ပဲခူးတိုင်းဒေသကြီး၊ ပြည်ခရိုင်တွင် တစ်နှစ်လျှင် မိုးစပါး၊ နွေစပါးစိုက်ဧကမှာ (၄၂၀၀၀၀)ခန့် ရှိပြီး အထွက်နှုန်းအနေဖြင့် ပျှမ်းမျှ (၇၀)တင်းခန့်ထွက်ရှိ၍ စုစုပေါင်း စပါးတင်းသိန်းပေါင်း (၂၉၀)ကျော်ထွက် ရှိပြီး ဆန်ပိုလျှံသောခရိုင်ဖြစ်ပါသည်။ ဆန်ပိုလျှံ သကဲ့သို့ ဘေးထွက်ပစ္စည်း ဆန်ကွဲ၊ ဖွဲနုတို့မှာလည်း ပိုလျှံ၍ တိရစ္ဆာန်အစားအစာဖြစ်လည်း ရောင်းချလျက်ရှိပါသည်။ ထို့အပြင် ဆန်ကွဲကို တန်ဖိုးမြှင့်ထုတ်ကုန်အဖြစ် ဆန်မရွေးလုပ်ငန်းများကို လုပ်ကိုင်လျှက်ရှိကြောင်း လေ့လာသိရှိရပါသည်။ ပြည်မြို့တွင် ဆန်မရွေးလုပ်ငန်းလုပ်ကိုင်သူ (၅)ဉီး ခန့်ရှိပြီး လုပ်ငန်းတစ်ခုလျှင် လုပ်သားဦးရေ (၅)ဉီး လုပ်ကိုင်လျက်ရှိ၍ တစ်ရက်လျှင် ဆန်မရွေး ထွက်ရှိမှုမှာ (၁၅၀) ပိဿာခန့်ထွက်ရှိပါသည်။ ထုတ်လုပ်မှု ကုန်ကျစရိတ်မှာ တစ်ရက်လျှင် (၁၇၅၀၀၀)ကျပ် ရှိပြီးထွက်ရှိလာသော ဆန်မရွေးများကို ဒေသတွင်းမြို့နယ်များနှင့် အောင်လံ၊ ပခုက္ကူမြို့နယ်များထိ ရောင်းချလျှက်ရှိ၍ တစ်ပိဿာလျှင် ကျပ် (၂၀၀၀) ခန့်ရရှိပါသည်။ တစ်နေ့လျှင် ဆန်မရွေးလုပ်ငန်း၏ အသားတင်အကျိုးအမြတ်မှာ ကျပ် (၁၀၀၀၀၀) ဝန်းကျင် ခန့်ရရှိပါသည်။
ဆန်မရွေးသည် မြန်မာ့ရိုးရာအစားအစာဖြစ်သည့်အတွက် တောနေ၊ မြို့နေ လူတန်းစားမရွေး ကြိုက်နှစ်သက်သည့် အစားအစာဖြစ်ပါသည်။ ဆန်မရွေးလုပ်ငန်းတစ်ခုကို ရင်းနှီးငွေကျပ် (၁၅)သိန်းဖြင့် တစ်နှစ်လျှင် (၆)လခန့် ပုံမှန်လုပ်ကိုင်နိုင်သော လုပ်ငန်းဖြစ်သည့်အတွက် မိသားစု တစ်ပိုင်တစ်နိုင်လုပ်ကိုင်နိုင်သည့်အပြင် ပတ်ဝန်းကျင်ရှိ လူများကိုလည်း အလုပ်အကိုင် ဖန်တီးပေး နိုင်သည့်လုပ်ငန်းဖြစ်ပါသည်။ ဆန်မရွေးလုပ်ငန်းကို ငွေကြေးအရင်းအနှီးများ၊ နည်းပညာများပံ့ပိုး ပေးနိုင်ပါက ဆန်ကွဲမှတစ်ဆင့် တန်ဖိုးမြှင့်ထုတ်ကုန် ထုတ်လုပ်သည့် လုပ်ငန်းများ ပိုမိုတိုးတက် လာမည်ဖြစ်သည်နှင့်အညီ အလုပ်အကိုင်အခွင့်အလမ်းသစ်များလည်း ပိုမိုရရှိမည် ဖြစ်ကြောင်း သတင်းရရှိပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)