စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့် ဝန်ထမ်းများသည် (၁၅.၁၂.၂၀၂၁) ရက်နေ့၊ နေ့လည်(၁:၃၀)အချိန်တွင် ပေါက်မြို့နယ်၊ အောင်တော်မူရပ်ကွက်ရှိ "SOE" သောက်ရေ သန့်လုပ်ငန်းရှင်နှင့် တွေ့ဆုံခဲ့ပါသည်။ တွေ့ဆုံဆွေးနွေးရာတွင် စားသုံးသူကာကွယ်ရေးဥပဒေမှ အခန်း(၁၈)ပါ ကုန်အညွှန်းအမှတ်အသားများ ပြည့်စုံစွာပါဝင်နိုင်ရေးနှင့် အခန်း(၁၈)ပုဒ်မ ၄၁၊ ပုဒ်မခွဲ (ခ) နှင့်(ဆ)ပါအချက်များကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခုထက်ပို၍ တွဲလျက်ဖြစ်စေ ရေးသားဖော်ပြရန်လိုအပ်ကြောင်း၊ လုပ်ငန်းလိုင်စင်များ၊ FDA ၏ ထောက်ခံချက်များလည်း ပြည့်စုံစွာ ရှိထားရမည်ဖြစ်ကြောင်း၊ လုပ်ငန်းရှင်များမှ မိမိတို့၏ ကုန်အမှတ်တံဆိပ်များကို ပြည့်စုံစွာ ဖော်ပြပြီးလျှင် ပြည့်စုံမှန်ကန်မှု ရှိ၊ မရှိကို စိစစ်ရန်အတွက် စားသုံးသူရေးရာဦးစီးဌာနသို့ ကုန်အမှတ်တံဆိပ်စစ်ဆေးခွင့်ပြုချက်ရယူရန်လည်း လိုအပ်ကြောင်း အသေးစိတ် ရှင်းလင်းဆွေးနွေး အသိပညာပေးခဲ့ပါသည်။
ဆက်လက်၍ ခရိုင်ဦးစီးမှူးနှင့်အဖွဲ့သည် ပခုက္ကူမြို့နယ်၊ ညောင်ကျစ်ပင်ကျေးရွာရှိ ကုန် အမှတ်တံဆိပ်စစ်ဆေး ခွင့်ပြုချက်ရရှိပြီးသော "ရွှေမင်းစံ" သောက်ရေသန့်လုပ်ငန်းသို့ ဝင်ရောက် လေ့လာခဲ့ရာ သောက်ရေသန့်ထုတ်လုပ်မှုအပြင် တစ်လီတာသောက်ရေသန့်ဘူးခွံများ ထုတ်လုပ်နေမှုနှင့်ပတ်သက်၍ မေးမြန်းခဲ့ရာတွင် သောက်ရေသန့်ဘူးခွံများ ရရှိရန်အတွက် ကုန်ကြမ်းပစ္စည်းများကို ရန်ကုန်မြို့မှ ဝယ်ယူရကြောင်း၊ ကော်ကုန်ကြမ်းပစ္စည်းတစ်ခုလျှင် (၉၂)ကျပ် ပေးချေရပြီး တစ်အိတ်လျှင် အခုရေ(၁၀၀၀)ပါရှိကြောင်း၊ တစ်လီတာ ရေသန့်ဘူးခွံများ ရရှိရန် ဘူးခွံထုတ်စက်ဖြင့် ထုတ်လုပ်ရာ တစ်နေ့လျှင်(၁၂)အိတ်ခန့် ပြီးစီးပြီး ကုန်ချော တစ်လီတာရေသန့်ဘူးခွံများကို တစ်နေ့လျှင် ဘူးအရေအတွက် (၁၀၀၀၀)ခန့်ရရှိကြောင်း၊ ဈေးကွက်အနေဖြင့် ဘူးခွံတစ်ဘူးလျှင် (၁၀၂) ကျပ် ဖြင့်ရောင်းရပြီး မှာယူလိုပါကလည်း ပြုလုပ်ဆောင်ရွက်ပေးလျက်ရှိကြောင်း၊ အလုပ်သမား(၂)ဦး ရှိပြီး တစ်နေ့လျှင် လုပ်အားခ(၅၀၀၀)ကျပ်ပေးရကြောင်း၊ နေ့စဉ်ပုံမှန်မရောင်းရသော်လည်း တစ်လ အတွင်းတွင် ဘူးအရေအတွက်(၁)သိန်းခန့် ရောင်းချရပြီး ပခုက္ကူ၊ ကမ္မ၊ ပေါက်မြို့နယ်များသို့ ရောင်းချ ရကြောင်းသိရှိရပါသည်။
စားသုံးသူရေးရာဦးစီးဌာန(မကွေးတိုင်းဒေသကြီး)