ပဲခူးတိုင်းဒေသကြီး ၊ ပြည်ခရိုင်တွင် စပါးစျေးများမှာ ယခင်ထက်စာလျှင် စျေးမြင့်တက်လာသည်ကို တွေ့ရှိရပါသည်။ ယခင်နိုဝင်ဘာလဆန်းပိုင်းတွင် စပါးစျေးမှာ တင်း (၁၀၀)ကျပ်လျှင် (၆၀၀၀၀၀-၆၁၀၀၀၀) စျေးဖြစ်ပြီး ယခုဒီဇင်ဘာလဆန်းပိုင်းတွင် တင်း(၁၀၀)လျှင် (၆၄၀၀၀၀-၆၅၀၀၀၀)ကျပ်အထိ စျေးမြင့်လာခဲ့ပါသည်။ ယခင်စပါးတင်း (၁၀၀)လျှင် (၆၀၀၀၀၀-၆၁၀၀၀၀)ကျပ် ရောင်းချစဉ်ကာလ၌ စပါးတွင် အစိုဓာတ် ကျန်ရှိသေးသည့်အတွက် အခြောက်ခံပြီးမှ ရောင်းချခြင်းဖြစ်ရာ စပါးတင်း (၁၀၀) လျှင်အခြောက်ခံခ (၃၀၀၀၀)ကျပ် ကုန်ကျသည့်အတွက် တောင်သူလယ်သမားများအနေဖြင့် (၅၇၀၀၀၀-၅၈၀၀၀၀)သာ ရရှိခဲ့ပါသည်။ ယခုအချိန် စပါးရောင်းချရာတွင် အစိုဓာတ်လျော့နည်းနေသောကြောင့် အခြောက်ခံစရာ မလိုဘဲ တိုက်ရိုက်ရောင်းချနိုင်သည့်အတွက် စပါးအခြောက်ခံကုန်ကျစရိတ် သက်သာကာ တွက်ချေ ပိုကိုက်လာကြောင်းသိရှိရပါသည်။
ယခုလအတွင်း စျေးမြင့်လာရခြင်းမှာ တောင်သူများအနေဖြင့် စပါးရိတ်သိမ်းမှု ၇၅ % ခန့်ပြီးစီး ပြီဖြစ်ခြင်း၊ တောင်သူများလက်ဝယ်တွင် စပါးလက်ကျန်နည်းလာခြင်း ၊ အချို့ တောင်သူကြီး များမှာ စပါးကို ထုတ်မရောင်းဘဲ စျေးကောင်းစောင့်၍ လက်ဝယ်သိုလှောင် ထားရှိခြင်း တို့ကြောင့် မြေပြင် လက်ကျန် နည်းလာသည်ကို တွေ့ရှိရပြီး ယခုအချိန်အခါသည် စပါးများ စတင်ခြောက်သွေ့ချိန်ဖြစ်၍ စပါး လှောင်လက်သမားများ အဝယ်ရှိလာခြင်း၊ စက်ပိုင်များမှ ဝယ်လိုအားများလာခြင်း ၊ ရောင်းအားနည်းပြီး ဝယ်လိုအား များလာခြင်းတို့ကြောင့် စပါးစျေးမြင့်တက် လာရခြင်းဖြစ်ကြောင်း လေ့လာသိရှိရပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)