နိုင်ငံတော်ဗဟိုဘဏ်က ရောင်းချပေးသည့် အမေရိကန်ဒေါ်လာဖြင့် ပြင်ပမှတင်သွင်းသည့် စက်သုံးဆီများကို သက်သာသော အထူးဈေးနှုန်းဖြင့် ဖြန့်ဖြူးရောင်းချပေးသည့် စစ်ကိုင်းမြို့ရှိ ရွှေဗျိုင်းဖြူ စက်သုံးဆီအရောင်းဆိုင်နှင့် BOC စက်သုံးဆီအရောင်းဆိုင်များ သို့ စစ်ကိုင်းခရိုင်၊ ဈေးကွက်စောင့်ကြည့် စစ်ဆေးကြပ်မတ်ရေးအဖွဲ့နှင့် စားသုံးသူရေးရာဦးစီးဌာနမှ ဝန်ထမ်းများသည် နိုဝင်ဘာလ(၁)ရက်နေ့က ကွင်းဆင်းစစ်ဆေးခဲ့ပါသည်။
အဖွဲ့ခေါင်း ဆောင်ဖြစ်သော စစ်ကိုင်းခရိုင် အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးဆန်းထွန်းစိန်က စက်သုံးဆီဆိုင်တာဝန်ခံများအား ရရှိသောစက်သုံး ဆီခွဲတမ်းများကို နိုင်ငံတော်က သတ်မှတ်ပေးသည့် ဈေးနှုန်းဖြင့် အချင်အတွယ်မှန်ကန်စွာ စနစ်တကျ ရောင်းချစေလိုကြောင်း၊ ကား ဆီဖြည့်သည့်နေရာနှင့် ဆိုင်ကယ်ဆီဖြည့်သည့်နေရာကို သီးသန့်ခွဲခြားထားရန်၊ အထူးဈေးနှုန်းများဖြင့် ရောင်းချခြင်းကို ဗီနိုင်းပိုစတာချိတ်ဆွဲထားရန်၊ ခွဲတမ်းရရှိမှု၊ နေ့စဉ်ရောင်းချရမှုနှင့် ဈေးနှုန်းများကို စနစ်တကျ စာရင်းဇယား မှတ်တမ်းများထားရှိပြီး စားသုံးသူရေးရာဦးစီးဌာနသို့ နေ့စဉ်စာရင်းပေးပို့ရန် မှာကြားခဲ့ကြောင်း သိရှိရပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)