်ပျိုးရာတွင် ရာသီမရွေးစိုက်ပျိုးကြပြီး စိုက်ပျိုးချိန် (၂) လကျော်လျှင် အသီးများကိုစတင်ခူးဆွတ်ရကြောင်း သိရှိရပါသည်။
ခရမ်းသီးကို ပြာသိုလတွင်စိုက်ပျိုးကာ တပေါင်းလကျော်လျှင် အသီးများသီးကာ စတင်ခူးဆွတ်ရောင်းချရပါသည်။ ခရမ်းသီးကို တစ်ကျင်းလျှင် (၁) ပင်ခန့်စိုက်ပျိုးရပြီး အပင်ရေ (၆၀၀) ခန့်စိုက်ပျိုးထားပါသည်။ ခရမ်းသီးကို မြေအောက်ရေတင်စနစ်ဖြင့်စိုက်ပျိုးကာ ခရမ်းသီးပင်စတင်စိုက်ပျိုးရန် မျိုးစေ့ဖိုး၊ မြေပြုပြင်ခ၊ ဓာတ်မြေဩဇာနှင့် ရေသွင်းခြင်း စသည်တို့၏ စုစုပေါင်းကုန်ကျစရိတ်မှာ ကျပ် (၆၀၀၀၀) ခန့်ကုန်ကျပြီး တစ်ခါခူးဆွတ်လျှင် (၁၂) ပိဿာမှ (၁၅) ပိဿာအထိပုံမှန်ခူးဆွတ်ရပြီး ၂/၃ရက်ခြားလျှင် တစ်ကြိမ်ခူးဆွတ်ရပါသည်။
ထို့ကြောင့် ခရမ်းသီးပင်သည် စဉ်ဆက်မပြတ်စိုက်ပျိုးနိုင်ပြီး နေ့စဉ်ခူးဆွတ်ရောင်းချရသောသီးနှံပင်ဖြစ်၍ စီးပွားရေးအရ စိုက်ပျိုးသင့်သောသီနှံပင်ဖြစ်ကြောင်းနှင့် ခရမ်းသီးတစ်ပိဿာလျှင် မေလတွင် (၁၈၀၀/၂၀၀၀) ကျပ်ဈေးနှုန်းတို့ဖြင့်ရောင်းရကာ ဇွန်လ/ဇူလိုင်လများတွင် ခရမ်းသီးတစ်ပိဿာလျှင် (၈၀၀/၁၀၀၀/၁၂၀၀) ကျပ်တို့ဖြင့် အစားစားရောင်းရပြီး မြို့မစည်ပင်သာယာဈေးရှိ ဖောက်သည်များထံ ပို့ဆောင်ရောင်းချကာ အရောင်းအဝယ်ဖြစ်ပြီး မိသားစုဝင်ငွေရရှိ၍ အဆင်ပြေလျက်ရှိကြောင်း တပ်ကုန်းကျေးရွာရှိ ခရမ်းသီးစိုက်တောင်သူ မဝါဝါခိုင်ထံမှသိရှိရပါသည်။
DOCA(စစ်ကိုင်း)