ပဲခူးတိုင်းဒေသကြီး၊ ပြည်ခရိုင်တွင် ကောက်စောစပါးများ စတင်ထွက်ပေါ်နေပြီဖြစ်ပါသည်။ ယခုနှစ်တွင် မိုးစပါးစိုက်ဧကမှာ (၃၈၂၆၀၉)ဧက စိုက်ပျိုးပြီး အထွက်နှုန်းမှာ တစ်ဧကလျှင် ပျမ်းမျှ တင်း(၇၀)ခန့်ထွက်ရှိနိုင်မည်ဟု ခန့်မှန်းရပါသည်။ ပျမ်းမျှအထွက်တင်းအနေဖြင့် (၂၆၈၁၄၉၆၇)တင်း ထွက်ရှိနိုင်ပြီး စားသုံးပိုလျှံမှုအနေဖြင့် ပြည်ခရိုင်တွင် လူဦးရေ(၉၄၈၇၄၆)ဦးရှိပြီး လူတစ်ဦးလျှင် တစ်နှစ် ပျမ်းမျှစားသုံးနှုန်းမှာ (၁၅)တင်းနှင့် မျိုး၊ အလေအလွင့်ထပ်နှုတ်ပါက စပါးတင်းပေါင်း (၁၁၀၁၄၁၁၀) တင်းခန့်ပိုလျှံနိုင်မည်ဖြစ်ပါသည်။
ပြည်ဈေးကွက်သို့ အနီးပတ်ဝန်းကျင်ဒေသများဖြစ်ကြသော ဇီးကုန်း၊ နတ်တလင်း၊မြန်အောင် နှင့် ကြံခင်းဘက်မှလည်း မိုးစပါးများ လာရောက်ရောင်းချကြလို့ နေ့စဉ် အရောင်းအဝယ်ဖြစ်လျှက် ရှိ ပါသည်။ စပါးဈေးနှုန်းများမှာ အစိုဓါတ် (၂၀%) မှ (၂၅%)ကြားရှိ ပေါင်(၅၀)ဝင် တင်း(၁၀၀)လျှင် စပါး အရည်အသွေးပေါ်မူတည်၍ (၆၀၀၀၀၀)ကျပ်ဈေးအထိ ဈေးဖွင့်ဝယ်ယူလျှက်ရှိပါသည်။ ဆန်ဈေး အနေဖြင့် ယခုထွက်ပေါ်သည့် ကြိတ်သစ်ဆန် (၂၅%)မှတ် (Well-Milled) (၁၀၈)ပေါင် တစ်အိတ်လျှင် (၂၄၀၀၀)ကျပ်ဈေးနှုန်းဖြင့် ရန်ကုန်ဈေးကွက်သို့ တင်ပို့ရောင်းချလျှက်ရှိပါသည်။ ဆန်ကွဲဈေးမှာ (2,3,4) တစ်အိတ်လျှင် (၂၀၀၀၀)ကျပ်၊ ဆန်ကွဲ (A 1,2 – Sorted ) တစ်အိတ်လျှင် (၂၄၀၀၀)ကျပ်ဖြင့် ရောင်းချ လျှက်ရှိကြောင်း သိရပါသည်။