ကတ္တီပါပဲပြုတ်ဟု လူသိများသည့်စွန်တာနီပဲပြုတ်ကို လူအများကြိုက်နှစ်သက်ပြီး ထမင်းပူပူဖြင့် မနက်စာအဖြစ် စားသုံးကြပါသည်။ စွန်တာနီပဲကို စစ်ကိုင်းတိုင်းဒေသကြီးနှင့် ဧရာဝတီတိုင်းဒေသကြီးတို့တွင် အများဆုံးစိုက်ပျိုးကြပါသည်။ အောက်တိုဘာလနှင့် နိုဝင်ဘာလများတွင် စတင်စိုက်ပျိုးပြီး ဧပြီလနှင့် မေလတို့တွင် ရိတ်သိမ်းကြပါသည်။ နိုင်ငံခြားသို့တင်ပို့နိုင်ပြီး ဈေးကွက်ဝင်၍ ဈေးကောင်းရသောပဲတစ်မျိုးဖြစ်ပါသည်။
စွန်တာနီပဲတစ်တင်းခွဲဝင် အိတ်တစ်အိတ်လျှင် ၁၃၀၀၀၀ကျပ်ခန့်ရှိပါသည်။ ပြုတ်ရောင်းသူများက တစ်ပြည်လျှင် ၅၆၀၀ကျပ်၊ နို့ဆီတစ်ဘူးလျှင် ၇၀၀ကျပ်ဖြင့်ဝယ်ယူရပါသည်။ ကတ္တီပါပဲကို မပြုတ်မီ ပဲအား ခဲ၊ ကျောက်များသန့်စင်၍ ရေဆေးပြီးမှသာလျှင် ပြုတ်ရပါသည်။ ပထမတစ်ရေဖြင့် ပဲနူးလျှင် ၎င်းရေအားသွန်ပြီး ဒုတိယရေဖြင့် ထပ်မံပြုတ်ရပါသည်။ ကတ္တီပါပဲပြုတ်ကို ၁၀ကျပ်သားလျှင် ၅၀၀ကျပ်ဖြင့်ရောင်းချကြပါသည်။
စွန်တာနီကို Velvet Bean ဟုခေါပြီး ပဲကတ္တီပါ၊ ပဲနီပြား၊ ပဲပြားပြုတ် စသည်ဖြင့် ဒေသအလိုက်ခေါ်ဝေါ်ကြပါသည်။ လေရောဂါအမျိုးမျိုး၊ အာရုံကြောရောဂါများနှင့် အစာအိမ်နှင့်အူလမ်း ကြောင်းဆိုင်ရာရောဂါများဖြစ်ပွားခြင်းကိုကာကွယ်ပေးသည့်အတွက် ဆေးဖက်ဝင်ပြီး ကျန်းမာရေးအထောက်အကူပြုအစားအစာဖြစ်ပါသည်။ ပရိုတိန်း၊ အဆီဓာတ်၊ ရေဓာတ်၊ အမျှင်ဓာတ်များပါဝင်ကြောင်း ကျန်းမာရေးသုတေသီများကဆိုပါသည်။
ကတ္တီပါပဲပြုတ် (ခေါ်) စွန်တာနီပဲပြုတ်သည် ဈေးနှုန်းသင့်တင့်ခြင်း၊ အရသာပြည့်စုံခြင်း၊ အာဟာရပြည့်ဝခြင်းနှင့် ကျန်းမာရေးအတွက် အထောက်အကူပြုသည့်အစားအစာဖြစ်ခြင်းကြောင့် ရောင်းအားကောင်းသည့် အစားအစာတစ်မျိုးဖြစ်ကြောင်းသိရပါသည်။
DOCA(ပဲခူး)