ကယားပြည်နယ်တွင် ချင်းကို လွိုင်ကော်မြို့နယ်ရှိ ကုန်းသာကျေးရွာနှင့် ကယားပြည်နယ်၊ အနောက်ပိုင်းတွင်ရှိသော လွိုင်နန်းဖကျေးရွာ၊ ပန်ပက်ကျေးရွာ၊ လိုဘာခိုကျေးရွာ၊ ဒေါရောက်ခူ ကျေးရွာတို့တွင် ယခင်ကစိုက်ပျိုးလျက်ရှိပြီး ယခုအခါ ဒေသအခြေအနေအရ စိုက်ပျိုးနိုင်မှုမရှိဘဲ ရှမ်းပြည်နယ်ရှိ ပင်လောင်းမြို့နယ်၊ ဆီဆိုင်မြို့နယ်၊ ဆိုက်ခေါင်မြို့၊ ဖယ်ခုံမြို့နယ်တို့မှလည်း မှာယူတင်သွင်းရောင်းချလျက်ရှိပါသည်။
ချင်းကို ဟင်းခတ်အမွှေးအကြိုင်အဖြစ် ရိုးရာအစားအစာများ၊ ဟင်းလျာများတွင် အသုံးများသဖြင့် ပြည်နယ်အတွင်းစားသုံးမှုများလာပါသည်။ ယခုဩဂုတ်လ၊ တတိယအပတ်တွင် ဈေးကွက်အတွင်း၌ ချင်းတစ်ပိဿာလျှင် (၅၈၀၀) ကျပ်မှ (၆၅၀၀) ကျပ်နှုန်းအထိရောင်းချလျက်ရှိပြီး ယခင်ဇူလိုင်လ၊ တတိယအပတ်တွင် ဈေးကွက်အတွင်း၌ ချင်းတစ်ပိဿာလျှင် (၅၅၀၀) ကျပ်မှ (၆၀၀၀)ကျပ်ခန့်သာအများဆုံးရှိခဲ့ရာ ယခုဩဂုတ်လ၊ တတိယအပတ်နှင့် ယခင်ဇူလိုင်လ၊ တတိယအပတ်ဈေးနှုန်းတို့ကိုနှိုင်းယှဉ်လျှင် ချင်းတစ်ပိဿာလျှင် (၃၀၀)ကျပ်မှ (၅၀၀)ကျပ်အထိဈေးနှုန်းမြှင့်တက်လာကြောင်း၊ ဈေးနှုန်းမြှင့်တက်လာရခြင်းမှာ ချင်းစိုက်ဧကလျော့နည်းလာပြီး ချင်းအထွက်နှုန်းလျော့ကာ ဈေးကွက်အတွင်း ဝင်ရောက်လာခြင်းကြောင့်ဖြစ်သည်ဟု နောင်ယားဈေးအတွင်းရှိ ချင်းရောင်းချသူတစ်ဦးထံမှသိရပါသည်။
DOCA(ကယား)