စစ်ကိုင်းခရိုင်ဆီကုန်သည်နှင့်ဆီလုပ်ငန်းရှင်များအသင်းဖွဲ့စည်းခြင်းကို ၂၀၂၃ခုနှစ်၊ အောက်တိုဘာလ ၅ရက်နေ့၊ နံနက် (၁၀:၀၀) နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးရုံး၌ ကျင်းပပြုလုပ်ခဲ့ရာ ဌာနဆိုင်ရာများ ၂၁ဦးနှင့် ဆီကုန်သည်နှင့်ဆီလုပ်ငန်းရှင် ၂၃ဦး၊ စုစုပေါင်း ၄၄ဦးတက်ရောက်ခဲ့ကြပါသည်။
အသင်းဖွဲ့စည်းခြင်းအခမ်းအနား၌ စစ်ကိုင်းခရိုင်၊ အထွေထွေအုပ်ချုပ်ရေးဦးစီးဌာန၊ ခရိုင်အုပ်ချုပ်ရေးမှူး ဦးခင်မောင်ဆင့်က အဖွင့်အမှာစကားပြောကြားပြီးနောက် စက်တင်ဘာလ ၁၆ရက်နေ့တွင် စစ်ကိုင်းမြို့၊ မြို့တော်ခန်းမ၌ကျင်းပပြုလုပ်ခဲ့သည့် စစ်ကိုင်းခရိုင်၊ အသေးစား၊ အငယ်စား၊ အလတ်စား စီးပွားရေးလုပ်ငန်းများထုတ်ကုန်ပြပွဲနှင့် ဈေးရောင်းပွဲတော်ဖွင့်ပွဲအခမ်းအနားတွင် ဆီလုပ်ငန်းရှင်တစ်ဦး၏ တင်ပြချက်အပေါ် စစ်ကိုင်းတိုင်းဒေသကြီးဝန်ကြီးချုပ်၏ လမ်းညွှန်ချက်အရ စစ်ကိုင်းခရိုင်ဆီကုန်သည်နှင့်ဆီလုပ်ငန်းရှင်များအသင်းကို အမြန်ဆုံးဖွဲ့စည်းရခြင်းဖြစ်ကြောင်း၊ ခရိုင်အသင်းဖွဲ့စည်းပြီးပါက စစ်ကိုင်းတိုင်းဒေသကြီးဆီကုန်သည်များနှင့်ဆီလုပ်ငန်းရှင်များအသင်း၊ မြန်မာနိုင်ငံဆီကုန်သည်များနှင့်ဆီလုပ်ငန်းရှင်များအသင်းတို့နှင့်ချိတ်ဆက်ပြီး စားအုန်းဆီဝယ်ယူရရှိရေး၊ ဖြန့်ခွဲရောင်းချရေးတို့ကို ညှိနှိုင်းတိုင်ပင်ဆောင်ရွက်ကြရန် ပြောကြားခဲ့ပါသည်။
ဆက်လက်၍ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်က အလုပ်အမှုဆောင်ရွေးချယ်ရန် နည်းလမ်းများကိုတင်ပြဆွေးနွေးပြီး တက်ရောက်လာသူများ၏ အများဆန္ဒအရ ရွေးချယ်တင်မြှောက်သူများကို ဥက္ကဋ္ဌ၊ ဒု-ဥက္ကဋ္ဌ၊ အတွင်းရေးမှူး၊ တွဲဖက်အတွင်းရေးမှူး၊ ဘဏ္ဍာရေးမှူး၊ တွဲဖက်ဘဏ္ဍာရေးမှူး၊ စာရင်းစစ်၊ တွဲဖက်စာရင်းစစ်နှင့် အဖွဲ့ဝင် ၃ဦး၊ စုစုပေါင်း ၁၁ဦးအား စစ်ကိုင်းခရိုင်ဆီကုန်သည်နှင့်ဆီလုပ်ငန်းရှင်များအသင်းအလုပ်အမှုဆောင်အဖြစ်ရွေးချယ်တင်မြှောက်၍ အတည်ပြုပြီး အခမ်းအနားပထမပိုင်းကိုရုပ်သိမ်းခဲ့ပါသည်။ ဒုတိယအပိုင်းအနေဖြင့် တက်ရောက်လာသည့် ဆီကုန်သည်နှင့်ဆီလုပ်ငန်းရှင်များအား စားသုံးသူကာကွယ်ရေးဥပဒေအကြောင်း သိကောင်းစရာများကို ဟောပြောဆွေးနွေးပြီး စားသုံးသူအသိပညာပေးလက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။
DOCA(စစ်ကိုင်း)