ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်အနေဖြင့် ၂၀၂၃ခုနှစ်၊ဩဂုတ်လမှစ၍ မိုးနှမ်းများစတင်ရိတ်သိမ်းနေပြီဖြစ်ပါသည်။ မိုးနှမ်းများစိုက်ပျိုးချိန်တွင် ပေါက်ခေါင်းမြို့နယ်အနေဖြင့် မိုးနှမ်းစိုက်ပျိုးဧကမှာ (၃၈၀၀၀)ကျော်စိုက်ပျိုးခဲ့ပြီး စိုက်ပျိုးသည့်မျိုးမှာ နှမ်းနက်အမျိုးအစားဖြစ်ကြောင်းသိရပါသည်။ ယခင်နှစ်တွင် ရာသီဥတုမမှန်ခဲ့၍ တစ်ယောက်စိုက်လျှင် (၇)တင်းခန့်ထွက်ရှိကြောင်းသိရပါသည်။ ယခုနှစ်တွင် ရာသီဥတုကောင်းမွန်၍ အပင်ပေါက်ကောင်းသဖြင့် အထွက်နှုန်းလည်းကောင်း၍ တစ်ယောက်စိုက်လျှင် (၁၀)တင်းခန့်ထွက်ရှိသဖြင့် တစ်ဧကလျှင် တင်း(၄၀)ခန့်ထွက်ရှိကြောင်းသိရပါသည်။ နှမ်းဈေးနှုန်းအနေဖြင့်လည်း ယခင်နှစ်တွင် နှမ်းနက်တစ်တင်းလျှင် (၇၀၀၀၀-၈၀၀၀၀)ကျပ်ခန့်ရှိသော်လည်း ယခုနှစ်၊ မိုးနှမ်းစတင်ပေါ်ခါစတွင် နှမ်းနက်တစ်တင်းလျှင် (၁၀၅၀၀၀)ကျပ်ခန့်ဈေးပေး၍ ဝယ်ယူလျက်ရှိကြောင်းသိရပါသည်။
ထို့ကြောင့် မိုးနှမ်းစိုက်တောင်သူများအနေဖြင့် ယခုနှစ်တွင် မိုးနှမ်းများမှာ အထွက်ကောင်း၊ ဈေးလည်းကောင်းသဖြင့် အကျိုးအမြတ်များစွာရရှိကြောင်းသိရှိရပါသည်။ နှမ်းစိုက်တောင်သူများအနေဖြင့်လည်း ပင်ပန်းသလောက် အကျိုးအမြတ်များစွာရရှိသဖြင့် နောက်နှစ်တွင်လည်း တိုးချဲ့စိုက်ပျိုးသွားမည်ဖြစ်ကြောင်းသိရပါသည်။
DOCA(ပဲခူး)