စစ်ကိုင်းတိုင်းဒေသကြီး၊ မုံရွာမြို့နယ်အတွင်း ချင်းတွင်းမြစ်ရိုးအရှေ့ဖက်တွင်တည်ရှိသော ညောင်ဖြူပင်၊ သစ်ဆိမ့်၊ ထနောင်းတော၊ နဂါးတွင်းကျေးရွာများသည် သပြေနှင့် ပန်းမာန်ဥယျာဉ် စိုက်ပျိုးခြင်းလုပ်ငန်းများကို အဓိကထားလုပ်ကိုင်ခြင်းဖြင့် ပုံမှန်ဝင်ငွေရရှိလျက်ရှိကြောင်း သိရသည်။ အဓိကထားစိုက်ပျိုးသော သပြေအမျိုးအစားများမှာ သပြေ(ရိုးရိုး)၊ ပတ္တမြားသပြေ၊ ကျောက်စိမ်းသပြေ၊ အာဆီယံသပြေနှင့် ကံ့ကော်သပြေများဖြစ်ပြီး သပြေပျိုးပင်များကို ပြင်ဦးလွင်မြို့နယ်မှမှာယူ စိုက်ပျိုးကြောင်း၊ စိုက်ပျိုးပြီး တစ်လ(၃)ကြိမ်ရေသွင်းပေးပြီး ပိုးသတ်ဆေး ဖျန်းပေးကာ နှစ်နှစ်သား အရွယ်ကစပြီး သပြေညွှန့်များကို ခူးဆွတ်ရောင်းချနိုင်ကြောင်း၊ ဈေးကွက်အနေဖြင့် သပြေအစည်း (အသေး) တစ်ထုံးလျှင် ၃၀၀၀ကျပ် နှင့် သပြေအစည်း(အကြီး) တစ်ထုံးလျှင် ၅၀၀၀ကျပ် နှုန်းဖြင့် မြို့ပေါ်ရှိပန်းဆိုင်များသို့ ပုံမှန်တင်ပို့ရောင်းချလျက်ရှိပြီး တစ်ဆင့်ပြန်လည်ရောင်းချကြသည့် လက်လီပန်းရောင်းသူများနှင့် ခြံအရောက်လာရောက် ဝယ်ယူမှုများရှိကြောင်း၊ သပြေတစ်ဧက စိုက်ပျိုးထားရှိလျှင် အနည်းဆုံး တစ်လဝင်ငွေ ကျပ်၇၀၀၀၀မှ ကျပ်၈၀၀၀၀ကြား ပုံမှန်ဝင်ငွေရရှိကာ တွက်ချေကိုက်ကြောင်း သိရသည်။
“ကံ့ကော်သပြေက တခြားသပြေပန်းတွေထက် ရာသီဥတုဒဏ်ပိုခံတယ်၊ ပိုခိုင်တယ်၊ အနီရောင်သန်းပြီး ရွက်နုတွေက ကံ့ကော်ရွက်နဲ့ဆင်တူတယ်၊ ဈေးကွက်မှာ လူကြိုက်များပြီး အရောင်းသွက် တွက်ချေကိုက်တယ်” ဟု သပြေစိုက်ပျိုးတောင်တစ်ဦးထံမှ သိရသည်။
DOCA(စစ်ကိုင်း)