စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးအနေဖြင့် ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု Thursday Talk (၉/၂၀၂၃) ကို (၂၁-၉-၂၀၂၃)ရက်နေ့၊ နံနက် (၀၉:၀၀) နာရီအချိန်တွင် ပခုက္ကူခရိုင်ဦးစီးမှူးရုံး၊ CICC ခန်းမ၌ တိုင်းဒေသကြီးဦးစီးမှူး၏လမ်းညွှန်မှုနှင့် ခရိုင်ဦးစီးမှူး၏ကြီးကြပ်မှုတို့ဖြင့် ကျင်းပပြုလုပ်ဆောင်ရွက်ခဲ့ကြပါသည်။ ထိုသို့ပြုလုပ်ဆောင်ရွက်ခြင်းမှာ ဝန်ထမ်းများဝန်ထမ်းစွမ်းဆောင်ရည်မြင့်မားပြီး လုပ်ငန်းဆောင်ရွက်ချက်များ အောင်မြင်စွာလုပ်ကိုင်ဆောင်ရွက်တတ်စေရန်ရည်ရွယ်၍ ပြုလုပ်ဆောင်ရွက်ရခြင်းဖြစ်ပါသည်။
ဆွေးနွေးပွဲတွင် ခရိုင်ဦးစီးမှူး ဦးဝေဠုအောင်က အဖွင့်အမှာစကားပြောကြားပြီးနောက် ပြည်ထောင်စုဝန်ကြီး၏လမ်းညွှန်ချက် (၁၃)ချက်ဖြစ်သော ပြင်ဆင်ဆောင်ရွက်မည့်လုပ်ငန်းစဉ်များဖြစ်သည့် (4R)၊ ပြင်ဆင်ဆောင်ရွက်မည့်အချက်များ (Trade) (၄)မျိုး၊ အနာဂတ်ကာလတွင် ဆောင် ရွက်မည့်အချက်များဖြစ်သည့် (A,B,C,D,E)၊ ရုံးလုပ်ငန်းများဆောင်ရွက်ရာတွင် အသုံးပြုရမည့် ကောင်းမွန်သောလုပ်ငန်းခွင်ဖြစ်စေရန်အတွက် (5S) များအကြောင်းနှင့် နိုင်ငံ့ဝန်ထမ်းကျင့်ဝတ် (၂၀၂၂)ခုနှစ်တို့ကိုအသေးစိတ်ရှင်းလင်းဆွေးနွေးခဲ့ပါသည်။
ထို့နောက် ဒုတိယဦးစီးမှူး ဒေါ်မျိုးသန္တာဝင်းက ရုံးစာရေးသားနည်းအမျိုးအစားများနှင့် လိုက်နာရမည့်စည်းကမ်းချက်တို့ကိုရှင်းလင်းရာတွင် အခန်း(၈)ပါ စာပေးစာယူအမျိုးအစားများဖြစ်သည့် အမှာစာပုံစံ၊ ရင်းနှီးမှုဖြင့်ပေးသောရုံးစာပုံစံ၊ ကိုယ်ရေးစာပုံစံ၊ ရုံးတွင်းပေးစာပုံစံ၊ သာမန်ရုံးစာပုံစံများတို့ကိုအသေးစိတ်ရှင်းလင်းဆွေးနွေးပြီး စာရေးသားခြင်းနှင့် အထားအသိုဆိုင်ရာစည်းကမ်းများဖြစ်သည့် လုံခြုံမှုအဆင့်အတန်းတွင်ပါဝင်ရမည့် ထိပ်တန်းလျှို့ဝှက်၊ လျှို့ဝှက်၊ အတွင်းရေး၊ ကန့်သတ်၊ ရိုးရိုးနှင့် ဦးစားပေးအဆင့်အတန်း၊ ရုံးစာများနှင့်ကြေးနန်းစာများတွင် ပါဝင်ရမည့်အချက်များ၊ ရုံးစာရေးသားနည်းဆိုင်ရာခေါင်းစဉ်များ၊ ပေးပို့သည့်ရုံး/ ဌာနအမည်၊ စာအမှတ်နှင့်ရက်စွဲ၊ ပေးပို့ရန်လိပ်စာ၊ အကြောင်းအရာ၊ ရည်ညွှန်းချက်၊ စာပိုဒ်အမှတ်၊ လက်မှတ်ရေးထိုးသူ၏အမည်နှင့် ရာထူးရေးသားခြင်း၊ မိတ္တူပေးပို့ခြင်းဆိုင်ရာအချက်အလက်တို့ကို အကျယ်တဝင့်ရှင်းလင်းဆွေးနွေးခဲ့ပါသည်။
ဆက်လက်၍ ဒုတိယဦးစီးမှူး ဒေါ်ပပရွှေကလည်း စားသုံးသူတိုင်ကြားမှုများနှင့်စပ်လျဉ်း၍ လက်ခံဖြေရှင်းဆောင်ရွက်မှုနှင့် အရေးယူမှုဆိုင်ရာ (၂/၂၀၂၂) ညွှန်ကြားချက်တွင် အပိုဒ်(၁ မှ ၄၄)ထိ ပါဝင်သောအချက်များရှင်းလင်းရာ မှတ်တမ်းတင်ရာ၌ တိုင်းဒေသကြီးနှင့် ပြည်နယ်ကိုယ်စားပြု အင်္ဂလိပ်အက္ခရာသုံးလုံးတို့ကို အတိုကောက်ရေးသားရန်၊ ကုန်စည်နှင့်ဝန်ဆောင်မှုအမျိုးအစားနှင့် ကုတ်နံပါတ်များအား မှတ်တမ်းတင်စာရင်းသွင်းမှုနမူနာပုံစံများဖြင့် အသေးစိတ်ရှင်းလင်းပြီး ဥပဒေနှင့်နည်းဥပဒေများ၏ ဆက်နွယ်မှုများကိုလည်း တိုင်ကြားသူနှင့်စီးပွားရေးလုပ်ငန်းရှင်တို့အကြား ညှိနှိုင်းဖြေရှင်းရာတွင် မိတ်ဆွေများဖြစ်သွားသည်အထိ ဖြေရှင်းပေးမှုဥပမာများဖြင့် အသေးစိတ်ရှင်းလင်းဆွေးနွေးခဲ့ပါသည်။
ထို့နောက် ဒုတိယဦးစီးမှူး ဒေါ်လှိုင်ဥမ္မာဦးက ဘေးအန္တရာယ်ရှိသောကုန်စည်ကို ပြန်လည်သိမ်းဆည်းစေခြင်း (သို့) ရောင်းချဖြန့်ဖြူးခြင်းကို ယာယီတားမြစ်ခြင်း (သို့) အမြဲတမ်းတားမြစ်ခြင်း ဘေးအန္တရာယ်ရှိသောဝန်ဆောင်မှုကို ယာယီတားမြစ်ခြင်း (သို့) အမြဲတမ်းတားမြစ်ခြင်းဆိုင်ရာညွှန်ကြားချက်(၃/၂၀၂၂)၊ အပိုဒ်(၁ မှ ၂၇) ထိပါဝင်သောအချက်တို့ရှင်းလင်းဆွေးနွေးရာတွင် ဘေးအန္တရာယ်ရှိသောကုန်စည်နှင့်ဝန်ဆောင်မှုများကို ပြန်လည်သိမ်းဆည်းရာတွင် ဆောင်ရွက်ရမည့်လုပ်ငန်းစဉ်များ၊ စီးပွားရေးလုပ်ငန်းရှင်က ကုန်စည်ကိုပြန်လည်သိမ်းဆည်းရာတွင် သက်ဆိုင်ရာဦးစီးမှူးရုံးမှတစ်ဆင့် ဦးစီးဌာနသို့တင်ပြရာ၌ ပါဝင်ရမည့်အချက်များ၊ စီးပွားရေးလုပ်ငန်းရှင်တို့အနေဖြင့် အသိပေးကြေညာခြင်းပြုလုပ်ရာတွင် ထည့်သွင်းဖော်ပြရမည့်အချက်အလက်တို့ကို အသေးစိတ်ရှင်းလင်းဆွေးနွေးခဲ့ကြောင်းသိရှိရပါသည်။
DOCA(မကွေး)