ကမ္ဘာ့နိုင်ငံများ၏ စီးပွားရေးနှင့်ကုန်သွယ်ရေးသတင်းများ

တရုတ်နိုင်ငံ
မရွှေ့ပြောင်းနိုင်သည့်ပစ္စည်းစာရင်းတွင် ရင်းနှီးမြှုပ်နှံမှုမြင့်တက်လာခြင်း
ယခုနှစ် ပထမ(၈)လအတွင်း တရုတ်နိုင်ငံ၏မရွှေ့ပြောင်းနိုင်သည့်ပစ္စည်းစာရင်းများတွင် ရင်းနှီးမြှုပ်နှံမှု(fixed-asset investment-FAI)မှာ ယွမ်ငွေ (၃၄.၆၉)ထရီလီယံ (အမေရိကန်ဒေါ်လာ ၅.၃၈)ထရီလီယံရှိခဲ့ကာ (၈.၉%)မြင့်တက်ခဲ့သည်ဟုအမျိုးသားစာရင်းအင်းဌာနမှထုတ်ပြန်ကြေငြာ ခဲ့ကြောင်း၊ FAI မှာ အခြေခံအဆောက်အအုံ၊ ပိုင်ဆိုင်မှု၊ စက်ပစ္စည်းနှင့် အခြားရုပ်ဝတ္တုပစ္စည်းများ တွင်မတည်ငွေရင်းအသုံးပြုခြင်းဖြစ်ပြီး အဆိုပါရင်းနှီးမြှုပ်နှံမှုများအနက် ပုဂ္ဂလိကကဏ္ဍမှ ရင်းနှီး မြှုပ်နှံမှု၌ယွမ်ငွေ(၁၉.၈၆)ထရီလီယံရှိခဲ့ကာ(၁၁.၅%)တိုးတက်လာခဲ့သည်ကိုတွေ့ရှိရကြောင်း၊ရင်းနှီး မြှုပ်နှံမှုများအနက် အခြေခံလုပ်ငန်းများတွင် (၁၈.၁%)၊တစ်ဆင့်မြင့်ကဏ္ဍများတွင် (၁၂.၉%)နှင့် တတိယအဆင့်လုပ်ငန်းများတွင် (၆.၈%)အသီးသီးတိုးတက်လာရာ အထူးသဖြင့် ရင်းနှီးမြှုပ်နှံမှုနှင့် အခြေခံအဆောက်အအုံကဏ္ဍများ၌ (၁၅.၇%)နှင့်(၂.၉%) စီ မြင့်တက်လာခဲ့ကြောင်း သိရှိရပါသည်။
အိမ်ဈေးနှုန်းများတည်ငြိမ်စေရန်ဆောင်ရွက်နေသည့်သတင်း
၂၀၂၁ ခုနှစ်၊ဩဂုတ်လအတွင်း တရုတ်နိုင်ငံ၏အိမ်ဈေးနှုန်းများမှာ ဈေးကွက် ကမောက် ကမ မဖြစ်စေရန် ကြပ်မတ်နေသည့်စည်းကမ်းများကြောင့် အဓိကမြို့ကြီး(၇၀)၌ ဈေးနှုန်းအတက် အကျအနည်းငယ်ဖြစ်သည်ဆိုရုံမျှလောက်သာဖြစ်ခဲ့ပြီး ပျမ်းမျှအားဖြင့်တည်ငြိမ်နေခဲ့ကြောင်း၊ ထို လအတွင်း ၎င်းမြို့ကြီး (၇၀)၌ အိမ်ဈေးနှုန်းမှာ (၀.၂%)မှ (၃.၇%)ကြားတွင်သာ အတက်အကျ ရှိခဲ့ ပြီး အိမ်အသစ်ဈေးနှုန်းမြင့်တက်နေသည့် မြို့ပေါင်း(၅၁)မြို့စာရင်းမှ(၄၆)မြို့၌သာ ဈေးနှုန်းများ မြင့် တက်တော့သည့်အခြေအနေဖြစ်ကြောင်း၊နိုင်ငံ၏ထိပ်တန်းမြို့တော်များတွင် အိမ်ဈေးနှုန်း(၀.၃%) တက်နေဆဲဖြစ်ရာ လွန်ခဲ့သည့်နှစ်နှင့် နှိုင်းယှဉ်ပါက ထိပ်တန်းမြို့တော်ကြီး (၄)မြို့တွင် အိမ်အသစ် ဈေးနှုန်းမှာ ပျမ်းမျှ(၅.၇%)ခန့်၊ ဒုတိယအဆင့်မြို့(၃၁)မြို့တွင် (၄.၄%)ခန့်၊ တတိယအဆင့်မြို့ (၃၅) မြို့တွင် (၂.၈%)ခန့် မြင့်မားလာကြောင်း၊ အိမ်ဝယ်ယူသည့် စည်းမျဉ်းစည်းကမ်းများ မထုတ်ပြန် သေးမီ ဩဂုတ်လအတွင်း တတိယအဆင့်မြို့များတွင် အိမ်အသစ်ဈေးနှုန်းများမှာ (၁၇)လအတွင်း အမြင့်ဆုံးမြင့်တက်ခဲ့ကြောင်း၊ ပြည်နယ်အစိုးရအသီးသီးက အိမ်ဈေးနှုန်းများ ကျဆင်းလာစေရန် ပိုမိုတင်းကြပ်သည့်ချေးငွေမူဝါဒများ ချမှတ်လာခြင်းကြောင့် လာမည့်တတိယလေးလပတ်တွင် အိမ် ဈေးနှုန်းများ အေးလာမည့်ပုံပေါ်ကြောင်း၊ ကျွမ်းကျင်သူများအနေဖြင့် လက်ရှိ မေခရိုထိန်းချုပ်ရေး စီမံဆောင်ရွက်မှုများမှာ ကျိုးကြောင်းဆီလျော်မှုမရှိသည့် ဝယ်လိုအားများကိုတားဆီးရန်နှင့် ပုံမှန် အိမ်ဝယ်ယူလိုသူများအတွက် စိတ်ချရစေရန် ဆောင်ရွက်ပေးနေခြင်းဖြစ်ကြောင်း၊ လက်ရှိ အိမ်၊ ခြံ၊ မြေစနစ်ကို တစ်သမတ်တည်းဖြစ်စေရန် ဆောင်ရွက်နေမှုနှင့်အတူ အိမ်၊ ခြံ၊မြေ ဈေးကွက် ရေရှည် တွင် တည်ငြိမ်စွာဖွံ့ဖြိုးနိုင်သည်ဟု သုံးသပ်ထားကြောင်း သိရှိရပါသည်။
အပြည်ပြည်ဆိုင်ရာ လေကြောင်းသယ်ယူပို့ဆောင်ရေးကဏ္ဍကို တိုးမြှင့်ရန်ကြိုးပမ်းနေခြင်း
တရုတ်နိုင်ငံ၏ ပြည်တွင်းပြည်ပ ဈေးကွက်(၂)ရပ်လုံးအတွက် လည်ပတ်ဆောင်ရွက်နေသည့် dual circulation စံပုံစံကို လွယ်ကူချောမွေ့စေရန်၊ပြည်တွင်း ကုန်စည်ထောက်ပံ့မှုကွင်းဆက်ကို အဆက်မပြတ်စေရန်နှင့် အပြည်ပြည်ဆိုင်ရာ လေကြောင်းသယ်ယူပို့ဆောင်မှုကဏ္ဍကို တိုးမြှင့်ရန် တရုတ်လေကြောင်းအာဏာပိုင်များက နည်းလမ်းရှာဖွေဆောင်ရွက်လျှက်ရှိရာ၌ အဆိုပါကဏ္ဍကို လျင်မြန်ကောင်းမွန်စွာဖွံ့ဖြိုးလာစေရန်ခရီးသည်နှင့်ကုန်ပစ္စည်းများပို့ဆောင်ရေးအတွက်မူဝါဒအမျိုး မျိုးဖြင့်ဆောင်ရွက်မည်ဖြစ်သည်ဟု တရုတ်မြို့ပြလေကြောင်းစီမံခန့်ခွဲရေးဌာန(CAAC)က ကတိပြု ထားကြောင်း၊၎င်းမူဝါဒများဖြင့် လေကြောင်းကုန်တင်ခြင်းနှင့်ဆက်စပ်နေသည့် အခြေခံအဆောက် အအုံတည်ဆောက်မှုများကို့ ပံ့ပိုးပေးသွားမည်ဖြစ်ပြီး လေဆိပ်ပြေးလမ်း ခွဲဝေနေရာချထားမှုများကို အကောင်းဆုံးဖြစ်စေလျှက် လေကြောင်းကုန်တင်ကဏ္ဍရှိ ဘက်စုံပံ့ပိုးပေးနိုင်မည့်စွမ်းရည်များကို တိုးမြှင့်ပေးသွားမည်ဖြစ်ကြောင်း၊ တရုတ်နိုင်ငံဘက်မှ လေယာဉ်အတည်ပြုသည့်လုပ်ငန်းစဉ်များကို ရိုးရှင်းလွယ်ကူစေခြင်း၊စင်းလုံးငှားလေယာဉ်များကို အစိမ်းရောင်လမ်းကြောင်းဖြင့် တံခါးဖွင့်ကြိုဆို ခြင်းနှင့် ခရီးသည်တင်လေယာဉ်များကို ကုန်တင်ဆောင်နိုင်ရန်အတွက်စီစဉ်ပေးခြင်း စသည့်စီမံ ဆောင်ရွက်မှုအမျိုးမျိုးဖြင့် စတင်မိတ်ဆက်၍ လေကြောင်းကုန်တင်ကဏ္ဍကို ကူညီပံ့ပိုးပေးလျှက် ရှိကြောင်း၊ CAAC စာရင်းများအရ ယခုနှစ် ပထမ နှစ်ဝက်အတွင်း တရုတ်လေကြောင်းကဏ္ဍမှ လေကြောင်းကုန်တင်ပို့မှု တန်ချိန်ပေါင်း (၃.၇၄)သန်းကျော်ကို ကိုင်တွယ်ဆောင်ရွက်ပေးခဲ့ရကာ ကပ်ရောဂါနှင့်မကြုံတွေ့မီ ၂၀၁၉ ခုနှစ်၏အလားတူကာလထက် (၆.၄%) တိုးတက်လာခဲ့ကြောင်း သိရှိရပါသည်။
(ရင်းမြစ်-နန်နင်းမြို့ စီးပွားရေးသံမှူး ပေးပို့သည့်သတင်း)
ဥရောပသမဂ္ဂနိုင်ငံများ
သစ်သီးဝလံနှင့် ဟင်းသီးဟင်းရွက်ဆိုင်ရာပြပွဲသို့ ပါဝင်ပြသရန်မှတ်ပုံတင်ထားသည့်ကုမ္ပဏီများ
စပိန်နိုင်ငံ၊မက်ဒရစ်မြို့၌ ၂၀၂၁ ခုနှစ်၊ အောက်တိုဘာလ(၅)ရက်မှ(၇)ရက်ထိ In person ပုံစံဖြင့်ကျင်းပမည့် သစ်သီးဝလံနှင့် ဟင်းသီးဟင်းရွက်ဆိုင်ရာပြပွဲ Fruit Attraction 2021 သို့ ပါဝင် ပြသရန်အတွက် စပိန်နိုင်ငံရှိ သစ်သီးဝလံနှင့်ဟင်းသီးဟင်းရွက်စိုက်ပျိုးထုတ်လုပ်သည့်ဒေသများနှင့် နိုင်ငံပေါင်း(၄၀)ခန့်မှ ကုမ္ပဏီပေါင်း (၁၂၀၀)နီးပါးကမှတ်ပုံတင်ထားပြီး ပါဝင်ပြသမည့် ကုမ္ပဏီ ထပ် တိုးလာနိုင်ကြောင်း၊အဆိုပါပြပွဲသည် စပိန်နိုင်ငံ၊မက်ဒရစ်မြို့ရှိပြပွဲများ၊ခန်းမများစီစဉ်သည့်လုပ်ငန်း (IFEMA MADRID)နှင့်စပိန်နိုင်ငံသစ်သီးဝလံ၊ဟင်းသီးဟင်းရွက်၊အပင်နှင့်ပန်းများထုတ်လုပ်တင်ပို့သူ များအသင်းချုပ်(FEPEX)တို့မှစီစဉ်ကျင်းပသည့် နိုင်ငံတကာသစ်သီးဝလံနှင့်ဟင်းသီးဟင်းရွက်ကဏ္ဍ ဆိုင်ရာပြပွဲကြီးဖြစ်ပြီး ပြပွဲဆိုင်ရာအသေးစိတ်အချက်အလက်များကို https://www.ifema.es/en/ fruit-attraction တွင် ဝင်ရောက်ကြည့်ရှုနိုင်ကြောင်း၊ Fruit Attraction 2021 သည် စပိန်နိုင်ငံ၊ မက်ဒရစ်မြို့အား အရည်အသွေး၊ တီထွင်ဆန်းသစ်မှု၊ မတူကွဲပြားမှုတို့ဖြင့် လတ်ဆတ်ထုတ်ကုန်များ ကူးသန်းရောင်းဝယ်မှုဆိုင်ရာကမ္ဘာ့ဗဟိုချက်သဖွယ်ဖြစ်လာစေရန်IFEMA MADRID ၏ပြခန်းဆောင် (၈)ခု၌ သစ်သီးဝလံနှင့် ဟင်းသီးဟင်းရွက်ထုတ်ကုန်များကို ခင်းကျင်းပြသသွားမည်ဖြစ်ကြောင်း သိရှိရပါသည်။
(ရင်းမြစ်-ဘရပ်ဆဲလ်မြို့စီးပွားရေးသံမှူးပေးပို့သည့်သတင်း)

ဂျပန်နိုင်ငံ
ဂျပန်နိုင်ငံမှ Unshu Mandarin လိမ္မော်သီးများ တင်ပို့မှုကန့်သတ်ချက်ကို ဖြေလျှော့ပေးသည့် ဗီယက်နမ်
ဂျပန်နိုင်ငံမှ Unshu Mandarin လိမ္မော်သီးများကို ဗီယက်နမ်နိုင်ငံ၏ သတ်မှတ်စံချိန် စံနှုန်းများနှင့်ကိုက်ညီမှုရှိသဖြင့် ၂၀၂၁ ခုနှစ်၊ အောက်တိုဘာလ(၁)ရက်နေ့မှစ၍ တင်ပို့ခွင့် ပြန် လည်ရရှိမည်ဟု ဂျပန်နိုင်ငံစိုက်ပျိုးရေးဝန်ကြီးဌာနမှ ပြောကြားခဲ့ကြောင်း၊ တင်ပို့မည့်လိမ္မော်သီး များကို သတ်မှတ်ထားသည့် စိုက်ပျိုးမြေများတွင် စိုက်ပျိုးရမည်ဖြစ်ပြီး လိမ္မော်သီးဖောက်ပိုးနှင့် အခြားသော ပိုးမွှားကင်းစင်ရန် စနစ်တကျ စစ်ဆေးမှုဆောင်ရွက်ရမည်ဖြစ်ကြောင်း၊ ဂျပန်နိုင်ငံမှ လိမ္မော်သီးတင်ပို့မှု တားမြစ်ထားခြင်းကို ဗီယက်နမ်နိုင်ငံမှ ဖြေလျှော့ပေးလိုက်သည့်အတွက် လာ မည့်နှစ် လိမ္မော်သီးထွက်ရှိမည့်ရာသီတွင် ပိုမိုတိုးမြှင့်တင်ပို့နိုင်မည်ဖြစ်ပြီး ပထမဆုံးစတင် တင်ပို့ မည့်နှစ်တွင် ကနဉီးတန်ဖိုး ယန်း ၉ သန်း ခန့်ရရှိနိုင်မည်ဟု စိုက်ပျိုးရေးဝန်ကြီးဌာနက ပြောကြား ခဲ့ကြောင်း၊ စိုက်ပျိုးရေးဝန်ကြီးဌာနအနေဖြင့် ဗီယက်နမ်သို့ လိမ္မော်သီး တိုးမြှင့်တင်ပို့နိုင်ရန်အတွက် လိမ္မော်သီးစိုက်ပျိုးလိုသူများကိုPlant Protection Station တွင်မြေယာမှတ်ပုံတင်ရန်တွန်းအားပေး ဆောင်ရွက်နေကြောင်း၊ လိမ္မော်သီး စိုက်ပျိုးလိုသူများသည် ဗီယက်နမ်နိုင်ငံမှသတ်မှတ်ထားသည့် ပစ္စည်းကိရိယာအသုံးအဆောင်များနှင့်အညီ ဆောင်ရွက်ရမည်ဖြစ်ကြောင်း၊ ယခုနှစ်တွင် Citrus fruit ပိုးသတ်စစ်ဆေးခြင်းလုပ်ငန်းစဉ်ကိုဆောင်ရွက်ခဲ့ခြင်းမရှိသဖြင့် လာမည့်နှစ်လိမ္မော်သီးထွက်ရှိ မည့်ရာသီမှသာ စတင် တင်ပို့မည်ဟု ဂျပန် စိုက်ပျိုးရေးဝန်ကြီးဌာန Plant Protection Station မှ ပြောရေးဆိုခွင့်ရှိသူမှ ပြောကြားခဲ့ကြောင်း၊ ဂျပန်နိုင်ငံသည် ၂၀၂၀ ပြည့်နှစ်အတွင်း Unshu orange တန်ချိန်(၉၈၁)တန်၊တန်ဖိုးယန်း(၅၁၈.၇)သန်းရရှိခဲ့သည့်ဟုစိုက်ပျိုးရေးဝန်ကြီးဌာန၏စာရင်းအချက် အလက်များအရ သိရှိရပါသည်။
(ရင်းမြစ်-တိုကျိုမြို့ စီးပွားရေးသံမှူးပေးပို့သည့်သတင်း)