အပ်မှိုဆိုသည်မှာ ရှည်ပြီးပါးသွယ်၍ ခေါင်းစွပ်ပုံစံမှိုတစ်မျိုးဖြစ်ပါသည်။ အပ်မှိုကို မြန်မာနိုင်ငံတွင် ကျယ်ကျယ်ပြန့်ပြန့်စားသုံးကြပါသည်။ အပ်မှိုတွင် အာဟာရဓါတ် တော်တော်များများပါဝင်ပြီး လူတစ်ယောက်အတွက် အဓိကလိုအပ်ချက်ဖြစ်သည့် အရိုးကိုအားဖြစ်စေသော ကယ်လ်ဆီယမ်ဓါတ်များ၊ သွေးတိုးခြင်းနှင့် အသည်းရောဂါကိုသက်သာစေသော အထောက်အကူပြုဓါတ်များလည်း ပါဝင်ပါသည်။ ကြက်ဥနှင့် အသားဓါတ်မတည့်သော ရောဂါရှိသူများသည် အပ်မှိုကို ရှောင်ရှားသင့်ပါသည်။ အစာအဆိပ်သင့်တက်သူများသည် အပ်မှိုကိုဂရုပြု၍ စားသုံးသင့်ပါသည်။ အထူးသဖြင့် ကိုယ်ဝန်ဆောင်၊ အသက်(၆၅)နှစ်နှင့်အထက်နှင့် ကိုယ်ခံအား နည်းသူများ မစားသင့် ကြောင်း သတိပေးချက်များရှိပါသည်။ အပ်မှိုကို ယိုးဒယားနှင့် ဂျပန်နိုင်ငံတို့ဘက်မှ တင်သွင်းကြောင်း သိရပြီး အပ်မှိုကို ရေခဲ/ဖော့ဖာများဖြင့် တင်သွင်းကြောင်း သိရပါသည်။ ဈေးနှုန်း ဈေးကွက် အနေဖြင့် ရေခဲ/ဖော့ ပါအပြီး (၁)ဖော့ကို (၄၄)ထုပ်ပါ (၆၀၀၀၀)ကျပ်၊ (၁)ဖော့ (၆၈)ထုပ်ပါ (၉၂၀၀၀)ကျပ် ဖြင့် ရောင်းချကြောင်းသိရပါသည်။ လက်လီဈေးနှုန်းများအနေဖြင့် တစ်ထုပ်ကို (၁၅၀၀)ကျပ် မှ (၂၀၀၀)ကျပ် အထိရောင်းချကြောင်းနှင့် အပ်မှိုအထုပ်များကို အမြို့မြို့အနယ်နယ်ရှိ ကုန်စိမ်းဆိုင်များတွင် ရောင်းချ ကြောင်းသိရပြီး အလွယ်တကူ ဝယ်ယူရရှိနိုင်ပါသည်။
DOCA(ပဲခူး)