သံပုရာသီးသည် မြန်မာနိုင်ငံတွင် အသုပ်သုပ်သည့်အခါ၊ မုန့်ဟင်းခါးနှင့် အုန်းနို့ခေါက်ဆွဲစားသည့်အခါ သံပုရာသီးညှစ်၍ စားသုံးလေ့ရှိပါသည်။ သံပုရာသီးကို သံပုရာသီး သနပ်၊ ဖျော်ရည် များပြုလုပ်၍လည်း စားသုံးကြပါသည်။ သံပုရာသီးကို အင်္ဂလိပ်လို Sour Lime ဟုခေါ်ပြီး အစာကြေဆေး၊ ပိုးသတ်ဆေး၊ သွေးတိုးကျဆေးစသည့် တိုင်းရင်းဆေးများဖော်စပ်ရာတွင် အသုံးပြုလေ့ရှိပါသည်။ ပြည်ခရိုင်၊ ပြည်မြို့တွင် သံပုရာသီးဈေးနှုန်းများအနေဖြင့် ခုရက်ပိုင်းတွင် ဈေးနှုန်းများကျဆင်းပြီး အရောင်းအဝယ်သွက်လျက်ရှိပါသည်။ တစ်နိုင်တစ်ပိုင် သံပုရာသီး စိုက်ပျိုးသူများအတွက် အပိုဝင်ငွေ ရလျက်ရှိပြီး သက်တမ်းရင့် သံပုရာပင် တစ်ပင်လျှင် အသီးလုံးရေ (၁၀၀၀)ခန့်သီးကြောင်း သိရပါသည်။ ယခုလိုမိုးရာသီတွင် သံပုရာခြံများမှ သံပုရာသီးများ လှိုင်လှိုင်ထွက်လာပြီး သံပုရာသီးတစ်လုံးလျှင် (၃၀)ကျပ်ဖြင့် ပြည်ဈေးကွက်တွင် အရောင်းအဝယ်ဖြစ်လျက် ရှိပါသည်။
DOCA(ပဲခူး)